ನಡುವಿನ ನಾರಾಯಣರು

 

 ಶೇಕ್ಸ್ ಪಿಯರ್ ನ  ಮರ್ಚೆಂಟ್ ಆ ವೆನಿಸ್ ನಿಂದ ಆಯ್ದ ಸಂಭಾಷಣೆ 

ನೆರಿಸ್ಸಾ : ನಿಮ್ಮ ಸಂಕಷ್ಟಗಳು ಅದೃಷ್ಟ ದಷ್ಟೇ ಧಾರಾಳ ವಿರುವುದರಿಂದ ಬಸವಳಿದಿರುವಿರಿ . ನನ್ನ ಪ್ರಕಾರ ಸಿರಿ ಕಾಲು ಮುರಿದು ಕೊಂಡು ಬಿದ್ದಿರುವ ಲಕ್ಷ್ಮಿ ನಾರಾಯಣ ಮತ್ತು ಒಂದು ಹೊತ್ತು ಊಟಕ್ಕೂ ತತ್ವಾರ ಇರುವ ದರಿದ್ರ ನಾರಾಯಣ ಇಬ್ಬರೂ  ಬಳಲುವರು .ಸುಖಿಯಾಗಿ ಇರುವವರು ಇವರೆಡರ ನಡುವಿನವರು  (ನಡು ವಿನ ನಾರಾಯಣರು ).  ಅಧಿಕ  ಸಂಪತ್ತು  ಶೀಘ್ರ ಮುಪ್ಪಿಗೆ ಅಹ್ವಾನ ;ಅಲ್ಲಿಂದೆಲ್ಲಿಗೆ ಬದುಕಲು ಅನುಕೂಲ ಇರುವವರು ಧೀರ್ಘಾಯುಷಿಗಳು . 

  ಪೋರ್ಷಿಯಾ :  ಮುತ್ತಿನಂತ ಮಾತು ಸರಿಯಾಗಿ ಹೇಳಿದಿ

ನೆರಿಸ್ಸಾ : (ನುಡಿಯೊಳಗೆ ಆಗಿ )ನಡೆಯೊಳಗೆ ಆದರೆ ಇನ್ನೂ ಉತ್ತಮ . 

ಪೋರ್ಷಿಯಾ :ಒಳಿತು ಯಾವುದು ಎಂದು ಗೊತ್ತಿದ್ದೂ ಅದನ್ನು ಅನುಸರಿಸುವುಸು ಸುಲಭವಾಗಿದ್ದರೆ  ಗುಡಿಗಳು ದೊಡ್ಡ ದೇವಾಲಯಗಳಾಗಿ ಬಡವನ ಗುಡಿಸಲುಗಳು  ರಾಜಕುಮಾರನ ಅರಮನೆಗಳಾಗಿ ಬಿಡುತ್ತಿದ್ದವು. ನುಡಿದಂತೆ ನಡೆವವನು ಒಳ್ಳೆಯ ಪ್ರವಾಚಕ .  ಇಪ್ಪತ್ತು ಮಂದಿಗೆ ಒಳಿತು ಏನು ಎಂಬುದನ್ನು ಬರೀ  ಬೋಧಿಸುವುದು ,ಅವರೊಳಗೊಬ್ಬನಾಗಿ ಅದನ್ನು ಪಾಲಿಸುವುದಕ್ಕಿಂತ ಸುಲಭ . ನಮ್ಮ ಮನಸಿನ ನುಡಿಯ ಹೃದಯ ಪಾಲಿಸದು .

 ಟಿಪ್ಪಣಿ : ಈಗ ನಮ್ಮಲ್ಲಿ  ಪರಿಸ್ಥಿತಿ ಬೇರೆ ಇದೆ ಜನ ಹೇಳಿಕೊಳ್ಳುತ್ತಿದ್ದಾರೆ .ಏನೂ ಇಲ್ಲದವರಿಗೆ ಸರಕಾರ ಉಚಿತ ಆಹಾರ ಧಾನ್ಯ ಕೊಡುತ್ತಿದೆ  .ಕೋಟ್ಯಾಧಿಪತಿ ಗಳು ಸಂಕಷ್ಟದ ಬಹಳ ಸಮಯದಲ್ಲಿಯೇ ಇನ್ನೂ ಸಿರಿವಂತರಾಗುವರು . ನಡುವಿನವರು ಮೂರು ಹೊತ್ತು ಉಣ್ಣಲು ಇದ್ದವರು ಲಾಕ್ ಡೌನ್ ನಿಂದ  ಸಂಪಾದನೆ ಇಲ್ಲದೆ ಬವಣೆ ಪಡುತ್ತಿರುವರು . ಸಂಪತ್ತಿನ ನಡುವೆ ಹುಟ್ಟಿದವರು ವ್ಯಾಯಾಮ ಇಲ್ಲದೆ , ತಿನ್ನುವುದು ಹೆಚ್ಚಾದ ಕಾರಣ  ಶೀಘ್ರ ವೃದ್ಧಾಪ್ಯ ಬರುವುದು ನಿಜ .

ನಮ್ಮ ನಾಯಕರು ಮಾಸ್ಕ್ ಧರಿಸಿ ಅಂತರ ಪಾಲಿಸಿ ಎಂದು ಉಪದೇಶಿ ಸಿದ್ದೇ ಉಪದೇಶಿ ಸಿದ್ದು.ಆದರೆ ತಾವೇ ಅದನ್ನು  ಪಾಲಿಸಲಾಗಲಿಲ್ಲ 

    

NERISSA You would be, sweet madam, if your miseries were in the same abundance as your good fortunes are. And yet for aught I see, they are as sick that surfeit with too much as they that starve with nothing. It is no mean happiness, therefore, to be seated in the mean. Superfluity comes sooner by white hairs, but competency lives longer.
PORTIA Good sentences, and well pronounced.
NERISSA 10They would be better if well followed.
PORTIA If to do were as easy as to know what were good to do, chapels had been churches and poor men’s cottages princes' palaces. It is a good divine that follows his own instructions. I can easier teach twenty what were good to be done than be one of the twenty to follow mine own teaching. The brain may devise laws for the blood, but a hot temper leaps o'er a cold decree. Such a hare is madness the youth—to skip o'er the meshes of good counsel the cripple. But this reasoning is not in the fashion to choose me a husband. O me, the word “choose!” I may neither choose whom I would nor refuse whom I dislike—so is the will of a living daughter curbed by the will of a dead father. Is it not hard, Nerissa, that I cannot choose one nor refuse none?

ರೋಗಕಾರಕ ಫಂಗಸ್ ಗಳು

 ರೋಗಕಾರಕ ಫಂಗಸ್(ಶಿಲೀಂದ್ರ) ಗಳು 

ಫಂಗಸ್ ಸೋಂಕು ಸಾಮಾನ್ಯ ,ವಿಶೇಷ ಏನೂ ಅಲ್ಲ . ನಾವೂ ಅವುಗಳು ಪರಸ್ಪರ ಸಹಯೋಗದಲ್ಲಿ ಬದುಕುತ್ತಿದ್ದೇವೆ .  ಚರ್ಮ ರೋಗಗಳಾದ ಸಿಬ್ಬ(Tenia versicolor) ಮತ್ತು ಉಗುರಿನ ಕೆಲ್ಲು(Onychomycosis) ಮತ್ತು ಮಳೆಗಾಲದಲ್ಲಿ ಕಾಲಿನ ಬೆರಳುಗಳ ನಡುವೆ ಬರುವ ನೀರು ಕಜ್ಜಿ ಎಲ್ಲವೂ ಫಂಗಸ್ ಗಳಿಂದ . ಹೆಚ್ಚಾಗಿ ಇವುಗಳ ಬಗ್ಗೆ ತಲೆ ಕೆಡಿಸಿ ಕೊಳ್ಳುವುದಿಲ್ಲ ಮತ್ತು ಚಿಕಿತ್ಸೆ ಮಾಡಿಸಲೂ ಹೋಗುವುದಿಲ್ಲ .                      

.

