ನಿನ್ನೆ ಮುಂಜಾನೆ ಪುತ್ತೂರಿನ ವಿವಿದೋದ್ಧೇಶ ತರಬೇತಿ ಸಂಸ್ಥೆ  ಐ ಅರ ಸಿ ಎಂ ಡಿ  ಯ ಆಶ್ರಯದಲ್ಲಿ ಅಬಾಕಸ್ ಸ್ಪರ್ಧೆಯಲ್ಲಿ ಬಾ ಜಯಶಾಲಿಯಾದ ಮಕ್ಕಳಿಗೆ ಬಹುಮಾನ ವಿತರಣಾ ಕಾರ್ಯಕ್ರಮ . ಈ ಸಂಸ್ಥೆಯನ್ನು ನಡೆಸುವವರು ಉತ್ಸಾಹಿ ಯುವ ದಂಪತಿಗಳಾದ ಪ್ರಫುಲ್ಲ ಮತ್ತು ಗಣೇಶ್ . ಹೆಚ್ಚಾಗಿ ನನಗೆ ಸಂಬಂಧ ಪಡದ ಸಭೆಗಳಲ್ಲಿ ಭಾಗವಹಿಸಲು ಹಿಂದೇಟು ಹಾಕುತ್ತೇನೆ . ಆದರೆ ಈ ದಂಪತಿಗಳು ದಶಕದಿಂದ ನನ್ನ ಆತ್ಮೀಯ ವಲಯದಲ್ಲಿ ಇರುವ ಕಾರಣ ಕೇಳಿದ ಒಡನೇ ಒಪ್ಪಿಕೊಂಡೆ . 

ನಮಗೆ ಅಬಾಕಸ್ ನಂತಹ ಬೌದ್ಧಿಕ ಮೌಲ್ಯ ವರ್ಧನೋಪಾಯ ಶಿಕ್ಷಣ ಇರಲಿಲ್ಲ .ತಾಯಿ ಯವರ ಮಾರ್ಗದರ್ಶನ ದಲ್ಲಿ  ಇಪ್ಪತ್ತು ಇಪ್ಪಾತ್ಲಿ   (೨೦X ೨೦)ವರೆಗೆ ಮೇಲಿಂದ ಕೆಳಗೆ ಮತ್ತು ಕೆಳಗಿಂದ ಮೇಲಿನ ವರೆಗೆ ಬಾಯಿಪಾಠ ಆಗಿದ್ದು ,ಈಗ ಕೂಡಾ ಕ್ಯಾಲ್ಕುಲೇಟರ್ ಇಲ್ಲದೇ ಸಣ್ಣ ಪುಟ್ಟ ಕೂಡು ಕಳೆ ಗುಣಿಸು ಮಾಡಬಲ್ಲೆ . ಕ್ಯಾಲ್ಕುಲೇಟರ್ ಈಗ ಸುದ್ದಿ ಮಾಡುತ್ತಿರುವ ಕೃತಕ ಬುದ್ಧಿಮತ್ತೆಯ  ಪ್ರಾಚೀನ ರೂಪ . ಕೃತಕ ಬುದ್ದಿಮತ್ತೆ  ಯ  ಮೇಲೆ ಪೂರ್ಣ ಅವಲಂಬಿಸಿದರೆ ನೈಸರ್ಗಿಕ ಬುದ್ದಿ ಕುಂಠಿತ ವಾಗ ಬಹುದು . 

ನಿನ್ನೆಯ ಸಭೆಯಲ್ಲಿ ಮದ್ರಾಸ್ ಐ ಐ ಟಿ ಯ ಶ್ರೀ ಸಾಯಿ ಗಣೇಶ್ ಮತ್ತು ಬೆಂಗಳೂರು ಜಿ ಕೆ ವಿ ಕೆ ಯ ಡಾ ಅಶೋಕ್ ಕುಮಾರ್ ಅವರ ಪರಿಚಯ ಆಯಿತು . ಈ ಯುವ ಪ್ರತಿಭಾವಂತರು ಪುಟ್ಟ ಮಕ್ಕಳಿಗೆ ಸ್ವಯಂ ಆಸಕ್ತಿಯಿಂದ  ಗಣಿತ ದಂತಹ ವಿಷಯ ಹೇಳಿಕೊಡುತ್ತದ್ದರು ಎಂದು ತಿಳಿಯಿತು .ಸಣ್ಣ ಮಕ್ಕಳಿಗೆ ಕಳಿಸುವುದು ಕಷ್ಟ ಮತ್ತು ತಾಳ್ಮೆ ಬೇಕು . ತಮ್ಮ ಆತ್ಮ ತೃಪ್ತಿಗಾಗಿ  ವಿದ್ಯರ್ಥಿಗಳನ್ನು ಹುಡುಕಿ ಕಲಿಸುವುದು ಮೆಚ್ಚ ಬೇಕಾದದ್ದು . 

 

ನನ್ನ ತಂಗಿ ಪದ್ಮಾವತಿ ಪುತ್ತೂರು ಪಾಂಗಾಳಾಯಿ ಯಲ್ಲಿ  ಹೊಸ ಮನೆ ನಿರ್ಮಿಸಿದ್ದು ತಿಂಗಳ ಹಿಂದೆ ಸರಳವಾಗಿ ಗೃಹ ಪ್ರವೇಶ ಮಾಡಿದ್ದರು . ಅಣ್ಣನಾದ ನನಗೂ ಆಹ್ವಾನವಿರಲಿಲ್ಲ ;ಅಂತ ನನಗೇನೂ ಬೇಸರವಿಲ್ಲ . ಒಂದನೆಯದಾಗಿ ಇದು ಎರಡನೇ ಮನೆ ಒಕ್ಕಲು .ಎರಡನೆಯದು ಗೃಹ ಪ್ರವೇಶದ  ಪ್ರಯುಕ್ತ ಕುಶಲ ಸಂಘದ ವಿಶೇಷ ಅಧಿವೇಶನ ,ಉಪಹಾರ ಸಹಿತ . ಪುತ್ತೂರಿನಲ್ಲಿ ನಗೆ ಪ್ರಿಯರ ಕೂಟ ಇದ್ದು ಅದರ ಪ್ರಧಾನ ಕಚೇರಿ  ,ಸರ್ವ ಜನಹಿತ ಸಂಘಟನೆಗಳಿಗೂ ಆಶ್ರಯ ತಾಣ ವಾದ  ಅನುರಾಗ ವಠಾರ (ಪುರಂಧರ ಭಟ್ ಮಾಳಿಗೆ  ಮನೆ ).ರಾಜೇಶ್ ಪ್ರೆಸ್  ರಘುನಾಥ ರಾಯರು ,ಸುಧಾಮ ಕೆದಿಲಾಯ ,ತುಳಸೀದಾಸ್ ,ಸುಬ್ರಹ್ಮಣ್ಯ ಶರ್ಮ ,ಶಂಕರಿ ಶರ್ಮ,ದತ್ತಾತ್ರೇಯ ರಾವ್  .ಅರ್ತಿಕಜೆ ದಂಪತಿಗಳು ,ರಮೇಶ ಬಾಬು ಇತ್ಯಾದಿ ಹಿರಿಯರು ಇದರಲ್ಲಿ ಇದ್ದಾರೆ . ನಕ್ಕು ಹಗುರಾಗುವ ವೇದಿಕೆ

ಈ ತಂಗಿ ಸಣ್ಣವಳಿರುವಾಗ ಜಡೆಗೆ ಸಿಕ್ಕಿಸುವ ಒಂದು ಐಟಂ ಬಂತು . ಎರಡು ಗೋಲಿಗಳನ್ನು ಒಂದು ಬ್ಯಾಂಡಿನಲ್ಲಿ ಕಟ್ಟಿ ಅದರ ನಡುವೆ ಜಡೆ . ಆಗೆಲ್ಲಾ ಶಾಲೆಗೆ ಹುಡುಗಿಯರು ಎರಡು ಜಡೆ ಹಾಕಿಕೊಂಡು ಹೋಗುವುದು . ಈ ವಸ್ತುವಿಗೆ ಲವ್ ಇನ್ ಟೋಕಿಯೋ ಎಂದು ಕರೆಯುತ್ತಿದ್ದರು . ಆ ಹೆಸರಿನ  ಸಿನಿಮಾ ನಾಯಕಿ ಅದನ್ನು ಹಾಕಿಕೊಂಡಿದ್ದ ಕಾರಣ ಇರಬೇಕು .ನನ್ನ ಅಕ್ಕ ತಂಗಿಯರ ಬಾಯಲ್ಲಿ ಅದು ಲವಿನ್ ಟಕಿ ಅದು ಹೃಸ್ವ ವಾಯಿತು . ಒಮ್ಮೆ ತಂದೆಯವರು ವಿಟ್ಲ ಪೇಟೆಗೆ ಹೋಗುವಾಗ ತಮಗೂ ಅದನ್ನು ತಂದು ಕೊಡುವಂತೆ ದುಂಬಾಲು ಬಿದ್ದರು . ತಂದೆಯವರು  ವಿಟ್ಲ ಪುತ್ತು  ಆಚಾರ್ರ ಫ್ಯಾನ್ಸಿ ಸ್ಟೋರಿಗೆ ತಲುಪುವಾಗ ಅದರ ಹೆಸರು ಟಂಗ್  ಟಕಿ ಎಂದು ಆಯಿತು .ಆದರೂ ಬೇಕಾದ ವಸ್ತು ತೊಂದರೆಯಿಲ್ಲದೇ ಬಂತು . 

ನಮ್ಮ ತಾಯಿ ತುಂಬಾ ಕಟ್ಟು ನಿಟ್ಟು . ಜೋಕ್ ಮಾಡಿಕೊಂಡು ಜೋರಾಗಿ ನಗುತ್ತಿದ್ದರೆ ,ಕಣ್ಣು ಅರಳಿಸಿ "ಎಂತ ಹೆದರಿಕೆ ಇಲ್ಲದ ನಗೆ "ಎಂದು ಗದರಿಸುವರು .ನನ್ನ ಮೇಲಂತೂ ಅವರಿಗೆ ಯಾವಾಗಲೂ ಅಪ ಧೈರ್ಯ .ಎಲ್ಲಿಗೆ ಹೋಗುವಾಗಲೂ ಬೆಗುಡು ಬೆಗುಡು ಮಾತನಾಡ (ಅಂದರೆ ಅತಿ ಹಾಸ್ಯ ಬೇಡ )..ಅವರು ಮನಸು ತೆರೆದು ನಕ್ಕದ್ದು ನಾನು ಕಂಡಂತೆ  ಬೆಂಗಳೂರಿಗೆ ವಾಲ್ವೊ ಬಸ್ ನ  ವಿಡಿಯೋ ದಲ್ಲಿ ಕಾಮನ ಬಿಲ್ಲು ಸಿನಿಮಾ ದಲ್ಲಿ ರಾಜಕುಮಾರ್ ಅಳುತ್ತಿರುವ ಮಗುವಿಗೆ ಸೀರೆ ಉಟ್ಟು ಬಾಟ್ಲಿ ಹಾಲು ಕುಡಿಸುವ ದೃಶ್ಯ ನೋಡಿ . ಹಾಗೆ ನಮ್ಮ ಹಾಸ್ಯ ಪ್ರಜ್ಞೆ ಸುಪ್ತಾವಸ್ಥೆ ಯಲ್ಲಿ ಇದ್ದು ಈಗ ಪ್ರದರ್ಶನ ಗೊಳ್ಳುತ್ತಿವೆ . ತಾಯಿಗೆ ನಾವು ಹತ್ತು ಮಕ್ಕಳು ,ನಮ್ಮನ್ನೆಲ್ಲಾ  ಒಂದು ದಾರಿಗೆ ತರಬೇಕಾದರೆ ಅವರು ಪಟ್ಟ ಪಾಡು ಊಹಿಸಿ ಕೊಳ್ಳಿ ..ಗಂಡು ಹುಡುಗರಿಗೆ ಬೆತ್ತದ ರುಚಿ ತೋರಿಸುತ್ತಿದ್ದರೂ ಹುಡುಗಿಯರು ಮದುವೆಯಾಗಿ ಹೋಗುವವವರು ಎಂದು ವಿನಾಯತಿ ಇತ್ತು

  ಪಾಸ್ ಫೈಲ್ 

ನಾವು ಪ್ರಾಥಮಿಕ ವಿದ್ಯಾಭ್ಯಾಸ ಮಾಡುವ ಸಮಯ; ದೊಡ್ಡ ರಜೆ ಕಳೆದು ತರಗತಿ ಆರಂಭವಾಗುವ ದಿನ ಈಗಿನಂತೆ ವಿದ್ಯಾರ್ಥಿಗಳನ್ನು  ಸ್ವಾಗತಿಸುವ ಪರಿಪಾಡಿ ಇರಲಿಲ್ಲ . ಕ್ಲಾಸ್ ಅಧ್ಯಾಪಕರು ಹಾಜರಿ ಪಟ್ಟಿಯಿಂದ ಹೆಸರು ಕೂಗಿ ಕರೆಯುವರು .ಅವರೆಲ್ಲಾ ಪಾಸ್ .ತಮ್ಮ ಸ್ಲೇಟು ಕಡ್ಡಿ ಸರಂಜಾಮು ಹೊತ್ತುಕೊಂಡು ಮೇಲಿನ ಕ್ಲಾಸ್ ಇರುವ ಕೊಠಡಿಗೆ ಹೋಗಬೇಕು . ಹೆಸರು ಕರೆಯದೇ ಇದ್ದವರು  ಫೈಲು . ಯಾರೆಲ್ಲ ಫೈಲು ಕೊನೆಗೇ ತಿಳಿಯುವುದು .ನಮ್ಮ ಮಿತ್ರರು ಪಾಸ್ ಆಗದಿದ್ದರೆ ಅವರ ಜತೆ ತಪ್ಪುವುದು ಎಂಬ ಬೇಸರ . ಆ ದಿನ ಕ್ಲಾಸ್ ಇಲ್ಲ . ಮರಳುವ ದಾರಿಯಲ್ಲಿ ಹೊಲಗದ್ದೆಯಲ್ಲಿ ಕೆಲಸ ಮಾಡುವವರು ಎಲ್ಯಣ್ಣೇರ್ ಪಾಸಾ ಎಂದು ಕೇಳುವರು . ಪಾಸಾಗಲಿ ಫೈಲು ಅಗಲೀ ಈಗಿನ ಹಾಗೆ ಹೊಗಳಿ ಏರಿಸುವ ಅಥವಾ ಹೀಗೆಳೆಯುವ ಪದ್ಧತಿ ಇರಲಿಲ್ಲ . ಫಲಿತಾಂಶ ದಿಂದ ಹತಾಶೆ ಗೊಂಡು ಆತ್ಮ ಹತ್ಯೆ ಮಾಡುವ ವಿದ್ಯಾರ್ಥಿಗಳ ಸಂಖ್ಯೆ ಬಹಳ ಕಡಿಮೆ ಇತ್ತು .ಈಗಿನ ಸರಕಾರಿ ಶಾಲೆಗಳಂತೆ ಕಡ್ಡಾಯ  ಹೋಲ್ ಸೇಲ್ ಪಾಸ್ ಮಾಡುವ ಪದ್ಧತಿ ಇರಲಿಲ್ಲ . 

ಪಾಸ್ ಆದರೆ ಮೇಲ್ತರಗತಿಯಲ್ಲಿ ಇರುವ ನಮ್ಮ ಮಿತ್ರರ ಬಳಿ ಅವರ ಉಪಯೋಗಿಸಿದ ಟೆಕ್ಸ್ಟ್ ಬುಕ್ ಅರ್ಧ ಬೆಲೆಗೆ ಖರೀದಿಸುತ್ತಿದ್ದೆವು . ನಮ್ಮ ದುರಾದೃಷ್ಟಕ್ಕೆ ಕೆಲವೊಮ್ಮೆ ಪಠ್ಯ ಪುಸ್ತಕ ಬದಲಾಗುತ್ತಿದ್ದವು . ನಾನು ನನ್ನ ಸೀನಿಯರ್  ಮುದ್ಕುಂಜ ದಿವಾಕರ ಪ್ರಭುಗಳ ಬಳಿ  ಪುಸ್ತಕ ಕೊಳ್ಳುತ್ತಿದ್ದೆ .ಅವರು ಪಠ್ಯ ಪುಸ್ತಕಗಳನ್ನು ಚೆನ್ನಾಗಿ ಇಟ್ಟು ಕೊಳ್ಳುತ್ತಿದ್ದರು

ಹೈ ಸ್ಕೂಲ್ ನಲ್ಲಿ ಕೂಡಾ ಇದೇ ರೀತಿ ಇತ್ತು . ಎಸ ಎಸ ಎಲ್ ಸಿ ಪರೀಕ್ಷೆ ಫಲಿತಾಂಶ ನವಭಾರತ ದಿನ ಪತ್ರಿಕೆಯಲ್ಲಿ ಮೊದಲು ಪ್ರಕಟವಾಗುತ್ತಿತ್ತು .ಶಾಲೆಗೆ ಆಮೇಲೆ ಬರುತ್ತಿತ್ತು ಎಂದು ನೆನಪು . ಪೇಪರ್ ನಲ್ಲಿ ಮೊದಲು ಫಸ್ಟ್ ಕ್ಲಾಸ್ ನ ಅಡಿಯಲ್ಲಿ ,ಆಮೇಲೆ ಸೆಕೆಂಡ್ ಮತ್ತು ಥರ್ಡ್ ಕ್ಲಾಸ್ ಕೆಳಗೆ ನಮ್ಮ ನಂಬರ್ ಇದೆಯೇ ಎಂದು ಹುಡುಕುತ್ತಿದ್ದೆವು .

ಯಾನ್ಲಾ ಈರ್ಲಾ ಸುಬ್ರಹ್ಮಣ್ಯದಾ ಜೋಡಿ 

ಇಂದು ಕುಕ್ಕೆ ಷಷ್ಟಿ . ಷಷ್ಟಿ ಸಮಯ ಸುಬ್ರಹ್ಮಣ್ಯದ ಬಳಿ ಕುಳ್ಕುಂದ ದಲ್ಲಿ ಜಾನುವಾರು ಸಂತೆ ನಡೆಯುತ್ತಿತ್ತು . ಘಟ್ಟದ ಮೇಲಿನಿಂದ ದನ ,ಎತ್ತು ,ಎಮ್ಮೆ ಮತ್ತು ಕೋಣಗಳನ್ನು ತಂದು ಪ್ರದರ್ಶನ ಮತ್ತು ಮಾರಾಟ ನಡೆಸುತ್ತಿದ್ದು ನಮ್ಮ ಜಿಲ್ಲೆಯ ರೈತರು ತಮಗೆ ಬೇಕಾದ ರಾಸುಗಳನ್ನು ಖರೀದಿಸಿ ಒಯ್ಯುತ್ತಿದ್ದರು . ಜಾತ್ರೆಗಾಗಿ ಪಶುಗಳನ್ನು ಪೋಷಿಸಿ ದಷ್ಟ ಪುಷ್ಟ ರನ್ನಾಗಿಸುತ್ತಿದ್ದಲ್ಲದೆ , ಕೊಂಬು ಕಿವಿ,ಮೂಗಿಗೆ ಅಲಂಕಾರ ಮಾಡಿರುತ್ತಿದ್ದರು. ಕೋಣಗಳ ಮೈಯ್ಯಿಂದ ಕೂದಲು ತೆಗೆದು ಎಣ್ಣೆ ಹಚ್ಚಿ ಫಳ ಫಳ ಹೊಳೆಯುವಂತೆ ಮಾಡುತ್ತಿದ್ದರು.  ಬ್ಯೂಟಿ ಪಾರ್ಲರ್ ನಿಂದ ಹೊರ ಬಂದ ಪಶುಯಗಳಂತೆ .ಉಳುಮೆಗಾಗಿ ಎತ್ತು ಮತ್ತು ಕೋಣಗಳ ಜೋಡಿಯನ್ನು ಅವರೇ ಮಾಡಿ ತರುತ್ತಿದ್ದು ಆಯ್ಕೆ ಸುಲಭ . ಸುಬ್ರಹ್ಮಣ್ಯದ ಜೋಡಿ ಬಹಳ ಪ್ರಸಿದ್ದ .ಅದಕ್ಕೇ ಒಂದು ತುಳು ಚಲ ಚಿತ್ರದಲ್ಲಿ ಯಾನುಲಾ ಈರ್ಲಾ ಸುಬ್ರಹ್ಮಣ್ಯದಾ ಜೋಡಿ ಎಂಬ ಪ್ರೇಮ ಗೀತೆ ಇದೆ . 

         ಕುಳ್ಕುಂದ ಜಾತ್ರೆಗೆ ನಾನು ಬಾಲ್ಯದಲ್ಲಿ ತಂದೆಯವರ ಜೊತೆಗೆ ಹೋದ ನೆನಪು ಇದೆ . ಅಲ್ಲಿ ಗೋಣಿ ಚೀಲ ಹಾಸಿ ಕೊಂಡು , ಚಳಿಗೆ (ಷಷ್ಟಿ ಸಮಯ ಭಾರೀ ಚಳಿ ಇರುತ್ತಿತ್ತು )ಕಂಬಳಿ ಹೊದ್ದು ಚಹಾ ಹೀರುತ್ತಿರುವ ಘಟ್ಟದ ಮೇಲಿನ ಕನ್ನಡ ಮಾತನಾಡುವ ವ್ಯಾಪಾರಿಗಳು .ಅವರೊಡನೆ  ಚೌಕಾಸಿ ಮಾಡುತ್ತಿರುವ ಗಿರಾಕಿಗಳು .ಹಿಂದೆ ಖರೀದಿಸಿದ ಜಾನುವಾರುಗಳನ್ನು ರಸ್ತೆ ಗುಂಟ ನಡೆಸಿ ಕೊಂಡೇ ಮನೆಗೆ ಬರುತ್ತಿದ್ದು ,ಕಾಲಾಂತರ ದಲ್ಲಿ ಟೆಂಪೋ ಗಳು ಬಳಕೆಗೆ ಬಂದವು

ಜಾನುವಾರು ಗಳಲ್ಲದೆ , ವಿವಿಧ ವಿನ್ಯಾಸದ ಕಂಬಳಿಗಳು , ಪಶು ಅಲಂಕಾರ ಸಾಧನಗಳು ಕೂಡಾ ಜಾತ್ರೆಯಲ್ಲಿ ಸಿಗುತ್ತಿದ್ದವು .

ನಿನ್ನೆ ಫೇಸ್ ಬುಕ್ ನಲ್ಲಿ ಸಹೋದರಿ ಒಬ್ಬರು ಜಯಂತ ಕಾಯ್ಕಿಣಿ ಯವರನ್ನು ಉಲ್ಲೇಖಿಸಿ ,"ಹೇಳಿ ಮಾಡಿಸಿದ ಜೋಡಿ ಎಂದರೆ ಚಪ್ಪಲಿ ಮಾತ್ರ ,ಬೇರೆಲ್ಲಾ ಹೋದಣಿಕೆ ಮಾತ್ರ " ಎಂಬ ಮಾತನ್ನು ಷೇರ್ ಮಾಡಿದ್ದು  ಸತ್ಯ ಎನಿಸಿತು .

ಕಣ್ಣೀರ ಕತೆ

  

ಈರುಳ್ಳಿ ಅಥವಾ ನೀರುಳ್ಳಿ ಈಗ  ಹಚ್ಚದೇ ಕಣ್ಣೀರು ತರಿಸುತ್ತಿದೆ . ಎಲ್ಲಿಯೂ ಒಳ್ಳೆಯ ನೀರುಳ್ಳಿ ಸಿಗುತ್ತಿಲ್ಲ .ಸಿಕ್ಕರೂ ದರ ಕೇಳಿಯೇ ಕಣ್ಣೀರು ಬರುವಂತಿದೆ . ನಮ್ಮ ಆಸ್ಪತ್ರೆ ಇರುವ ಎ ಪಿ ಎಂ ಸಿ ರಸ್ತೆಯಲ್ಲಿ ಹಲವು ಜೀನಸು ಅಂಗಡಿಗಳು ಇದ್ದು ,ಎಲ್ಲಾ ಕಡೆ ಎಡ ತಾಕಿದೆ . ಕೆಲವು ಅಂಗಡಿಗಳು ಈ ಐಟಂ ತರಿಸುವುದೇ ನಿಲ್ಲಿಸಿವೆ . ಕಾರಣ ಬರುತ್ತ್ತಿರುವ ಮಾಲು ಕಳಪೆ ಮಟ್ಟದ್ದು .ಇನ್ನು ಕೆಲವು ಅಂಗಡಿಗಳು ಸಾಂಬಾರ್ ಈರುಳ್ಳಿ ಎಂಬ ಸಣ್ಣ ನೀರುಳ್ಳಿ ಮಾತ್ರ ಮಾರುತ್ತಿವೆ . ನಾನು ಯಾವ ವ್ಯವಹಾರಕ್ಕೂ ನಾಲಾಯಕ್ಕು ಆಗಾಗ ನನ್ನ ಮನೆಯವರು ಸೋದಾಹರಣ ಹೇಳಿ ಹೇಳಿ ನನ್ನಲ್ಲಿ ಕೀಳರಿಮೆ ಉಂಟು ಮಾಡಿರುತ್ತಾರೆ . ಅದನ್ನು ಹುಸಿ ಮಾಡಲು ಎಂದು ಪುತ್ತೂರಿನ ಸರ್ವ ಮಾಲ್ ,ಮಾರ್ಟ್ ಮತ್ತು ಅಂಗಡಿಗಳಿಗೆ ಭೇಟಿ ನೀಡಿದೆ .ಆದರೆ ವಧು ಅನ್ವೇಷಿಸುವ ಊರಿನ ಕೃಷಿಕ  ಯುವಕರ ಸ್ಥಿತಿ ಆಯಿತು .ಎಲ್ಲಿಯೂ ಒಳ್ಳೆಯ ನೀರುಳ್ಳಿ  ಪತ್ತೆ ಇಲ್ಲ . ಕೊನೆಗೆ ಮೊನ್ನೆ ಸೋಮವಾರ ಪುತ್ತೂರು ಸಂತೆ ಗೆ ಭೇಟಿ ಇತ್ತು ಎರಡು ಸುತ್ತು ಹೊಡೆದೆ . ಕೋವಿಡ್ ನಂತರ ಸಂತೆಗೆ ಭೇಟಿ ಇದುವೇ ಮೊದಲು . ಅಲ್ಲಿ ನನ್ನ ಕೆಲವು ರೋಗಿಗಳು ನನ್ನನ್ನು ನೋಡಿ ನಮಸ್ಕಾರ ಮಾಡಿ ಕನಿಕರ ಸೂಚಿಸಿದರು .'ಪಾಪ ಡಾಕ್ಸ್ರಿಗೆ ಪ್ರಾಕ್ಟೀಸ್ ಕಮ್ಮಿ ಆಗಿರ ಬೇಕು ,ಕಡಿಮೆಗೆ ತರಕಾರಿ  ಕೊಳ್ಳ್ಳುವಾ ಎಂದು ಬಂದಿರ ಬೇಕು ' ಎಂಬ ಮುಖ ಭಾವ .. 

