ಮೆಚ್ಚಿನ ಶಿಕ್ಷಕ ಕಮ್ಮಜೆ ಸುಬ್ಬಣ್ಣ ಭಟ್
ಹೈ ಸ್ಕೂಲ್ ನಲ್ಲಿಯೂ ಅಧ್ಯಾಪಕರ ತೀವ್ರ ಕೊರತೆ ಇದ್ದು , ಹಿಂದಿ ಅಧ್ಯಾಪಕರು ಕನ್ನಡ ,ಕ್ರಾಫ್ಟ್ ಗುರುಗಳು ಸಮಾಜ , ಡ್ರಾಯಿಂಗ್ ಮಾಸ್ತರು ವಿಜ್ನಾನ ಹೀಗೆಲ್ಲಾ ತೆಗೆದುಕೊಳ್ಳುತ್ತಿದ್ದ ದಿನಗಳು . ಹಾಗಿರಲು ಒಂಬತ್ತನೇ ತರಗತಿ ಇಂಗ್ಲಿಷ್ ಕ್ಲಾಸ್ ಗೆ ಸುಬ್ಬಣ್ಣ ಭಟ್ಟರನ್ನು ಹಾಕಿದರು . ಭಾಷೆಯ ಮತ್ತು ಅಧ್ಯಯನವನ್ನು ಹೇಗೆ ಮಾಡ ಬೇಕು ಎಂಬುದನ್ನು ಮೊದಲಿಗೆ ತೋರಿಸಿಕೊಟ್ಟವರು . ಯಾವುದೇ ತರಗತಿಗೆ ಮೊದಲು ಅಧ್ಯಯನ ಮಾಡಿಕೊಂಡೇ ಬರುವರು ,ಮತ್ತು ಲೇಖಕರ ಇತರ ಕೃತಿಗಳ ಬಗ್ಗೆಯೂ ಹೇಳಿ ಓದಲು ಪ್ರಚೋದಿಸುವರು . ಅಲೆಕ್ಸಾಂಡರ್ ಪೋಪ್ ಪತ್ರಿಕೆಗಳಲ್ಲಿ ತನ್ನ ಕೃತಿಯನ್ನು ತಾನೇ ಬೇರೆ ಹೆಸರಿನಲ್ಲಿ ವಿಮರ್ಶಿಸಿಸುತ್ತಿದ್ದನು ಎಂದು ಹೇಳುತ್ತಿದ್ದ ನೆನಪು .ಹಳ್ಳಿ ಮಕ್ಕಳಾದ ನಮಗೆ ಸ್ಯಾಂಡ್ ವಿಚ್ ಎಂಬ ಶಬ್ದ ಬಂದಾಗ ಬೋರ್ಡ್ ನಲ್ಲಿ ಚಿತ್ರ ಬಿಡಿಸಿ ತೋರಿಸುವರು ,
ಒಂದು ಶಾಲಾ ವಾರ್ಷಿಕೋತ್ಸವಕ್ಕೆ ಕನ್ನಡ ನಾಟಕ ನಿರ್ದೇಶಿಸಿದ್ದು ನಾನೂ ಅದರಲ್ಲಿ ಪಾತ್ರ ವಹಿಸಿದ್ದೆನು ,ನನ್ನ ಪಾತ್ರಕ್ಕೆ ಪ್ಯಾಂಟ್ ಬೇಕಿದ್ದು ನಮ್ಮ ಮನೆಯಲ್ಲಿ ಇಲ್ಲದ ಕಾರಣ ಅವರ ಪ್ಯಾಂಟ್ ಕೊಟ್ಟಿದ್ದರು . ಇನ್ನೊಂದು ತರಗತಿಯ ಇಂಗ್ಲಿಷ್ ಉಪ ಪಠ್ಯ ಕೂಡಾ (ನಾವು ನೊಂಡಿಟೇ -non detail )ತೆಗದುಕೊಳ್ಳುತ್ತಿದ್ದು ಅವರ ತರಗತಿಗಳು ನಿಜಕ್ಕೂ ಕಲಿಕೆಯ ಹಬ್ಬ ಆಗಿದ್ದವು .ಪಠ್ಯ ಪುಸ್ತಕ ವನ್ನು ನಮ್ಮ ಎದುರಿಗೇ ಮೊದಲ ಬಾರಿಗೆ ಓದಿ ಯು ಅಂಡರ್ಸ್ಟ್ಯಾಂಡ್ ಯು ಅಂಡರ್ಸ್ಟ್ಯಾಂಡ್ ಎನ್ನುವ ವರ್ಗಕ್ಕೆ ಸೇರಿದವರಲ್ಲ .
ಸುಬ್ಬಣ್ಣ ಭಟ್ ಸ್ಪುರದ್ರೂಪಿಗಳು ,ಲಕ್ಷಣವಾದ ಮುಖ ,ಸಹಜ ಚೆಂದುಟಿ.ಒಮ್ಮೆ ನೋಡಿದರೆ ಮತ್ತೊಮ್ಮೆ ನೋಡ ಬೇಕು ಎನ್ನುವ ಆಕರ್ಷಣೆ ಇತ್ತು . ಆಗ ತರುಣರಾಗಿದ್ದು ಉತ್ಸಾಹಿಗಳು ಆಗಿದ್ದರು.
ಪಿ ಯು ಸಿ ವಿದ್ಯಾರ್ಥಿಗಳಿಗೂ ಅವರು ಅಚ್ಚು ಮೆಚ್ಚು . ಅವರ ನೋಟ್ಸ್ ನನ್ನ ಅಕ್ಕ ಓದುವಾಗ ನನಗೂ ಅರ್ಥ ಆಗುತ್ತಿತ್ತು .ಅದರ ಬಗ್ಗೆ ಹಿಂದೆಯೇ ಬರೆದಿರುವೆನು .
ಅವರ ಸೋದರಳಿಯ ಪರಮೇಶ್ವರ ಎಡೆಕ್ಕಾನ ಅಜ್ಜನ ಮನೆಯಿಂದ ಶಾಲೆಗೆ ಬರುತ್ತಿದ್ದು ನನ್ನ ಆಪ್ತ ಮಿತ್ರ ಆಗಿದ್ದನು .ಪುತ್ತೂರಿನಲ್ಲಿ ಎಡೆಕ್ಕಾನ ಎಂಟರ್ಪ್ರೈಸಸ್ ಎಂಬ ಯಶಸ್ವಿ ಉದ್ದಿಮೆ ನಡೆಸುತ್ತಿದ್ದವನು ಕೆಲ ವರ್ಷಗಳ ಹಿಂದೆ ತೀರಿಕೊಂಡನು .
ಈಗಲೂ ಸುಬ್ಬಣ್ಣ ಭಟ್ ಅರೋಗ್ಯ ಸಮಸ್ಯೆಗಳಿಗೆ ನನ್ನಲ್ಲಿ ಬರುವರು ,ಗುರುಗಳ ಋಣ ಪೂರ್ಣವಾಗಿ ಅಲ್ಲದಿದ್ದರೂ ಕಿಂಚಿತ್ ಸಂದಾಯ ಮಾಡುವ ಭಾಗ್ಯ ಎಂದು ತಿಳಿದು ಕೊಂಡಿದ್ದೇನೆ
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