ಇತ್ತೀಚೆಗೆ ಕೋವಿಡ್ ಪರ್ವದಲ್ಲಿ ಕಪ್ಪು ಮತ್ತು ಬಿಳಿ ಫಂಗಸ್ ಎಂಬ ಹೆಸರು ಕೇಳಿ ಬರುತ್ತಿವೆ .ಯತಾರ್ಥದಲ್ಲಿ ಫಂಗಸ್ ಗಳಲ್ಲಿ ಈ ತರಹದ ವರ್ಣ ಭೇದ ಇಲ್ಲ .ಒಂದೊಂದು ವರ್ಗದ ಶಿಲೀಂದ್ರ ಉಂಟು ಮಾಡುವ ರೋಗದ ಪರಿಣಾಮ ಅಂಗಗಳಿಗೆ ಸ್ವಲ್ಪ  ಕಪ್ಪು ಅಥವಾ ಬಿಳಿ ಬಣ್ಣ ಬರ ಬಹುದು . ಅದರಿಂದ ವಾಡಿಕೆ ಯಲ್ಲಿ  ಬಂದ ಹೆಸರುಗಳು .

ಉದಾಹರಣೆಗೆ  ಕ್ಯಾಂಡಿಡಾ ಎಂಬ ಫಂಗಸ್ ಸೋಂಕಿನಿಂದ ಬಾಯಿ ಗಂಟಲು ಒಳಗೆ ಬಿಳಿ ಪೊರೆ ಉಂಟು ಮಾಡಬಲ್ಲುದು .ಅದೇ ರೀತಿ ಮ್ಯೂಕೋರ್ ಮೈಸಿಟೀಸ್ ಎಂಬ ಶೀಲಿಂದ್ರ  ಮೂಗು ಕಣ್ಣು ಬಾಯಿಗಳಲ್ಲಿ  ಸೋಂಕಿನಿಂದ ಚರ್ಮ ಕಂದು ಅಥವಾ ಕಪ್ಪು ಬಣ್ಣಕ್ಕೆ ತಿರುಗುವಂತೆ ಮಾಡ ಬಹುದು . 

 ಅವಕಾಶವಾದಿ ರೋಗಾಣುಗಳು ಎಂಬ ಪ್ರಭೇಧ  ಇದೆ  .(Opportunistic Pathogens ). ಈ ಫಂಗಸ್ ಗಳೂ ಅದೇ ಜಾತಿಗೆ ಸೇರಿದವು .ನಮ್ಮ ಮನುಷ್ಯರಲ್ಲಿಯೂ  ಬಹಳ ಮಂದಿ ಇದೇ ವರ್ಗಕ್ಕೆ ಸೇರಿದವರು ಇದ್ದೇವೆ .ನೀವು ಕೋವಿಡ್ ಸಾಂಕ್ರಾಮಿಕ ಕಾಲದಲ್ಲಿ ತಮ್ಮ ಬೇಳೆ ಬೇಯಿಸಿ ಕೊಳ್ಳುವ ಅನೇಕರನ್ನು ನೋಡಿದ್ದೀರಿ . ಮೇಲ್ನೋಟಕ್ಕೆ ಸುಭಗ ಸಂಭಾವಿತರಾದ ಇವರು ಸಮಯ ಸಿಕ್ಕಾಗ ಅರಿವಿಲ್ಲದಂತೆಯೇ ಧಾಳಿ ಮಾಡುವರು . ಅವಕಾಶ ನೋಡಿ ವೈರಿಯ ಮೇಲೆ ಆಕ್ರಮಣ ಮಾಡುವದು ಮಹಾಭಾರತ ಯುದ್ಧದಲ್ಲಿಯೂ ಕಂಡಿದ್ದೇವೆ . ಉದಾ ಕರ್ಣನ ರಥ ಮುರಿದು ಬಿದ್ದಾಗ .

ನಮ್ಮ ಅರೋಗ್ಯ ಸರಾಸರಿ ಒಳ್ಳೆಯ ಮಟ್ಟದಲ್ಲಿ ಇದ್ದರೆ ಅವಕಾಶವಾದಿ ಸೋಂಕುಗಳಿಗೆ ಶರೀರ ಅವಕಾಶ ಕೊಡುವುದಿಲ್ಲ .ಕೊಟ್ಟರೂ ತೀವ್ರತರ ಇರಲಾರದು . ಆದರೆ ಹತೋಟಿ ತಪ್ಪಿದ ಸಕ್ಕರೆ ಕಾಯಿಲೆ ,ಕ್ಯಾನ್ಸರ್ ರೋಗ ಮತ್ತು ಅದರ ಚಿಕಿತ್ಸೆ ಮತ್ತು ಈಗ ಕೋವಿಡ್ ನಂತಹ ಸೋಂಕಿನಿಂದ ರೋಗ ನಿರೋಧಕ ಶಕ್ತಿ ಕುಂದಿರುವಾಗ ಇವು ತಮ್ಮ ರೋಗ ಕಾರಕ ಪ್ರತಿಭೆಯನ್ನು ಪ್ರದರ್ಶಿಸಲು ವೇದಿಕೆ ನಿರ್ಮಾಣವಾಗುತ್ತದೆ . ಹಲವರಲ್ಲಿ  ಸಕ್ಕರೆ ಕಾಯಿಲೆಯ ಆರಂಭವೇ ಜನನಾಂಗಗಳ  ಕ್ಯಾಂಡಿಡಾ (ಬಿಳಿ ಫಂಗಸ್ )ಸೋಂಕಿನಿಂದ ಕಂಡು ಹಿಡಿಯಲ್ಪಡುತ್ತದೆ .

 

 

ಹಿಂತಿರುಗಿ ನೋಡಿದಾಗ

                       ಹಿಂತಿರುಗಿ  ನೋಡಿದಾಗ 

ನಾವು ವೈದ್ಯಕೀಯ ಕಲಿಯುವಾಗ ಎಂ ಬಿ ಬಿ ಎಸ್ ನಮ್ಮ ಗುರಿ ಆಗಿತ್ತು . ಆಮೇಲೆ ಎಲ್ಲಿಯಾದರೂ ಪ್ರಾಕ್ಟೀಸ್ ಮಾಡುವುದು ,ಅಥವಾ ಸರಕಾರಿ ಸೇವೆ . ಪಿ ಜಿ ಬಗ್ಗೆ ಆಲೋಚನೆ ಇರಲಿಲ್ಲ .ಇಂಟರ್ನ್ ಆಗಿದ್ದಾಗ ಪಿ ಜಿ‌ ಗೆ ಓದುವುದು ಅಂತ ಇಲ್ಲದೆ ರೋಗಿಗಳ ಚಿಕಿತ್ಸೆ ಬಗ್ಗೆ ಕಲಿಯುವುದರಲ್ಲಿಯೇ ಆಸಕ್ತಿ .ಆದ ಕಾರಣ ಹೆರಿಗೆ ,ಸಣ್ಣ ಶಸ್ತ್ರ ಚಿಕಿತ್ಸೆ ,ಮಕ್ಕಳ ರೋಗ ಇತ್ಯಾದಿ ಎಲ್ಲಾ ವಿಭಾಗಗಳಲ್ಲಿಯೂ ತಕ್ಕ ಮಟ್ಟಿಗೆ ಅನುಭವ ಮತ್ತು ಆತ್ಮ ವಿಶ್ವಾಸ ಇರುತ್ತಿತ್ತು .  ಎಂ ಬಿ ಬಿ ಎಸ್ ಫೀಸಿಶಿಯನ್ ಅಂಡ್ ಸರ್ಜನ್ ಎಂದು ಹಾಕಿ ಕೊಳ್ಳಲು ನಿಜಕ್ಕೂ ಅರ್ಹರಾಗಿದ್ದೆವು .ಈಗ ಎಲ್ಲರೂ ಪಿ ಜಿ ಮಾಡುವ ತರಾತುರಿಯಲ್ಲಿಯೇ ಇರುತ್ತಾರೆ ಮತ್ತು ಹೌಸ್ ಸರ್ಜನ್ ಆಗಿರುವಾಗ MCQ ಬಿಡಿಸುವುದರಲ್ಲಿಯೇ ಸಮಯ ಕಳೆಯುವರು .