ಕೊನೆಗೂ ಒಂದು ಮೂಲೆಯಲ್ಲಿ ಉರ್ದು ಮಾತನಾಡುವ ಸಾಹೇಬರಲ್ಲಿ ಪರವಾಗಿಲ್ಲ ಎನ್ನುವ ಮಾಲು ಕಂಡಿತು . ಕಿಲೋ ವಿಗೆ ರೂಪಾಯಿ ಅರುವತ್ತರಂತೆ ೫ ಕೆಜಿ ಕೊಂಡು ,ದಿಗ್ವಿಜಯ ಸಾದಿಸಿದವರಂತೆ ಪಕ್ಕದ ಅಂಗಡಿಯಿಂದ ಸೌತೆ ,ಬದನೆ ,ಹೀರೆ ಮತ್ತು ಮೂಲಂಗಿ ಚೀಲಕ್ಕೆ ಸೇರಿಸಿ ಕೊಂಡು ಆಸ್ಪತ್ರೆಗೆ ಹೋದೆ ದಿನವಿಡೀ ನೀರುಳ್ಳಿ ಚಿತ್ತನಾಗಿದ್ದೆ . 

ಸಂಜೆ  ಮನೆಗೆ ಸೇರಿದಾಗ ಸೈಕ್ಲೋನ್ ಮಳೆ ಆರಂಭವಾಗಿತ್ತು   ಹೆಂಡತಿಯ ಎದುರು ನೀರುಳ್ಳಿ ಇಟ್ಟು  ಮೀಸೆ ತಿರುವಾ (ನನಗೆ ಮೀಸೆ ಇಲ್ಲ ) ಎಂದು ಕರೆದರೆ ಅವಳು ಮಹಡಿಯಲ್ಲಿ ಕಿಟಿಕಿ ಬಳಿ ನೀರು ಬೀಳುವುದನ್ನು ನೋಡುತ್ತಿದ್ದಳು .ನೋಡಿ ಮಳೆಗಾಲದಲ್ಲಿ  ನೀರು ಸೋರಿ ಗೋಡೆ ಒದ್ದೆಯಾಗುವುದಕ್ಕೆ ನಾನು ನಿನ್ನೆಯಷ್ಟೇ ಹಾಕಿದ ಲೀಕ್ ಪ್ರೂಫ್ ಲೇಪ ಎಷ್ಟು ಚೆನ್ನಾಗಿ ಕೆಲಸ ಮಾಡಿದೆ . ನಾನು ನೀರುಳ್ಳಿ ನೀರುಳ್ಳಿ ಎಂದೆ ."ಎಂತದ್ದು ಮಾರಾಯರೆ ನಿಮ್ಮ ನೀರುಳ್ಳಿ . ನಾನು ಎಷ್ಟು ಒಳ್ಳೆಯ ಕೆಲಸ ಮಾಡಿದ್ದೇನೆ .ಒಂದು ದಿನವಾದರೂ ನನ್ನ ಕಾರ್ಯ ನೀವು ಗುರುತಿಸಿ ಪ್ರಶಂಸೆ ಮಾಡಿದ್ದುಂಟಾ .ಇದು ಎಂತ ನೀರುಳ್ಳಿ ?ಎಲ್ಲಾ ಹುಟ್ಟಿದೆ ."ಎಂದು ನನ್ನ ಉಬ್ಬಿದ ನನ್ನ ಬಲೂನ್ ಗಾಳಿ  ತೆಗೆದಳು . 

ಈ ನೀರುಳ್ಳಿ ಸಾಮಾನ್ಯ ಎಂದು ಭಾವಿಸ ಬೇಡಿ .ದೆಹಲಿಯಲ್ಲಿ ಜನಪ್ರಿಯ ನಾಯಕಿ ದಿ ಸುಷ್ಮಾ ಸ್ವರಾಜ್ ಇದರ ಸಮಸ್ಯೆಯಿಂದ ತಮ್ಮ ಮುಖ್ಯ ಮಂತ್ರಿ ಪದವಿಯನ್ನೇ ಕಳೆದು ಕೊಂಡು ,ಇಲ್ಲಿಯ ವರೆಗೆ ಅವರ ಪಕ್ಷಕ್ಕೆ ಅಲ್ಲಿ ಅಧಿಕಾರ ಮರೀಚಿಕೆಯಾಗಿಯೇ ಉಳಿದಿದೆ 

ಮಾತಿನ ಸಂಕೀರ್ಣತೆ

                                                                                                                                                                                      

ಆಚಾರವಿಲ್ಲದ ನಾಲಿಗೆ ನಿನ್ನ ನೀಚ ಬುದ್ದಿಯ ನಾಲಿಗೆ ಎಂದು ದಾಸರು ಹಾಡಿದ್ದು ವಿನಾ ಕಾರಣ   ಕೆಟ್ಟದ್ದನ್ನು ಆಡುವವರಿಗೆ . ಇಲ್ಲಿ ನಾಲಿಗೆ ಯನ್ನು ಮಾತಿನ ಮುಖ್ಯ ಅಂಗ ಎಂದು ವಾಚ್ಯವಾಗಿ ಇದ್ದರೂ ಆಡುವವನನ್ನೇ ಪೂರ್ಣ ಉದ್ದೇಶಿಸಿ ಇರುವುದು . ಸಾಮಾನ್ಯ ತಿಳುವಳಿಕೆ ಇರುವಂತೆ  ನಾಲಿಗೆ ಮಾತಿನ ಮೂಲ ಅಲ್ಲ  ಅಲ್ಲದೆ ಏಕ ಮಾತ್ರ ಅಂಗವೂ ಅಲ್ಲ . 

ವಾಚ್ಯ ಮಾತಿನ ಉಗಮ ಎಡ ಮುಮ್ಮೆದುಳಿನಲ್ಲಿ .ಇಲ್ಲಿ ಬ್ರೋಕ ನ ಕೇಂದ್ರ (ಕಂಡು ಹಿಡಿದ ಫ್ರೆಂಚ್ ವಿಜ್ಞಾನಿ ಹೆಸರು )ಎಂದು ಇದ್ದು ಇಲ್ಲಿ ಆಡುವ ಮಾತಿನ ಕ್ರಿಯಾತ್ಮಕ ಸಂದೇಶ ರಚನೆ ಆಗಿ ನರಗಳ ಮೂಲಕ ಅದು ಕೊರಳಲ್ಲಿ ಇರುವ ಧ್ವನಿ ಪೆಟ್ಟಿಗೆಯ ಮಾಂಸ ಖಂಡಗಳಿಗೆ ರವಾನೆ ಆಗುತ್ತದೆ . ಆದೇಶ ಕ್ಕನುಸಾರ ಸ್ವರ ತಂತುಗಳು ಕಂಪಿಸಿ ಸ್ವರೋತ್ಪಾದನೆ ಆಗುವುದು , ನಮ್ಮ ಆಡಿಯೋ ಸ್ಪೀಕರ್ ಗಳ ಮುಖ್ಯ ಪೆಟ್ಟಿಗೆ ಯಲ್ಲಿ ಆದಂತೆ . ಉತ್ಪಾದಿತ ಶಬ್ದಗಳ ಮೌಲ್ಯ ವರ್ಧನೆ ನಾಲಿಗೆ  ,ಬಾಯಿ ,ಹಲ್ಲುಗಳ ಮೂಲಕ ಆಗುವುದಲ್ಲದೆ ,ಮೂಗಿನ ಪಾರ್ಶ್ವಗಳಲ್ಲಿ  ಮೂಳೆಗಳಲ್ಲಿ  ಖಾಲಿ ಪೆಟ್ಟಿಗೆ ಯಂತೆ ಇರುವ ಸೈನಸ್ (ಇವು ಸೌಂಡ್ ಸಿಸ್ಟಮ್ ನ  ಸ್ಪೀಕರ್ ಪೆಟ್ಟಿಗೆ ಗಳಂತೆ ಕಾರ್ಯ ನಿರ್ವಹಿಸುತ್ತವೆ )ಗಳಲ್ಲಿ ಆಗುತ್ತದೆ . 

ಆಲಿಸಿದ ಮಾತನ್ನು ಗ್ರಹಣ ಮಾಡುವ ಮೆದುಳಿನ ಕೇಂದ್ರ ಕ್ಕೆ  ವರ್ನಿಕೆ ಕೇಂದ್ರ ಎನ್ನುವರು .ಇದು ಬ್ರೋಕನ ಜಾಗಕ್ಕಿಂತ ಸ್ವಲ್ಪ ಹಿಂದುಗಡೆ ಇದ್ದು ಕಿವಿ ಮೂಲಕ ಆಲಿಸಿದ ಮಾತಿನ ಗ್ರಹಣ ಮಾಡುತ್ತದೆ . ಇಲ್ಲಿಂದ ಬ್ರೋಕನ ಜಾಗಕ್ಕೆ ಸಂಪರ್ಕ ಇದೆ . ಮಾತನ್ನು ಉತ್ಪಾದಿಸುವ ಮತ್ತು ಗ್ರಹಿಸುವ ಎರಡು ಮುಖ್ಯ  ವಿಭಾಗ ಗಳು ಇವೆ ಎಂದು ತಿಳಿಯಿತಲ್ಲಾ . 

ಮೆದುಳಿನಲ್ಲಿ  ರಕ್ತ ಹೆಪ್ಪ್ಪು ಗಟ್ಟುವುದು ಅಥವಾ ರಕ್ತ ಸ್ರಾವ ವಾಗಿ ಬ್ರೋಕನ ಕೇಂದ್ರದ ಕೆಲಸ ವ್ಯತ್ಯಯ ಆದರೆ(ಆಡುವ ) ಮಾತು ಬಿದ್ದು ಹೋಗುವುದು . ಕೇಳಿದ್ದು ಅರ್ಥ ಆಗ ಬಹುದು . ವರ್ನಿಕೆ ಕೇಂದ್ರ ಕ್ಕೆ ಮಾತ್ರ  ತೊಂದರೆ ಆದರೆ ಆಡುವ ಮಾತು ಬೀಳದು .ಆದರೆ ಆಡಿದ ಮಾತಿಗೆ ಅರ್ಥವಿರದು . ನಮ್ಮ ಬಲ ಭಾಗದ ಅವಯವಗಳ ನಿಯಂತ್ರಣ ಎಡದ ಮೆದುಳಿನಲ್ಲಿ ಇರುವುದರಿಂದ ಸಾಮಾನ್ಯವಾಗಿ  ಬಲ ಪಾರ್ಶ್ವ ವಾತ ಆದಾಗ ಮಾತೂ ಬೀಳುವುದು . 

ಧ್ವನಿ ಪೆಟ್ಟಿಗೆ ಯ ಕ್ಯಾನ್ಸರ್ ,ಅಥವಾ ನರ ದೌರ್ಬಲ್ಯ ಆದರೆ ಮಾತಿನ ಉತ್ಪಾದನೆ ಸರಿಯಾಗಿ ಆದರೂ ಶಬ್ದ ಗಳು ಹೊರಡವು .

ಸಹಿ ನೆನಪಿನ ಸಿಹಿ

ನನ್ನ ಪತ್ನಿ ಶ್ರಮ ಜೀವಿ ಮತ್ತು ಸದಾ ಕ್ರಿಯಾ ಶೀಲೆ . ಏನಾದರೂ ಮಾಡುತಿರು ತಮ್ಮ ಎಂದು ಕವಿ ಹೇಳಿದ ರೀತಿ . ಹಾಗೆ ಮೊನ್ನೆ ನನಗೆ ಬ್ಯಾಂಕ್ ನಿಂದ  ಕೆ ವೈ ಸಿ ಅಪ್ಡೇಟ್ ಮಾಡಿ ಎಂದು ಒಂದು  ಓಲೆ ಬಂತು . ಸರಿ ನನ್ನದು ಮತ್ತು ಪತ್ನಿಯ ಕೆ ವೈ ಸಿ ದಾಖಲೆ ಪ್ರತಿ ಗಳಿಗೆ ಸಹಿ ಹಾಕಿಸ ಬೇಕಿತ್ತು . ಯಾವಾಗ ನೋಡಿದರೂ ಅವಳ ಕೈಯಲ್ಲಿ ಏನಾದರೂ ಇರುತ್ತಿದ್ದು ಹೊಂಚು ಹಾಕಿ ಕಾದು ನೋಡಿ ಸಹಿ ಹಾಕಿಸಿ ಕೊಂಡಾಗ ನಿಟ್ಟುಸಿರು . 

ಬಾಲ್ಯದಲ್ಲಿ ಶಾಲೆಯಿಂದ ಪ್ರೋಗ್ರೆಸ್ ರಿಪೋರ್ಟ್ ಅಂತ ವರ್ಷಕ್ಕೆ ಎರಡು ಬಾರಿ ಕೊಟ್ಟು ಹೆತ್ತವರ ಸಹಿ ಹಾಕಿಸಲು ಕಳುಹಿಸುತ್ತಿದ್ದರು ಕನ್ನಡ ಮೀಡಿಯಂ ನ ನಾವು ಅದನ್ನು ಪ್ರೋಕ್ರಿ ರಿಪೋರ್ಟ್ ಎನ್ನುತ್ತಿದ್ದೆವು  . ದಿನವಿಡೀ ಏನಾದರೂ ಒಂದು ಕೆಲಸ ಮಾಡಿರುತ್ತಿದ್ದ ತಂದೆಯವರನ್ನು ಕಾಡಿ ರಾತ್ರಿ ಹೊತ್ತು ಚಿಮಿಣಿ ದೀಪದ ಬೆಳಕಿನಲ್ಲಿ  ಸಹಿ ಹಾಕಿಸಿ ಕೊಳ್ಳುತ್ತಿದ್ದೆವು . ನಾವು ತುಂಬಾ ಮಕ್ಕಳು ಇದ್ದು ಸರಕಾರಿ ಆಫೀಸ್ ನಲ್ಲಿ ಫೈಲ್ ಗಳಿಗೆ ಸಹಿ ಹಾಕುವ ರೀತಿ ಇತ್ತು ಎನ್ನ ಬಹುದು . ನಮಗೆ ಮಾರ್ಕ್ ಎಷ್ಟು ಸಿಕ್ಕಿದೆ  ಎಂದು ಅವರು ಎಂದೂ ಚಿಂತೆ ಮಾಡಿದವರಲ್ಲ .ಕಡಿಮೆ ಅಂಕ ಸಿಕ್ಕಿದರೆ ಕೆಂಪು ಗೆರೆ ಹಾಕುವ ಪದ್ಧತಿ .ಕೆಲವೊಮ್ಮೆ ನಿನಗೆ ಯಾಕೆ ಕಡಿಮೆ ಕೆಂಪು ಗೆರೆ ಎಂದು ಕೇಳುವರು . ಮಕ್ಕಳು ಬುದ್ದಿವಂತರಾದರೆ ತೋಟ ಗದ್ದೆ ನೋಡಿಕೊಳ್ಳಲು ಯಾರೂ ಸಿಗಲಿಕ್ಕಿಲ್ಲ ಎಂಬ ಭಾವನೆ ಇತ್ತು . 

ತಂದೆ ಸಿಗದಿದ್ದರೆ ಅಜ್ಜನವರನ್ನು ಕಾಡಿ ಸಹಿ ಮಾಡಿಸಿ ಕೊಳ್ಳುತ್ತಿದ್ದೆವು .ಅಜ್ಜ ಮತ್ತು ತಂದೆ ಹಳೆಯ ಮೋಡಿ ಅಕ್ಷರದಲ್ಲಿ ಸಹಿ ಮಾಡುವರು .ಸಹಿ ಮಾಡುವ ಮೊದಲು ಒಂದು ರಫ್ ಕಾಗದ ದಲ್ಲಿ  ಮಾಡಿ ನೋಡುವರು . ಆಮೇಲೆ ಮೋಡಿ ಅಕ್ಷರದಲ್ಲಿ ಅಜ್ಜನ ಸಹಿ  ಅಂಗ್ರಿ ಮಹಾಬಲ ಭಟ್ಟನ ರುಜು ಎಂಬುದು ಲಿಂಗ್ರಿ ಮಹಾಚಲ ಚಟ್ಟನ  ರುಜು ಆಗುತ್ತಿತ್ತು . ಏನೇ ಇದ್ದರೂ ನಮಗೆ ಪರೀಕ್ಷೆಯಲ್ಲಿ ಪಾಸ್ ಆಗುವಾಗ ಆದದ್ದಕ್ಕಿಂತ ಹೆಚ್ಚು ನಿರಾಳತೆ  ಪ್ರೋಗ್ರೆಸ್ ರಿಪೋರ್ಟ್ ಗೆ ಸಹಿ ಬಿದ್ದಾಗ  ಆಗುತ್ತಿತ್ತು

ಹೃದಯಾಘಾತ ಬಗ್ಗೆ  ಎಲ್ಲರೂ ಕೇಳಿದ್ದೇವೆ .ಹೃದಯದ ಮಾಂಸಖಂಡ ಗಳಿಗೆ ರಕ್ತ ಸರಬರಾಜು ಮಾಡುವ ರಕ್ತ ನಾಳಗಳು ಹಠಾತ್ ಬಂದ್ ಆದರೆ ಹೃದಯದ ಕಾರ್ಯದಲ್ಲಿ ವ್ಯತ್ಯಯ ಆಗಿ , ರಕ್ತ ತಡೆಯ ಗಂಭೀರತೆಯನ್ನು ಹೊಂದಿಕೊಂಡು  ಎದೆ ನೋವಿನಿಂದ ಹಿಡಿದು ಸಾವು ಕೂಡಾ ಸಂಭವಿಸುವುದು . ಸಂಭವದ ಕ್ಷಿಪ್ರತೆಯಿಂದ ಆಘಾತ ಎಂಬ ವಿಶೇಷಣ .

ಅದರಂತೆ ಮೆದುಳಿನ ಆಘಾತ ಅಥವಾ ಸ್ಟ್ರೋಕ್  ಎಂಬ ಕಾಯಿಲೆ ಇದೆ . ಇಲ್ಲಿ ಮಾತ್ರ ಮೂರು ಮುಖ್ಯ ಪ್ರಭೇದ ಇವೆ .ಒಂದು ; ಹೃದಯಾಘಾತದಲ್ಲಿ ಆಗುವಂತೆ ಮೆದುಳಿನ ರಕ್ತ  ನಾಳಗಳು ಕೊಬ್ಬು ಶೇಖರಣೆಯಿಂದ ಸ್ಥಳೀಯ ವಾಗಿ ರಕ್ತ ಹೆಪ್ಪು ಗಟ್ಟುವಿಕೆಗೆ ಆಹ್ವಾನ ಕೊಟ್ಟು ರಕ್ತ ಸರಬರಾಜಿನಿಂದ ವಂಚಿತವಾದ ಸುತ್ತ ಮುತ್ತಲಿನ ಮೆದುಳಿನ ಜೀವಕೋಶಗಳು ನಿಷ್ಕ್ರಿಯ ಗೊಳ್ಳುವವು . ಎರಡು ; ರಕ್ತ ನಾಳಗಳು ಹಠಾತ್ ಒಡೆದು ಮೆದುಳಿನ ರಕ್ತಸ್ರಾವ ಆಗುವುದು . ಮೂರು ; ಕೆಲವು  ಕಾಯಿಲೆಗಳಲ್ಲಿ ಹೃದಯ ಒಳಗೆ ಹೆಪ್ಪು ಗಟ್ಟಿದ ರಕ್ತದ ತುಣುಕುಗಳನ್ನು ಮೆದುಳಿಗೆ ಹೋಗುವ ರಕ್ತ ನಾಳಗಳ ಮೂಲಕ ಹೋಗಿ ತಟಸ್ಥ ಉಂಟು ಮಾಡುವುದು .

 ಬಲ ಬಾಗದ ದೊಡ್ಡ ಮೆದುಳು ಶರೀರದ  ಎಡ   ಭಾಗವನ್ನೂ  ಮತ್ತು  ಎಡ ಪಾರ್ಶ್ವದ ದೊಡ್ಡ ಮೆದುಳು ಬಲ ಭಾಗ ಮತ್ತು ಮಾತನ್ನು ನಿಯಂತ್ರಿಸುತ್ತವೆ.  ಎಡ ಮೆದುಳು ಆಘಾತ ಆದರೆ ಬಲ ಪಾರ್ಶ್ವ ವಾಯು ಅಥವಾ ಲಕ್ವಾ ಉಂಟಾಗುತ್ತದೆ . ಅದೇ ತರಹ ಎಡ ಮೆದುಳಿನ ಕ್ಷಮತೆ ಕುಂದಿದಾಗ ಮಾತಾಡುವ, ಅರ್ಥ ಮಾಡಿಕೊಳ್ಳವ ಶಕ್ತಿ ಬೀಳ ಬಹುದು . ಅದೇ ರೀತಿ  ಹಿಮ್ಮೆದುಳಿಗೆ ಹಾನಿ ಆದರೆ ದೃಷ್ಟಿ ಹೋಗ ಬಹುದು . ಕಣ್ಣುಗಳು ಸರಿ ಇದ್ದರೂ ದೃಷ್ಟಿ ಗ್ರಹಣ  ವ್ಯತ್ಯಯದಿಂದ ಬರುವ ಕುರುಡು ತನ.ಸಿಟಿ ಸ್ಕ್ಯಾನ್  ಅಥವಾ ಎಂ ಆರ್ ಐ ಯಿಂದ ಮೆದುಳಿನ ಆಘಾತ ವನ್ನು ಪತ್ತೆ ಮಾಡುವರು .

ಅಧಿಕ ರಕ್ತದ ಒತ್ತಡ ,ಕೊಲೆಸ್ಟ್ರಾಲ್ ಇತ್ಯಾದಿ ಮೆದುಳಿನ ಆಘಾತಕ್ಕೆ ಸಾಮಾನ್ಯ ಕಾರಣಗಳು .ಹೃದಯಾಘಾತದಲ್ಲಿ ಮಾಡುವಂತೆ ಔಷಧಿ ನೀಡಿ ಹೆಪ್ಪು ಕರಗಿಸುವುದು ಮತ್ತು ರಕ್ತ ನಾಳಗಳ ಮೂಲಕ ಕೊಳಾಯಿ ಹಾಯಿಸಿ ಹೆಪ್ಪು ತೆಗೆದು ಸ್ಟೆಂಟ್ ಹಾಕುವುದು ಇಲ್ಲಿಯೂ ಇದೆ . ಮೆದುಳಿನ ಆಘಾತದಲ್ಲಿ ಕಾಯಿಲೆ ಮೆದುಳಿನಲ್ಲಿ ಇದ್ದರೂ ರೋಗ ಲಕ್ಷಣ ಅವಯವಗಳಲ್ಲಿ  ಇರುವುದು . ಕೈಕಾಲುಗಳು ಉಪಯೋಗಿಸದೆ ಮರಗಟ್ಟಿ ಹೋಗದ ಹಾಗೆ ಅವಕ್ಕೆ ಪಿಸಿಯೋ ತೆರಪಿ ಅಥವಾ ವೈಜನಿಕ ವ್ಯಾಯಾಮ  ಕೊಡುವರದರೂ ಮುಖ್ಯ ಚಿಕಿತ್ಸೆ ಮೆದುಳಿಗೆ ಆಗ ಬೇಕು . ಫ್ಯೂಸ್ ಹೋದಾಗ ಅದನ್ನು ಸರಿಪಡಿದೇ ಬಲ್ಬ್ ಹಾಕಿ ಪ್ರಯೋಜನ ವಿಲ್ಲ .

