ಶಂಕರ ವಿಠಲ್ ಬಸ್

                                     

                        

ಶಂಕರ ವಿಠ್ಠಲ ಬಸ್  

 

 

                                   

                  

                    ನಮ್ಮ ಊರಿನಲ್ಲಿ  ಸಂಚಾರಕ್ಕೆ ಹಿಂದೆ ಇದ್ದ ಬಸ್ ಗಳಲ್ಲಿ  ಶಂಕರ ವಿಠಲ್ ಕಂಪನಿಯ ದ್ದೇ  ಅಧಿಕ .ಕನ್ಯಾನ ಉಪ್ಪಳ ಮಾರ್ಗದಲ್ಲಿ ಅವು ಮಾತ್ರ ಇದ್ದು ಆನೆಕಲ್ಲು ಕಡೆಗೆ ಕೆ ಬಿ ಟಿ (ಕುಮಾರನ ಬಸ್ ) ಮತ್ತು ಸಿ ಪಿ ಸಿ ಬಸ್ (ರಾಂಪಣ್ಣನ ಬಸ್ )ಗಳು ಇದ್ದವು . ಸಿಲ್ವರ್ ಕಲರ್ ಅನಾಕರ್ಷಕ ,ಉದ್ದ ಕಡಿಮೆ (ತಿರುಗಾಸುಗಳು ಇದ್ದ ಕಾರಣ ಇರಬೇಕು ). 

ಮುಂಜಾನೆ ನಾಲ್ಕು ಗಂಟೆಗೆ ಮೊದಲ ಬಸ್ ಕನ್ಯಾನದಿಂದ ಹೊರಟು ಬಾಯಾರು ಪೈವಳಿಕೆ ಮಾರ್ಗದಿಂದ ಉಪ್ಪಳ ರೈಲು ನಿಲ್ದಾಣಕ್ಕೆ ಹೋಗಿ ,ಅಲ್ಲಿಂದ ಬಂದ್ಯೋಡು ಮಾರ್ಗವಾಗಿ ಪೆರ್ಮುದೆ ಗೆ ಹೋಗುವುದು . ಬೇಸಗೆಯಲ್ಲಿ ಧರ್ಮತಡ್ಕ ವರೆಗೆ ಮುಂದುವರಿಯುವುದು . ನಮ್ಮ ತಂದೆಯ ಅಜ್ಜನ ಮನೆ ಚೆಕ್ಕೆಮನೆ . ಅಲ್ಲಿಯ  ಕಾರ್ಯಕ್ರಮಗಳಿಗೆ ನಾವು ಎರಡೂವರೆ ಗಂಟೆಗೆಲ್ಲಾ ಎದ್ದು ಕನ್ಯಾನಕ್ಕೆ ನಡೆದು ಬಸ್ ಹಿಡಿಯುತ್ತಿದ್ದೆವು .ಅದು ತಪ್ಪಿದರೆ ಮುಂದಿನ ಬಸ್ಸಿನಲ್ಲಿ ಬಾಯಾರು ಪದವಿನಲ್ಲಿ ಇಳಿದು ಗುಂಪೆ ಗುಡ್ಡೆ ಮೂಲಕ ನಾಲ್ಕೈದು ಮೈಲು ನಡೆಯ ಬೇಕು .ಹಾಗೆ ಮಾಡಿದ್ದೂ ಇದೆ . ಈ ಬಸ್ಸಿನ ಡ್ರೈವರ್ ಗೋಪಾಲ ಣ್ಣ .ಆದುದರಿಂದ ಗೋಪಾಲನ ಬಸ್ .ಅವರ ಮನೆ ಕನ್ಯಾನ ದಲ್ಲಿ ಇದ್ದು ಮಕ್ಕಳು  ಶಾಲೆಗೆ  ಬರುತ್ತಿದ್ದರು . ಈ ಬಸ್ ಮರಳಿ ಕನ್ಯಾನ ಮೂಲಕ ವಿಟ್ಲಕ್ಕೆ ಹೋಗಿ ಹಿಂತಿರುಗಿ ಉಪ್ಪಳಕ್ಕೆ ಹೋಗಿ ಕನ್ಯಾನಕ್ಕೆ ಮರಳುವುದು .. 

             ಇನ್ನೊಂದು ಮಹಾಬಲ ಶೆಟ್ಟಿ ಬಸ್ .ಬೆಳಿಗ್ಗೆ ಉಪ್ಪಳದಿಂದ ಕನ್ಯಾನ ವಿಟ್ಲ ಮೂಲಕ ಪುತ್ತೂರಿಗೆ ಬಂದು ಅಲ್ಲಿಂದ ಮಂಗಳೂರಿಗೆ ಹೋಗವುದು . ಅಲ್ಲಿಂದ ರಿಟರ್ನ್ ಟ್ರಿಪ್ ಅದೇ ಮಾರ್ಗದಲ್ಲಿ . ಅದರಲ್ಲಿ ಹೊಳ್ಳರೆಂಬ ಕಂಡಕ್ಟರ್ ಇದ್ದರು .ಕಾಕಿ ಅಂಗಿ ಚಡ್ಡಿ ಹಾಕುವರು .ಅವರ ಭಾವ ರಾಮ ರಾವ್  ಪ್ರಾಥಮಿಕ ಶಾಲೆಯ ಅಧ್ಯಾಪಕರು . 