ನಮ್ಮ ವಿದ್ಯಾರ್ಥಿ ಕಾಲದಲ್ಲಿ ರೇಡಿಯೋಲೋಜಿ ಯಲ್ಲಿ  ಎಕ್ಸ್ ರೇ  ಮಾತ್ರ ಇದ್ದು ಬಹಳ ಮಂದಿ ಪ್ರಾಧ್ಯಾಪಕರು  ರೇಡಿಯೇಶನ್ ನಿಂದ ಕಾನ್ಸರ್ ರೋಗಕ್ಕೆ ತುತ್ತಾಗುತ್ತಿದರು. ಉನ್ನತ ಅಭ್ಯಾಸಿಗಳಿಗೆ ಆಕರ್ಷಕ ವಿಷಯ ಆಗಿರಲಿಲ್ಲ .ಈಗ  ಬೇರೆ ಬೇರೆ ತರಹದ ಸ್ಕ್ಯಾನ್ ಗಳು ಬಂದಿದ್ದು ಈ ವಿಭಾಗ ಅತ್ಯಧಿಕ ವಿದ್ಯಾರ್ಥಿಗಳನ್ನು ಆಕರ್ಷಿಸುತ್ತಿದೆ . ಮೊದಲು ಸ್ತ್ರೀ ರೋಗ ತಜ್ನರು ಕೈಯಿಂದಲೇ ಗರ್ಭಸ್ಥ ಶಿಶುವಿನ ಬಗ್ಗೆ ತಿಳಿದು ಕೊಳ್ಳಬೇಕಿತ್ತು .ಅದೇ ರೀತಿ ಹೃದ್ರೋಗ ದಲ್ಲಿ  ಎಕೋ ಕಾರ್ಡಿಯೋ ಗ್ರಫಿ ಎಂಬ ಸ್ಕ್ಯಾನ್ ನಿಂದ ಕವಾಟಗಳ ,ಹೃದಯ ಮಾಂಸ ಖಂಡಗಳ ಬಗ್ಗೆ ನಿಮಿಷಾರ್ಧದಲ್ಲಿ ನೋಡಿ ತಿಳಿಯ ಬಹುದು .ಹಿಂದೆ ಸ್ಟೇತೋಸ್ಕೋಪ್ ಮಾತ್ರ ಇದ್ದಾಗ ನಾವು ಹೃದಯದ ವಿಶೇಷ ಮರ್ಮರಗಳ ಬಗ್ಗೆ ತಲೆಕೆಡಿಸಿ ಕೊಳ್ಳುತ್ತಿದ್ದೆವು .

  ಎಚ್ ಐ ವಿ ಬಂದ ಮೇಲೆ ಸಿರಿಂಜ್ ಗಳನ್ನು  ಕುದಿಸಿ  ಮರು ಉಪಯೋಗಿಸುವುದು ನಿಂತು ಹೋಗಿ ದಿಸ್ಪೊಸಿಬಲ್ ಸಿರಿಂಜ್ ಬಂದುವು .ಹಿಂದಿನ ಕಾಲದ ವೈದ್ಯರು ಇಕ್ಕುಳು ಉಪಯೋಗಿಸಿ ಪಿಸ್ಟನ್ ಮತ್ತು ಸೂಜಿ ಸಿರಿಂಜ್ ಗೆ ಸಿಕ್ಕಿಸುವ ದೃಶ್ಯ ಮರೆಯಾಯಿತು .ಮಕ್ಕಳು ಮೊದಲಿನಂತೆ ಇಂಜೆಕ್ಷನ್ ಗೆ ಅಂಜುವುದಿಲ್ಲ .     ರಕ್ತದಾನ ಆಗ ಸುಲಭ ಇತ್ತು  .ತುರ್ತು ಸಂದರ್ಭದಲ್ಲಿ  ಗ್ರೂಪ್ ಕ್ರಾಸ್ ಮ್ಯಾಚಿಂಗ್ ಮಾಡಿ ನಾವೇ ರಕ್ತ ಕೊಡುತ್ತದ್ದೆವು .ಈಗ ಎಚ್ ಐ ವಿ .ಹೆಪಾಟೈಟಿಸ್ ಇತ್ಯಾದಿ ರೋಗಗಳು ಇವೆಯೇ ಎಂದು ನೋಡಿಯೇ ಕೊಡ ಬೇಕಾಗಿದೆ .   ಸರ್ಜರಿಗೆ   ಮೊದಲು ಕೂಡಾ ಈ ಟೆಸ್ಟ್ ಗಳನ್ನು  ಮಾಡಬೇಕಿದ್ದು ಖರ್ಚು ಹೆಚ್ಚು ಮಾಡುತ್ತದೆ .

ಹಿಂದೆ  ಅಧ್ಯಾಪಕರನ್ನು ಭಯ (ಇದು ಜಾಸ್ತಿ ) ಭಕ್ತಿಯಿಂದ  ನೋಡುತ್ತಿದ್ದೆವು .. ಕೆಲವರಮೇಲೆ ಪ್ರೀತಿಯೂ  ಇರುತ್ತಿತ್ತು . ಪರೀಕ್ಷೆಯಲ್ಲಿ ಪಾಸ್ ಆಗುವುದು ತುಂಬಾ ಕಷ್ಟವಲ್ಲದಿದ್ದರೂ ಸುಲಭವಾಗಿರಲಿಲ್ಲ ,ಅದೃಷ್ಟ ಬೇಕಿತ್ತು . ಈಗ  ಫೇಲ್ ಆಗುವುದಕ್ಕೇ  ಕಷ್ಟ ಪಡ  ಬೇಕಾಗುವುದು . 

ಬಹಳ ಬೇಸರದ ವಿಚಾರ ಆಗಲೂ ಈಗಲೂ ನಮ್ಮ ದೇಶದಲ್ಲಿ ತಮ್ಮ ವಿದ್ಯಾರ್ಥಿ ಒಬ್ಬ ಪ್ರಾಮಾಣಿಕ ,ಬುದ್ದಿವಂತ ಮತ್ತು ಶ್ರಮಜೀವಿ ಎಂದು ಪ್ರಾಧ್ಯಾಪಕನಿಗೆ ತಿಳಿದಿದ್ದರೂ ಅವನನ್ನು ಉನ್ನತ ವಿದ್ಯಾಭ್ಯಾಸಕ್ಕೆ ಚುನಾಯಿಸುವ ಹಕ್ಕು ಅವನಿಗೆ ಇರುವುದಿಲ್ಲ .ಒಂದೋ  ಹಣ ಇಲ್ಲವೇ ಎಂಟ್ರನ್ಸ್ ಪರೀಕ್ಷೆಯ ಅಂಕ ಇದು ಮಾತ್ರ ನಿರ್ಧಾರಕ . ಬುದ್ದಿವಂತ ನಾದವನು  ಪ್ರಾಮಾಣಿಕ ಇರ ಬೇಕೆಂದಿಲ್ಲ ,ಅಥವಾ ಇದ್ದರೂ ಶ್ರಮ ಪಟ್ಟು ಕೆಲಸ ಮಾಡುವವನು ಇರಲಾರನು .ವೈದ್ಯಕೀಯ ರಂಗದಲ್ಲಿ ಇವೆಲ್ಲಾ ಬಹಳ ಮುಖ್ಯ.

 ನಮ್ಮ ಪ್ರಾಧ್ಯಾಪಕರಲ್ಲಿ ಕೈ ಬೆರಣಿಕೆ ಯಷ್ಟು ಮಂದಿಗೆ ಮಾತ್ರ ಕಾರ್ ಇತ್ತು .ಇನ್ನು ಕೆಲವರಲ್ಲಿ ಸ್ಕೂಟರ್ . ಉಳಿದವರು ನಡೆದೇ ಮತ್ತು ಬಸ್ ನಲ್ಲಿ ಸಂಚರಿಸುತ್ತಿದ್ದರು . ಆದರೂ ಅವರು ಹೆಚ್ಚು ತೃಪ್ತ ರಂತೆ ತೋರುತ್ತಿದ್ದರು . ಈಗ ವಿದ್ಯಾರ್ಥಿಗಳೇ ದೊಡ್ಡ ಕಾರ್ ಗಳಲ್ಲಿ ಬರುವರು . ಸಂಪತ್ತು ಹೆಚ್ಚಿ ದಂತೆ  ಮಾನವೀಯ ಸ್ಪರ್ಶ ಮತ್ತು ಸಂಬಂಧಗಳು  ಭಾಗಶಃ ಮರೆಯಾದವು .ಗುರು ಶಿಷ್ಯ ಸಂಬಂಧ ವ್ಯಾವಹಾರಿಕ ಆಗಿದೆ .  .

 ರೋಗಿ ವೈದ್ಯರ ಬಾಂಧವ್ಯ ಕೆಟ್ಟಿರುವುದು ಎಲ್ಲರಿಗೂ ತಿಳಿದ ವಿಷಯ .ವೈದ್ಯ ವೈದ್ಯರ ನಡುವೆ ಸುಖ ದುಖ ,ವಿಚಾರ ವಿನಿಮಯ ಕಡಿಮೆ ಆಗಿದೆ .ಒಂದೇ ಸಂಸ್ಥೆಯಲ್ಲಿ ಕೆಲಸ ಮಾಡುವವರಿಗೂ ಸಂಪರ್ಕ ಕಡಿಮೆ ಆಗಿದೆ .