 

ಬಿಬೇಕ್ ದೇಬ್ ರಾಯ್ ಅವರ ಮಹಾಭಾರತ ದಲ್ಲಿ ಗೀತೋಪದೇಶ ಓದುತ್ತ್ತಿದ್ದೆ . ಎಲ್ಲಾ ವೇದಾಂತಿಗಳು ಪುರಾವರ್ತಿಸುವ ಫಲಾ ಪೇಕ್ಷೆ  ನಿನ್ನ ಕರ್ತವ್ಯ ಮಾಡು , ಸುಖ ಬಂದಾಗ ಅತಿ ಹಿಗ್ಗದಿರು ,ಕಷ್ಟ ಬಂದಾಗ ಕುಗ್ಗದಿರು ,ಅದೇ ನೈಜ ಯೋಗವಸ್ಥೆ ಇತ್ಯಾದಿ ವಾಕ್ಯಗಳ ರಿವಿಶನ್  ಆಯಿತು .ಲೋಕದಲ್ಲಿ ಇದನ್ನು ಬೋಧಿಸುವ ಪ್ರಾಜ್ಞರು ಸನ್ಯಾಸಿಗಳು ಬಹಳ ಮಂದಿ ಇದ್ದಾರೆ .ಆದರೆ ತಮ್ಮ ನಡವಳಿಕೆಯಲ್ಲಿ ಇದನ್ನು ಅಳವಡಿಸಲು ಅವರಿಗೂ ಸಾಧ್ಯವಾಗುವುದಿಲ್ಲ .  ಷಡ್ವೈರಿ ಗಳಿಂದ ದೂರವಿರಿ ಎಂದು ವೇದಿಕೆಯಿಂದ ಪ್ರಚಿಸುವವರು ತಮ್ಮ ಬಗ್ಗೆ ಯಾರಾದರೂ ಟೀಕೆ ಮಾಡಿದರೆ ಹುಲು ಮಾನವರಂತೆ  ಕೋಪಾವೇಶದಿಂದ ಶಾಪ ಹಾಕುವರು , ಆಸ್ತಿಗಾಗಿ ಕೋರ್ಟ್ ಕಟ್ಟಳೆ ಅಲೆ ಯುವರು . 

ಇದನ್ನೆಲ್ಲಾ ಮೀರಿದ ಯೋಗಾವಸ್ಥೆ ಅಪರೂಪಕ್ಕೆ  ಕಂಡರೆ ಅದು  ಜನ ಸಾಮಾನ್ಯರಲ್ಲಿಯೇ .ಮೊನ್ನೆ ನಾನು ಓದಿದ ಬನ್ನಂಜೆ ಯವರ ಆತ್ಮ ಚರಿತ್ರೆ ಯಲ್ಲಿ ತಮ್ಮ ಆತ್ಮೀಯರಾದ  ಉದ್ಯಮಿ ಒಬ್ಬರ ಹೋಟೆಲ್ ಅಗ್ನಿಗೆ ಆಹುತಿ ಆದಾಗ ಅಲ್ಲಿದ್ದ ಹತ್ತು ಲಕ್ಷ ರೂಪಾಯಿ ಭಸ್ಮ ವಾಯಿತು ;ಅದನ್ನು ತಿಳಿದು ಅವರು ಯಾವುದೇ ಉದ್ವೇಗಕ್ಕೆ ಒಳಗಾಗದೆ ,ಹಿಂದಿನ ದಿನ ಅದನ್ನು ಯಾರಾದರೂ ಬಡವರಿಗೆ ಕೊಡ ಬಹುದಿತ್ತು ಎಂದು ಕೊಂಡರಂತೆ . 

ನನ್ನ ಕೈ ಎಣಿಕೆಯ ರೋಗಿಗಳಲ್ಲಿ ಇಂತಹ ಸ್ಥಿತ ಪ್ರಜ್ಞತೆ ಕಂಡಿದ್ದೇನೆ .ಹಿಂದೆ ಕ್ಯಾನ್ಸರ್ ಪೀಡಿತ ಓರ್ವ ಮಹಿಳೆ ಬಗ್ಗೆ ಬರೆದಿದ್ದೆ . ಇಂತಹದೇ ಓರ್ವ ಮಹಾ ಮಹಿಮ ದಿ  ವಿಶ್ವನಾಥ ಸಾಲಿಯಾನ್ ಮತ್ತು ಅವರ ಪತ್ನಿ ದಿ ಪಾರ್ವತಿ .,ಇವರು ಪುತ್ತೂರಿನ ಮಂಜಲ್ ಪಡ್ಪು ವಿನಲ್ಲಿ ಹೋಟೆಲ್ ವಿಶ್ವಾಸ್ ಎಂಬ  ಉದ್ಯಮ ನಡೆಸುತ್ತಿದ್ದು ಜನಪ್ರಿಯ ರಾಗಿದ್ದರು . ಜನ ಸಾಮಾನ್ಯರ ಮೆಚ್ಚಿನ ಹೋಟೆಲ್ . ಹಿಂದೆ ಕಟ್ಟಿಗೆಯಲ್ಲಿ ಅಡಿಗೆ ಇದ್ದಾಗ ಹೊಗೆ ಸೇವನೆಯಿಂದ ಇರ ಬೇಕು .ಅವರಿಗೆ ತೀವ್ರತರ  ಉಸಿರಾಟದ ಸಮಸ್ಯೆಯಿಂದ ಬಳಲುತ್ತಿದ್ದರು .  ಕಾಯಿಲೆ ಎಷ್ಟೇ ತೀವ್ರವಾಗಿ ಇರಲಿ ಒಂದೇ ಒಂದು ದಿನ ಅವರು ಮುಖ ಗಂಟು ಹಾಕಿದ್ದಾಗಲಿ ,ಗೊಣಗಿದ್ದಾಗಲೀ ಇಲ್ಲ . ಕೃತಜ್ಞತಾ ಭಾವ ಸೂಚಿಸುವ ಮುಖಭಾವ ಮಾತ್ರ ನಾನು ಕಂಡದ್ದು . ರೋಗ ತೀವ್ರವಾಗಿ ಅವರು ಅಸು ನೀಗಿದಾಗ ಅವರನ್ನು ಬಲ್ಲವರು ಕಂಬನಿ ಮಿಡಿದರು . ಇವರ ಪತ್ನಿ ದಿ ಪಾರ್ವತೀ ಅಮ್ಮ ನವರು ಗುಣದಲ್ಲಿ ಇವರದೇ ಪಡಿಯಚ್ಚು . ವರ್ಷಗಳ ಹಿಂದೆ ಭಾರೀ ಮಳೆಗೆ ಧರೆ ಕುಸಿದು ಇವರೂ ಜತೆಗೆ ಮಲಗಿದ್ದ ಮೊಮ್ಮಗ ಧನುಷ್ ಅಸು ನೀಗಿದಾಗ ಊರಿಗೆ ಊರೇ ಮರುಗಿತ್ತು .ಒಳ್ಳೆಯವರಿಗೆ ಯಾಕೆಇಂತಹ ಪರೀಕ್ಷೆ ?

ಈಗ ಮಗ ಮಹೇಶ್ ಹೋಟೆಲ್ ಮುಂದುವರಿಸುತ್ತಿತ್ತು ಹಿರಿಯರ ಸದ್ಗುಣಗಳು ಅವರಲ್ಲಿಯೂ ಎದ್ದು ಕಾಣುತ್ತದೆ .

ನಮಗೆ ಬಾಲ್ಯದಲ್ಲಿ ವಿಶಷ್ಟವಾದ ಕೆಲವು ಅನುಕೂಲ ಇದ್ದವು . ನಮ್ಮ ಅಜ್ಜನ ಮನೆ ಅಜ್ಜ ಅಜ್ಜಿಗೆ ನಮ್ಮ ಅಮ್ಮ ಒಬ್ಬಳೇ ಮಗಳು . ಅವರು ದೊಡ್ಡವರು .ಮೂರು ಜನ ತಮ್ಮಂದಿರು . ನನ್ನ ದೊಡ್ಡ ಅಣ್ಣ ಅವರರಿಗೆ ಕ್ರಮವಾಗಿ  ಡಿ ಎಂ (ದೊಡ್ಡ ಮಾವ ).ಎನ್ ಎಂ (ನಾರಾಯಣ ಮಾವ )ಮತ್ತು ಪಿ ಎಂ (ಪುಟ್ಟು ಮಾವ ) ಎಂಬ ಹೃಸ್ವ ನಾಮ ಇಟ್ಟಿದ್ದು ನಾವೂ ಕೆಲವೊಮ್ಮೆ ಹಾಗೆ ಕರೆಯುತ್ತಿದ್ದೆವು .ನಮ್ಮ ಮಾವಂದಿರಿಗೆ ನಮ್ಮ ತಾಯಿ ಮಾತ್ರ ಸಹೋದರಿ ಆದ ಕಾರಣ ,ಮತ್ತು ಅವರು ಹಿರಿಯಕ್ಕ ಆದ ಕಾರಣ ಅಲ್ಲಿಗೆ ಅಜ್ಜನ ಮನೆಯ ಹಕ್ಕು ಸ್ಥಾಪಿಸಲು ನಾವು ಮಾತ್ರ . ತನ್ನ ಎಳವೆಯಲ್ಲಿಯೇ ಅಜ್ಜ ತೀರಿ ಹೋದ ಕಾರಣ ,ಕುಟುಂಬದ ಭಾರ ಬಿದ್ದು ದೊಡ್ಡ ಮಾವ ವೆಂಕಟ ಕೃಷ್ಣ ಜೋಯಿಸ ಸ್ವಲ್ಪ ಎದುರು ಕೋಪ ಮೈಗೂಡಿಸಿ ಗೊಂಡಿದ್ದು ಅವರ ಲ್ಲಿ ಪ್ರೀತಿಗಿಂತಲೂ ಭಯ ಜಾಸ್ತಿ ;ಅಕ್ಕನ ಮಕ್ಕಳಿಗಿಂತಲೂ ಅವರ ಮಕ್ಕಳಿಗೆ ಅದರ ಅನುಭವ ಅಧಿಕ .ಮಕ್ಕಳ ಮತ್ತು ಬಂಧುಗಳ ಮೇಲೆ ಪ್ರೀತಿ ಇದ್ದರೂ ಅವರು ತೋರಿಸಿ ಕೊಳ್ಳರು ಎರಡನೇ ಯವರು ಮುಲ್ಕಿ ವಿಜಯಾ ಕಾಲೇಜಿನಲ್ಲಿ ಸಸ್ಯ ಶಾಸ್ತ್ರ ಪ್ರಾಧ್ಯಾಪಕರು . ಇವರು ಸಾಧು ;ಸ್ನೇಹ ಪ್ರವೃತ್ತಿಯವರು .ನಮ್ಮ ಬಂಧುಗಳ ಮಕ್ಕಳು ಅನೇಕರು ,ಮುಖ್ಯವಾಗಿ ಹುಡುಗಿಯರು ಇವರ ಸುಪರ್ದಿಯಲ್ಲಿ ಈ ಕಾಲೇಜಿನಲ್ಲಿ ಅಧ್ಯಯನ ಭಾಗ್ಯ ಪಡೆದಿರುವರು . ಸ್ವಲ್ಪ ಹಾಸ್ಯ ಪ್ರವೃತ್ತಿ ,ಯಾವುದೇ ಭಿಡೆ ಯಿಲ್ಲದೆ ಇವರ ಜತೆ ದೊಡ್ಡವರು ಮತ್ತು ಮಕ್ಕಳು ವ್ಯವಹರಿಸ ಬಹುದು . 

ನಮ್ಮ ಮೂಲ ಅಜ್ಜನ ಮನೆ ಉಕ್ಕಿನಡ್ಕ ಸಮೀಪ ಗುರುವಾರೆ .ಅವರಿಗೆ ಈಶ್ವರ ಮಂಗಲ ಸಮೀಪ ಸಾರು ಕೂಟೇಲು ಎಂಬಲ್ಲಿ ಒಂದು ಆಸ್ತಿಯೂ ಇದ್ದು ,ಆರಂಭದಲ್ಲಿ ನನ್ನ  ಅಮ್ಮನ ಸೋದರ ಮಾವ ಶಂಭು ಭಟ್ ಅದನ್ನು ನೋಡಿಕೊಳ್ಳುತ್ತಿದ್ದರು . ಅವರು ತುಂಬಾ ಸಾಧು ಸಜ್ಜನ .ನನ್ನ ಸಣ್ಣ ಮಾವ ಶಂಕರ ಜೋಶಿ (ಪಿ ಎಂ ) ದೊಡ್ಡವರಾದ ಮೇಲೆ ಆಸ್ತಿಯನ್ನು ಅವರ ಸುಪರ್ದಿಗೆ ಬಿಟ್ಟು ಬೆಳ್ತಂಗಡಿ ಸಮೀಪ ಬೊಲ್ಪಾಲೆ ಎಂಬಲ್ಲಿ ನೆಲಸಿದರು . ಮದುವೆಯಾಗುವ ತನಕ ಅಜ್ಜಿ ಮತ್ತು ಮಾವ ಮಾತ್ರ ಇದ್ದು ಆಮೇಲೆ ಅತ್ತೆ ಬಂದು ಸೇರಿದರು .ಈ ಮಾವ ಕಲಿಕೆಯಲ್ಲಿ ಬುದ್ದಿವಂತ ಆಗಿದ್ದರೂ ಅಸ್ತಿ ನೋಡಿಕೊಳ್ಳಲು ಓದು ನಿಲ್ಲಿಸಿದವರು . 

ಎಲ್ಲಾ ಮಾವಂದಿರಿಗೂ ಅಕ್ಕನಲ್ಲಿ ಪ್ರೀತಿ ಮತ್ತು ಗೌರವ .ಅಜ್ಜನ ಶ್ರಾದ್ಧ ಮತ್ತು ಇತರ ಸಮಾರಂಭ ಗಳು ಇದ್ದಾಗ ಅವರಲ್ಲಿ ಒಬ್ಬರು ದಿನ ಮುಂದಾಗಿ ಬಂದು ಅಕ್ಕನನ್ನು ಕರೆದೊಯ್ಯುವರು . ನಮ್ಮ ಅಮ್ಮ ತಮ್ಮಂದಿರಲ್ಲಿ ಯಾವತ್ತು  ಕುಂದು ಕಾಣರು ,ಯಾರಾದರೂ ಎತ್ತಿ ತೋರಿಸಿದರೆ ಅದಕ್ಕೆ ಸಕಾರಣ ಕೊಡುವರು . 

ಹಾಗೆ ಎರಡು ಅಜ್ಜನ ಮನೆ ಭಾಗ್ಯ (ಮುಲ್ಕಿ ವಸತಿ ಗೃಹ ಸೇರಿಸಿದರೆ ಮೂರು ). ದೊಡ್ಡ ರಜೆಯಲ್ಲಿ ಹೋಗಲು . ನಮಗೆ ಹೆಚ್ಚಿನ ಆಕರ್ಷಣೆ ಕೊನೆಯ ಮಾವ ಇದ್ದ ಸಾರು ಕೂಟೇಲು . ಕಾರಣ  ಅಲ್ಲಿ ಇದ್ದ ಅಜ್ಜಿ  ಮತ್ತು  ನಮ್ಮ ಮಾವನ ಪುಸ್ತಕ ಸಂಗ್ರಹ .ಮಾವ ನಿಗೆ ಓದುವ ಹವ್ಯಾಸ ಇದ್ದು ಕಾರಂತ ,ಭೈರಪ್ಪ ,ತ್ರಿವೇಣಿ ಮುಂತಾದವರ ಹೊಸ ಹೊಸ ಪುಸ್ತಕಗಳು ಅಲ್ಲಿ ಇದ್ದವು . ಆದರಿಂದ ರಜೆಯಲ್ಲಿ ಅಲ್ಲಿಗೆ ದಾಳಿ .ಮಾವನೂ ನಮ್ಮೊಡನೆ ಮಿತ್ರರಾಗಿ ಇರುತ್ತಿದ್ದರು . ಈಗ ಈ ಮಾವ ಅಸ್ತಿ ಮಾರಿ ಪುತ್ತೂರಿನಲ್ಲಿ ನೆಲೆಸಿದ್ದು ಓದುವ ಹವ್ಯಾಸ ಮುಂದುವರಿಸಿದ್ದಾರೆ .ಸಾಹಿತ್ಯ ಕಾರ್ಯಕ್ರಮಗಳಿಗೆ ಹಾಜರಾಗುತ್ತಾರೆ  . 

ಕೆಲವೊಂದು ದೊಡ್ಡ ರಜೆಯಲ್ಲಿ ನಾವು  ನಮ್ಮ ದೊಡ್ಡ ಅಕ್ಕನ ಮನೆಯಲ್ಲಿ .ಅಲ್ಲಿ ನಮಗೆ ಬೋರ್ ಆಗದಿರಲಿ ಎಂದು ಒಂದು ಟೆಲಿ ಫಂಕನ್ ರೇಡಿಯೋ ಭಾವ ತಂದಿಟ್ಟಿದ್ದು ,ಉಪ್ಪಿನಂಗಡಿ ಗೆ ಹೋದಾಗ ದಿನ ಪತ್ರಿಕೆ ,ಸುಧಾ ಇತ್ಯಾದಿ ತರುತ್ತಿದ್ದರು . ಅಲ್ಲಿ ಕುಮಾರ ವ್ಯಾಸ ಭಾರತ ಮತ್ತು ದೇರಾಜೆ ರಾಮಾಯಣ ಎರಡು ಗ್ರಂಥಗಳು ಮಾತ್ರ ಇದ್ದ ನೆನಪು . ಹಾಗೆ ನಮಗೆ ಬೇಸರವಾಗದಿರಲಿ ಎಂದು ಅಕ್ಕ ಮತ್ತು ಭಾವ ನಾನು ಹುಬ್ಬಳ್ಳಿಯಲ್ಲಿ ಎಂ ಬಿ ಬಿ ಎಸ್ ಕಲಿಯುತ್ತಿರುವಾಗ ನನ್ನ  ಸಲಹೆಯಂತೆ ಒಂದು ಲೈಬ್ರರಿ ಮಾಡಿದರು ,ಹುಬ್ಬಳ್ಳಿ ಸಾಹಿತ್ಯ ಭಂಡಾರ ದಿಂದ ಆಯ್ದ ಮಾಸ್ತಿ ,ಕಾರಂತ ,ಭೈರಪ್ಪ ,ಕುವೆಂಪು ,ರಾವ್ ಬಹಾದ್ದೂರ್ ಮುಂತಾದವರ ಪುಸ್ತಕಗಳನ್ನು ಆಯ್ದು ಸಿ ಪಿ ಸಿ ಲೋರಿ ಯಲ್ಲಿ ಪಾರ್ಸೆಲ್ ಮಾಡಿದ್ದೆ .ಸಾಹಿತ್ಯ ಭಂಡಾರದಲ್ಲಿ ನನ್ನ ಪರಿಚಯದ ಓರ್ವ ಉದ್ಯೋಗಿ ಇದ್ದು ನನ್ನ ಅಭಿರುಚಿ ಅವರಿಗೆ ತಿಳಿದಿತ್ತು
 

ಕೆಲವು ಅನುಭವ ಗಳು

  ವೈದ್ಯಕೀಯ ಪದವಿ ಪಡೆದ ಮೇಲೆ  ದೇಶ ವಿದೇಶ ಗಳಲ್ಲಿ ಬೇರೆ ಬೇರ ಆಸ್ಪತ್ರೆಗಳಲ್ಲಿ ಕೆಲಸ ಮಾಡಿದ್ದೇನೆ . ಎಲ್ಲಾ ಕಡೆಯೂ ಮುಂಜಾನೆ ಎಂಟು ಗಂಟೆಗೆ ನಾನು ಹಾಜರ್ .ರೈಲ್ವೆ ಅರೋಗ್ಯ ಕೇಂದ್ರಗಳಲ್ಲಿ ನನಗೆ ಮೇಲ್ವಿಚಾರಕರು ಇರಲಿಲ್ಲ ,ಹಾಜರಿ ಪುಸ್ತಕ ಇಲ್ಲ .ಆದರೂ  ಆ ಸಮಯಕ್ಕೆ ಹಾಜರ್ . ಮುಂದೆ ಪೆರಂಬೂರು  ರೈಲ್ವೆ ಆಸ್ಪತ್ರೆ ಯಲ್ಲಿ ಇದ್ದಾಗ ಅಲ್ಲಿ  ಮುಖ್ಯಸ್ಥರೂ ಸೇರಿ ಬಹುತೇಕ ವೈದ್ಯರು ಏಳೂ ಮುಕ್ಕಾಲಿಗೇ ಹಾಜರ್ .ಅಲ್ಲಿಯೂ ಹಾಜರಿ ಪುಸ್ತಕ ಇಲ್ಲ . ಆದರೆ ಶಿಸ್ತು ಪಾಲನೆ ಅಯಾಚಿತವಾಗಿ ನಡೆಯುತ್ತಿದ್ದು ಆಗಿನ ಅಲ್ಲಿನ ಕೆಲಸ ಸಂಸ್ಕೃತಿ ನಾನು ಮತ್ತೆಲ್ಲಿಯೂ ಕಂಡಿಲ್ಲ . 

ಈಗಲೂ ರೋಗಿಗಳು ಇರಲಿ ಇಲ್ಲದಿರಲಿ ನಾನು  ಎಂಟು ಎಂಟು ಕಾಲಿಗೆಲ್ಲಾ ಆಸ್ಪತ್ರೆಗೆ ಹಾಜರ್ ಆಗುತ್ತೇನೆ .ನನ್ನ ಮನೆಯವರಿಗೆ ಇದು ಸ್ವಲ್ಪ ಕಿರಿ ಕಿರಿಯಾದರೂ ಅಭ್ಯಾಸವಾಗಿ ಸಹಿಸಿ ಕೊಳ್ಳುತ್ತಿದ್ದಾರೆ . ಸರ್ವಿಸ್ ನಲ್ಲಿ ಇದ್ದಾಗ ನಾನು ರಜೆ ಹಾಕಿದ್ದು ಕಡಿಮೆ ,ರೈಲ್ವೆ ಯಲ್ಲಿ ಉಚಿತ ಪಾಸ್ ಇದ್ದರೂ ಊರು ತಿರುಗಿದ್ದು ಕಡಿಮೆ . ರೈಲ್ವೆ ಬಿಡುವಾಗ ನನ್ನ ಹಕ್ಕಿನಲ್ಲಿ ಇದ್ದ ರಜೆಗೆ ವೇತನ ಕೊಟ್ಟರು .ಮುಂದೆ ನಾನು ಮಧ್ಯ ಪ್ರಾಚ್ಯ ದ  ದೇಶ ವೊಂದರಲ್ಲಿ ಸರಕಾರಿ ಕೆಲಸಕ್ಕೆ ಸೇರಿ ಬಿಟ್ಟು ಬಂದಾಗ ನನ್ನ ರಜಾ ವೇತನವೆಂದು ದೊಡ್ಡ ಮೊತ್ತವನ್ನು ನಾನು ಕೇಳದೆಯೇ ನನ್ನ ವಿಳಾಸಕ್ಕೆ ಕಳುಸಿದರು . 

ನಾನು ಎರಡು ವೈದ್ಯಕೀಯ ಕಾಲೇಜು ಗಳಲ್ಲಿ ಅಧ್ಯಾಪನ ಮಾಡಿದ್ದು ,ಅಲ್ಲಿ ನಾನು ಬಳಸದೇ ಇದ್ದ ವೇತನ ಸಹಿತ ರಜೆ (ಇದು ಸಾಮಾನ್ಯವಾಗಿ ತುಂಬಿ ಇರುತ್ತಿತ್ತು )ಯ  ವೇತನ ಪಾವತಿಸುವ ಸೌಜನ್ಯ ಮಾಡಲಿಲ್ಲ( ಅಥವಾ ಅವರ ಆರ್ಥಿಕ  ಸ್ಥಿತಿ ಸಮ್ಮತಿಸಲಿಲ್ಲ ). 

ನಾನು ಆಸ್ಫತ್ರೆಯಲ್ಲಿ ಸಲಹೆಗೆ ಲಭ್ಯವಿರುವೆನೋ ಎಂದು ತಿಳಿಯ ಬೇಕಾದರೆ ಆಸ್ಪತ್ರೆಗೆ ಫೋನ್ ಮಾಡಿದರೆ ಸಾಕು .ಆದರೂ ಕೆಲವರು ನನ್ನ ಫೋನ್ ಗೆ ಕರೆ ಮಾಡಿ ನೀವು ನಾಳೆ ಇದ್ದಿರೋ ನಾಡಿದು ಇದ್ದೀರೋ ಎಂದು ಕೇಳಿ ನನಗೆ ಕರ ಕರೆ ಮಾಡುವರು . ರೋಗಿಯನ್ನು ಪರೀಕ್ಷೆ ಮಾಡುತ್ತಿರುವಾಗ  ಏಕಾಗ್ರತೆ ತಪ್ಪಿ ವಿಶ್ವಾಮಿತ್ರನ ತಪಸ್ಸಿನ ನಡುವೆ ಮೇನಕೆಯ ಡಾನ್ಸ್ ನಂತೆ ಆಗುತ್ತದೆ .ಅಂತಹ ಕರಕರೆ ಆದರೂ ನೋಡಿ ಸಂತೋಷ ಪಡಬಹುದು .ಆದರೆ ನೀವು ಇದ್ದೀರಾ ಕರೆಗಳಿಗೆ ಕಳಶವಿಟ್ಟಂತೆ ಇನ್ಸೂರೆನ್ಸ್ , ಸಾಲ ಬೇಕೇ ಸಲ ಬೇಕೇ ಸಾಲಿಗ ಬ್ಯಾಂಕ್ ಗಳು, ನಿಮ್ಮ ಟೆಲಿಫೋನ್ ಕಡಿತ ಮಾಡಲಾಗುವುದು ,ಬ್ಯಾಂಕ್ ಖಾತೆ ಸ್ಥಗಿತ ಗೊಳಿಸಲಾಗುವುದು ,ನಿಮ್ಮ ಪಾರ್ಸೆಲ್ ನಲ್ಲಿ ಮದ್ದು ಇದೆ ಇತ್ಯಾದಿ ನಮ್ಮ ಸ್ಥಿ ಮಿತ ತಪ್ಪಿಸುವಲ್ಲಿ ಯಶಸ್ವಿ ಆಗುವವವು

                 ಕಾಡೂರು  ಸೀತಾರಾಮ ಶಾಸ್ತ್ರಿಗಳು 

 .ನಿನ್ನೆ ನಟರಾಜ ವೇದಿಕೆಯಲ್ಲಿ ಬಡಗು ತಿಟ್ಟಿನ ಯಕ್ಷಗಾನ ಸುಧನ್ವ ಮೋಕ್ಷ ಮತ್ತು ಗದಾ ಯುದ್ಧ ನೋಡಿ ಆನಂದಿಸಿದೆ .ನಿರೀಕ್ಷೆಯಂತೆ ಚೆನ್ನಾಗಿ ಬಂತು  ಹಿಂದೆ ಪುತ್ತೂರಿನಲ್ಲಿ ವ್ಯವಸಾಯೀ  ಮೇಳಗಳ ಯಕ್ಷಗಾನ ಬಯಲಾಟಗಳು ಸಾಕಷ್ಟು ಆಗುತ್ತಿದ್ದು ಜಾತ್ರೆ ಸಮಯವಂತೂ ಆರೇಳು ಆಟಗಳು ಒಂದೇ ದಿನ ಆದದ್ದು ಇದೆ .ಯಾಕೋ ಈ ಗ ಕಟೀಲು ಮೇಳದ ಹರೆಕೆ ಆಟ ಬಿಟ್ಟರೆ ಡೇರೆ ಮೇಳಗಳ ಆಟ ಬರುವುದೇ ಇಲ್ಲ .ಯಕ್ಷಗಾನ ಪ್ರೇಕ್ಷಕರು  ಎಲ್ಲಿ ಮಾಯವಾದರು ?

