ಪ್ರಾಥಮಿಕ ಶಾಲೆಯಲ್ಲಿ ಶ್ರೀನಿವಾಸ ರಾವ್ ಎಂಬ ಶಿಕ್ಷಕರು ಇದ್ದರು .ಕಿರಿಂಚಿ ಮೂಲೆ ರಸ್ತೆ ಬದಿಯಲ್ಲಿ ಇವರ ಮನೆ .ನಮ್ಮ ಮನೆಯಿಂದ ಹೋಗುವ ದಾರಿಗೆ ತಾಗಿ ಕನ್ಯಾನ ರಸ್ತೆ ಪಕ್ಕ ಇವರ ತೋಟ ಮತ್ತು ಮನೆ ಇದೆ . ಇವರು ನನಗೆ ತಿಳಿದಂತೆ ತರಬೇತಿ ಹೊಂದಿದ ಶಿಕ್ಷಕರು ಆಗಿರಲಿಲ್ಲ .ಆದರೆ ಆದರ್ಶ ಶಿಕ್ಷಕರಲ್ಲಿ ಇರಬೇಕಾದ ಗುಣ ಮತ್ತು ಜ್ಞಾನ ಇತ್ತು . ನಾಲ್ಕನೇ ತರಗತಿಗೆ ನಮಗೆ ಕ್ಲಾಸ್ ತೆಗೆದು ಕೊಳ್ಳುತ್ತಿದ್ದ ನೆನಪು . ಗಟ್ಟಿಯಾದ ಸ್ವರ . ಶಿಸ್ತಿನ ವ್ಯಕ್ತಿ . ತಪ್ಪಿದರೆ ಕೈಗೆ ಏಟು ತಪ್ಪಿದ್ದಲ್ಲ . ತಮ್ಮ ಮಕ್ಕಳಿಗೂ .
ಇವರದು ಪ್ರಶ್ನೋತ್ತರ ಪಿರಿಯಡ್ ಎಂದು ಇತ್ತು .ಆಗ ಉತ್ತರ ಹೇಳಿದವರು ಮೇಲೆ ಮತ್ತು ತಪ್ಪಿದವರು ಕೆಳಗೆ ಹೋಗಬೇಕಿತ್ತು . ಸೀಟಿಂಗ್ ಅರೆಂಜ್ ಮೆಂಟ್ ನಲ್ಲಿ ಮೊದಲ ರಾಂಕ್ ಮತ್ತು ಕಡೆಯ ರಾಂಕ್ ಗೆ ನಿರ್ದಿಷ್ಟ ಜಾಗ ಇದ್ದು ಉಳಿದವರು ನಡುವೆ .ಒಂದು ದಿನ ಗೈರು ಹಾಜರು ಆದರೆ ಕೊನೆಯ ಸೀಟ್ ;ಮತ್ತೆ ಪರಿಶ್ರಮದಿಂದ ಮೇಲೆ ಬರಬೇಕು .
ಅವರ ಅಕ್ಷರ ಬಹಳ ಮುದ್ದು ,ವಾಕ್ಯಗಳು ಸ್ಪಷ್ಟ . ಸಂಜೆ ಹೊತ್ತು ನಮ್ಮನ್ನೆಲ್ಲಾ ಮರದ ಕೆಳಗೆ ಕೂರಿಸಿ ಚಂದಮಾಮ ಮತ್ತು ಇತರ ಪುಸ್ತಕಗಳಿಂದ ಕತೆ ಓದಿ ಹೇಳುವರು .
ಇವರ ತಲೆ ಬೋಳು ,ಇವರ ಮಕ್ಕಳಿಗೂ ಇದು ಬಂದಿದೆ .ಶ್ರಮ ಜೀವಿ ,ಅವರ ಮನೆಗೆ ಹೋದರೆ ಏನಾದರೂ ಕೃಷಿ ಸಂಬಂಧ ಕೆಲಸ ಮಾಡುತ್ತಲಿರುವರು . ಹಾಳು ಹರಟೆ ಇವರಿಗೆ ದೂರ . ಶಾಲೆ ಬಿಟ್ಟ ಮೇಲೆ ಅಂಗಡಿಯೊಂದರಲ್ಲಿ ಲೆಕ್ಕ ಬರೆಯುವ ಕೆಲಸವೂ ಮಾಡುತ್ತಿದ್ದ ನೆನಪು .
ನಮ್ಮ ಮನೆಗೆ ಕಾನಿಷುಮಾರಿ ಗೆ ಇತ್ಯಾದಿಗಳಿಗೆ ವರ್ಷ ವರ್ಷ ಬರುತ್ತಿದ್ದರು . ನಮ್ಮ ಮನೆಯಲ್ಲಿ ಎಲ್ಲರೂ ಗೌರವದಿಂದ ಕಾಣುತ್ತಿದ್ದರು .. ಒಂದು ಕಾಲಕ್ಕೆ ನಾವು ಎಲ್ಲಾ ಕಡೆಗಳಿಂದ ಪ್ರಹಾರ ಮತ್ತು ಕಷ್ಟ ನಷ್ಟ ಅನುಭವಿಸುತ್ತಿದ್ದಾಗ ನಮ್ಮ ಮನೆಗೆ ಬಂದು ಧೈರ್ಯ ಹೇಳಿದ್ದರು .