ಕೆ ಎಂ ಸಿ ಹುಬ್ಬಳ್ಳಿಗೆ ಇತ್ತೀಚಿಗೆ ಭೆಟ್ಟಿ ನೀಡಿದ್ದೇನೆ .ನನ್ನ ಮನದಲ್ಲಿ ಚಿರಸ್ಥಾಯಿ ಆಗಿರುವ ಅದು ನನ್ನನ್ನು ಗುರುತಿಸುವುದಿಲ್ಲ  . ವೈದ್ಯ ಶಾಸ್ತ್ರಕ್ಕೆ ಜೀವ ತುಂಬಿದ  ಅನಾಟಮಿ ವಿಭಾಗದ ಶವಗಳೇ , ನಮ್ಮನ್ನು ಅಜ್ಞಾನ ಕೂಪದಿಂದ ಎತ್ತಿದ ಫಿಸಿಯೋಲಾಜಿ ಪ್ರಯೋಗದ ಮಂಡೂಕಗಳೇ ,ವೈದ್ಯ ಶಾಸ್ತ್ರವ  ನಮಗೆ ಅರೆದು ಇಳಿಸಿದ  ಗುರುಗಳೇ  , ನಿಮ್ಮ  ಸಂಟಕದೊಡನೆ ನಮ್ಮನ್ನೂ ಸಹಿಸಿ ,ರೋಗ ನಿದಾನ ಕಲಿಯಲನುವು ಮಾಡಿದ ರೋಗಿಗಳೇ ,ನಮ್ಮ ಕಾಲೇಜು ತುಂಟಾಟದ ಹುಡುಗರೇ ,ಸೀರೆ ಉಟ್ಟ ಸಹಪಾಠಿ ಬೆಡಗಿಯರೇ ,ಸದಾ ವರ್ಣಮಯ ತೋಟದ ಹೂಗಳೇ,ಸಿ ಬೀ ಟಿ ಸಿಟಿ ಬಸ್ ಗಳೆ  ಎಲ್ಲಿ ಹೋದಿರಿ ನೀವು ನಿಮ್ಮವ ಬಂದಿರುವೆನು  ,ನನ್ನ ಗುರುತಿಸೆಯಾ ಎಂದು ನನ್ನ ಹೃದಯ ಕೂಗುವುದು .

ಹುಬ್ಬಳ್ಳಿ ದಿನಗಳು 10

                            ಹುಬ್ಬಳ್ಳಿ ದಿನಗಳು10

 ನಾನು ಕಾಲೇಜ್ ಸೇರುವಾಗ ತುರ್ತು ಪರಿಸ್ಥಿತಿ ಜ್ಯಾರಿಯಲ್ಲಿ ಇದ್ದು ಯಾವುದೇ ವಿದ್ಯಾರ್ಥಿ ಸಂಘಗಳಿಗೆ ಅವಕಾಶ ಇರಲಿಲ್ಲ .1977 ರ ನಂತರ ಅವುಗಳಿಗೆ ಅವಕಾಶ ಮಾಡಿಕೊಡಲಾಯಿತು .ಶ್ರೀ ಬೆಲ್ಲದ ಎಂಬವರು ಕಾರ್ಯ ದರ್ಶಿ ಅದರೆಂದು ನೆನಪು .ಸಂಘದ ಉದ್ಘಾಟನೆಗೆ ಬೆಳ್ಳಾರಿ ಮೆಡಿಕಲ್ ಕಾಲೇಜ್ ನಲ್ಲಿ ಪ್ರಿನ್ಸಿಪಲ್ ಆಗಿದ್ದ ಪ್ರಸಿದ್ದ ಸರ್ಜನ್ ಪ್ರಾಧ್ಯಾಪಕ ಡಾ ಆರ್ ಎಚ್ ಎನ್ ಶೆಣಯ್  ಅವರು ಮುಖ್ಯ ಅತಿಥಿ ಯಾಗಿದ್ದರು .ಕಾಲೇಜ್ ಡೇ ಗೆ ಆಗ ಕರ್ನಾಟಕದ ಮುಖ್ಯ ನ್ಯಾಯಾಧೀಶರಾಗಿದ್ದ ಶ್ರೀ ಜಿ ಕೆ ಗೋವಿಂದ ಭಟ್ ಮತ್ತು ಅವರ ಸಹೋದ್ಯೋಗಿ ಸಭಾಹಿತ (ಸೀನಿಯರ್ )ಮುಖ್ಯ ಅತಿಥಿ ಯನ್ನಾಗಿ ಕರೆಸಿದ್ದರು .ಆಗಿನ್ನೂ ಸರಕಾರಿ  ಕಾಲೇಜ್ ಗಳಲ್ಲಿ ಜನ ಪ್ರತಿನಿಧಿಗಳನ್ನು ಖಡ್ಡಾಯವಾಗಿ ಕರೆಯಬೇಕು ಎಂಬ ಈಗಿನ ಪ್ರೋಟೋಕಾಲ್ ಇದ್ದಂತಿಲ್ಲ .ಈ ಅವಧಿಯಲ್ಲಿ  ಸಾಂಸ್ಕೃತಿಕ ಚಟುವಟಿಕೆಗಳ ಕಾರ್ಯದರ್ಶಿಯಾಗಿ ಶ್ರೀ ಶಿವಾನಂದ ಕುಬಸದ್ ಎಂಬ ಸೀನಿಯರ್ ಇದ್ದರು.ಅವರು ಬಹುಮುಖ ಪ್ರತಿಭೆಯವರಾಗಿದ್ದು ಈಗ ಪತ್ರಿಕೆಯಲ್ಲಿ ಆರೋಗ್ಯಕ್ಕೆ ಸಂಬಂದಿಸಿದ ಒಳ್ಳೆಯ ಲೇಖನಗಳನ್ನು ಬರೆಯುತ್ತಿರುತ್ತಾರೆ .

ನಂತರದ ಅವಧಿಗೆ ಶ್ರೀ ಮಾಲಿ ಪಾಟೀಲ್ ಎಂಬ ನನ್ನ ಸಹಪಾಠಿ ಕಾರ್ಯದರ್ಶಿ ಆದರು ಮತ್ತು ಮತ್ತೊಬ್ಬ ಪ್ರತಿಭಾವಂತ ಮಿತ್ರ ಶ್ರೀ ವಿವೇಕ ವಾಣಿ
ಸಾಂಸ್ಕೃತಿಕ ಚಟುವಟಿಕೆಗಳ ಕಾರ್ಯದರ್ಶಿ ಆದರು .ಮುಂದಿನ ಕಾಲೇಜ್ ಡೇ ಗೆ ಆಗ ಕೇಂದ್ರ ರಾಸಾಯನಿಕ ಖಾತೆ ಸಚಿವರಾಗಿದ್ದ ಶ್ರೀ ವೀರೇಂದ್ರ ಪಾಟೀಲ್  ಮತ್ತು ಗುಲ್ಬರ್ಗಾ ಮೆಡಿಕಲ್ ಕಾಲೇಜ್ ಮುಖ್ಯಸ್ಥ ಶ್ರೀ ಜವಳಿ ಯವರು ಅತಿಥಿಗಳು .

ಕಾಲೇಜ್ ನಲ್ಲಿ ಬಹುಮುಖ ಪ್ರತಿಭೆಯ ಅನೇಕ ವಿದ್ಯಾರ್ಥಿಗಳು ಇದ್ದರು .ನಮ್ಮದೇ ಒಂದು ಆರ್ಕೇಸ್ತ್ರಾ ಇತ್ತು .ನನ್ನ ತರಗತಿಯ ಸುನೀಲಾ ಜೋತಾಡಿ ಮತ್ತು ಪರಿಮಳ ಒಳ್ಳೆಯ ಹಾಡುಗಾರ್ತಿ ಗಳಾಗಿ ಹೆಸರು ಪಡೆದಿದ್ದರು . ಮಿತ್ರ ಹರೀಶ್ ಕುಮಾರ್ ಶೆಟ್ಟಿ ಇಂಗ್ಲಿಷ್ ನಲ್ಲಿ  ಚೆನ್ನಾಗಿ ಭಾಷಣ ಮಾಡುತ್ತಿದ್ದು ,ಅವರು ಉಪಯೋಗಿಸಿದ ಶಬ್ದಗಳ ಅರ್ಥ ನಾವು ನಿಘಂಟುವಿನಲ್ಲಿ ನೋಡಿ ತಿಳಿಯುತ್ತಿದ್ದೆವು .