ಇಂತಹ  ಬರಗಾಲ ಹೋಗಲಾಡಿಸಲು   ಕೆಲವು ಕಲಾ ಪ್ರೇಮಿಗಳು ಕೈಲಾದ ಪ್ರಯತ್ನ ಮಾಡುತ್ತಿದ್ದಾರೆ . ಅವರ ಪೈಕಿ ಕಾಡೂರು ಸೀತಾರಾಮ ಶಾಸ್ತ್ರಿ ಗಳು ಅಗ್ರಗಣ್ಯರು .ಶಾಸ್ತ್ರೀ ಅಂಡ್ ಕೋ ಎಂಬ ಅಡಿಕೆ ಮಾರಾಟ ಸಂಸ್ಥೆಯನ್ನು ನಡೆಸಿಕೊಂಡು ಬರುತ್ತಿರುವ ಇವರು ಯಕ್ಷಗಾನ ತಾಳ ಮದ್ದಳೆ ,ಬಯಲಾಟ ಇತ್ಯಾದಿಗಳನ್ನು ವರ್ಷವೂ ನಡೆಸಿಕೊಂಡು ಬರುತ್ತಿದ್ದು ,ಪುತ್ತೂರಿನ ಸಾಂಸ್ಕೃತಿಕ ಮತ್ತು ಸಾಹಿತ್ಯಿಕ ಕಾರ್ಯಕ್ರಮಗಳಲ್ಲಿ  ಯಾವತ್ತೂ ಕಂಡು ಬರುವ ಮುಖ . ತಾವು ಆನಂದಿಸಿದ ಕಲಾಪ್ರಕಾರ ಗಳನ್ನು  ಉಳಿದವರೂ ನೋಡಿ ಸಂತಸ ಪಡಲಿ ಎಂಬ ಧ್ಯೇಯ .ತಮ್ಮ ಗಳಿಕೆಯ ಒಂದು ಭಾಗ ಇದಕ್ಕೆ ಮೀಸಲು . ಅದಕ್ಕೆ ಸಮಾನ ಮನಸ್ಕರ ತಂಡ . ಕಳೆದ ವರ್ಷದ ವರೆಗೆ ಪುತ್ತೂರು ದಸರಾ ಕಾರ್ಯಕ್ರಮದಲ್ಲಿಯೂ ಇವರ ಸಕ್ರಿಯ ಪಾಲು . ಆಪತ್ ಸ್ಥಿತಿಯಲ್ಲಿ ಸಿಲುಲುಕಿದ ಅನೇಕರಿಗೆ ಇವರು ಸಹಾಯ ಮಾಡಿದ್ದು ,ಪ್ರಚಾರದಿಂದ ದೂರ . 

ಪುತ್ತೂರಿನಲ್ಲಿ ಹಿಂದೆ ಉದ್ಯಮಿಗಳಾದ ದಿ ಮಾಧವ ನಾಯಕ್ ,ಜಿ ಎಲ್ ಆಚಾರ್ಯ ಮುಂತಾದವರು ಸ್ವಯಂ ಕಲಾಸಕ್ತರಾಗಿ ಕಲೆ ಸಾಹಿತ್ಯಕ್ಕೆ ಪ್ರೋತ್ಸಾಹ ಕೊಡುತ್ತಿದ್ದರು .ಜಿ ಎಲ್ ಆಚಾರ್ಯ ಅವರ ಶತಮಾನೋತ್ಸವ ಕಾರ್ಯಕ್ರಮ  ಇಂದು ಆರಂಭ ಗೊಳ್ಳಲಿದೆ . ಈಗಿನ ತಲೆಮೊರೆಯ ಡಾ ಹರಿಕೃಷ್ಣ ಪಾಣಾಜೆ ,ಡಾ ಶ್ರೀಪ್ರಕಾಶ್ ಬಂಗಾರಡ್ಕ ,ಡಾ ಶ್ರೀಶ ಕುಮಾರ್ ಮತ್ತು ರಾಘವೇಂದ್ರ ಹಾಲ್ಕೆರೆ ಮುಂತಾದವರನ್ನು ನೆನಪಿಸಿ ಕೊಳ್ಳ ಬಯಸುತ್ತೇನೆ 

 

ಬನ್ನಂಜೆ ಗೋವಿಂದಾಚಾರ್ಯ ರ  ಆತ್ಮಕತೆ ಆತ್ಮ ನಿವೇದನ ಓದಿ ಮುಗಿಸಿದೆ. ಅವರ ನಿರೂಪಣೆ ,ವೀಣಾ ಬನ್ನಂಜೆ ಅವರ ಬರಹ  . ಬಾಲ್ಯದಲ್ಲಿ ಉದಯವಾಣಿ ಪ"ತ್ರಿಕೆಯಲ್ಲಿ ಅವರು ಬರೆಯುತ್ತಿದ್ದ ' ಕಿಷ್ಕಿಂಧಾ ಕಾಂಡ "ಅಂಕಣವನ್ನು ತಪ್ಪದೇ ಓದುತ್ತಿದ್ದೆ . ಪ್ರಜಾವಾಣಿಯಲ್ಲಿ ಟಿ ಎಸ್ ಆರ್ ಅವರ 'ಛೂಬಾಣ" ದಂತೆ ಹಾಸ್ಯ ಲೇಪಿತ ವಿಡಂಬನಾತ್ಮಕ ಬರಹಗಳು . ಮಂಗಳೂರು ಶ್ರೀನಿವಾಸ ಹೋಟೆಲ್ ನಲ್ಲಿ ಅವರ ಪ್ರವಚನಗಳನ್ನೂ ಕೇಳಿದ್ದೆ. 

ಬನ್ನಂಜೆ ಶಿವರಾಮ ಕಾರಂತರಂತೆ ಬಯಲು ವಿಶ್ವ ವಿದ್ಯಾಲಯದಲ್ಲಿ ಕಲಿತವರು. ಶಿಷ್ಟ ಕಾಲೇಜು ಶಿಕ್ಷಣ ಕ್ಕೆ ಹೊರತಾದುದು ತಮಗೆ ಲಾಭವೇ ಆಯಿತು ಎಂದು ಹೇಳುತ್ತಾರೆ  .ಕಾರಂತರಂತೆ ಎಲ್ಲವನ್ನೂ ಪ್ರಶ್ನಿಸಿ ಸ್ವೀಕರಿಸುವವವರು . 

ಈ ಕೃತಿಯ ಕೆಲವು ವಾಕ್ಯಗಳನ್ನು ಉದ್ದರಿಸುತ್ತೇನೆ .ಅವರ ಒಂದು ಭಾಷಣ ದಿಂದ ;'ನಮ್ಮ ದೇಶದಲ್ಲಿ ಎರಡು ರೀತಿಯ ಜನರಿದ್ದಾರೆ .ಕೆಲವರು ತಮ್ಮನ್ನು ಆಸ್ತಿಕರೆಂದು ತಿಳಿದುಕೊಂಡವರು .ಕೆಲವರು ತಮ್ಮನ್ನು ನಾಸ್ತಿಕರೆಂದು ತಿಳಿದುಕೊಂಡವರು.ವಸ್ತುತಃ ಈ ದೇಶದಲ್ಲಿ ಆಸ್ತಿಕರೂ ಇಲ್ಲ .ನಾಸ್ತಿಕರೂ ಇಲ್ಲ ಎಡೆಬಿಡಂಗಿಗಳು ಇರುವುದು 'ಎಂದೆ .'ಆಸ್ತಿಕರು ವೇದಪುರಾಣ ಗಳನ್ನು ನಂಬುತ್ತೇವೆ ಎಂದರೆ ಏಕೆ ನಂಬುತ್ತಾರೆ ?ಓದದಿರುವುದರಿಂದ .ನಾಸ್ತಿಕರು ದೇವರನ್ನು ವೇದವನ್ನು ನಂಬೋದಿಲ್ಲ ,ಯಾಕೆಂದರೆ ಓದಲಿಲ್ಲ ಅದಕ್ಕೆ .ನಮ್ಮ ನಂಬಿಕೆಗೆ ಮೂಲ ಅಜ್ಞಾನ .ಆದ್ದರಿಂದ ಆಸ್ತಿಕರ ವಾದಕ್ಕೂ ಅರ್ಥ ಇಲ್ಲ .ನಾಸ್ತಿಕರ ವಾದಕ್ಕೂ ಅರ್ಥ ಇಲ್ಲ ."

ತಾವು ಸದಾ ನಿರುದ್ಯೋಗಿ ಆಗಿದ್ದು ಅಧ್ಯಯನ ಶೀಲ ವಿದ್ಯಾರ್ಥಿ ಆಗಿರಬೇಕು ಎಂಬುದು ಅವರ ಜೀವನ ಆಶಯ . 

ವಿದ್ಯಾರ್ಥಿ ,ಗೃಹಸ್ಥ ,ಪತ್ರಕರ್ತ ,ಪ್ರವಾಚಕ ,ಲೇಖಕ ,ಚಲಚಿತ್ರ ಸಾಹಿತಿ,ಗುರು ಮತ್ತು ಮಾರ್ಗದರ್ಶಕ  ಹೀಗೆ ತನ್ನ ಜೀವನದ ಹಲವು ಮಜಲುಗಳು ಮತ್ತು ಮುಖಗಳ ಮತ್ತು ತಮ್ಮ  ಪರಿಚಯ ವಲಯಕ್ಕೆ ಬಂದ  ಹಿರಿಯ ಲೇಖಕರು ಮತ್ತು ವ್ಯಕ್ತಿಗಳ ಚಿತ್ರಣ ಇದೆ . ಕೆಲವೊಂದು ವಿಚಾರಗಳ ಪುನರಾವೃತ್ತಿ ಆದದ್ದು ಬಿಟ್ಟರೆ  ಒಟ್ಟಿನಲ್ಲಿ ಇಷ್ಟವಾದ ಓದು

 

ವೈದ್ಯಕೀಯ ಇಂಟರ್ನ್ ಶಿಪ್

 ಎಂ ಬಿ ಬಿ ಎಸ್ ಅಧ್ಯಯನ ಕಾಲದಲ್ಲಿ ರೋಗ ಚರಿತ್ರೆ ವಿಶ್ಲೇಷಣೆ ,ರೋಗಿಯ ಪರೀಕ್ಷೆ , ಪ್ರಯೋಗಾಲಯ ಪರೀಕ್ಷೆಗಳು ,ರೋಗದ ಪತ್ತೆ ಮತ್ತು ಚಿಕಿತ್ಸೆಯನ್ನು ಶಾಸ್ತ್ರೀಯ ವಾಗಿ ಕಲಿಸುತ್ತಾರೆ . ಅಸಂಖ್ಯಾತ ರೋಗಗಳು ,ಅಷ್ಟೇ ಪರೀಕ್ಷೆಗಳು ಮತ್ತು ಔಷಧಿಗಳು . ಯಾವ ಹೊಸ ರೋಗದ ಬಗ್ಗೆ ಓದುವಾಗಲೂ ತಮಗೂ ಅದು ಇರ ಬಹುದೇ ಎಂಬ ಸಂಶಯ . ಇದು ಟಿ ಬಿ , ಕುಷ್ಟ ,ಸಿಫಿಲಿಸ್ ,ಹೃದಯಾಘಾತ ,ನರ ದೌರ್ಬಲ್ಯ ಕಾಯಿಲೆ ಅಥವಾ ಗರ್ಭವತಿ ಯಾಗುವುದು ಯಾವುದೇ ಇರ ಬಹುದು . ಮೆಡಿಕಲ್ ಸ್ಟೂಡೆಂಟ್ಸ್ ಸಿನ್ಡ್ರೋಮ್ ಎಂದು ತಮಾಷೆಗೆ ಹೇಳುವರು .

 ಅಂತಿಮ ಎಂ ಬಿ ಬಿ ಎಸ್ ಪಾಸ್ ಆಗಿ ಇಂಟರ್ನ್ ಶಿಪ್ ಅಥವಾ ಹೌಸ್ ಸರ್ಜೆಂಸಿ  ಒಂದು ವರ್ಷ ಕಡ್ಡಾಯ ಮಾಡ ಬೇಕು .ಇದಕ್ಕಾಗಿ ವಾಹನ ಚಲಾವಣೆಗೆ ಲರ್ನಿಂಗ್ ಲೈಸೆನ್ಸ್ ಕೊಡುವಂತೆ ವೈದ್ಯಕೀಯ ಪರಿಷತ್ ತಾತ್ಕಾಲಿಕ ನೋಂದಣಿ ನೀಡುವುದು .ಇದನ್ನು ಹಿಡಿದುಕೊಂಡು ರೋಗಿ ಪರೀಕ್ಷೆಗೆ ತೊಡಗುವ ವೈದ್ಯನ ಸ್ಥಿತಿ ವಾಹನ ಕಲಿಯುವವನ್ನು  ನಗರದ ಕೇಂದ್ರದಲ್ಲಿ ಒಬ್ಬನೇ ಬಿಟ್ಟಂತೆ ಆಗುವುದು .ಇನ್ನು ಕೆಲವರು ಚಕ್ರ ವ್ಯೂಹ ಹೊಕ್ಕ ಅಭಿಮನ್ಯು ವಿನಂತೆ ಆಗುವರು .  ಪರಿಶೀಲನೆ ಮಾಡುವಾಗ ರೋಗಿಗೆ ತನ್ನ ದೌರ್ಬಲ್ಯ ತಿಳಿಯದಂತೆ ಹುಸಿ ಗಾಂಭೀರ್ಯ ,ಟೊಳ್ಳು ಧೈರ್ಯ ಮುಖದಲ್ಲಿ ನಟಿಸ ಬೇಕು .ಏನೂ ತಿಳಿಯದಿದ್ದರೆ ಒಂದಿಷ್ಟು ರಕ್ತ ಪರೀಕ್ಷೆ ಬರೆದು ಬಿಟ್ಟು ,ರೋಗಿ ಅತ್ತ ಹೋದಾಗ ಪಿ ಜಿ ಗಳ ಬಳಿ ಕೇಳಿ ತಿಳಿದು ಕೊಳ್ಳುವುದು .ಇನ್ನು ಕೆಲವರು ಬೇರೆಯವರಲ್ಲಿ ಕೇಳುವುದು ಮರ್ಯಾದೆಗೆ ಕಮ್ಮಿ ಎಂದು ಏನಾದರೂ ಒಂದು ಬರೆದು ಕೊಡುವರು .

ಇಂಟರ್ನ್ ಶಿಪ್ ಅವಧಿಯಲ್ಲಿ ಒಂದು ವರ್ಷವನ್ನು ಬೇರೆ ಬೇರೆ ವಿಭಾಗ ದಲ್ಲಿ ಹಂಚಿ ಹಾಕುವರು ,. ಇದರಲ್ಲಿ ಮುಖ್ಯ ವಿಭಾಗ ಗಳೆಂದು ಪರಿಗಣಿತ  ಸರ್ಜರಿ ,ಮೆಡಿಸಿನ್ ,ಮತ್ತು ಗೈನೆಕೋಲೊಜಿ ಗೆ ಸಿಂಹ ಪಾಲು . ಮಕ್ಕಳ ವಿಭಾಗ ,ಕಣ್ಣು ,ಕಿವಿ ,ಮೂಳೆ, ಚರ್ಮ ಇತ್ಯಾದಿ ವಿಭಾಗ ,ಕಮ್ಯೂನಿಟೀ ಮೆಡಿಸಿನ್ ಎಂದು ಉಪಕೇಂದ್ರ ಗಳಲ್ಲಿ ಎಂದು ಉಳಿದ ಸಮಯವನ್ನು ಹಂಚಿ ಹಾಕುವರು .

ಒಳ್ಳೆಯ ವೈದ್ಯನಾಗಲು ಹಿರಿಯರ ಮಾರ್ಗ ದರ್ಶನದಲ್ಲಿ ಎಲ್ಲ ವಿಭಾಗಗಳಲ್ಲಿ ಹಗಲಿರುಳು ಆತ್ಮಾರ್ಥಕ ವಾಗಿ ಕೆಲಸ ಮಾಡ ಬೇಕು . ಹಿಂದೆ ರೋಗ ನಿರ್ಧರಣ ,ಕೇಸ್ ಶೀಟ್ ಬರೆಯುವುದು ,ಇಂಜೆಕ್ಷನ್ ಕೊಡುವುದು ,ಡ್ರೆಸ್ಸಿಂಗ್ ಮಾಡುವುದು ,ಶಸ್ತ್ರೆ ಚಿಕಿತ್ಸೆಯಲ್ಲಿ ಸಹಕರಿಸುವುದು ,ರಕ್ತ ಗ್ರೂಪ್ ,ಕ್ರಾಸ್ ಮ್ಯಾಚಿಂಗ್ ಮಾಡಿ ರಕ್ತ ಸಂಗ್ರಹ ಮಾಡುವುದು , ಎಕ್ಸ್ ರೇ ಸ್ಕ್ರೀನಿಂಗ್ ಮಾಡುವುದು ,ಪ್ರಯೋಗಾಲಯದಿಂದ ರಿಪೋರ್ಟ್ ಗಳನ್ನು ಸಂಗ್ರಹಿಸುವುದು , ಸಾಧಾರಣ ಹೆರಿಗೆ ಮಾಡಿಸುವುದು ಇತ್ಯಾದಿ ಅಲ್ಲದೆ ರೋಗಿ ಡಿಶ್ಚಾರ್ಜ್ ಆಗುವಾಗ ಸಮ್ಮರಿ ಬರೆದು ಕೊಡುವುದು ಇತ್ಯಾದಿ ಮುಗಿಯದ ಕೆಲಸ .ಆದರೆ ತಮ್ಮ ಅನುಭವ ಅಧಿಕವಾಗಿ ಆತ್ಮ ವಿಶ್ವಾಸ ಹೆಚ್ಚುತ್ತಿರುವ ಸಂತೋಷ . ತಮ್ಮ ಕೆಲಸದಿಂದ ಪ್ರಾಧ್ಯಾಪಕರಿಂದ ಸೈ ಎನಿಸಿ ಕೊಳ್ಳುವ ಕಾತುರ . ಇಲ್ಲಿ ಹಿರಿಯ ನರ್ಸ್  ,ಡ್ರೆಸ್ಸರ್ ಮತ್ತು ಅಟ್ಟೆಂಡರ್ ಎಲ್ಲರಿಂದಲೂ ಕಲಿಯುವುದು ಸಾಕಷ್ಟು ಇತ್ತು .

 

ಈಗ ಎಂ ಬಿ ಬಿ ಎಸ್ ಪಾಸ್ ಆದ ಒಡನೆಯೇ ಪಿ ಜಿ ನೀಟ್ ಅಥವಾ ಪಿ ಜಿ ಪ್ರವೇಕ್ಷಾ ತಯಾರಿಯ  ಜಂಜಡ ದಲ್ಲಿ ಇಂಟರ್ನ್ ಶಿಪ್ ನ ನೈಜ ಉದ್ದೇಶ ಮರೆಯಾಗಿದೆ . ತಾವು ಹೌಸ್ ಸರ್ಜೆಂಸಿ ಮಾಡುತ್ತಿರುವ  ವಿಭಾಗದ ವಿಷಯ ಬಿಟ್ಟು ನೀಟ್ ಅಧ್ಯಯನ ಗೈಡ್ ಗಳಲ್ಲಿ ತಲ್ಲೀನರಾಗಿ ಇರುತ್ತಾರೆ .ಯಾವುದಾದರೂ ಪ್ರೊಫೆಸರ್ ಕಟ್ಟು ನಿಟ್ಟು ಇದ್ದರೆ ಆಫೀಸಿನಲ್ಲಿ ಹೋಗಿ ಬೇರೆ ರವರ ವಿಭಾಗಕ್ಕೆ ಹಾಕಿಸಿ ಕೊಳ್ಳುತ್ತಾರೆ .ಎಲ್ಲಾ ವೈದ್ಯಕೀಯ ಶಾಖೆಗಳಲ್ಲಿ ಯೂ ವೈದ್ಯನಾದವನಿಗೆ ಸರಾಸರಿ ಜ್ನಾನ ಬೇಕು ಎಂಬ ಉದ್ದೇಶ ಮರೆಯಾಗುತ್ತಿದೆ . ಇಂದು ಸ್ಪೆಷಾಲಿಟಿ ,ಸೂಪರ್ ಸ್ಪೆಷಾಲಿಟಿ ಯ ಕಾಲ . ಬೇಕಾದಷ್ಟು ಸ್ಕ್ಯಾನ್ ,ರಕ್ತ ಪರೀಕ್ಷೆ ,ಇಂಟರ್ನೆಟ್ ,ವ್ಹಾಟ್ಸಪ್ಇತ್ಯಾದಿ ಇವೆ .ಆದರೆ ರೋಗಿಯೊಡನೆ ಸಂಹವನ ,ಪರೀಕ್ಷಣ ,ಚಿಕಿತ್ಸೆ ಮಾಡುವಾಗ ರೋಗಿಯ ಆರ್ಥಿಕ ಸ್ಥಿತಿ ಪರಿಗಣನೆ ಇತ್ಯಾದಿ ಗಳ ಪರಿಗಣನೆ ಬೇಡವೇ ಎಂಬ ಪ್ರಶ್ನೆ ಇದೆ .

ವಿಲಿಯಂ ಒಸ್ಲರ್ ಎಂಬ ವೈದ್ಯ ಪಿತಾಮಹ ಈ ರೀತಿ ಹೇಳಿದ್ದಾನೆ .ರೋಗ ಜ್ನಾನ ವೆಂಬ ಮಹಾ ಅಧ್ಯಯನ ವನ್ನು ಸೂಕ್ತ ಗ್ರಂಥಗಳ ಸಹಾಯ ವಿಲ್ಲದೆ ಮಾಡುವುದು ದಿಕ್ಸೂಚಿಯ ಸಹಾಯವಿಲ್ಲದೆ ಸಮುದ್ರ ಯಾನ ಮಾಡಿದಂತೆ ಆದರೆ ,ಆಸ್ಪತ್ರೆಯಲ್ಲಿ ನಿಜ ರೋಗಿಗಳ ರೋಗ ನಿಧಾನ ಮತ್ತು ಚಿಕಿತ್ಸೆ ಅಧ್ಯಯನ ಮಾಡದೇ ಇರುವುದು ಸಮುದ್ರ ತಟಕ್ಕೇ ಹೋಗದೆ ಇರುವಂತೆ .

 ವೈದ್ಯಕೀಯ ವಿದ್ಯಾರ್ಥಿಗಳಿಗೆ ರೋಗಿಯ ಪರೀಕ್ಷಾ ವಿಧಾನ ತಿಳಿಸುವ  ಹಚಿಸನ್ ಕ್ಲಿನಿಕಲ್ ಮೆಥಡ್ಸ್ ಎಂಬ ಪುಸ್ತಕ ಇದೆ .ಅದರ ಆರಂಭದಲ್ಲಿ ಒಂದು ಪ್ರಾರ್ಥನೆ ಹೀಗಿದೆ .

“ಅನಾರೋಗ್ಯ ವಿಲ್ಲದವರನ್ನು  ಅವರಷ್ಟಕ್ಕೆ ಬಿಡದಿರುವ (ಅನವಶ್ಯಕ ಚಿಕಿತ್ಸೆ ನೀಡುವ)

ಹೊಸತರ ಬಗ್ಗೆ ಅತೀವ ಮೋಹ ಮತ್ತು ಹಳೆಯದೆಲ್ಲ ಕೀಳು  ಎಂಬ   ತಾತ್ಸಾರ ತೋರುವ   .ಜ್ಞಾನವನ್ನು ವಿವೇಕದ ಮುಂದೆ , ವಿಜ್ಞಾನವನ್ನು ಕಲೆಯ ಮುಂದೆ

ಮತ್ತು  ಬುದ್ದಿಮತ್ತೆಯನ್ನು   ಸಾಮಾನ್ಯ ಜ್ಞಾನ ದ ಮುಂದೆ ಇಡುವ ,ರೋಗಿಗಳನ್ನು 

ಮನುಷ್ಯರಾಗಿ ಎಣಿಸದೆ ಕೇಸ್ ಎಂದು ನೋಡುವ ,ಮತ್ತು  ನಮ್ಮ ಚಿಕಿತ್ಸೆಯು 

ರೋಗವನ್ನು  ಬಳಲುವುದಕ್ಕಿಂತಲೂ ಅಸಹನೀಯವಾಗದಂತೆ  ಮಾಡುವುದರಿಂದ

ನಮ್ಮನ್ನು ರಕ್ಷಿಸು.”