ಮುಂಜಾನೆ ಪುತ್ತೂರಿನಿಂದ ಆರು ಗಂಟಿಗೆ ಹೊರಟು ಉಪ್ಪಳಕ್ಕೆ ಹೋಗಿ ಮಧ್ಯಾಹ್ನ ಪುತ್ತೂರಿಗೆ ಮರಳುವ ಬಸ್ ಪೀರ್ ಸಾಹೇಬರದ್ದು . ಇದರಲ್ಲಿ ಪುತ್ತೂರು ಪೇಟೆಗೆ ಬೇಕಾದ ಮೀನು ಕೂಡಾ ಸರಬರಾಜು ಆಗುತ್ತಿತ್ತು .ಕೆದ್ಲಾಯ ಎಂಬ ಕಂಡಕ್ಟರ್ ಇದ್ದರು . ಪೀರ್ ಸಾಹೇಬರು ನಮಗೆ ಹೆಚ್ಚು ಪರಿಚಿತರು ..ಪುತ್ತೂರು ನಗರ ಸಮೀಪ ಅವರ ಮನೆ ಇತ್ತು . ಮಧ್ಯಾಹ್ನ ಅವರ ಬುತ್ತಿ ಅಲ್ಲಿಂದ ತಂದು ಕೊಡುವರು . ನಮ್ಮ ಅಣ್ಣ ಪುತ್ತೂರು ಪಾಪ್ಯುಲರ್ ನ್ಯೂಸ್ ಏಜೆನ್ಸಿ ಯಿಂದ ಟೈಮ್ಸ್ ಒಫ್ ಇಂಡಿಯಾ ಪೇಪರ್ ಇವರ ಮೂಲಕ ತರಿಸುತ್ತಿದ್ದು ನಾವು ಬಸ್ಸಿಗೆ ಕಾದು ತೆಗೆದು ಕೊಳ್ಳುವೆವು .ಇದೇ ರೀತಿ ಹಳ್ಳಿ ಯಲ್ಲಿ ಹಲವರು  ಔಷಧಿ ಇತ್ಯಾದಿ ತರಿಸಿಕೊಳ್ಳುವರು . ನಮ್ಮ ಮನೆಗೆ ಉಪ್ಪಳದಿಂದ ಎರಡು ಒಳ್ಳೆಯ ನಾಯಿ ಮರಿಗಳನ್ನು ಕೂಡಾ ತಂದು ಕೊಟ್ಟಿದ್ದರು . ನಾವು ಪುತ್ತೂರು ,ವಿಟ್ಲ  ಜಾತ್ರಗೆ ಬಂದರೆ ಇದೇ  ಬಸ್ ನಲ್ಲಿ ಮರಳುವುದು . 

  ಈ ಬಸ್ ಗಳ  ಟಿಕೆಟ್ ಚೆಕಿಂಗ್ ಇನ್ಸ್ಪೆಕ್ಟರ್ ವಾಸುದೇವ ಕಿಣಿಯವರ ಬಗ್ಗೆ ಹಿಂದೆ ಬರೆದಿದ್ದೆನು .. ಬಸ್ ಗಳು ಯಾವಾಗಲೂ ತುಂಬಿ ತುಳುಕುತ್ತಿದ್ದವು . ಹೇಗಾದರೂ ಹತ್ತಿ ಬಿಟ್ಟರೂ ದಾರಿ ಮಧ್ಯೆ ಇಳಿಯುವುದು ತುಂಬಾ ತ್ರಾಸದಾಯಕ ಆಗಿರುತ್ತಿತ್ತು . 

 ಪುತ್ತೂರಿನಿಂದ ಪಾಣಾಜೆಗೂ ಇದೇ ಕಂಪನಿಯ ಬಸ್ ಗಳು ಇದ್ದುವು .ಶಂಕರ ಭಟ್ ಮತ್ತು ವಿಠಲ್ ಭಟ್ ಎಂಬವರು ೧೯೨೯ ರಲ್ಲಿ ಆರಂಭಿಸಿದ ಈ  ಕಂಪನಿಯನ್ನು ಮೂರು ವರ್ಷಗಳ ನಂತರ ಆರೂರು ಕುಟುಂಬದವರು ಖರೀದಿಸಿ ನಡೆಸಿದರು . ಒಂದು ಕಾಲಕ್ಕೆ ಎಂಟು ನೂರಕ್ಕಿಂತಲೂ ಅಧಿಕ ಬಸ್ ಗಳನ್ನು ಕಂಪನಿ ಹೊಂದಿತ್ತು ಎಂದು ಅವರ ಬ್ಲಾಗ್ ಹೇಳುತ್ತದೆ .

ಪುತ್ತೂರಿನಿಂದ ಬೆಂಗಳೂರಿಗೆ ರಾತ್ರಿ  ಮೊದಲ ಸುಖಾಸೀನ ಬಸ್ ಕೂಡಾ ಇವರೇ ಆರಂಬಿಸಿದವರು . ಆಮೇಲೆ ಯಾಕೋ ಅದು ನಿಂತು ಹೋಯಿತು . ಮೊಳಹಳ್ಳಿ ಶಿವ ರಾವ್ ವೃತ್ತದ ಬಳಿ ಶಂಕರ ವಿಠಲ್ ಬಸ್ಸಿನ ಗ್ಯಾರೆಜ್ ಇತ್ತು .

     ನಮ್ಮೂರಿನ ಜೀವ ನಾಡಿಗಳಾಗಿದ್ದ ಬಿಳಿ ಬಸ್ ಗಳು ಇಲ್ಲಿ ಇಲ್ಲ.(ನಮ್ಮ ನೆನಪಿನಲ್ಲಿ ಹಸಿರಾಗಿವೆ ) .ಬದಲಿಗೆ ವರ್ಣ ರಂಜಿತ ಗಾಡಿಗಳು ಚಲಿಸುತ್ತಿವೆ .