ನಮ್ಮ ನಾಟಕಗಳು ಉತ್ತಮ ಮಟ್ಟದ್ದಾಗಿ ಇರುತ್ತಿದ್ದು ,ವಿವೇಕ ವಾಣಿ ಸ್ವತಃ ಒಂದನ್ನು  ಯಶಸ್ವಿಯಾಗಿ ನಿರ್ದೇಶಿಸಿದ ನೆನಪು .ಪ್ರದೀಪ್ ಹನುಮಸಾಗರ್ ಎಂಬ ನಮ್ಮ ಸೀನಿಯರ್ ನಾಟಕ ,ಸಂಗೀತ  ಮತ್ತು ಕಲೆ ಎಲ್ಲಾ ರಂಗಗಳಲ್ಲಿ ಮಿಂಚುತ್ತಿದ್ದ ವಿಶೇಷ ಪ್ರತಿಭೆ .ಇಕ್ಬಾಲ್ ಮಣಿಯಾರ್ ಎಂಬ ಜೂನಿಯರ್ ಹಾರ್ಮೋನಿಯಂ ನುಡಿಸುತ್ತಿದ್ದು ,ಪಿ ಗಣೇಶ್ ಒಳ್ಳೆಯಗಾಯಕ .ಧಾರವಾಡದಲ್ಲಿ ಈಗ ಪ್ರಸಿದ್ದ ಸ್ತ್ರೀ ರೋಗ ತಜ್ನರೂ ,ಚಿಂತಕರೂ ,ಬರಹಗಾರರೂ ಆಗಿ ಅಸಾಂಪ್ರದಾಯಿಕ ಮಕ್ಕಳ ಶಾಲೆ ನಡೆಸುತ್ತಿರುವ ಸಂಜೀವ ಕುಲಕರ್ಣಿ ನಮ್ಮ ಜೂನಿಯರ್ ಮತ್ತು ಸಂಮಿತ್ರರು ;ಆಗಲೇ ಕವನಗಳನ್ನು ಬರೆಯುತ್ತಿದ್ದು ಪತ್ರಿಕೆಗಳಲ್ಲಿ ಪ್ರಕಟವಾಗುತ್ತಿದ್ದವು .

ನನ್ನ ಮಿತ್ರ ಡಾ ಮಂಟೂರ್ (ಈಗ ಪ್ರಸಿದ್ದ ಸೂಕ್ಷ್ಮಾಣು ಜೀವಿ ಶಾಸ್ತ್ರಜ್ನ )ಅವರು ವಿದ್ಯಾರ್ಥಿ ಸಂಘಟನೆಯೊಂದರಲ್ಲಿ ಸಕ್ರಿಯರಾಗಿದ್ದು ಅವರೊಡನೆ ವಾರಾಂತ್ಯದಲ್ಲಿ ಒಂದು ಹಲ್ಲಿಗೆ ಸೈಕಲ್ ನಲ್ಲಿ ತೆರಳಿ ಜನರಿಗೆ ಆರೋಗ್ಯ ಶಿಕ್ಷಣ ಮತ್ತು ಉಚಿತ ಔಷಧಿ ವಿತರಣೆ ಮಾಡುತ್ತಿದ್ದ ನೆನಪು .

ಮಕ್ಕಳ ವಾರ್ಡ್ ನಲ್ಲಿ ಕೆಲವು ಬಾಲ್ಯ ಸಕ್ಕರೆ ಕಾಯಿಲೆ ಮತ್ತು ದಿನವೂ ಔಷಧ ಬೇಡುವ ಕಾಯಿಲೆಯ ಕೆಲವು ಬಡ ಮಕ್ಕಳನ್ನು ಮಾನವೀಯ ನೆಲೆಯಲ್ಲಿ ಖಾಯಂ ಆಗಿ ಅಡ್ಮಿಟ್ ಮಾಡಿದ್ದರು .ಇವರು ವಾರ್ಡ್ ಸಿಸ್ಟರ್ ಗಳಿಗೆ ಸಹಾಯ ಮಾಡುವರು .ಅನಕ್ಷರಸ್ಥ ರಾಗಿದ್ದ ಈ ಮಕ್ಕಳಿಗೆ ನಾವು ಕೆಲವು ವಿದ್ಯಾರ್ಥಿಗಳು ಸೇರಿ ಸಂಜೆ ಹೊತ್ತು ಅಕ್ಷರಾಭ್ಯಾಸ ಮಾಡಿಸಿದೆವು .ಮತ್ತು ಬಹಳ ಚೆನ್ನಾಗಿ ಹಾಡುತ್ತಿದ್ದ ಅವರಿಗೆ ತರಬೇತು ನೀಡಿ ಮಕ್ಕಳ ದಿನಾಚರಣೆ ಯಂದು ಒಳ್ಳೆಯ ಕಾರ್ಯಕ್ರಮ ಏರ್ಪಡಿಸಿದ್ದು ಧಾರವಾಡ ಆಕಾಶವಾಣಿಯವರು ಅದನ್ನು ಪ್ರಸಾರ ಮಾಡಿದರು .ಈ ಕಾರ್ಯದಲ್ಲಿ ಸಂಜೀವ ಕುಲಕರ್ಣಿ ಮತ್ತು ಇಕ್ಬಾಲ್ ಮಣಿಯಾರ್ ಸಹಕಾರ ನೀಡಿದ ನೆನಪು .ಮಕ್ಕಳ ವಿಭಾಗದ ಮುಖ್ಯಸ್ಥ ರಾಗಿದ್ದ  ಡಾ ಮಾಲತಿ ಯಶವಂತ್ ನನಗೊಂದು ಸರ್ಟಿಫಿಕೇಟ್ ದಯಪಾಲಿಸಿದರು .ಅದೇ ರೀತಿ ಹೆರಿಗೆ ವಿಭಾಗದಲ್ಲಿ ಹೆತ್ತವರಿಂದ ನಾನಾ ಕಾರಣಕ್ಕೆ ತ್ಯಕ್ತರಾದ ಕಂದಮ್ಮಗಳು ಇದ್ದು ಅವರನ್ನು ವಾರ್ಡ್ ಸಿಸ್ಟರ್ಸ್ ಪ್ರೀತಿಯಿಂದ ನೋಡಿಕೊಳ್ಳುತ್ತಿದ್ದರು . ಅಂತಹ ಒಂದು ಮಗು ಪ್ರೀತಿ ;ನನ್ನನ್ನು ತುಂಬಾ ಹಚ್ಚಿ ಕೊಂಡಿತ್ತು.ಆಗ ದತ್ತು ತೆಗೆದು ಕೊಳ್ಳುವ ಕಾನೂನುಗಳು ಸರಳ ಮತ್ತು ಸುಲಭ ಇದ್ದುದರಿಂದ  ಈ ಮಕ್ಕಳು ತುಂಬಾ ಕಾಲ ಇರ ಬೇಕಾಗಿ ಬರುತ್ತಿರಲಿಲ್ಲ .

ಕ್ರೀಡಾ ಚಟುವಟಿಕೆಗಳಿಗೂ ಸಾಕಷ್ಟು ಅವಕಾಶಗಳು ಇದ್ದವು .ಹಾಸ್ಟಲ್ ನಲ್ಲಿ  ಟೇಬಲ್ ಟೆನ್ನಿಸ್ ಟೇಬಲ್ ಕಾಮನ್ ಹಾಲ್ ನಲ್ಲಿ ಇತ್ತು.ವಾಲಿ ಬಾಲ್ ಕೂಡಾ ಆಡುತ್ತಿದ್ದರು .ಕಾಲೇಜ್ ನಲ್ಲಿ ಟೆನ್ನಿಸ್ ಕೋರ್ಟ್  , ಮತ್ತು ದೊಡ್ಡ  ಕ್ರೀಡಾಂಗಣ ಇದ್ದು ನಮ್ಮಲ್ಲಿ  ಒಳ್ಳೆಯ  ಫೂಟ್ ಬಾಲ್ ಮತ್ತು ಕ್ರಿಕೆಟ್ ಆಟಗಾರರು ಇದ್ದರು .ನನ್ನ ಕ್ಲಾಸ್ ನಲ್ಲಿ  ಮೋಹನ್ .ಉದಯ್ ಸಾಂಭ್ರಾಣಿ ,ಸಂದೀಪ್ ಒಳ್ಳೆಯ  ಕ್ರಿಕೆಟ್ ಆಟಗಾರರು ಆಗಿದ್ದು ,ರಾಮನಾಥನ್ ಟೆನ್ನಿಸ್ ಮತ್ತು ಫೂಟ್ ಬಾಲ್ ಆಟಗಾರರಾಗಿದ್ದರು .