ಚಿರ ಸ್ಮರಣೀಯರು

 ನಿನ್ನೆ ಒಬ್ಬರು ಹಿರಿಯರು ವೈದ್ಯಕೀಯ ಸಲಹೆಗೆ  ಬಂದಿದ್ದರು .ಅವರನ್ನು ಪರೀಕ್ಷೆ ಮಾಡುವಾಗ ಚರ್ಮದ ಅಡಿಯಲ್ಲಿ ತಲೆಯಿಂದ ಉದರಕ್ಕೆ ಹಾಕಿದ ಒಂದು ಕೊಳಾಯಿ ಕೈಗೆ ಸಿಕ್ಕಿತು .ಅದನ್ನು ಪ್ರಸಿದ್ಧ ನರರೋಗ ತಜ್ಞ ದಿ  ಡಾ ಕೆ ಆರ್ ಶೆಟ್ಟಿ ಅವರ ಸಲಹೆ ಮೇರೆಗೆ ನರ ಶಸ್ತ್ರ ನಿಪುಣ ಡಿ ಡಾ ಕೋದಂಡ ರಾಮ ಅವರು ವೆನ್ಲಾಕ್ ಆಸ್ಪತ್ರೆಯಲ್ಲಿ  ಅಳವಡಿಸಿದ್ದು ಎಂದು ಹೇಳಿದರು . ಇದಕ್ಕೆ ವೆಂಟ್ರಿಕ್ಯುಲೊ ಪೆರಿಟೋನಿಯಲ್ ಷಂಟ್ ಎನ್ನುತ್ತಾರೆ . ಮೆದುಳ ಸುತ್ತಲೂ ಮತ್ತು ಒಳಗೆ ಮೆದುಳ ದ್ರವ ಇದ್ದು ಇದು ಬೆನ್ನು ಹುರಿಯ ಸುತ್ತಲೂ ಪಸರಿಸಿರುತ್ತದೆ . ಯಾವುದೇ ಕಾಯಿಲೆಯಿಂದ ಇದರ  ಹರಿವಿಗೆ ತಡೆಯಾದರೆ ,ಅಥವಾ ಇದರ ಒತ್ತಡ ಜಾಸ್ತಿ ಆದರೆ ಮೆದುಳಿಗೆ ಅಪಾಯವಾಗದಂತೆ ಅದನ್ನು ಒಂದು ನಳಿಕೆ ಮೂಲಕ ಹೊಟ್ಟೆಗೆ ಸಂಪರ್ಕಿಸಿ ಬಿಡುವರು . ಹೆಚ್ಚಾದ ಮೆದುಳ ದ್ರವ ಉದರದಲ್ಲಿ ಹೀರಲ್ಪಡುವುದು . ಹೊಟ್ಟೆಗೆ ಹೋಗುವ ದಾರಿಯಲ್ಲಿ ಒಂದು ವಾಲ್ವ್ ಇದ್ದು ಇದು ಉದರ ದ್ರವ ಮೆದುಳಿಗೆ ಹೋಗದಂತೆ ತಡೆ ಗಟ್ಟುವುದು . 

ಇಲ್ಲಿ ನಾನು ಹೇಳ ಹೊರಟಿರುವುದು  ಚಿಕಿತ್ಸೆ ಮಾಡಿದ ಈ ಇಬ್ಬರು ಹಿರಿಯ ವೈದ್ಯರ ಬಗ್ಗೆ .ಡಾ ಕೆ ಆರ್ ಶೆಟ್ಟಿ ಕೆನರಾ ನರ್ಸರಿ ಖ್ಯಾತಿಯ ಕಾಪು ಮುದ್ದಣ್ಣ ಶೆಟ್ಟರ ಪುತ್ರ . ಮಂಗಳೂರಿನ ಮೊದಲ ನರ ರೋಗ ತಜ್ಞ ಎನ್ನ ಬಹುದು . ಕೆ ಎಂ ಸಿ ಯ ಪ್ರಿನ್ಸಿಪಾಲ್ ಆಗಿದ್ದರು .ಮೃದುಭಾಷಿ ,ಸರಳ ಜೀವಿ .. ಒಳ್ಳೆಯ ಓದುಗ . ದೊಡ್ಡ ಬಂಗಲೆಯನ್ನು ಬಿಟ್ಟು ಕದ್ರಿ ಬಳಿ ವಸತಿ ಸಮುಚ್ಚಯ ನಿರ್ಮಿಸಿ ಅದರೊಳು ಒಂದರಲ್ಲಿ ,( ವಿಕಸಿತ ಕೂಡು ಕುಟುಂಬ ;ಇದು ಅವರಿಟ್ಟ ಹೆಸರು )ವಾಸಿಸುತ್ತಿದ್ದರು .ನಾನು ಕೆ ಎಸ ಹೆಗ್ಡೆ  ಆಸ್ಪತ್ರೆಯಲ್ಲಿ ಕೆಲಸ ಮಾಡುತ್ತಿದ್ದಾಗ ಇಳಿ ವಯಸ್ಸಿನಲ್ಲಿಯೂ ನಮಗೆ ಮಾರ್ಗದರ್ಶನ ನೀಡುತ್ತಿದ್ದರು . 

ಇನ್ನೊಬ್ಬರು ದಂತ ಕತೆಯಾದ ನರ  ರೋಗ ಶಸ್ತ್ರಜ್ಞ  ಡಾ ಕೋದಂಡ ರಾಮ .ಇವರ ಬಗ್ಗೆ ನನಗೆ ಕೇಳಿ ಮಾತ್ರ ಗೊತ್ತು . ಈಗಿನ ಸಿ ಟಿ ಸ್ಕ್ಯಾನ್ ,ಎಂ ಆರ್ ಐ ಇತ್ಯಾದಿಗಳು ಇಲ್ಲದ ಕಾಲದಲ್ಲಿ ಕಠಿಣ ವಾದ  ಮೆದುಳ ಶಸ್ತ್ರ ಚಿಕಿತ್ಸೆಯನ್ನು ಸರಕಾರಿ ವೆನ್ಲಾಕ್ ಆಸ್ಪತ್ರೆಯಲ್ಲಿ ಅವರು ಮಾಡುತ್ತಿದ್ದರು ಎಂಬುದು ವಿಶೇಷ . ಇವರನ್ನು ನಾವು ಮರೆಯಬಾರದು

ಇವರಂತೆ ವೆನಲಾಕ್ ಆಸ್ಪತ್ರೆಯಲ್ಲಿ ಡಾ ಎಂ ಪಿ ಪೈ ,ಡಾ ಸಿ ಆರ್ ಬಲ್ಲಾಳ್ ಮತ್ತು ಲೇಡಿ ಗೋಷನ್ ಆಸ್ಫತ್ರೆಯಲ್ಲಿ ಡಾ ಮನೋರಮಾ ಅವರು ಸಲ್ಲಿಸಿದ ಸೇವೆ ಕೂಡಾ ಸದಾ ಸ್ಮರಣಾರ್ಹ

                                 

                                                      

ಅಣ್ಣನೂ ಹೋದ

 

ತಿಂಗಳ ಹಿಂದೆ ನನ್ನ ದೊಡ್ಡ ಅಕ್ಕ ಹಠಾತ್ ನಮ್ಮನ್ನು ಬಿಟ್ಟು ಹೋದ ಬಗ್ಗೆ ಬರೆದಿದ್ದೆ . ನೆನಪು ಮಾಸುವ ಮುನ್ನ ನಿನ್ನೆ ನಮ್ಮ ಹಿರಿಯಣ್ಣ ಕೆಲ ಕಲ ಆಸೌಖ್ಯ ದಿಂದ ಇದ್ದವರು ಇಹಲೋಕ ತ್ಯಜಿಸಿದರು .

ಇವರು ತಮ್ಮ ಪ್ರಾಥಮಿಕ ವಿದ್ಯಾಭ್ಯಾಸ ಕನ್ಯಾನ ದಲ್ಲಿ ,ಮುಂದೆ ಪೆರ್ಲದಲ್ಲಿ ಹೈ ಸ್ಕೂಲ್  (ಅಜ್ಜನ ಮನೆಯಿಂದ )ಮುಗಿಸಿ ಪಿ ಯು ಸಿ ಉಡುಪಿ ಎಂ ಜಿ ಎಂ ಕಾಲೇಜ್ ನಲ್ಲಿ ಪಡೆದು ,ಗುಜರಾತ್ ನವಸಾರಿಯಲ್ಲಿ  ಮೈಕ್ರೋ ಬಯಾಲಜೀ ಬಿ ಎಸ್ ಸಿ ,ಕೆ ಎಂ ಸಿ ಹುಬ್ಬಳ್ಳಿ ಯಿಂದ ಅದೇ ವಿಷಯದಲ್ಲಿ ಎಂ ಎಸ್ ಸಿ ,ಮುಂದೆ ಮಂಗಳೂರು ವಿಶ್ವ ವಿದ್ಯಾಲಯ ದಿಂದ ಪಿ ಎಚ್ ಡಿ  ಗಳಿಸಿದರು . ಚಿತ್ರಕಲೆ ಮತ್ತು ಫೋಟೋ ಗ್ರಫಿ ಅವರ ಹವ್ಯಾಸವಾಗಿದ್ದು ,ಆರ್ಟಿಸ್ಟ್ ಮಹಾಬಲ ಎಂದು ಗುರುತಿಸಲ್ಪ ಟ್ಟಿದ್ದರು . 

ಅಡಿ ಚುಂಚನ ಗಿರಿ ಮೆಡಿಕಲ್ ಕಾಲೇಜ್ ,ಆಂಧ್ರದ ನೆಲ್ಲೂರು ಮೆಡಿಕಲ್ ಕಾಲೇಜ್ ಮತ್ತು ಕೊನೆಗೆ ಮಂಗಳೂರಿನ ಎ ಜೆ ಮೆಡಿಕಲ್ ಕಾಲೇಜ್ ನಲ್ಲಿ ಪ್ರಾಧ್ಯಾಪಕ ರಾಗಿ ದುಡಿದು ವಿಶ್ರಾಂತ ಜೀವನ ನಡೆಸುತ್ತಿದ್ದರು .

ಒಳ್ಳೆಯ ಹಾಸ್ಯ ಪ್ರಜ್ನೆ ,ಕಿರಿಯರ ಮೇಲೆ ಪ್ರೀತಿ . ಅದೇ ರೀತಿ ತಮಗೆ ಆಗದೆ ಕಂಡರೆ ಶೀಘ್ರ ಕೋಪ . 

ನನಗೆ ಮೊದಲ ಕೈಗಡಿಯಾರ ಜನತಾ ಬಜಾರ್ ನಲ್ಲಿ ಕ್ಯೂ ನಿಂತು ತಂದು ಕೊಟ್ಟಿದ್ದರು ,ನನಗೆ ಮೆಡಿಕಲ್ ಸೇರಲು ಒತ್ತಾಸೆ ಮಾಡಿ ಮೊದಲ ಫೀಜ್ ಕೊಟ್ಟು ಆಶೀರ್ವದಿಸಿದ್ದರು .ನಮ್ಮ ದೊಡ್ಡಕ್ಕ ಹೋದ ವಿಷಯ ಆಘಾತ ಉಂಟು ಮಾಡಿದಂತೆ ಇತ್ತು .

ಅವರ ಏಕಮಾತ್ರ ಪುತ್ರಿ ಗ್ಲಾಸ್ಗೋ ದಲ್ಲಿ ದಂತ ವೈದ್ಯೆ ,ಅಳಿಯ ಡಾ ಹರೀಶ್ ಅಲ್ಲೇ ಎಲುಬು ತಜ್ನ ;ಮೊಮ್ಮಗಳು ಒಬ್ಬಾಕೆ ವೈದ್ಯೆ ,ಇನ್ನೊಬ್ಬಳು ವೈದ್ಯಕೀಯ ವಿದ್ಯಾರ್ಥಿನಿ .

ಕಾಡುವ ಸಾವಿನ ರೂಪಾಂತರ

 ಸಾವುಗಳು ಬಹುವಾಗಿ ಕಾಡುತ್ತಿವೆ . ಹಿರಿಯ ಯರಾದ  ಡಾ ಎನ್ ಟಿ ಭಟ್ ಅವರು ಒಂದು ಕಡೆ  ಇತ್ತೀಚಿಗೆ ಶುಭ ಸಮಾರಂಭ ಗಳೆಂದು ಕರೆಯಿಸಿ ಕೊಳ್ಳುವ   ಮದುವೆ ಮುಂಜಿ ಯಂತಹುಗಳಿಂದ  ವೈಕುಂಠ ಸಮಾರಾಧನೆ ,ಶ್ರಾದ್ಧ ಇತ್ಯಾದಿಗಳಲ್ಲಿ ಭಾಗವಹಿಸುವುದೇ ಹೆಚ್ಚಾಗಿದೆ ಎಂದು ಉಲ್ಲೇಖಿಸಿದ್ದ ನೆನಪು . ದಿವಂಗತ ರಾಗಿರುವ ಹಾಸ್ಯ ಪ್ರವೃತ್ತಿಯ ನಮ್ಮ ಪುರೋಹಿತರೊಬ್ಬರು ಮೊದಲನೇ ವರ್ಗಕ್ಕೆ ಸಿವಿಲ್ ಕೇಸ್ ಎಂದೂ ಮತ್ತೊಂದನ್ನು ಕ್ರಿಮಿನಲ್ ಕೇಸ್ ಎಂದೂ ವರ್ಗೀಕರಿಸಿ ಸೂಚ್ಯವಾಗಿ ಹೇಳುತ್ತಿದ್ದರು . 

ನನ್ನ ಅಜ್ಜ ಆಗಾಗ ಶ್ರೀಕೃಷ್ಣನನ್ನು ಉಲ್ಲೇಖಿಸಿ ಹೇಳುತ್ತಿದ್ದ ಮಾತು "ಆತ್ಮಕ್ಕೆ ಸಾವು ಇಲ್ಲ ,ದೇಹಕ್ಕೆ ಮಾತ್ರ ,ಸಾವಿಗೆ ಅಳಬಾರದು . ನಾನು ನಿರ್ದೇಶಿಸಿದಂತೆ ಪಾತ್ರ ನಿರ್ವಹಿಸಿ ರಂಗ ಮಂಚದಿಂದ ನಿರ್ಗಮಿಸು "

ನನಗೆ ಅರಿವು ಬಂದ ಮೇಲೆ ಮನೆಯಲ್ಲಿ ಸಂಭವಿಸಿದ ಮೊದಲ ಸಾವು ನನ್ನ ದೊಡ್ಡಪ್ಪ ,ಸಿನೆಮಾ ನಟ ಗಣಪತಿ ಭಟ್ ಅವರದ್ದು .ನನ್ನ ಎಸ್ ಎಸ್ ಪರೀಕ್ಷೆಗೆ ಕೆಲವು ದಿನಗಳು ಇನಮ್ಮನ್ನು ರುವಾಗ . ಅಜ್ಜ ಅಜ್ಜಿ  ಬದುಕಿದ್ದರು . ದೊಡ್ಡಪ್ಪನ ಶವ ವನ್ನು  ಮದ್ರಾಸ್ ನಿಂದ ಕಾರಿನಲ್ಲಿ ತಂದು ನಮ್ಮ ಹೊಲದಲ್ಲಿ ಅಂತ್ಯ ಸಂಸ್ಕಾರ . ಮನೆಯಲ್ಲಿ ಎಲ್ಲರೂ ಶೋಕ ತಪ್ತರು . ದೊಡ್ಡಪ್ಪ ವರ್ಷಕ್ಕೊಮ್ಮೆ ಮನೆಗೆ ಬರುತ್ತಿದ್ದರೂ ನಮಗೆಲ್ಲ ಅವರ ಮೇಲೆ ಪ್ರೀತಿ ಗೌರವ .  ಬಿಳಿ ಪೈಜಾಮ ಮತ್ತು ಷರಟು ,ನುಣುಪು ಮುಖ  . ತಮ್ಮಂದಿರ ಮಕ್ಕಳ ಮೇಲೆ ಮಮತೆ . ಓದಿ ಉಶಾರಿ ಆಗ ಬೇಕು ಎಂದು ಹಾರೈಸುತ್ತಿದ್ದರು . ನಿಧನದ ಸುದ್ದಿ ಕೇಳಿ ನೆರೆ ಕರೆಯವರು ,ಬಂಧುಗಳು ಮನೆಗೆ ಆಗಮಿಸಿ ಸಮಾಧಾನ ಹೇಳಿ ಹೋಗುವರು .ಮನೆ ಕೆಲಸದವರು ತಾವೇ ಶವ ಸಂಸ್ಕಾರಕ್ಕೆ ಮತ್ತು ಉತ್ತರ ಕ್ರಿಯೆಗೆ ಬೇಕಾದ ವ್ಯವಸ್ಥೆ ಮಾಡುವರು . ಅಳುವೂ ಹೆಚ್ಚು ,ಸಮಾಧಾನ ಮಾಡುವವರೂ ಅಷ್ಟೇ . ಎಷ್ಟು ವಯಸ್ಸಾದವರೂ ಸತ್ತರೂ ಏನೋ ಕಳಕೊಂಡ  ಮತ್ತು ಇನ್ನೂ ಸ್ವಲ್ಪ ದಿನ ಇರಬೇಕಿತ್ತು ಭಾವ. ನನ್ನ ಅಜ್ಜಿ ಮೌನವಾಗಿ ದುಃಖ ಸಹಿಸಿದರು , ಸಮಾರಂಭದಲ್ಲಿ ಮಾಡಿದ ವಿಶೇಷ ಗಳನ್ನು ತಿನ್ನಲಿಲ್ಲ . ಬಂದ ಹತ್ತಿರದ ನೆಂಟರು  ದುಃಖ ಹಂಚಿಕೊಳ್ಳಲು ಹಲವು ದಿನಗಳು ನಮ್ಮಲ್ಲಿಯೇ ಇದ್ದರು

ಇದಾದ ಮೇಲೆ ಅಜ್ಜ ,ಅಜ್ಜಿ ಇಹಲೋಕ ತ್ಯಜಿಸಿದರು . ದೊಡ್ಡಪ್ಪ ತೀರಿ ಇಪ್ಪತ್ತು ವರ್ಷಗಳ ನಂತರ ಅಪ್ಪ ತೀರಿ ಕೊಂಡರು .ಅವರು ಮೆದುಳಿನ ರಕ್ತ ಸ್ರಾವದಿಂದ ಹಠಾತ್ ಅಸ್ವಸ್ಥ ರಾಗಿ ಆಸ್ಪತ್ರೆ ಸೇರಿದಾಗ ನಾನು ಚೆನ್ನೈ ನಲ್ಲಿ ಇದ್ದು ರಾತ್ರೋ ರಾತ್ರಿ ಮಂಗಳೂರಿಗೆ ಬಂದೆ . ಮರಣೋತ್ತರ ಕಾರ್ಯಕ್ರಮ ಉಪ್ಪಿನಂಗಡಿ ದೇವಳದಲ್ಲಿ (ನಾವು ಆಗ ಆಸ್ತಿ ಮಾರಿ ಆಗಿತ್ತು ). ಬಂಧುಗಳು ಮತ್ತು ಅಂಗ್ರಿಯ ನೆರೆ ಹೊರೆಯವರು ಪ್ರೀತಿಯಿಂದ ಭಾಗವಹಿಸಿದ್ದರು . ಕೊನೆಯ ದಿನ ಪ್ರಾಜ್ಞ ರಾದ  ಶಿರಂಕಲ್ಲು ಈಶ್ವರ ಜೋಯಿಶರು ತಂದೆಯವರ ಬಗ್ಗೆ  ಮಾಡಿದ ನುಡಿ ನಮನ ಆಲಿಸಿದ  ಎಲ್ಲರ ಮಡು ಗಟ್ಟಿದ  ದುಃಖ ಕಣ್ಣಲ್ಲಿ ತುಂಬಿ ಬಂತು . ಆಗಲೂ ತಂದೆಯವರು ಇನ್ನೂ ಸ್ವಲ್ಪ ಕಾಲ ಇರಬೇಕಿತ್ತು ಎಂಬ ಭಾವನೆ . 

ಅದಾಗಿ ಇಪ್ಪತ್ತು ವರ್ಷದಲ್ಲಿ ನನ್ನ ಕಿರಿಯ ಸಹೋದರ ಶ್ರೀನಿವಾಸ ಕ್ಯಾನ್ಸರ್ ನಿಂದ ತೀರಿ ಕೊಂಡ . ನಮಗೆಲ್ಲಾ ಕಿರಿಯವನು , ಉಳಿಸಲು ಮಾಡಿದ ಪ್ರಯತ್ನ ವೆಲ್ಲಾ ವಿಫಲ ವಾಯಿತು . ಬೆಂಗಳೂರಿನ ಪ್ರಸಿದ್ಧ ಆಸ್ಪತ್ರೆಯಲ್ಲಿ ಅವನು ತೀರಿ ಕೊಂಡ ದಿನ ದುಃಖ ತಪ್ತರಾದ ಅವನ ನೂರಾರು  ಸಹೋದ್ಯಗಿಗಳನ್ನು ಸಂಭಾಳಿಸುವುದೇ ಕಷ್ಟವಾಯಿತು . ಅವನಿಗಾಗಿ ಬಂಧು ಮಿತ್ರರು  ಐವತ್ತಕ್ಕೂ ಮೀರಿ  ಯೂನಿಟ್ ರಕ್ತ ದಾನ ಸ್ವಯಂ ಪ್ರೇರಿತ  ರಾಗಿ ಕೊಟ್ಟಿದ್ದರು .  ಎಲ್ಲರಲ್ಲೂ ದುಃಖ ದ  ಛಾಯೆ . 

ಮುಂದೆ ಐದು ವರ್ಷಗಳಲ್ಲಿ ನಮ್ಮ ಅಮ್ಮ . ಈಗ ನಮ್ಮ ದೊಡ್ಡಕ್ಕ . 

ಹಿರಿಯರ ಸಾವಿಗೆ ಪ್ರತಿಕ್ರಿಯೆ ಕೂಡಾ ಕಾಲಕ್ಕೆ ತಕ್ಕಂತೆ ಬದಲಾಗುತ್ತಿದೆ . ಅವರ ಅಗಲಿಕೆ ಶೋಕ ಕ್ಕಿಂತಲೂ ನಿರಾಳತೆ ಉಂಟು ಮಾಡುತ್ತಿದೆ .ಅನಾ ಯೇಸ  ಮರಣಂ ವಿನಾ ದೈನ್ಯೇನ ಜೀವಿತಂ ದೊಡ್ಡದಾಗಿ ಕೇಳಿಸುತ್ತಿದೆ  . ಉತ್ತರ ಕ್ರಿಯಾ ಕಾರ್ಯಕ್ರಮಗಳು ವೈದಿಕ ಆಚರಣೆಗೆ ಸೀಮಿತವಾಗಿ ಊಟವಾದ ಕೂಡಲೇ ಹೆಚ್ಚಿನವರು ತಮ್ಮ ತಮ್ಮ ಮನೆಗೆ . 

ಆಸ್ಪತ್ರೆಯಲ್ಲಿಯೂ ಇದರ ಪೂರ್ವ ಚಿತ್ರಣ ಕಾಣುತ್ತೇವೆ . ಗಂಭೀರ ಕಾಯಿಲೆ ಯಿಂದ ಹಲವು ದಿನಗಳು ಹಿರಿಯರು ಮಲಗಿದರೆ ನೋಡಿಕೊಳ್ಳಲು ಯಾರೂ ಇಲ್ಲ . ನೋಡಲು ಬರುವ ಬಂಧುಗಳೂ ಕಡಿಮೆ . ಕಷ್ಟದಲ್ಲಿ ಬದುಕಿದರೆ ಬಂಧುಗಳಿಗೆ ಸಂತೋಷವೋ ದುಃಖವೋ ಅರಿಯುವುದು ಕಷ್ಟ . 

ಇದರಲ್ಲಿ ಯಾರನ್ನೂ ದೂಷಿಸುವುದಕ್ಕೆ ಇಲ್ಲ . ಕೊನೆಗೆ ಭಗವಂತ ಹೇಳಿದಂತೆ ಆಪ್ತರು ಅಗಲಿದಾಗ ಶೋಕಿಸ ಬಾರದು ಎಂಬುದು ಡಿಫಾಲ್ಟ್ ಆಗಿದೆ . 