ಇವರ ಪುತ್ರ ಸುರೇಶ ರಾವ್ ನನ್ನ ಒಂದು ವರ್ಷ ಸೀನಿಯರ್ ಮತ್ತು ಬಾಲಕೃಷ್ಣ ಒಂದು ವರ್ಷ ಕೆಳಗೆ ಇದ್ದು ಮಿತ್ರರು . ಸುರೇಶ ಕೋಲ್ ಇಂಡಿಯಾ ದಲ್ಲಿ ಜನರಲ್ ಮ್ಯಾನೇಜರ್ ಮತ್ತು ಬಾಲಕೃಷ್ಣ ಬೆಟ್ಟಂಪಾಡಿ ಜೂನಿಯರ್ ಕಾಲೇಜು ಪ್ರಿನ್ಸಿಪಾಲ್ ಆಗಿ ನಿವೃತ್ತರಾದರು .ಅವರ ಮಗಳಂದಿರು ನನ್ನ ಸಹೋದರಿಯರ ಸ್ನೇಹಿತೆಯರು .
ಅವರ ಎರಡನೇ ಮಗ ಶ್ರೀಪತಿ ರಾವ್ ಹೈ ಸ್ಕೂಲ್ ನಲ್ಲಿ ನಮಗೆ ವಿಜ್ಞಾನ ಅಧ್ಯಾಪಕರು . ಉತ್ಸಾಹಿಗಳು . ತರಗತಿ ಆರಂಭವಾಗುವುದಕ್ಕೆ ಮೊದಲೇ ಬಂದು ಬೋರ್ಡಿನಲ್ಲಿ ಚೆನ್ನಾಗಿ ಬಣ್ಣ ಬಣ್ಣದ ಚಿತ್ರ ಬಿಡಿಸುವರು . ಪ್ರಯೋಗಾಲಯ ವನ್ನು ತೆರೆದು ಬಳಸಲು ಆರಂಭಿಸಿದ್ದು ಅವರು ಬಂದ ಮೇಲೆಯೇ .ಸಾಧ್ಯವಾದ ಪ್ರಯೋಗ ಎಲ್ಲಾ ಮಾಡಿ ತೋರಿಸುವರು . ನಮ್ಮ ಶಾಲೆಯಲ್ಲಿ ಒಂದು ವಿಜ್ಞಾನ ಸಂಘ ಆರಂಭಿಸಿ ಕೆ ಅರ ಈ ಸಿ ಯಲ್ಲಿ ಪ್ರೊಫೆಸರ್ ಆಗಿದ್ದ ಪಾ ದೇವ ರಾವ್ ಅವರಿಂದ ಉದ್ಘಾಟಿಸಿದರು . ಅವರು ಶಾಲೆಗೆ ಬೈಸಿಕಲ್ ನಲ್ಲಿ ಬರುತ್ತಿದ್ದು ಕೆಲವೊಮ್ಮೆ ನಮ್ಮನ್ನು ಡಬಲ್ ರೈಡ್ ಮಾಡಿ ಕರೆದು ಕೊಂಡು ಹೋದದ್ದು ಇದೆ . ಒಳ್ಳೆಯ ವಿಜ್ಞಾನ ಅಧ್ಯಾಪಕರು ಆಗಿದ್ದ ಅವರು ಮುಂದೆ ಆರ್ಟ್ಸ್ ವಿಷಯ ದಲ್ಲಿ ಎಂಎ ಮಾಡಿ ಜೂನಿಯರ್ ಕಾಲೇಜು ಲೆಕ್ಚರರ್ ಆಗಿ ಹೋದದ್ದು ವಿಜ್ಞಾನ ಶಿಕ್ಷಣಕ್ಕೆ ಆದ ನಷ್ಟ .ಅವರೂ ಮುಂದೆ ಜೂನಿಯರ್ ಕಾಲೇಜು ಒಂದರ ಪ್ರಿನ್ಸಿಪಾಲ ಆಗಿ ನಿವೃತ್ತರಾದರು .
ಈಗ ಪುತ್ತೂರಿನಲ್ಲಿ ನೆಲೆಸಿರುವ ಅವರೂ ಅಲ್ಪ ಸ್ವಲ್ಪ ಗುರು ಸೇವೆ ಮಾಡಲು ಅವಕಾಶ ಕೊಡುವರು . ಹೀಗೆ ತಂದೆ ಮಕ್ಕಳಿಬ್ಬರಿಗೂ ಶಿಷ್ಯನಾಗುವ ಯೋಗ ನನಗೆ ಇತ್ತು .
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