                  

ಹುಬ್ಬಳ್ಳಿ ನೆನಪುಗಳು 9

                  ಹುಬ್ಬಳ್ಳಿ ನೆನಪುಗಳು 9

          

 ಅಜ್ಞಾನ ತಿಮಿರಾಂಧಸ್ಯ  ಜ್ನಾನಾಂಜನ ಶಲಾಕಾಯ ಚಾಕ್ಷುರುನ್ಮಿಲೀತಮ್  ಯೇನ ತಸ್ಮೈ ಶ್ರೀ ಗುರುವೇ ನಮಃ  ನಮಗೆ  ಸರ್ಜರಿ ವಿಭಾಗದಲ್ಲಿ ಕೆ ಜಿ ನಾಯಕ್ ಎಂಬ ಪ್ರಾಧ್ಯಾಪಕರು ಇದ್ದರು.ಅವರ ಪತ್ನಿ ಶೀಲಾ ನಾಯಕ್ ಅನಾಟಮಿ ಪ್ರೊಫೆಸರ್ .ಇಬ್ಬರೂ ನಿವೃತ್ತಿ ನಂತರ ಸುಳ್ಯ ದ ಕೆ ವಿ ಜಿ‌ ಮೆಡಿಕಲ್ ಕಾಲೇಜ್ ನಲ್ಲಿ  ಕೆಲಸ ಮಾಡುತ್ತಿದ್ದರು.ಕೆ  ಜಿ‌ ನಾಯಕ್ ಅವರ ಒಂದು ಪಾದ ಸ್ವಲ್ಪ ಊನ ಆಗಿದ್ದರೂ ಬಹಳ ಕ್ರಿಯಾಶೀಲ .ಟೆನ್ನಿಸ್ ಕೂಡಾ ಆಡುತ್ತಿದ್ದರು . ನಾನು ವಿದ್ಯಾರ್ಥಿಯಾಗಿ ಮತ್ತು ಇಂಟರ್ನ್ ಆಗಿ ಅವರ (ಪ್ರೊ ಕೌಲ್ಗುಡ್ ಯೂನಿಟ್ )ಯೂನಿಟ್ ನಲ್ಲಿಯೇ ಇದ್ದೆ.ಅವರಿಗೆ ಕಲಿಸುವುದು ಅಚ್ಚು ಮೆಚ್ಚು .ಮಂಗಳೂರು ಕನ್ನಡದಲ್ಲಿ ಬೈಯ್ಯುವರು (ಪ್ರೀತಿಯಿಂದ ).ನನ್ನ ಉತ್ತರ ಅವರಿಗೆ ಸಮಾಧಾನ ಆಗದಿದ್ದರೆ 'ಏನಾ ಭಟ್ ಬಾಯಿಗೆ ಬಂದ ಹಾಗೆ ಏನಾದರೂ ಹೇಳುತ್ತಿ ,ಸರಿಯಾಗಿ ಓದುವುದಿಲ್ಲ," ನಮ್ಮ ಬ್ಯಾಚ್ ನಲ್ಲಿ ಇದ್ದ ಭಗವಾನ್ ಸಿಂಗ್ ಎಂಬ ಸರ್ದಾರ್ ನನ್ನು ಅವರು ಸಿಂಗು ಎಂದು ಕರೆಯುವರು .ವಾಟ್ ಸಿಂಗು ವಾಟ್ ಈಸ್ ಯುವರ್ ಫೈಂಡಿಂಗ್ ?ಇತ್ಯಾದಿ .ಪರೀಕ್ಷೆ ಗೆ ಮೊದಲು ಒಂದು ಸ್ಪೆಷಲ್ ಕ್ಲಾಸ್ ಸರಣಿ ತೆಗೆದು ಕೊಳ್ಳುವರು .ಅವರ ಹಿಂದಿನ ಶಿಷ್ಯ ಮತ್ತು ಈಗಿನ ಸಹೋದ್ಯೋಗಿ ಡಾ ಗಿರಿ ಗೌಡ ಕೂಡಾ ತೆಗೆದುಕೊಳ್ಳುವರು .ಹಾಗೆ ಶಸ್ತ್ರ ಚಿಕಿತ್ಸಾ ವಿಷಯ ನಮಗೆ ಸುಲಿದ ಬಾಳೆಯ ಹಣ್ಣಿನಂದದಿ ,ಕಳೆದ ಚಿಗುರಿನ ಕಬ್ಬಿನಂದದಿ ಆಗಿ ಹೋಯಿತು .




. ಗಿರಿ ಗೌಡರು ಅತೀ ಸರಳ ಆದರೆ ಜನಪ್ರಿಯ ಮತ್ತು ಅಧ್ಯಯನ ಶೀಲ ಗುರುಗಳು ಅವರು ತರಗತಿ ಆರಂಭಿಸುವ ಮೊದಲು ಕಣ್ಣು ಮುಚ್ಚಿ  ತಮ್ಮ ಗುರುಗಳಾದ ಡಾ ಅರ್ ಎಚ್ ಏನ್ ಶೆಣಯ್ ಮತ್ತು ,ಡಾ ಕೆ ಜಿ ನಾಯಕ್  ರವನ್ನು  ವಂದಿಸಿ  ತರಗತಿ ಆರಂಭಿಸುತ್ತಿದ್ದರು . ಅವರ ಬೆಡ್ ಸೈಡ್ ಕ್ಲಿನಿಕ್ಸ್ ಮತ್ತು ಪರೀಕ್ಷಾ ಕಾಲದ ವಿಶೇಷ ತರಬೇತಿ ಯು ಜಿ ಮತ್ತು ಪಿ ಜಿ ವಿದ್ಯಾರ್ಥಿಗಳಲ್ಲಿ ಜನಪ್ರಿಯ ಆಗಿತ್ತು .ಅವರೂ ಕೆ ಜಿ ನಾಯಕ ಅವರ ಶಿಷ್ಯರು .

ಗಿರಿ ಗೌಡರು ಉತ್ತಮ ಅಧ್ಯಾಪಕ ರಾದರೂ  ಒಳ್ಳೆಯ ಶಸ್ತ್ರ ಚಿಕಿತ್ಸಾ ನಿಪುಣರಾಗಿರಲಿಲ್ಲ ,ಅವರಿಗೆ ಅನಾರೋಗ್ಯದಿಂದ ಸ್ವಲ್ಪ ಕೈ ನಡುಕ ಇತ್ತು . ಸ್ತನದ ಗಡ್ಡೆಗಳ ಬಗ್ಗೆ  ಪಾಠ ಆರಂಭಿಸುವಾಗ ಅವರು  'ಈ ಅಂಗವು ಶಿಶು , ಕವಿ ಪ್ರೇಮಿಗಳಿಗೆ ಅಪ್ಯಾಯಮಾನವಾಗಿ ಇರುವಂತೆ ಕ್ಯಾನ್ಸರ್ ರೋಗಕ್ಕೂ 'ಎನ್ನುತ್ತಿದ್ದರು .  ಫೈನಲ್ ಪರೀಕ್ಷೆಯಲ್ಲಿ ಯಾವುದೊ  ಒಂದು  ವಿಷಯ ರೋಗಿಯನ್ನು ಪರೀಕ್ಷಿಸುವಾಗ ಮರೆತು ಹೋದರೆ ಏನಾಗುವುದು ? ಎಂದು ಕೇಳುವರು ,ನಾವು  ಹೆದರಿ ಉತ್ತರ ನಿರೀಕ್ಷಿಸುತ್ತಿರುವಾಗ  ನಿರುಮ್ಮಳವಾಗಿ   ಏನೂ ಸಂಭವಿಸದು  ಎನ್ನುವರು .ಅದು ಅವರು ವಿಶ್ವಾಸ ಹುಟ್ಟಿಸುತ್ತಿದ್ದ ರೀತಿ .
   ಅಲ್ಪಾಯುವಿನಲ್ಲಿ  ತೀರಿ ಕೊಂಡರೂ  ವಿದ್ಯಾರ್ಥಿಗಳ ಹೃದಯ ದಲ್ಲಿ  ಜ್ಞಾನ ರೂಪಿಯಾಗಿ ನೆಲೆಸಿದ್ದಾರೆ .ನಮ್ಮ ಶರೀರದಲ್ಲಿ ತಂದೆ ತಾಯಿಯರ ರಕ್ತ , ಇಂತಹ ಗುರು ವರೇಣ್ಯರ ಜ್ಞಾನ ವಾಹಿನಿ  ಹರಿದಾಡುತ್ತಿದೆ.ನಮ್ಮನ್ನು ಕಾಲ ಕಾಲಕ್ಕೆ  ದಾರಿ ತೋರಿ ಕಾಪಾಡುತ್ತಿದೆ .