ಹಿಂದೆ ನಾನು ಹೇಳಿದಂತೆ ಬದುಕಿದ್ದಾಗ ತಂದೆ ತಾಯಿಯನ್ನು ಚೆನ್ನಾಗಿ ನೋಡಿ ಕೊಳ್ಳಲು ಆಗದಿದ್ದರೂ ವೈಕುಂಠ ಸಮಾರಾಧನೆ ಗೌಜಿಯಿಂದ ಮಾಡುತ್ತಾರೆ . ಅವರ ಆತ್ಮಕ್ಕೆ ಮತ್ತು ಲೋಕಕ್ಕೆ ಅಂಜಿ . ಮಕ್ಕಳು ಒಬ್ಬೊಬ್ಬರ ಕಡೆಯಿಂದ ಒಂದೊಂದು ಸ್ವೀಟ್ ಇರುತ್ತದೆ .ಸಕ್ಕರೆ ಕಾಯಿಲೆಯಿಂದ ಸತ್ತ ಒಬ್ಬರ ಮಗ ನಾಲ್ಕು ಸಿಹಿ ತಿಂಡಿ ಮಾಡಿಸಿದ್ದರು . ತಮ್ಮ ತಂದೆಗೆ ಎಳೆವೆಯಲ್ಲಿಯೇ ಈ ಕಾಯಿಲೆ ಬಂದು ಒಲ್ಲದ ಮನಸಿಂದ ಜೀವನವಿಡೀ ಪಥ್ಯ ಮಾಡಿದ್ದರು . ಅವರ ಆತ್ಮಕ್ಕೆ ಶಾಂತಿ ಸಿಗಲಿ ಎಂಬ ಉದ್ದೇಶ

 

ಶಿಷ್ಯ ಕಣ್ಮಣಿಗಳು

 

ಅಜ್ಞಾನ ತಿಮಿರಾಂಧಸ್ಯ ಜ್ಞಾನಾಂಜನ ಶಲಾಕಾಯ

ಚಕ್ಷುರುನಿರ್ಮಿಲಿತಂ ಏನ್ ತಸ್ಮೈ ಶ್ರೀ ಗುರವೇ ನಮಃl

ಅಜ್ನಾನ ವೆಂಬ  ದೃಷ್ಟಿ (ಕಣ್ಣ )ಪೊರೆಯನ್ನು  ಜ್ನಾನ ವೆಂಬ ಅಂಜನ ಮೂಲಕ ನಿವಾರಿಸಿ  ದೃಷ್ಟಿ  ನೀಡಿದ ಗುರುವೇ ನಿಮಗೆ ನಮಸ್ಕಾರ ,

 ಇದು ವಿದ್ಯೆ ಕಲಿಸಿದ ಗುರುಗಳನ್ನು ನೆನೆಸಿ ಕೊಳ್ಳುವ ಪ್ರಸಿದ್ದ ಶ್ಲೋಕ .

 

ಕೆಲ ವರ್ಷಗಳ ಹಿಂದೆ ಒಂದು ಸಂಜೆ ಹಠಾತ್  ನನ್ನ ಎಡಗಣ್ಣಿನ ಮುಂದೆ ಮಿಂಚು ಗಳ  ಗೊಂಚಲು ,ಆಮೇಲೆ ಹುಳಗಳು ಹರಿದಾಡಿದಂತೆ  ಕಾಣಿಸ ತೊಡಗಿದವು . ಬೆಳಗಾವಿಯಲ್ಲಿ ನೆಲೆಸಿರುವ ನನ್ನ ಮಿತ್ರ ಎಮ್ ಬಿ ಬಿ ಎಸ ಸಹಪಾಠಿ  ಡಾ ವಿವೇಕ ವಾಣಿ ಅವರಿಗೆ ಫೋನಾಯಿಸಿದಾಗ ಅದು ದೊಡ್ಡ ತೊಂದರೆ ಇರಲಿಕ್ಕಿಲ್ಲ ,ಆದರೂ ಮಂಗಳೂರಿನಲ್ಲಿ ಡಾ ಶ್ರೀಪತಿ ಕಾಮತ್  ಎಂಬ ಉತ್ಸಾಹಿ ಅಕ್ಷಿಪಟ ತಜ್ಞರು ಇದ್ದಾರೆ .ಅವರನ್ನು ತುರ್ತು ಕಾಣಿರಿ ಎಂದು ಸಲಹೆ ಮಾಡಿದರು .. ಅದರಂತೆ ವೈದ್ಯರ  ಅಪ್ಪೋಯಿಂಟ್ಮೆಂಟ್ ತೆಗೆದು ಕೊಂಡು ಅವರ ಕ್ಲಿನಿಕ್  ನೇತ್ರ ಜ್ಯೋತಿ ರೆಟಿನಾ ಸೆಂಟರ್ (ಕಲೆಕ್ಟರ್ ಗೇಟ್ ಬಳಿ ) ನನ್ನ ಸರದಿ ಬಂದಾಗ ಪರೀಕ್ಷಾ ಕೋಣೆಗೆ ಕಾಲಿಟ್ಟೆ . ನನ್ನನ್ನು ನೋಡಿದೊಡನೆ ವೈದ್ಯರು "ಸಾರ್ ನಾನು ಎಂ ಬಿ ಬಿ ಎಸ್ ನಲ್ಲಿ ನಿಮ್ಮ ವಿದ್ಯಾರ್ಥಿ ಎಂದು ಸಂತೋಷ ಮತ್ತು ಗೌರವದಿಂದ ಕೂರಿಸಿ ವಿವರವಾದ ತಪಾಸಣೆ ನಡೆಸಿ ,"ಅಕ್ಷಿ ದ್ರವ ಕುಗ್ಗಿ ಅದರ ಪೊರೆ ಅಕ್ಷಿ ಪಟವನ್ನು ಎಳೆದಾಗ ಸಣ್ಣ ಗಾಯ ಆಗಿ ಬಂದ ಸಮಸ್ಯೆ . "ಎಂದು ಲೇಸರ್ ಚಿಕಿತ್ಸೆ ಮಾಡಿ ಧೈರ್ಯ ಹೇಳಿ ಕಳುಹಿಸಿದರು . ಅದರಿಂದ ನನ್ನ ತೊಂದರೆ ಉಲ್ಬಣಿಸದೆ ಶಮನ ಆಯಿ. ತು . ಕಳಿಸಿದ ಗುರುವಿಗೆ ವೈದ್ಯೋಪಚಾರ ಮಾಡಿದ ಧನ್ಯತೆ ಅವರ ಮುಖದಲ್ಲಿ ಕಂಡೆ ,

ಈಗ ಕೆಲವು ತಿಂಗಳಿನಿಂದ ನನ್ನ ಬಲದ ಕಣ್ಣು ಸ್ವಲ್ಪ ಬಲೆ ಬಲೆ ಯಂತೆ ಆಗಲು  ವೈದ್ಯ ಮಿತ್ರ ಡಾ ಹರಿ ಕೃಷ್ಣ ಕಾಮತ್ ಅವರಿಗೆ ತೋರಿಸಲು  ಕಣ್ಣ ಪೊರೆ ಆರಂಭವಾಗಿದೆ ಎಂದರು . ಹಾಗೇ ಒಂದು ದಿನ ಕಾರ್ಯಾರ್ಥ ದೇರಳ ಕಟ್ಟೆಗೆ ಹೋಗಿದ್ದವನು ಬರುವ ದಾರಿಯಲ್ಲಿ ಮೆಲ್ಕಾರಿನಲ್ಲಿ ಅಧೋಕ್ಷಜ ನೇತ್ರಾಲಯ ನಡೆಸುತ್ತಿರುವ ನನ್ನ ಮತ್ತೊಬ್ಬ ಶಿಷ್ಯ  ಡಾ ದುರ್ಗಾ ಪ್ರಸಾದ್ ನಾಯಕ್ ಅವರಲ್ಲಿ ವಿವರವಾಗಿ ಪರೀಕ್ಷೆ ಮಾಡಿಸಿಕೊಂಡು ,ಅವರ ಸಲಹೆಯಂತೆ ವಾರದ ಹಿಂದೆ ಪೊರೆ  ನಿವಾರಣಾ ಶಸ್ತ್ರ ಕ್ರಿಯೆ ಮತ್ತು ಕೃತಕ ಲೆನ್ಸ್ ಧಾರಣೆ ಮಾಡಿಸಿಕೊಂಡೆ  .ಬಹಳ ಪ್ರೀತಿ ಮತ್ತು ಗೌರವ ದಿಂದ ನನ್ನ ಚಿಕಿತ್ಸೆ ನಡೆಸಿ ಕೊಟ್ಟರು . ಡಾ ದುರ್ಗಾ ಪ್ರಸಾದ್ ಎಂ ಬಿ ಬಿ ಎಸ್ ನಲ್ಲಿ ನನ್ನ ಯೂನಿಟ್ ನಲ್ಲಿಯೇ ಇದ್ದವರು . ಪ್ರತಿಭಾವಂತ ..ಅವರ ಶ್ರೀಮತಿ ಡಾ ಪಲ್ಲವಿ ಕೂಡಾ ನನ್ನ ವಿದ್ಯಾರ್ಥಿನಿ ಮತ್ತು ಈಗ ನೇತ್ರ ತಜ್ಞೆ . ಉಪ್ಪಳದಲ್ಲಿ ಕೂಡಾ ಚಿಕಿತ್ಸಾಲಯ ತೆರೆದಿದ್ದಾರೆ .

ಇವರೆಲ್ಲಾ ನನ್ನ ಹೆಮ್ಮೆಯ ವಿದ್ಯಾರ್ಥಿಗಳು .ಗುರುವನ್ನು ಮೀರಿದ ಶಿಷ್ಯರು . ನನ್ನ ಕಣ್ಣಿನ ತಿಮಿರೆಯನ್ನು ಹೋಗಲಾಡಿಸಿ ದೃಷ್ಟಿ ಕೊಟ್ಟವರು . ಇದಕ್ಕಿಂತ ಸಂತೋಷ ಅಧ್ಯಾಪಕನಾದವನಿಗೆ ಬೇಕೇ ?

(ಉಳಿದಂತೆ ನನ್ನ ಅಕ್ಷಿ ಆರೋಗ್ಯ ವನ್ನು ಪ್ರೀತಿಯಿಂದ ನೋಡಿಕೊಳ್ಳುತ್ತಿರುವ ಡಾ ಹರಿ ಕೃಷ್ಣ ಕಾಮತ್ ಅವರಿಗೆ ಋಣಿ )

                                           ಡಾ ಶ್ರೀಪತಿ ಕಾಮತ್

                                   ಡಾ ದುರ್ಗಾ ಪ್ರಸಾದ್ ನಾಯಕ್
 

ಮರೆಯಾದ ಅಕ್ಕ

     

ನನ್ನ ಹಿರೀ ಅಕ್ಕ ಪರಮೇಶ್ವರಿ ನಮ್ಮನ್ನು ಬಿಟ್ಟು ಇಂದು ಅಗಲಿದರು.ನಿನ್ನೆಯೇ ಸ್ವಲ್ಪ ಹೊಟ್ಟೆ ನೋವು ಎಂದು ನನ್ನ ಮನೆಯವರಲ್ಲಿ ತಿಳಿಸಿದ್ದು ಕಡಿಮೆ ಆಗದಿದ್ದರೆ ಇಂದು ಆಸ್ಪತ್ರೆಗೆ ಬರುವ ಯೋಚನೆ ಎಂದು . ರಾತ್ರಿ ನೋವು ಉಲ್ಬಣವಾದರೂ ತಮ್ಮನಿಗೆ ತೊಂದರೆ ಕೊಡುವುದು ಬೇಡ ಎಂದು ಸಹಿಸಿ ಇಂದು ಮುಂಜಾನೆ  ಆಸ್ಪತ್ರೆಗೆ ಬಂದವರೇ ಹೃದಯಾಘಾತ ದಿಂದ ಆಸು ನೀಗಿದರು . ಅದು ತಾಯಿ ಹೃದಯ ;ತಮ್ಮ ಪಾಪ ದಿನವಿಡೀ ಆಸ್ಪತ್ರೆ ಯಲ್ಲಿ ದುಡಿದು ದಣಿದು ಬಂದಿರುತ್ತಾನೆ ;ಸ್ವಲ್ಪ ವಿಶ್ರಮಿಸಲಿ ಎಂದು .

ಅಕ್ಕ  ನನಗಿಂತ ಹತ್ತು ವರ್ಷಗಳ ಹಿರಿಯಳು. ಬಾಲ್ಯದಲ್ಲಿ ಅವಳನ್ನು ನಮ್ಮ ಮನೆಯಲ್ಲಿ ಕಂಡ ನೆನಪು ಇಲ್ಲ . ಏನಿದ್ದರೂ ಅವಳ ಮದುವೆಯಾಗಿ ಹೋದ ಮೇಲೆ ಅಕ್ಕನ ಮನೆಯಲ್ಲಿಯೇ ಒಡನಾಟ . ಒಡ ಹುಟ್ಟಿದವರು ಎಂದರೆ ಪ್ರೀತಿ . ಅವಳ ಮದುವೆಯಾದ ಕಾಲದಲ್ಲಿ ಉಪ್ಪಿನಂಗಡಿ ಯಿಂದ ಆರು ಮೈಲು ನಡೆದೇ ಹೋಗ ಬೇಕು . ನಾಗರೀಕತೆ ಗಾಳಿ ಬೇಸದಿದ್ದ ಊರು ಆದುದರಿಂದ ಮಾನವೀಯತೆ ಯಥೇಷ್ಟ ಇತ್ತು . ನನ್ನ ಬಾವ ಪ್ರಾಥಮಿಕ ಶಾಲೆ ಅಧ್ಯಾಪಕರು .ಅಕ್ಕನದೇ ಕೃಷಿ ವ್ಯವಸಾಯ ಉಸ್ತುವಾರಿ . ನಾಲ್ಕು ಹೆಣ್ಣು ಮಕ್ಕಳು .ಎಲ್ಲರಿಗೂ ಯೋಗ್ಯ ವಿದ್ಯಾಭ್ಯಾಸ ಕೊಡಿಸಿ ನೆಲೆ ಮುಟ್ಟಿಸಿ ,ಬಾವ ತೀರಿ ಹೋದ ಮೇಲೂ ತಾನು  ಮನೆಯನ್ನು ಬಿಡಲು ಸಮ್ಮತಿಸದೆ  ಕೊನೆಯುಸಿರು ತನಕ ತನ್ನ ಕರ್ಮ ಭೂಮಿಯಲ್ಲಿ ನೆಲೆ ನಿಂತರು .

ಅಕ್ಕ ಸಂಗೀತ ಪ್ರೇಮಿ .ಗುತ್ತು ಗೋವಿಂದ ಭಟ್ ಮತ್ತು  ಕಾಂಚನ ಐಯ್ಯರ್ ಅವರಲ್ಲಿ ಸಂಗೀತ ಅಧ್ಯಯನ .ಮಗಳು ,ಮೊಮ್ಮಗಳೂ ಅದೇ ದಾರಿ . ಗ್ರಾಮೀಣ ಭಾಗ ಉರುವಾಲಿನಲ್ಲಿ  ಸಂಗೀತ ಶಾಲೆ  ಆರಂಬಿಸುವ ಹಿಂದೆ  ಅವರ ಪರಿಶ್ರಮ ಇತ್ತು . ಹಿರಿಯಕ್ಕನ ಚಾಳಿ ಮನೆ ಮಂದಿಗೆಲ್ಲಾ ಎಂಬಂತೆ ನಮಗೂ ಸಂಗೀತ ಗಾಳಿ .

         ನಮ್ಮ ಏಳಿಗೆ ಕಂಡು ಹೆಮ್ಮೆ.    ನಾವು ಅಕ್ಕನ ಮನೆಗೆ ರಜೆಯಲ್ಲಿ ಹೋದಾಗ ಸಂಭ್ರಮ .  . ಕೋಟಿ ಚೆನ್ನಯ ಚಿತ್ರದ ಎಕ್ಕ ಸಕ್ಕ ಎಕ್ಕ ಸಕ್ಕ ಎಕ್ಕ ಸಕ್ಕಲಾ ಅಕ್ಕ ಪಂಡ್ಡು ಪಂಮೀನೆಕ್ಲು ಬತ್ತೇರಿತ್ತೆಲಾ ನೆನಪಿಸುವ ಚಿತ್ರಗಳು .

ನಮ್ಮ ತಲೆಮಾರಿನವರಿಗೆ  ಹಿರಿಯರೊಡಗಿನ ಸಂಬಂಧಗಳು ಕಿರಿಯರೊಡನೆ ಇರುವುದಕ್ಕಿಂತ  ಹೆಚ್ಚು ದಟ್ಟವಾಗಿ  ಇತ್ತು .

  ಅಧ್ಯಾಪಕ 

ನಿರಂತರ ಅಧ್ಯಯನ ಒಳ್ಳೆಯ  ಅಧ್ಯಾಪಕನ  ಅವಶ್ಯಕತೆ .  ಬಿ ಎಡ್  ಸೇರಿ ಪದವಿ  ಸ್ನಾತಕೋತ್ತರ ಪದವಿ ಪಿ ಎಚ್ ಡಿ ಇದ್ದರೆ ಸಾಕು ಎಂಬ ನಂಬಿಕೆ ಇದೆ . ದೊಡ್ಡ ಡಿಗ್ರಿ ಇದ್ದಷ್ಟು ಅಧಿಕ  ವೇತನ ಶ್ರೇಣಿ . ಶಿಕ್ಷಣ ವಾಣಿಜ್ಯೀಕರಣ ಆಗಿರುವ ಈ ದಿನಗಳಲ್ಲಿ  ಪದವಿಗಳ ಮೌಲ್ಯಾಂಕನವೇ  ಪ್ರಶ್ನಾರ್ಹ ಆಗಿರುವಾಗ  ಪದವಿಯ ತೂಕ ನೋಡಿ ಅಧ್ಯಾಪಕನ ನಿಜ ಮೌಲ್ಯ ನಿರ್ಧರಿಸುವುದು ತಪ್ಪಾಗುತ್ತದೆ . ಒಂದು ವಿಷಯದಲ್ಲಿ ಸ್ನಾತಕ ,ಸ್ನಾತಕೋತ್ತರ ಪದವಿ ಮಾತ್ರ ಇರುವ ವ್ಯಕ್ತಿ ಪಿ ಎಚ್ ಡಿ ಉಪಾಧಿ ಇರುವವರಿಗಿಂತ ಒಳ್ಳೆಯ ಅಧ್ಯಾಪಕ ನಾಗಿ ಇರ ಬಹುದು . ಒಂದು ಪದವಿ ಗಳಿಸಿದ ಮೇಲೆ ಅಧ್ಯಯನ ಅನಾವಶ್ಯಕ ಎಂಬ ನಂಬಿಕೆ ಸಾರ್ವತ್ರಿಕ ಅಗಿದೆ. ಇನ್ನು ವೈದ್ಯಕೀಯ ರಂಗವೂ ಸೇರಿ ತಥಾ ಕಥಿತ ನಿರಂತರ ಕಲಿಕಾ ಕಾರ್ಯಕ್ರಮಗಳು ಹರಕೆ ಸಂದಾಯ ಕಾರ್ಯಕ್ರಮಗಳೂ ,ಪ್ರದರ್ಶನ ವೇದಿಕೆಗಳೂ ಆಗಿ ಮಾರ್ಪಡುತ್ತಿವೆ ಎಂಬುದು ವಿಷಾಧನೀಯ .ಅಧ್ಯಾಪಕ ವೃತ್ತಿಗೆನೈಜ ಆಸಕ್ತಿ   ಇರುವವರು ಮಾತ್ರ ಬರಬೇಕು    ಕೇವಲ ಸಂಬಳ ಸಾರಿಗೆ ಗಾಗಿ ಅಲ್ಲ .ಮತ್ತು ತನ್ನ ಅಧ್ಯಯನ ಶೀಲತೆ ಕುಂದಿದಾಗ  ಈ ವೃತ್ತಿಗೆ ವಿದಾಯ ಹೇಳ ಬೇಕು.

  ನನ್ನ ಪ್ರಾಥಮಿಕ ಮತ್ತು ಮಾಧ್ಯಮಿಕ ತರಗತಿಗಳಲ್ಲಿ ಎರಡು ವಿಧದ ಅಧ್ಯಾಪಕರು ಇದ್ದರು . ಪಾಠ ವಿಷಯವನ್ನು ಚೆನ್ನಾಗಿ ಓದಿ  ಮನನ ಮಾಡಿ ತರಗತಿಗೆ ಬರುವವರು ಒಂದು ವರ್ಗ . ಮತ್ತು ಹಾಗೆಯೇ ಕ್ಲಾಸ್ ಗೆ ಬಂದು ಪಠ್ಯ ಪುಸ್ತಕ ಓದುವವರು ಎರಡನೇ ವರ್ಗ . ಇವರು ಪಠ್ಯ ಪುಸ್ತಕ ಕೂಡಾ ಯಾವುದಾದರೂ ವಿದ್ಯಾರ್ಥಿಯ ಕೈಯ್ಯಿಂದ ತೆಗೆದು ಕೊಳ್ಳುವವರು, "ನಿನ್ನೆ ನಾವು ಎಲ್ಲಿ ಇದ್ದೆವು ?ಎಂದು ವಿದ್ಯಾರ್ಥಿಗಳನ್ನೇ ಕೇಳಿ ಅಲ್ಲಿಂದ ಮುಂದುವರಿಕೆ .ಒಂದು ವಾಕ್ಯ ಓದಿ ಅದರ ಪೂರ್ವಾರ್ಧ ಪ್ರಶ್ನಾರ್ಥಕ ವಾಗಿ ಪುನರುಕ್ತಿ . ಉದಾ  ಅಶೋಕನು ಸಾಲು ಮರಗಳನ್ನು ನೆಡಿಸಿದನು . ಎಂದು ಓದಿ ಅಶೋಕನು ಸಾಲು ಮರಗಳನ್ನು ? ಎಂಬ ಪ್ರಶ್ನೆ .ಮಕ್ಕಳು ಒಕ್ಕೊರಲಿನಿದ ನೆಡಿಸಿದನು ಎನ್ನಬೇಕು . ಪಠ್ಯ ಪುಸ್ತಕದಲ್ಲಿ ಮುದ್ರಣ ತಪ್ಪು ಇದ್ದರೂ ಅವರ ಗಮನಕ್ಕೆ ಬಾರದು .ಉದಾಹರಣೆಗೆ ನನ್ನ ಸಮಾಜ ಅಧ್ಯಾಪಕರು ಪುಸ್ತಕದಲ್ಲಿ ಇದ್ದುದನ್ನು ಓದುತ್ತಾ "ಕಾರ್ನ್ ವಾಲೀಸ ನು 1799 ನೇ ಫೆಬ್ರುವರಿ 30 ರಂದು ನಾಲ್ಕನೇ ಮೈಸೂರ್ ಯುದ್ಧದಲ್ಲಿ ಟಿಪ್ಪು ಸುಲ್ತಾನ ನನ್ನು ವಧಿಸಿದನು ' ಎಂಬುದನ್ನು ಹಾಗೆಯೇ ಓದಿ ಪುರರುಕ್ತಿ ಮಾಡಿಸುವಾಗ ಒಬ್ಬ ವಿದ್ಯಾರ್ಥಿ ಸಾರ್ ಫೆಬ್ರುವರಿ ಯಲ್ಲಿ ಮೂವತ್ತು ಇಲ್ಲವಲ್ಲಾ ಎಂದು ಹೇಳಿದಾಗ ಅವರು ತಬ್ಬಿಬ್ಬು .ಇಲ್ಲಿ ಪಠ್ಯ ವಿಷಯ ತಮಗೇ ಸರಿಯಾಗಿ ಮನನ ಆಗದಿದ್ದರೂ ಯು ಅಂಡರ್ ಸ್ಟಾಂಡ್ ?ಯು ಅಂಡರ್ ಸ್ಟಾಂಡ್ ?ಎಂದು ವಿದ್ಯಾರ್ಥಿಗಳನ್ನು ಪ್ರಶ್ನಿಸುವರು .

ಪ್ರಸಿದ್ದ ವೈದ್ಯ ಪ್ರಾಧ್ಯಾಪಕ ಡಾ ಕೆ ವಿ ತಿರುವೆಂಗಡಮ್ ' ಕಲಿಸುವುದು ಕಲಿಕೆಯ ಉತ್ತಮ ಮಾರ್ಗ . ಯಾವತ್ತೂ ನಿನಗೆ ತಿಳಿದಿರುವ ಜ್ನಾನ ವನ್ನು ಇನ್ನೊಬ್ಬರಿಗೆ ತಿಳಿಸುತ್ತಲಿರು .ನಿನ್ನ ಜ್ನಾನವೂ ವೃದ್ದಿಸುವುದು "ಎನ್ನುತ್ತಿದ್ದರು .ಅದನ್ನು ತಮ್ಮ ಜೀವನದಲ್ಲಿ ಮಾಡಿ ತೋರಿಸಿದರು  ತಮ್ಮ ಇಳಿ ವಯಸ್ಸಿನಲ್ಲೂ ವೈದ್ಯ ವಿದ್ಯಾರ್ಥಿಗಳಿಗೆ ಉಚಿತವಾಗಿ ಕ್ಲಾಸ್ ತೆಗೆದು ಕೊಳ್ಳುತ್ತಿದ್ದರು .

ಇದೆಲ್ಲಾ ಆಲೋಚನೆ ಬರಲು ಕಾರಣ ಮೊನ್ನೆ ನಿಧನರಾದ ನನ್ನ ಗುರು ಕಮ್ಮಜೆ ಸುಬ್ಬಣ್ಣ ಭಟ್ ಅವರ ನೆನಪು . ನೈಜ ಅಧ್ಯಯನ ಶೀಲ ಅಧ್ಯಾಪಕ ರನ್ನು ಮೊದಲು ನಾನು ಕಂಡುದು ಅವರಲ್ಲಿ .

ಆಧಾರ ಪುರಾಣ

 

 ಸರಕಾರ ಆಧಾರ್ ಕಾರ್ಡ್ ಪದ್ದತಿ ಜಾರಿಗೆ ತಂದಾಗ ವ್ಯಕ್ತಿಯ  ಗುರುತು ಖಾತರಿ ಪಡಿಸುವ ಉದ್ದೇಶ ಮಾತ್ರ ಇತ್ತು . ಉದಾ- ಯಾವುದೇ ಸರಕಾರಿ ಯೋಜನೆಯ ಪ್ರಯೋಜನ ಪಡೆಯುವಾಗ ನಿರ್ದಿಷ್ಟ ವ್ಯಕ್ತಿಗೆ ಸಿಗುವಂತೆ  ಖಾತರಿ ಮಾಡಿಕೊಳ್ಳುವುದು . ಆಧಾರ್ ರಾಷ್ಟ್ರೀಯತೆಯನ್ನು  ಖಾತರಿ ಮಾಡುವುದಿಲ್ಲ . ಈಗ ಬ್ಯಾಂಕ್ ಖಾತೆ ,ಅಸ್ತಿ ನೋಂದಣಿ ,ಗ್ಯಾಸ್ ಕನೆಕ್ಷನ್ ,ಆಸ್ಪತ್ರೆಯಲ್ಲಿ ದಾಖಲು ಎಲ್ಲಾ ಕಡೆ ಆಧಾರ್ ಕೇಳುತ್ತಾರೆ .ದಿನಗಳ ಹಿಂದೆ ಗ್ಯಾಸ್ ಏಜನ್ಸಿ ಯವರು ಆಧಾರ್ ಬೆರಳಚ್ಚು ದೃಡೀಕರಣ ಮಾಡಲು ಸಂದೇಶ ಕಳುಸಿದರು . ನನಗೆ ಗ್ಯಾಸ್ ಸಬ್ಸಿಡಿ ಇಲ್ಲ .ಆದರೂ ದೃಢೀಕರಣ ಏಕೆ ?ಏಜನ್ಸಿ ಯವರಲ್ಲಿ ಕೂಡಾ ಉತ್ತರ ಇರಲಿಲ್ಲ .. ಕುರುಡು ಕಾನೂನುಗಳು . ಬದುಕಲು ಮತ್ತು ಸಾಯಲೂ ಆಧಾರ ಬೇಕು . 

 ನಿಮ್ಮ ಗ್ರಾಹಕರನ್ನು ಅರಿಯಿರಿ (Know your customer)  ಅಥವಾ ಸದಾ ಕಾಡುವ ಕೆ ವೈ ಸಿ  ಒಂದು ಕಾಟ ವಾಗಿ ಮಾರ್ಪಟ್ಟಿದೆ . ಅದಕ್ಕೂ ಆಧಾರ ಬೇಕು . ಬ್ಯಾಂಕ್ ,ಫೋನ್ ,ಗ್ಯಾಸ್ ,ಫಾಸ್ಟಾಗ್ ,ಆಸ್ತಿ ನೋಂದಣಿ  ,ಬಸ್ ಟಿಕೆಟ್ ಇತ್ಯಾದಿ  ಇತ್ಯಾದಿ . ಮೋಸ ಮಾಡುವವರು   ಕೆ ವೈ ಸಿ ಅಪ್ಡೇಟ್ ಎಂದು ಮೆಸೇಜ್ ಲಿಂಕ್ ಕಳುಹಿಸಿ ಪಂಗ ನಾಮ ಹಾಕುವ ಸುದ್ದಿ ಕೇಳುತ್ತಿರುತ್ತೇವೆ . ನಿಮ್ಮ ಆಧಾರ್ ನಂಬರ್ ನಲ್ಲಿ ಬುಕ್ ಮಾಡಿದ ಪಾರ್ಸೆಲ್ ನಲ್ಲಿ ನಿಷೇಧಿತ ವಸ್ತುಗಳಿವೆ ಎಂಬ ಸಂದೇಶ ಕಳುಹಿಸಿ ಬೆದರಿಸಿ ಇ -ದರೋಡೆ ಮಾಡುವವರೂ ಇದ್ದಾರೆ . ಬ್ಯಾಂಕ್ ಗಳಲ್ಲಿ ನೀವು ಕೆ ವೈ ಸಿ ಅಪ್ಡೇಟ್ ಮಾಡಿ ಸ್ವತಃ  ಹೋದರೆ ಅಲ್ಲಿ ನಿಮ್ಮನ್ನು ಗುರುತಿಸಿ ಸ್ವಾಗತಿಸುವವರು ಯಾರೂ ಇರರು .ಮುಖ ಎತ್ತಿ ನಿಮ್ಮನ್ನು ನೋಡಿದರೆ ಪುಣ್ಯ . ಇದು ನೊ  ಯುವರ್ ಕಸ್ಟಮರ್ ಮಹಿಮೆ . 

ಇನ್ನು ಸರಕಾರಿ ಕಚೇರಿಗಳಲ್ಲಿ ಲಂಚ ತೆಗದು ಕೊಳ್ಳುವಾಗ ,ಸಾಮಾನ್ಯವಾಗಿ ಹೇಳುವ ಮಾತು "ಇದು ನಮಗಲ್ಲ ಮೇಲಿನವರಿಗೂ ಪಾಲು ಹೋಗಬೇಕು " ಆದುದರಿಂದ ಅದನ್ನೂ ಆಧಾರ್ ಗೆ ಲಿಂಕ್ ಮಾಡಿದರೆ ನೈಜ ಫಲಾನುಭವಿ ಯಾರು ಎಂದು ಕೊಟ್ಟವನಿಗೆ ತಿಳಿದೀತು .. 

ಆಧಾರ್ ಕಾರ್ಡ್ ,ವೋಟರ್ ಕಾರ್ಡ್ , ಎಟಿಎಂ ಕಾರ್ಡ್ ,ರೇಷನ್ ಕಾರ್ಡ್,ಆಸ್ಪತ್ರೆ ಕಾರ್ಡ್  .ಐಡಿ ಕಾರ್ಡ್ ಇತ್ಯಾದಿ ಕಾರ್ಡ್ ಗಳೂ ಅವುಗಳ ಜೆರಾಕ್ಸ್ ಕಾಪಿಗಳೂ ಎಲ್ಲರ ಜೋಳಿಗೆಗಳಲ್ಲಿ ರಾರಾಜಿಸುವ ಈ ಕಾಲದಲ್ಲಿ  ಕೆಲವು ರೋಗಿಗಳು ರೋಗ ವಿವರ ಇರುವ ನಮ್ಮ ಚೀಟಿ ಕೇಳಿದರೆ ಎಲ್ಲವನ್ನೂ ನಮ್ಮ ಮುಂದೆ ಸುರುವಿ ಹುಡುಕ ಹೇಳುವರು. 

ಆಧಾರ್ ಇದ್ದರೆ ಸಾಲದು . ಅದಕ್ಕೆ ಜೋಡಣೆ ಆಗ ಬೇಕು . ಪಾನ್ ಕಾರ್ಡ್ ,ಬ್ಯಾಂಕ್ ಅಕೌಂಟ್ , ಡಿಮ್ಯಾಟ್ ಅಕೌಂಟ್ ,ರೇಷನ್ ಕಾರ್ಡ್  ಎಲ್ಲದಕ್ಕೂ . ವರ್ಷಗಳ ಹಿಂದೆ ಸೀತಾ ಪರಿತ್ಯಾಗ ಯಕ್ಷಗಾನದಲ್ಲಿ ಅಗಸನ ಪಾತ್ರ ಮಾಡಿದವರು ಹೆಂಡತಿಯೊಡನೆ ಕೋಪದಲ್ಲಿ ಮನೆ ಬಿಟ್ಟು ಎಂದು ಹೇಳಲು ಆಕೆ ನೀವು ಮದುವೆಯಾಗಿ ಕರೆದು ಕೊಂಡು ಬಂದಕ್ಕೆ ಆಧಾರ ಇದೆ ಎಂದು ತಾಳಿ ಯನ್ನು ತೋರಿಸಿದಾಗ ಆತ ಆಧಾರ ಇದ್ದರೆ ಸಾಲದು ಅದು ಜೋಡಣೆಯಾಗಿಯೋ ಎಂದು ಪ್ರಶ್ನಿಸುತ್ತಾನೆ . ಮುಂದೆ ಮದುವೆಯಾಗುವ ಮೊದಲು ಗಂಡು ಹೆಣ್ಣಿನ ಆಧಾರ ಜೋಡಣೆ ಯಾಗಬೇಕು ಎಂದು ಕಾನೂನು ಬಂದೀತು.

ಆದುದರಿಂದ ಆಧಾರ್ ಕಾರ್ಡ್ ಯಾವತ್ತೂ ಜೋಪಾನವಾಗಿ ಇಟ್ಟಿರಿ :ನಿರಾಧಾರ ಆಗದಿರಿ .

 

ನಿನ್ನೆಯ ದಿನ  ಅಪರಾಹ್ನ ಎರಡು ಗಂಟೆಗೆ ಪುತ್ತೂರು ನ್ಯಾಯಾಲಯ ಪರಾಶರ ಸಭಾಂಗಣದಲ್ಲಿ ಎರಡು ಚೊಕ್ಕ ಕಾರ್ಯಕ್ರಮಗಳು . ನೂತನ ನ್ಯಾಯಾಧೀಶ ದೇವರಾಜ್ ಅವರಿಗೆ ಸ್ವಾಗತ ಮತ್ತು  ವಕೀಲ ಭಾಸ್ಕರ ಕೋಡಿಂಬಾಳ ಅವರ ಲಲಿತ ಪ್ರಬಂಧಗಳ ಸಂಕಲನ "ಕಣ್ಣಿಗೆ ಕಾಣದ್ದು ಮನಸ್ಸನ್ನು ಕಾಡಿದ್ದು " ಬಿಡುಗಡೆ . ಪುತ್ತೂರು ವಕೀಲರ ಸಂಘದ ಆಶ್ರಯದಲ್ಲಿ . ನಿವೃತ್ತ ಹೈ ಕೋರ್ಟ್ ನ್ಯಾಯಾಧೀಶ ನ್ಯಾ ಮೂ ಕೃಷ್ಣ ಭಟ್ ಅವರು ಮುಖ್ಯ ಅತಿಥಿ ಮತ್ತು ಕೃತಿ ಅನಾವರಣ ಮಾಡಿದವರು . ಪುತ್ತೂರು ನ್ಯಾಯಾಲಯದ ನ್ಯಾಯಾಧೀಶರು ,ಬಾರ್ ಕೌನ್ಸಿಲ್ ಅಧ್ಯಕ್ಷರು ,ಹಿರಿಯ ನ್ಯಾಯವಾದಿ ಶ್ರೀ ರಾಮ ಮೋಹನ ರಾವು ,ಇಂತಹವರ ಜೊತೆಗೆ ವೇದಿಕೆ ಹಂಚಿಕೊಳ್ಳುವ ಗೌರವ ನನಗೆ .ವೇದಿಕೆಯಲ್ಲಿ ತಲೆ ಹಣ್ಣಾದವರು(ಬಿಳಿ ಅದವರು )ನಾನು ಮತ್ತು ರಾಮ ಮೋಹನ ರಾವ್ ಮಾತ್ರ . ನ್ಯಾಯಾಧೀಶರು ಮತ್ತು ನ್ಯಾಯವಾದಿ ಗಳು  ಕಕ್ಷಿದಾರರ ವಿಚಾರಗಳನ್ನು ತಲೆಗೆ ತೆಗೆದು ಕೊಂಡರೂ ಅದನ್ನು ಹಚ್ಚಿ ಕೊಳ್ಳುವುದಿಲ್ಲ ಎಂದು ತೋರುತ್ತದೆ ವೈದ್ಯರು ರೋಗಿಗಳ ಸಮಸ್ಯೆಗಳನ್ನೂ .

ವಕೀಲರು ,ಸಾಹಿತಿಗಳು ಮತ್ತು ಭಾಸ್ಕರ್ ಅವರ ಬಂಧು ಮಿತ್ರರಿಂದ ತುಂಬಿದ ಸಭಾಂಗಣ .ನ್ಯಾ ಮೂ ಕೃಷ್ಣ ಭಟ್  ಧೋತಿ ಶಾಲು ಧಾರಿಯಾಗಿ ಬಂದಿದ್ದು ವಿಶೇಷ . ಕೃತಿಯನ್ನು ಬಿಡುಗಡೆ ಗೊಳಿಸಿ ಪಾಂಡಿತ್ಯ ಪೂರ್ಣ ಭಾಷಣ ಮಾಡಿದರು ;ಕೃತಿಯನ್ನು ಬಹಳ ಮೆಚ್ಚಿ ಕೊಂಡರು. ವೃತ್ತಿಯಲ್ಲಿ ಅವರು ಎಲ್ಲರ ಪ್ರೀತಿ ಗೌರವ ಗಳಿಸಿದ್ದವರು ಎಂದು ನೆರೆದಿದ್ದ  ನ್ಯಾಯಾಧೀಶರ ಭಾಷಣಗಳಿಂದ ವೇದ್ಯ ವಾಯಿತು .ಸಂಸ್ಕೃತ ,ಕನ್ನಡ ಮತ್ತು ಇಂಗ್ಲಿಷ್ ಸಾಹಿತ್ಯವನ್ನು ಚೆನ್ನಾಗಿ ಓದಿ ಕೊಂಡವರು.ತಾವು ನ್ಯಾಯಾಧೀಶ ರಾಗಿದ್ದಾಗ  ಸಾಹಿತಿಗಳನ್ನು ಕರೆಸಿ ವಕೀಲರ ಸಂಘಗಳಲ್ಲಿ ಭಾಷಣ ಗಳನ್ನು ಏರ್ಪಡಿಸುತ್ತಿದ್ದುನನ್ನು ನೆನೆಪಿಸಿ ಕೊಂಡರು . ಹಿರಿಯ ನ್ಯಾಯವಾದಿ ರಾಮ ಮೋಹನ ರಾವು ಅವರ ಭಾಷಣ ,ನ್ಯಾಯಾಧೀಶರ ,ವಕೀಲ ಸಂಘದ ಪದಾಧಿಕಾರಿಗಳ  ಶುಭಾಂಶನೆ ,ಕೃತಿ ಕರ್ತನ ಭಾಷಣ ಎಲ್ಲವೂ ಚೆನ್ನಾಗಿ ಬಂತು .ಒಟ್ಟಿನಲ್ಲಿ ಒಂದು ಸಂಜೆ ಅರ್ಥ ಪೂರ್ಣ ವಾಗಿ ಕಳೆಯಿತು .  

ರವಿ ಕಾಣದ್ದನ್ನು ಕವಿ ಕಾಣುವ ಎಂಬ ಮಾತು ಇದೆ . ಇಲ್ಲಿ ಕವಿ ರವಿ (ಭಾಸ್ಕರ )ಒಂದು ಗೂಡಿದಾಗ ಆದ ಕೃತಿ ಈ ಹೊತ್ತಿಗೆ .

ಪುಸ್ತಕದ ಮೊದಲ ಲೇಖನ 'ಭಕ್ತರಿಲ್ಲದ ಭಗವಂತನಿಗೆ ಕೆದಿಲ್ಲಾಯ ರಿಂದ  ನಿತ್ಯ ಪೂಜೆ .ಅದರ ಎರಡು ಪಾರಾ ಹೀಗಿದೆ .

ತಿನ್ನಲು ಉಣ್ಣಲು ಬಹಳ ಕಷ್ಟದ ಕಾಲ ವೊಂದಿತ್ತು .ಆದರೆ ಅದೇ ಕಾಲದಲ್ಲಿ ನೆಮ್ಮದಿಗೇನೂ ಕೊರತೆಯಿರಲಿಲ್ಲ .ಆ ಕಾಲದಲ್ಲಿ ಕೋಡಿಂಬಾಳದ ಶ್ರೀ ಮಹಾ ವಿಷ್ಣು ದೇವರ ಬಳಿ ವರ್ಷಕ್ಕೊಮ್ಮೆ ಅಥವಾ ಎರಡು ಸಲ ಬರುತ್ತಿದ್ದ ಭಕ್ತರಲ್ಲಿ ಅನೇಕರು ಬರುವಾಗ ಕಿಸೆಯಲ್ಲಿ ಹುಡುಕುವುದು ಇದ್ದದ್ದರಲ್ಲಿ ಅತೀ ಸಣ್ಣ ಪಾವಲಿಯನ್ನು,ಭಕ್ತರ ಅಂಗಿಯ ಕಿಸೆಯಲ್ಲಿಯೋ ,ಪಂಚೆಯೊಳಗಿನ ಪಟ್ಟೆನಾಮದ ಚಡ್ಡಿಯ ಕಿಸೆಯಲ್ಲಿಯೂ ಅಡಗಿ ಕುಳಿತ ಪಾವಲಿಗೆ ಕೈ ಹಾಕಿದಾಗ ತಪ್ಪಿಸಿ ಕೊಳ್ಳಲಾರದೇ ಸಿಕ್ಕಿ ಹಾಕಿಕೊಂಡವುಗಳಲ್ಲಿ ದೊಡ್ಡದನ್ನೆಲ್ಲಾ ಪುನಃ ಕಿಸೆಗೆ ಹಾಕಿ ಉಳಿದವುಗಳಲ್ಲಿ ಅತೀ ಸಣ್ಣ ಪಾವಳಿಯನ್ನು ಆಯ್ಕೆ ಮಾಡಿ ಭಕ್ತ ತನ್ನ ಡಬ್ಬಿಗೆ ಹಾಕುತ್ತಿದ್ದ .ಇದನ್ನು ನೋಡಿದ ದೇವರು ಶತಮಾನಗಳ ಹಿಂದೆಯೇ ಮರುಕ ಪಟ್ಟಿರ ಬೇಕು .

ಆ ಸಣ್ಣ ಪಾವಲಿಯನ್ನಾದರೂ ಮನಸಾರೆ ತನ್ನ ಡಬ್ಬಿಗೆ ಹಾಕುತ್ತಾನೆಯೇ ?ಅದೂ ಇಲ್ಲ .ಆ ಪಾವಲಿಯನ್ನು ಭಕ್ತ ತನ್ನ ತಲೆಗೆ ಮೂರು ಸುತ್ತರಿಳಿಸಿ ತಾನು ಮಾಡಿದ ಪಾಪ -ತಾಪ ದೋಷಗಳನ್ನೆಲ್ಲಾ ಅದರೊಳಗೆ ಆಪೋಷಣೆ ಗೊಳಿಸಿ ಟಿಂಗ್ ಎಂದು ಡಬ್ಬಿಯೊಳಗೆ ಹಾಕುತ್ತಿದ್ದ .ಡಬ್ಬಿ ಪಾಲಾದ ಪಾವಲಿ ವ್ಯರ್ಥವಾಗದಿರಲಿ ಎಂದು ಎರಡು ಕೈ ಜೋಡಿಸಿ ಕಣ್ಮುಚ್ಚಿ ಅಲ್ಲೇ ಅಡ್ಡ ಬೀಳುತ್ತಿದ್ದ .ಎಲ್ಲವನ್ನೂ ಬಲ್ಲ ದೇವರಿಗೆ ಇದೆಲ್ಲಾ ಅರ್ಥವಾಗದಿರಲು ಸಾಧ್ಯವೇ ?ಖಂಡಿತಾ ಇಲ್ಲ .ಈ ಚಿಲ್ಲರೆ ಪ್ರತಿಫಲ ಹಣಕ್ಕೆ ಜನರು ಮಾಡಿದ ಪಾಪ ತಾನೇಕೆ ಹೊತ್ತು ಕೊಳ್ಳಬೇಕು ಎಂದು ಕೊಂಡಿರಬೇಕು .ಜನರ ಚಿಲ್ಲರೆ ಹಣವೂ ಬೇಡ ,ಆ ಚಿಲ್ಲರೆ ಹಣದಿಂದ ತಾವು ಮಾಡಿದ ಪಾಪ ನಿವಾರಣೆ ಆಯಿತು ಎಂದೂ ಬೇಡ ಎಂದು ನಮ್ಮೂರ ದೇವರು ಜನ ಸಂಚಾರ ವಿರದ ಕೋಡಿಂಬಾಳದ ನಿರ್ಜನ ಪ್ರದೇಶದಲ್ಲಿ ಹಲವು ಶತಮಾನದ ಹಿಂದೆಯೇ ನೆಲಸಿರ ಬೇಕು ."

ಪುಸ್ತಕದ ಮುಖ ಬೆಲೆ ರೂ 150 .ಪ್ರತಿಗಳು ಆದಾಯ ತೆರಿಗೆ ಕಚೇರಿ ಪಕ್ಕದ  ಭಾಸ್ಕರ ಕೋಡಿಂಬಾಳ ಅವರ ಆಫೀಸು ಮತ್ತು ಪುತ್ತೂರು ವಕೀಲರ ಸಂಘದ ಕಚೇರಿಯಲ್ಲಿ ಲಭ್ಯ ಎಂದು ಲೇಖಕರು ತಿಳಿಸಿದ್ದಾರೆ . ಮೊಬೈಲ್ 9448548226.

 ಆತ್ಮೀಯ  ವಕೀಲ ಮಿತ್ರ  ಶ್ರೀ ಭಾಸ್ಕರ  ಕೋಡಿ೦ಬಾಳ  ಅವರ ಲಲಿತ ಪ್ರಬಂಧ ಗಳ ಸಂಕಲನ '' ಕಣ್ಣಿಗೆ ಕಾಣದ್ದು ಮನಸ್ಸನ್ನು ಕಾಡಿದ್ದು" ಇದೆ ಸೋಮವಾರ 19.8.2024  ಅಪರಾಹ್ನ 2 ಗಂಟೆಗೆ ಪುತ್ತೂರು ವಕೀಲರ ಸಂಘ ದ  'ಪರಾಶರ ಸಭಾ ಭವನ "ದಲ್ಲಿ ನೆರವೇರಲಿದೆ .

ಪಂಜೆ ಮಂಗೇಶ ರಾಯರ ಸಬ್ ಅಸಿಸ್ಟಂಟ್ ನ ಸುಳ್ಳು ಡೈರಿ ಯಿಂದ , ಶ್ರೀನಿವಾಸ ಮೂರ್ತಿ ಯವರ ರಂಗಣ್ಣನ ಕನಸಿನ ದಿನಗಳು ,ಬಿ ಜಿ ಎಲ್ ಸ್ವಾಮಿ ಯವರ  ಕೃತಿಗಳಂತೆ  ಗಂಭೀರ ವಿಚಾರ ಗಳನ್ನು ಮೃದು ಹಾಸ್ಯ ಲೇಪನ ದೊಡನೆ ಓದುಗರಿಗೆ ಆಪ್ಯಾಯ ಮಾನ ಆಗುವಂತೆ ಇರುವ ಲೇಖನಗಳು ಈ ಕೃತಿಯಲ್ಲಿ ಇವೆ .

ವಕೀಲರು ನ್ಯಾಯಾಧೀಶರಿಂದ ರಚಿತವಾದ ಮೌಲಿಕ ಕೃತಿಗಳು ಅನೇಕ ಇವೆ .ಮಾಸ್ತಿ ವೆಂಕಟೇಶ ಐಯ್ಯಂಗಾರ್ ಅವರ  ಆತ್ಮ ಚರಿತ್ರೆ "ಭಾವ " ಮತ್ತು ನವರತ್ನ ರಾಮ ರಾವ್ ಅವರ ಕೆಲವು ನೆನಪುಗಳು ಕೃತಿಯಲ್ಲಿ ತಾವು ನ್ಯಾಯಾಧೀಶ ರಾಗಿ ಕಾರ್ಯ ನಿರ್ವಹಿಸುವಾಗ ನಡೆದ ರೋಚಕ ಕತೆಗಳ ಉಲ್ಲೇಖ ಇದೆ . ಅದೇ ರೀತಿ ಕೆ ಪಿ ಎಸ್ ಮೇನೋನ್ ಅವರ ಆತ್ಮ ಚರಿತ್ರೆ ಮೆನಿ ವರ್ಲ್ಡ್ಸ್ ನಲ್ಲಿ . ಇವುಗಳಲ್ಲಿ ಹೆಚ್ಚಿನವು ಆತ್ಮ ಚರಿತ್ರೆಗಳು . ಪ್ರಾಥ ಸ್ಮರಣೀಯ ಎಚ್ ಆರ್  ಖನ್ನಾ ಅವರ ನೀದರ್  ರೋಸಸ್ ನೋರ್ ಥಾರ್ನ್ಸ್ ,ಎಂ ಸಿ ಛಾಗ್ಲಾ  ಅವರ ರೋಸಸ್ ಇನ್ ಡಿಸೆಂಬರ್ ., ಲೈಲಾ ಸೇಥ್ ,ಫಾಲಿ  ನಾರಿಮನ್ ,ಹಿದಾಯತುಲ್ಲಾ ,ಕೃಷ್ಣ ಐಯ್ಯರ್ ,ಎಸ ಎಸ ಸೋಧಿ ಮತ್ತು ನಮ್ಮವರೇ ಆದ  ಎಚ್ ಹನುಮಂತ ರಾಯ ,ಬಿ ವಿ ಆಚಾರ್ಯ ಮತ್ತು ಯು ಎಲ್ ಭಟ್  ಅವರ ಕೃತಿಗಳು ಸಾಹಿತ್ಯಿಕವಾಗಿಯೂ  ಹೆಸರು ಗಳಿಸಿದಂತಹವು . ವಕೀಲರಿಗೆ ತಮ್ಮ ವೃತ್ತಿ ಯಲ್ಲಿ  ಜೀವ ಮತ್ತು ಜೀವನದ ಹಲವು ಮುಖ ಮತ್ತು  ಮಗ್ಗುಲುಗಳು  ಅಯಾಚಿತವಾಗಿ ಗೋಚರವಾಗಿತ್ತವೆ . ಸಾಹಿತ್ಯ ರಚನೆಗೆ ಒಳ್ಳೆಯ ವಸ್ತು ಆಗ ಬಲ್ಲುವು . 

ವಸ್ತು ಇದ್ದರೆ  ಸಾಲದು . ಅದನ್ನು ಗ್ರಹಿಸುವ ಮನಸ್ಸು ಮತ್ತು ಅಕ್ಷರಕ್ಕೆ ಇಳಿಸುವ ಭಾಷಾ ಜ್ಞಾನ ಕೂಡ ಬೇಕಾಗುತ್ತದೆ ,ಇಂತಹ ಪ್ರತಿಭೆ ಭಾಸ್ಕರ್ ಅವರಲ್ಲಿ ಇದೆ ..ಸೂಕ್ಷ್ಮ ಗ್ರಹಣ ,ಹಾಸ್ಯ ಪ್ರಜ್ಞೆ ಮತ್ತು ವೃತ್ತಿ ಕಾರಣ  ನಗರ ವಾಸಿ ಯಾದರೂ ಜತನ ದಿಂದ ಕಾಯ್ದು ಕೊಂಡು ಬಂದ  ಮಣ್ಣಿನ ವಾಸನೆ ಇವು ಅವರ ಪ್ರಭಂದ ಗಳಲ್ಲಿ ಎದ್ದು ಕಾಣುವ ಗುಣಗಳು . 