ಸರ್ಕಾರೀ ಮೆಡಿಕಲ್ ಕಾಲೇಜು ಆಸ್ಪತ್ರೆಯಲ್ಲಿ ಎರಡು ತರದ ವೈದ್ಯರು ಇರುತ್ತಾರೆ . ಒಂದು ಅಸಿಸ್ಟೆಂಟ್ ಸರ್ಜನ್ ಕ್ಯಾಟಗೊರಿ  ,ಇವರು ಕ್ಯಾಶುಯಾಲಿಟಿ ,ಓ ಪಿ ಡಿ ವಾರ್ಡ್ ಗಳಲ್ಲಿ ಇರುವರು . ಟೀಚಿಂಗ್ ವಿಭಾಗದವರು ಇನ್ನೊಂದು . ಲೆಕ್ಚರರ್ ,ಅಸಿಸ್ಟೆಂಟ್ ಪ್ರೊಫೆಸರ್ ಮತ್ತು ಪ್ರೊಫೆ ಸರ್  ಇತ್ಯಾದಿ . ಈಗ ಪ್ರಸಿದ್ಧ ಮಕ್ಕಳ ಹೃದ್ರೋಗ ತಜ್ಞೆಯಾಗಿರುವ  ವಿಜಯ ಲಕ್ಷ್ಮಿ ಬಾಳೇಕುಂದ್ರಿ  ಅಸಿಸ್ಟೆಂಟ್ ಸರ್ಜನ್ ಆಗಿದ್ದು ಮೆಡಿಸಿನ್ ವಿಭಾಗದಲ್ಲಿ ಇದ್ದರು .ಬಹಳ ಪ್ರತಿಭಾವಂತೆ ,ಉತ್ಸಾಹಿ ಆಗಿದ್ದ ಇವರು ಕೆಲವೊಮ್ಮೆ ನಮಗೆ ಕ್ಲಾಸ್ ತೆಗೆದು ಕೊಳ್ಳುವರು .ಹಾಗೆಯೇ ಡಾ ಹೊಸ್ಮಟ್ಟ್ ಎಂಬುವರು ಕೂಡ ನಮಗೆ ಪಾಠ ಮಾಡುತ್ತಿದ್ದರು . 

ಇನ್ನು ಧಾರವಾಡ ಸಿವಿಲ್ ಆಸ್ಪತ್ರೆಯಲ್ಲಿ ಹೌಸ್ ಸರ್ಜನ್ ಆಗಿ ಮೂರು ತಿಂಗಳು ಪೋಸ್ಟಿಂಗ್ಸ್ ಇದ್ದಾಗ ಅಲ್ಲಿ ಡಾ ಗಜಾನನ ಗುಡಿಗಾರ ಎಂಬ ಪ್ರತಿಭಾವಂತ ಫಿಸಿಷಿಯನ್ ಇದ್ದು ಅವರಿಂದ ನಾನು ಹಲವು ವಿಷಯಗಳನ್ನು ಕಲಿತೆನು . ಸೂಕ್ಷ್ಮ ಮತಿಯಾಗಿದ್ದ ಅವರದು ರೋಗ ನಿಧಾನದಲ್ಲಿ ಎತ್ತಿದ ಕೈ . ಅವರ ಪತ್ನಿ ಸ್ತ್ರೀ ರೋಗ ತಜ್ಞೆ .ನಾನು ಧಾರವಾಡದಲ್ಲಿ ಇದ್ದಷ್ಟು ದಿನ ಅವರ ಮನೆಯವನೇ ಆಗಿದ್ದು ನನ್ನ ಬಹುಪಾಲು ಊಟೋಪಚಾರ ಅವರಲ್ಲಿ ಆಗುತ್ತಿತ್ತು . ನಿವೃತ್ತರಾದ ಮೇಲೆ ಹುಬ್ಬಳ್ಳ್ಳಿಯಲ್ಲಿ ಪ್ರಾಕ್ಟೀಸ್ ಮಾಡುತ್ತಿದ್ದು ಶಿರೂರ್ ಪಾರ್ಕ್ ನಲ್ಲಿ ನೆಲಸಿದ್ದರು .ಅವರ ಕೈ ಬರಹ ಮತ್ತು ವೈದ್ಯಕೀಯ ನೋಟ್ಸ್ ಬಹಳ ಚಂದ . ಸರಕಾರಿ ಸೇವೆಯಲ್ಲಿ ಪ್ರಾಮಾಣಿಕವಾಗಿ ಸೇವೆ ಸಲ್ಲಿಸುತ್ತಿದ್ದ ಅವರನ್ನೆಲ್ಲಾ  ಆಗಾಗ ಸ್ಮರಿಸಿ ಕೊಳ್ಳು ವೆನು . 

  ಧಾರವಾಡ ಸಿವಿಲ್ ಆಸ್ಪತ್ರೆಯಲ್ಲಿ ಹೌಸ್ ಸರ್ಜನ್ ಆಗಿದ್ದ ಮೂರು ತಿಂಗಳು ನಾನು ಆಸ್ಪತ್ರೆಯಲ್ಲಿಯೇ ನೆಲಸಿ ೨೪ ಗಂಟೆ ಕೆಲಸ ಮಾಡುತ್ತಿದ್ದೆ .ಹೆರಿಗೆ ,ಮಕ್ಕಳ ವಿಭಾಗ ಮತ್ತು ತುರ್ತು ಚಿಕಿತ್ಸೆಯಲ್ಲಿ ತುಂಬಾ ಅನುಭವ ದೊರೆಯಿತು . ಮೆಡಿಕಲ್ ಕಾಲೇಜು ನಲ್ಲಿ ಪಿ ಜಿ ಗಳು ಇದ್ದ ಕಾರಣ  ನಮಗೆ ಸ್ವತಂತ್ರವಾಗಿ ನಿರ್ಧಾರ ತೆಗೆದು ಕೊಳ್ಳುವ ಅವಕಾಶಗಳು ಕಡಿಮೆ ಇದ್ದವು . 

ಸಿವಿಲ್ ಆಸ್ಪತ್ರೆಯಲ್ಲಿ  ನರ್ಸಿಂಗ್ ವಿದ್ಯಾರ್ಥಿಗಳಿಗೆ ತರಗತಿಗಳನ್ನು ತೆಗೆದು ಕೊಳ್ಳುತ್ತಿದ್ದ (ಗೌರವ ಉಪನ್ಯಾಸಕ )ಕಾರಣ ನನ್ನ ಅನುಭವದ ಪರಿಧಿ ವಿಸ್ತರಿಸಿ ಕೊಂಡಿತು . 

ಲೇಖಕ ಬಸವರಾಜ ಕಟ್ಟಿಮನಿ (MLC ಆಗಿದ್ದರು )ಸಿವಿಲ್ ಆಸ್ಪತ್ರೆಯಲ್ಲಿ ರೋಗಿಯಾಗಿ ದಾಖಲಾಗಿದ್ದರು .ಅವರನ್ನು ಉಪಚರಿಸುವ ಭಾಗ್ಯ ಸಿಕ್ಕಿತ್ತು . ಧಾರವಾಡ ವಿಶ್ವವಿದ್ಯಾಲಯ ಉಪಕುಲಪತಿ ಯಾಗಿದ್ದ  ಖ್ಯಾತ ಅರ್ಥ ಶಾಸ್ತ್ರಜ್ಞ ಡಿ ಎಂ ನಂಜುಂಡಪ್ಪ ಕೂಡಾ ವೈದ್ಯಕೀಯ ಸಲಹೆಗಾಗಲಿ ಸರಕಾರಿ ಆಸ್ಪತ್ರೆಗೆ ಬರುತ್ತಿದ್ದರು . 

ಸಿವಿಲ್ ಆಸ್ಪತ್ರೆಯ ನವ ಶಿಶು ವಿಭಾಗದಲ್ಲಿ ಹೀಟರ್ ಇಲ್ಲದಿದ್ದುದರಿಂದ ನನ್ನ ಸ್ಟೈಪೆಂಡ್ ಹಣದಲ್ಲಿ ಒಂದನ್ನು ಕೊಡುಗೆಯಾಗಿ ನೀಡಿ ನನ್ನ ಋಣ ಅಲ್ಪ ಸಂದಾಯ ಮಾಡಿದೆನು .