ಪುತ್ತೂರು ಸಿಟಿ  ಆಸ್ಪತ್ರೆಯಲ್ಲಿ ಆರಂಭದಿಂದ ಅಂದರೆ ಸುದೀರ್ಘ ಹದಿನಾಲ್ಕು ವರ್ಷ ಸೇವೆ ಸಲ್ಲಿಸಿ ಅನಿವಾರ್ಯ ಕಾರಣಗಳಿಂದ ವಿದಾಯ ಹೇಳುತ್ತಿರುವ ಶ್ರೀ ಅಬ್ದುಲ್ ಜಲೀಲ್ ಅವರು .

ಜಲೀಲ್ ಅವರು ಆಸ್ಪತ್ರೆಯಲ್ಲಿ ರೇಡಿಯೊ ಗ್ರಾಫ್ ತಂತ್ರಜ್ನ ರಾಗಿ ರೋಗಿಗಳ ಎಕ್ಸ್ ರೇ ,ಸಿಟಿ ಸ್ಕ್ಯಾನ್  ತೆಗೆಯುವುದರಲ್ಲಿ ಸಿದ್ದ ಹಸ್ತರು . ತಮ್ಮ ಕೆಲಸವನ್ನು ಪ್ರಮಾಣಿಕ ವಾಗಿ ಮಾಡಿದ್ದಲ್ಲಲ್ಲದೆ ,ಅವಶ್ಯ ಬಿದ್ದಾಗ ರೋಗಿಗಳನ್ನು ಸಾಗಿಸುವುದು (ವೀಲ್ ಛೈರ್ ,ಟ್ರಾಲಿ ),ತುರ್ತು ಚಿಕಿತ್ಸಾ ವಿಭಾಗದಲ್ಲಿ ಸಿಬ್ಬಂದಿಗಳಿಗೆ ಸಹಾಯ ಮಾಡುವುದು ಇತ್ಯಾದಿ ಗಳಲ್ಲಿಯೂ ನೆರವಾಗುವರು . 

ಸ್ವಲ್ಪ ಮಟ್ಟಿನ ಅಂಗ ವೈಕಲ್ಯ ಇರುವ ಜಲೀಲ್ ಅವರು ಅದನ್ನು ತೋರ್ಪಡಿಸದೆ ಮತ್ತು ಮೀರಿ ಸಲ್ಲಿಸಿದ ಸೇವೆ 

ನಿಜಕ್ಕೂ ವಿಶೇಷ .ಅವರ ಮುಂದಿನ ಜೀವನ ಆರೋಗ್ಯ ಸುಖ ಶಾಂತಿ ಗಳಿಂದ ಇರಲಿ ಎಂಬ ಹಾರೈಕೆ

ಪರಕ್ಕೆ ಸಂದಾಪುನೆ

 

  ಅತೀವ ಕಷ್ಟ ಬಂದಾಗಬಾಲ್ಯದಲ್ಲಿ ತಾಯಿ( ಮತ್ತು ಈಗ ಪತ್ನಿ ಬಾಯಲ್ಲಿ )ಹಲವು ಬಾರಿ ನನಗೆ ಒಟ್ರಾಸಿ 'ಪರಕ್ಕೆ ಸಂದಾಪುನೆ ' ಎಂದು ಅವರು ಹೇಳಿದ ಕೆಲಸ ನಿರೀಕ್ಷಾ ಮಟ್ಟಕ್ಕೆ ಬರದಿದ್ದಾಗ ಬೈದದ್ದು ಇದೆ . ಪರಕ್ಕೆ ಸಂದಾಪುನೆ ಅಥವಾ ಹರಕೆ ಸಲ್ಲಿಸುವುದನ್ನು ಅಷ್ಟು ತಾಪು ಮಾಡುತ್ತಾರೆ ಎಂದು ನಾನು ಹಲವು ಬಾರಿ ಯೋಚಿಸಿದ್ದಿದೆ .  ,ಜನರು ಧರ್ಮಾತೀತ ವಾಗಿ ದೇವರು ,ದೈವ ಗಳಿಗೆ ಹರಕೆ ಹೇಳುವುದು ನಡೆದು ಕೊಂಡು ಅನತಿ ಕಾಲದಿಂದ ನಡೆದು ಕೊಂಡು ಬಂದಿದೆ . ಒಂದೊಂದು ರೋಗ ಮತ್ತು ಸಂಕಟಕ್ಕೂ ಪರಿಹಾರ ಕೇಳುವ ಪ್ರತ್ಯೇಕ  ಕ್ಷೇತ್ರ ಇವೆ . ಇಲ್ಲಿ ನಂಬಿಕೆ  ಭಕ್ತರಿಗೆ ಒಂದು ಪ್ಲಾಸಿಬೊ ರೀತಿಯ ಧೈರ್ಯ ನೀಡುವುದು . ಎಲ್ಲವನ್ನೂ ವೈಜ್ನಾನಿಕ ವಾಗಿ ನೋಡಲು ಆಗುವುದಿಲ್ಲ . ಅಡ್ಡ ದಾರಿಯಲ್ಲಿ ನಡೆದು ದೇವರಿಗೆ ಹರಕೆ ರೂಪದಲ್ಲಿ ಕಪ್ಪ ಕಾಣಿಕೆ ಕೊಟ್ಟರೆ ಸರ್ವ ಜ್ನಾನಿ ಭಗವಂತ ನಿಗೆ ಗೊತ್ತಾಗದೇ? ಅವನಿಗೆ ಗೊತ್ತಾಗದು ಎಂದು ತಿಳಿದರೆ ಅವನ ಮಹಿಮೆಯನ್ನೇ ಕುಗ್ಗಿಸಿ ದಂತೆ.

              ಹರಕೆ ಹೇಳಿ ಆಯಿತು . ಇಷ್ಟಾರ್ಥ ವೂ ಈಡೇರಿತು . ಆಮೇಲೆ ಜಿಜ್ನಾಸೆ . 'ಭೂತಕ್ಕೆ ಕೋಳಿ ಕೊಡುತ್ತೇನೆ ಎಂದು ಕೋಳಿ ಕೊಳ್ಳಲು ಹೋದಾಗ ಹೇಗೂ ಹರಕೆಗೆ ತಿನ್ನಲು ಅಲ್ಲ ,ಹೆಚ್ಚು ಕ್ರಯದ್ದು ಯಾಕೆ ?  '  ಗೋದಾನ ಮಾಡುತ್ತೇನೆ ಎಂದು ಹೇಳಿಕೊಂಡು ಆಗಿದೆ . ಇನ್ನೂ ತುಂಬಾ ಹಾಲು ಕೊಡುವ ದನವೇ ಆಗ ಬೇಕು ಎಂದು ಏನು ?"ಚಿನ್ನದ ತೊಟ್ಟಿಲು ಕೊಡುತ್ತೇನೆ ಎಂದದ್ದು ಹೌದು ಇಷ್ಟು ಪವನಿಂದೆ ಎಂದು ಹೇಳಿಲ್ಲವಲ್ಲ " ಇತ್ಯಾದಿ ಲೌಕಿಕ ವಿಚಾರಗಳು ಪ್ರಮಾರ್ಥಿಕತೆಯನ್ನು ಅವರಿಸುತ್ತವೆ . ಒಟ್ಟಾರೆ ಹರಕ್ಕೆ ಹೇಳಿದ್ದಕ್ಕೆ ತೀರಿಸಿ ದೇವರ ಲೆಕ್ಕ ಚುಕ್ತಾ ಮಾಡಿದರೆ ಆಯಿತು .ಈ ಅರ್ಥದಲ್ಲಿಯೇ ನನ್ನ ತಾಯಿ ಯವರು ಹೇಳುತ್ತಿದ್ದರು ಅನ್ನಿಸುತ್ತದೆ .ಯಾವುದೇ ಕೆಲಸದಲ್ಲಿ ಆತ್ಮಾರ್ಥತೆ ಇಲ್ಲದೆ ಮಾಡ ಬಾರದು ಎಂಬ ಉದ್ದೇಶ . 

ಇನ್ನೊಂದು ನುಡಿಗಟ್ಟು ಇದೆ ದಕ್ಷಿಣೆಗೆ ತಕ್ಕ ಪ್ರದಕ್ಷಿಣೆ .ಇಲ್ಲಿ ದಕ್ಷಿಣೆ ಕೊಡುವುದು ಯಾರು ,ತಕ್ಕಂತೆ ಪ್ರದಕ್ಷಿಣೆ ಹಾಕುವವವರು ಯಾರು ?ಯಾಕೆಂದರೆ ವಾಡಿಕೆಯಲ್ಲಿ ದಕ್ಷಿಣೆ ಹಾಕುವವರೂ ಪ್ರದಕ್ಷಿಣೆ ಹಾಕುವವರೂ ಒಬ್ಬರೇ ಆಗಿರುತ್ತಾರೆ . ಈಗಿನ ವಾತಾವರಣ]ದಲ್ಲಿ  ದಕ್ಷಿಣೆ ತಕ್ಕ ಪ್ರದಕ್ಷಿಣೆ ಹಾಕುವವರೂ ಅಪರೂಪ . ಮೇಲಿಂದ ಅಥವಾ ಕೆಳಗಿಂದ ಎಂದರೂ ಬಂದರೆ ಮಾತ್ರ ಎಂಬಂತಾಗಿದೆ . 

ನನ್ನ ಅಮ್ಮ ಹೇಳುತ್ತಿದ್ದ ಇನ್ನೊಂದು ಮಾತು ,ಏನು ಮಗ ಒತ್ತಾಯದ ಮೇಲೆ ಶಂಭಟ್ಟನ ರುಜು ಎಂಬ ಮಾತು . ಅವರ ಕಟ್ಟುಪಾಡಿಗೆ ಸಿಕ್ಕ್ಕಿ ಮನಸಿಲ್ಲದ ಮನಸಿನಲ್ಲಿ ಏನಾದರೂ ಮಾಡಿದರೆ ಹೇಳುತ್ತಿದ್ದರು 

ಕೆಪ್ಪಟ್ರಾಯ

 ಕೆಪ್ಪಟ್ರಾಯ ಬೇಸಿಗೆಯಲ್ಲಿ  ಸೋಂಕು ರೋಗಗಳ ಹಾವಳಿ .ಇದೇ  ಸಮಯ ವಾರ್ಷಿಕ ಪರೀಕ್ಷೆಗಳೂ ನಡೆಯುವವು . ಈ ವರ್ಷ  ಮಕ್ಕಳಲ್ಲಿ ಮತ್ತು ಯುವಕರಲ್ಲಿ  ಹೆಚ್ಚಾಗಿ ಕಂಡು ಬಂದ ಕಾಯಿಲೆ ಕೆಪ್ಪಟರಾಯ ಅಥವಾ ಮಂಪ್ಸ್ . ಇದು ಒಂದು ವೈರಸ್ ಜನ್ಯ ಮತ್ತು ತಾನೇ ವಾಸಿ ಯಾಗುವ  ಕಾಯಿಲೆ . 

ಈ ಕಾಯಿಲೆ ಲಾಲಾರಸ  ಉತ್ಪತ್ತಿ  ಮಾಡುವ ಪ್ಯಾರೋಟಿಡ್ ಗ್ರಂಥಿಯನ್ನು ಮುಖ್ಯವಾಗಿ ಬಾಧಿಸುವುದಾದರೂ ಉಳಿದ ಲಾಲಾ ಗ್ರಂಥಿ ಗಳು  ,ವೃಷಣ ಬೀಜ ,ಅಂಡಾಶಯ ,ಮೇದೋಜೀರಕ ಗ್ರಂಥಿ  , ಅಪರೂಪಕ್ಕೆ ಮೆದುಳನ್ನೂ . ಒಂದು ಅಥವಾ ಎರಡು ಪ್ಯಾರೋಟಿಡ್  ಗ್ರಂಥಿ ಊದಿ  ಕೊಂಡು ವಿವರೀತ ನೋವು ,ಜ್ವರ ಬರುವುದು . ಕೆಲವರಲ್ಲಿ ವೃಷಣ ಬಾಧೆ ಪ್ಯಾರೋಟಿಡ್ ಊತ ಕಡಿಮೆ ಆದಮೇಲೆ ಅಥವಾ ತತ್ಸಮಯ ಬರಬಹುದು .ಅಂಡಾಶಯ ಅಥವಾ ಮೇದೋಜೀರಕ ಗ್ರಂಥಿ ಗೆ ಕಾಯಿಲೆ ಬಂದರೆ ಹೊಟ್ಟೆ ನೋವು ಉಂಟಾಗುವುದು 

ಈ ಕಾಯಿಲೆಗೆ ನೋವು ನಿವಾರಕಗಳನ್ನು ಕೊಟ್ಟು ವಿಶ್ರಾಂತಿ ಸಲಹೆ ಮಾಡುವರು . ಮಂಪ್ಸ್  ವೈರಸ್ ಗೆ ಔಷಧಿ ಇಲ್ಲ . ತಡೆಗಟ್ಟುವ  ಲಸಿಕೆ ಇದೆ . ಮಕ್ಕಳ ಲಸಿಕಾ ಕಾರ್ಯಕ್ರಮದಲ್ಲಿ ಎಂ ಎಂ ಆರ್ ನಲ್ಲಿ ಮೊದಲನೇ ಎಂ  ಮಂಪ್ಸ್ . ಲಸಿಕೆ ಕೊಂಡವರಲ್ಲಿ ಕೂಡಾ ಈ ವರ್ಷ ಸ್ವಲ್ಪ ತೀವ್ರತರ ನೋವು ಬಂದಂತೆ ಇದೆ . ವೈರಸ್ ರೂಪ ಬದಲಿಸುವುದು ಕಾರಣ ಇರ ಬಹುದು . 

ಲಾಲಾ ರಸದಲ್ಲಿ ವೈರಾಣು ಇರುವುದು ,ಜಲ ಬಿಂದು ರೂಪದಲ್ಲಿ ಗಾಳಿ ಮೂಲಕ ಹರಡುವುದು . 

ಎರಡೂ  ವೃಷಣಗಗಳ  ಬಾಧೆ ಬಂದರೂ ವೀರ್ಯಾಣುಗಳ ಕೊರತೆ ಅಪರೂಪದಲ್ಲಿ ಆಗ ಬಹುದಷ್ಟೇ . 

ಬಾಲಂಗೋಚಿ : ನನಗೆ ಬಾಲ್ಯದಲ್ಲಿ ಕೆಪ್ಪಟ್ರಾಯ  ಬಂದಿತ್ತು .ಆಗ ಅದಕ್ಕೆ ಗಾಮಟೆ  ತೊಗಟೆ  ಅರೆದು ಹಚ್ಚುತ್ತಿದ್ದು ಕಹಿ ಕಷಾಯ ಕೊಡುತ್ತಿದ್ದರು . ಒಮ್ಮೆ ಕಾಯಿಲೆ ಬಂದರೆ ನೈಸರ್ಗಿಕ ರೋಗ ಪ್ರತಿಬಂಧಕ ಶಕ್ತಿ ಬರುವುದು

 ತೆ ಲಿಂದ  ನಿಲವು ಪಟ್ಟ ಪಗಲ್ ಪೋಲೆ ಎರಿಯುದೇ 

ಈ ಸುಡು ಬೇಸಗೆ ಮತ್ತು   ರಾಜಕೀಯ ಬೇಗೆ ಶಮನ ಗೊಳಿಸಲು ತಣ್ಣೀರು ಮತ್ತು ಸಂಗೀತ ದ ಆಶ್ರಯ ಪಡೆಯುತ್ತೇನೆ. ಮೊನ್ನೆ ಸಂಜೆ ಪ್ರಸಿದ್ಧ ತಮಿಳು ಕೀರ್ತನೆ ಅಲೈ ಪಾಯುದೇ ಕಣ್ಣಾ ಏನ್ ಮನ ಮಿಗ ಅಲೈ ಪಾಯುದೇ  ಕೇಳುತ್ತಿದ್ದೆ .  ಕೃಷ್ಣ ನ ಕುರಿತು ಗೋಪಿಕೆ ಯ  ಹಾಡು . ನಿನ್ನ ಕೊಳಲ ಸಂಗೀತ ಅಲೆ ಅಲೆಯಾಗಿ ಬರುತ್ತಿದೆ ಎಂಬುದು ಪಲ್ಲವಿ ಅರ್ಥ ಇರಬೇಕು . ಈ ಗೀತೆಯ ಒಂದು ಸಾಲು' ತೆ ಲಿಂದ  ನಿಲವು ಪಟ್ಟ ಪಗಲ್ ಪೋಲೆ ಎರಿಯುದೇ 'ಎಂದು ಆರಂಭ ವಾಗುತ್ತದೆ . ತಿಳಿ ಬೆಳದಿಂಗಳು ಕೂಡಾ ಮಟ  ಮಧ್ಯಾಹ್ನ ದಂತೆ  ಉರಿಯುತ್ತಿದೆ .(ನಿನ್ನ ಪ್ರೇಮ ತಾಪದಲ್ಲಿ ಎಂದು ಇರಬೇಕು  )ಎಂದು ಅರ್ಥ . ಇದನ್ನು ಕೇಳುತ್ತಿದ್ದ ಸಮಯ ಸಂಜೆ ಏಳು ಗಂಟೆ . ಎಂದೂ ಕಾಣದ ಸೆಖೆ . ಕೃಷ್ಣನ ಕೊಳಲ ಗಾನ ಇಲ್ಲದಿದ್ದರೂ ಪಟ್ಟ ಪಗಲ್ ಪೋಲ್ ಎರಿಯುದೇ  ಎಂದು ನನ್ನ ಮನೆಯವರಲ್ಲಿ ಹೇಳಿದೆ . 

ಇಂತಹುದೇ ಅರ್ಥ ಬರುವ ಹಳೆ ಜನಪ್ರಿಯ ಚಿತ್ರ ಗೀತೆ ಒಂದು ಇದೆ .  ನಲ್ಲ ನಲ್ಲೆಯನ್ನು ಕುರಿತು ಹಾಡುವುದು

"ಬಳಿ  ನೀನಿರಲು ಬಿಸಿಲೇ  ನೆರಳು  ಮಧುಪಾನ ಪಾತ್ರೆ  ನಿನ್ನೊಡಲು ಮಧುವಿಲ್ಲದೆ ಮದವೇರಿಪ ನಿನ್ನಂತರಂಗ ಮಧುರಂಗ " ಇಲ್ಲಿ ಸೂರ್ಯನ ತಾಪಕ್ಕೆನಲ್ಲೆಯ ಸಾನ್ನಿಧ್ಯ ತಂಪೆರೆದರೆ , ಮೇಲಿನ ಗೀತೆಯಲ್ಲಿ  ತಂಪಾದ ಬೆಳದಿಂಗಳಲ್ಲೂ ಹಗಲ  ತಾಪ . 

ಏನಿದ್ದರೂ ಇಂತಹ ಆಲಾಪಗಳಿಗೆಲ್ಲ ಈ ಉರಿ ಬೇಸಿಗೆ ಹೇಳಿದ್ದಲ್ಲ

ಚಿಣ್ಣರೊಂದಿಗೆ ಸ್ವಲ್ಪ ಹೊತ್ತು 

 ಯುವ  ಉದ್ಯಮ ಶೀಲ  ದಂಪತಿಗಳಾದ ಗಣೇಶ್  ಮತ್ತು  ಪ್ರಫುಲ್ಲ  ಹಲವು ವರ್ಷಗಳಿಂದ  ನನಗೆ ಪರಿಚಿತರು ;ನಮ್ಮ ಆಸ್ಪತ್ರೆಯ ಸಮೀಪ ತರಬೇತಿ ಸಂಸ್ಥೆ ಯೊಂದನ್ನು ನಡೆಸುತ್ತಿದ್ದು  ನನ್ನ ಮೇಲೆ ಅಭಿಮಾನ ಇಟ್ಟುಕೊಂಡವರು . ದಿವಸಗಳ ಹಿಂದೆ ತಮ್ಮ ಸಂಸ್ಥೆ ನಡೆಸುತ್ತಿರುವ ಮಕ್ಕಳ  ಬೇಸಿಗೆ ಶಿಬಿರದ ಸಮಾರೋಪ ಸಮಾರಂಭ ಕ್ಕೆ ಅತಿಥಿ ಗಳಾಗಿ ಬರಬೇಕು ಎಂದು ಕೇಳಿ ಕೊಂಡಾಗ ಈಗಿನ ಗೊಂದಲ ಮತ್ತು  ಬಿಸಿಲು ಎರಡರಿಂದ ಸ್ವಲ್ಪ ವಿರಾಮ ವಾಗಲಿ ಎಂದು ಒಪ್ಪಿಕೊಂಡೆನು . ನಿರಾಸೆ ಆಗಲಿಲ್ಲ 

ನಮ್ಮ ಬಾಲ್ಯದಲ್ಲಿ ಸಮ್ಮರ್ ಕ್ಯಾಂಪ್ ಅಜ್ಜನ ಮನೆಯಲ್ಲಿ . ಅಲ್ಲಿ ಅಜ್ಜಿ ,ಮಾವ ಅತ್ತೆ ,ಅವರ ಮಕ್ಕಳ ಜತೆ . ಸ್ವಂತ ಮನೆಯೇತರ ವಾತಾವರಣ ಕ್ಕೆ ಹೊಂದಿಕೊಳ್ಳುವುದು ,ತೋಟ ,ಗುಡ್ಡೆ ಅಲೆಯುವುದು ,ತನ್ಮೂಲಕ ಸಹಜ ಕಲಿಕೆಯೂ ಆಗುವುದು . ನಮ್ಮ ಭಾವಂದಿರೊಂದಿಗೆ ಅವರ ತರಗತಿಗಳಿಗೆ ಅತಿಥಿ ವಿದ್ಯಾರ್ಥಿ ಯಾಗಿ ಹೋಗಿದ್ದೂ ಇದೆ . ಕೇರಳದಲ್ಲಿ ಓಣಂ ಗೆ ಹೆಚ್ಚು ರಜೆ ಇದ್ದುದರಿಂದ ನಮ್ಮ ರಜಾ ದಿನಗಳಲ್ಲಿ ಅವರಿಗೆ ಶಾಲೆ ಇರುತ್ತಿತ್ತು . ಸ್ವಂತ ಮನೆಯ ಮಕ್ಕಳಿಗೆ ಇರುವ ಕಟ್ಟು ನಿಟ್ಟಿನ ನಿಯಮಗಳು  ಅತಿಥಿಗಳಾದ ನಮಗೆ ಕಡಿಮೆ ಅನ್ವಯ ಅಲ್ಲದೆ  ಅತಿಥಿಗಳು ಇರುವಾಗ ಮನೆ ಮಕ್ಕಳಿಗೆ ಪೆಟ್ಟು ಬೀಳುತ್ತಿದುದು ಕಡಿಮೆ . ಅಜ್ಜನ ಮನೆಯಲ್ಲಿ ಇದ್ದ ಕತೆ ಪುಸ್ತಕಗಳನ್ನು ಓದುವುದು ;ಜತೆಗೆ ನಮ್ಮ ಭಾವಂದಿರ  ಪಠ್ಯ ಪುಸ್ತಕಗಳು .. ಇಂತಹ ಸಹಜ ಶಿಬಿರಗಳು ಮಕ್ಕಳು  ಸಮಾಜ ಜೀವಿಗಳಾಗಲು ಸಹಾಯ ಎಂದು ನನ್ನ ಅನಿಸಿಕೆ . 

ಆದರೆ ಈಗ ಅಂತಹ ದೀರ್ಘ ಕಾಲದ ಅಜ್ಜಿ ಮನೆ ವಾಸ ಕಾಣೆಯಾಗಿದೆ .ಮಕ್ಕಳು ಸುಮ್ಮನೆ ಬಿಟ್ಟರೆ ಮೊಬೈಲ್ ಟಿವಿ ರಾಗುತ್ತಾರೆ .ದಿನವಿಡೀ ಆಟವಾಡಲೂ ಆಗುವುದಿಲ್ಲ . ಅದಕ್ಕೆಂದು ಬೇಸಗೆ ಶಿಬಿರಗಳನ್ನು ಏರ್ಪಡಿಸುವರು . ಇಂತಹ ಶಿಬಿರಕ್ಕೇ ಮೊನ್ನೆ ಹೋದುದು . ಈಗಿನ ಮಕ್ಕಳು ಮೇಲ್ನೋಟಕ್ಕೆ ನಾವು ಬಾಲ್ಯದಲ್ಲಿ ಇದ್ದುದಕ್ಕಿಂತ ಬಹಳ ಚೂಟಿ ಯಾಗಿರುವುದಲ್ಲದೆ  ,ಸಂಕೋಚ ,ಅತಿ ನಾಚಿಕೆ ಇಲ್ಲ . ನೀವೆಲ್ಲಾ ದೊಡ್ಡ ವರಾಗಿ ಏನು ಆಗ ಬಯಸುತ್ತೀರಿ ಎಂದುದಕ್ಕೆ ಡಾಕ್ಟರ್ ಎಂದು ಒಬ್ಬರೂ ಹೇಳಲಿಲ್ಲ . ಒಬ್ಬಳು ಹುಡುಗಿ ನನಗೆ ಆರ್ಟಿಸ್ಟ್ ಆಗಬೇಕು ಎಂದಳು