 

ಹುಬ್ಬಳ್ಳಿ ದಿನಗಳು 11

  ಹುಬ್ಬಳ್ಳಿ ದಿನಗಳು 11

ನಮ್ಮ ಫೈನಲ್ ಎಂ ಬಿ ಬಿ ಎಸ್ 1980 -81 ರಲ್ಲಿ ಆಗಿದ್ದು ನಿರ್ಣಾಯಕ ಆಗಿತ್ತು .ನಾವೆಲ್ಲ ಅದರ  ತಯಾರಿಯಲ್ಲಿ ಇದ್ದೆವು . 

ಅದೇ ವರ್ಷ ಕೆಲವು ಪ್ರಮುಖ ಘಟನೆಗಳು ನಡೆದವು .

ಒಂದು ಗೋಕಾಕ ಚಳುವಳಿ .ಕರ್ನಾಟಕದಲ್ಲಿ ಶಾಲೆಗಳಲ್ಲಿ ಕನ್ನಡವೇ ಒಂದನೇ ಭಾಷೆ ಆಗಿರಬೇಕು ಎಂಬ ಡಾ ವಿ ಕೃ ಗೋಕಾಕ ಸಮಿತಿ ಕೊಟ್ಟ ತೀರ್ಮಾನ ಜ್ಯಾರಿಗೆ ತರಲು ಆಗ ಮುಖ್ಯ ಮಂತ್ರಿ ಆಗಿದ್ದ  ಶ್ರೀ ಗುಂಡೂ ರಾವು ಸರ್ಕಾರ ಮೀನ ಮೇಷ ನೋಡಿದಾಗ ರಾಜ್ಯದಾದ್ಯಂತ ನಡೆದ ಚಳುವಳಿ . ವರನಟ ಡಾ ರಾಜ್ ಕುಮಾರ್ ಕೂಡಾ ಭಾಗವಸಿದ್ದುದು ವಿಶೇಷ .ಕೊನೆಗೆ ಸರಕಾರ ಮಣಿಯಿತು .

ಇನ್ನೊಂದು ನರಗುಂದದ ರೈತ ಬಂಡಾಯ . ನರಗುಂದ ಸ್ವಾತಂತ್ರ್ಯ ಸಂಗ್ರಾಮದಲ್ಲಿಯೂ ಅಲ್ಲಿಯ ಅರಸ ಬಾವು ಸಾಹೇಬ ಬಾವೆ ಸಾರಿದ ಬಂಡಾಯದಿಂದ ಪ್ರಸಿದ್ದವಾದ ಸ್ಥಳ . ಇಲ್ಲಿಯ ರೈತರು ಮಲಪ್ರಭಾ ನೀರಾವರಿ ತೆರಿಗೆ ಎಂದು ಕಟ್ಟಿದರೂ ಸಾಕಷ್ಟು ನೀರು ಸಿಗುವುದಿಲ್ಲ ಎಂದು ಚಳವಳಿ ಮಾಡುತ್ತಿದ್ದರೂ ಸರಕಾರ ಕ್ಯಾರೇ ಎನ್ನಲಿಲ್ಲ .
ಅಂದು 1980ರ ಜುಲೆ 21, ಆಗಿನ ತಹಸೀಲ್ದಾರ ವರೂರ ಅವರು ಕಚೇರಿಗೆ ಬಂದರು. ರೈತರು ಕಚೇರಿ ಬಾಗಿಲು ಮುಚ್ಚಿ, ಅಡ್ಡಗಟ್ಟಿ ಪ್ರತಿಭಟನೆ ನಡೆಸಿದರು. ಅರೆಬೆತ್ತಲೆಯಾಗಿ ಅಡ್ಡ ಮಲಗಿದರು. ಹೋಗುವುದಾದರೆ ನಮ್ಮನ್ನು ತುಳಿದುಕೊಂಡ ಹೋಗಿ ಎಂದು ಎಚ್ಚರಿಸಿದರು. ತಹಸೀಲ್ದಾರ  ಪ್ರತಿಭಟನಾ ನಿರತ ಅರೆಬೆತ್ತಲೆ ರೈತರನ್ನು ತುಳಿದುಕೊಂಡು ಕಚೇರಿ ಪ್ರವೇಶಿಸಿದ್ದು ರೆತರನ್ನು ಕೆರಳಿಸಿತು. ಆವೇಶ ಭರಿತ ರೈತರು ತಹಸೀಲ್ದಾರರನ್ನು ಹೊರಗೆಳೆದು ಥಳಿಸಿದರು. ಕಚೇರಿ ಒಳಗೆ ನುಗ್ಗಿದ ರೈತರು ಸಿಕ್ಕಿದ್ದನ್ನು ಕಿತ್ತೆಸೆದರು. ಕಿಟಕಿ,ಬಾಗಿಲು ಪುಡಿಪುಡಿಯಾದವು, ಅಲ್ಲಿಯೆ ಇದ್ದ ಅಬಕಾರಿ ಇಲಾಖೆಯಲ್ಲಿನ ಸರಾಯಿ ಟ್ಯಾಂಕಗಳನ್ನು ಒಡೆದು ಅದರಿಂದಲೆ ಕಚೇರಿಗೆ ಬೆಂಕಿ ಹಚ್ಚಿ ಆಕ್ರೋಶ ವ್ಯಕ್ತಪಡಿಸಿದರು. ಅಷ್ಟರಲ್ಲಿ ಬೆರಳೆಣಿಕೆಯಲ್ಲಿದ್ದ ಪೊಲೀಸರು ರೈತರ ಮೇಲೆ ಲಾಠಿ ಬೀಸಿದರು. ಆದರೂ ಪರಿಸ್ಥಿತಿ ನಿಯಂತ್ರಣಕ್ಕೆ ಬಾರದಿದ್ದಾಗ ರೈತರ ಮೇಲೆ ಪಿಎಸ್‌ಐ ಗುಂಡು ಹಾರಿಸಿದನು. ಆಗ ಚಿಕ್ಕನರಗುಂದ ಗ್ರಾಮದ ಯುವ ರೈತ ವೀರಪ್ಪ ಕಡ್ಲಿಕೊಪ್ಪ ಗುಂಡಿಗೆ ಬಲಿಯಾದರು. ರೈತನ ಸಾವಿನ ಸುದ್ದಿ ಕಾಡ್ಗಿಚ್ಚಿನಂತೆ ಹಬ್ಬಿತು. ಆಕ್ರೋಶಗೊಂಡ ರೈತರು ಸಿಕ್ಕ ಸಿಕ್ಕ ಪೋಲಿಸರನ್ನು ಮನಬಂದಂತೆ ಥಳಿಸಿ ಸಾಯಿಸಿದರು. ಈ ದುರ್ಘಟನೆ ಸುದ್ದಿ ನವಲಗುಂದಕ್ಕೂ ಹಬ್ಬಿದಾಗ ಪ್ರತಿಭಟನಾ ರೈತರು ಪೊಲೀಸರ ವಿರುದ್ಧ ಬಂಡಾಯ ಎದ್ದರು. ಅಲ್ಲಿಯೂ ಓರ್ವ ರೈತ ಗುಂಡಿಗೆ ಬಲಿಯಾಗುವ ಮೂಲಕ ರೈತ ಕ್ರಾಂತಿಯೇ ನಡೆಯಿತು. 

ನಾವು ಆಗ ಸರ್ಜರಿ ಫೈನಲ್ ವರ್ಷದ ಪೋಸ್ಟಿಂಗ್ ನಲ್ಲಿ ಇದ್ದು ನೂರಾರು ಗಾಯಾಳುಗಳನ್ನು  ಕೆ ಎಂ ಸಿ ಆಸ್ಪತ್ರೆಗೆ ತಂದಿದ್ದರು ,ಹಗಲೂ ರಾತ್ರಿ ವೈದ್ಯರು ,ವಿದ್ಯಾರ್ಥಿಗಳು ಸೇವೆ ಸಲ್ಲಿಸಿದರು.ರಕ್ತ ದಾನ ಮಾಡಿದರು .ತಲೆಗೆ ಏಟು ಬಿದ್ದು ಪ್ರಜ್ನಾಹೀನ ರಾದ ಪೋಲೀಸು ಮತ್ತು ರೈತರ ತಲೆಯೊಳಗೆ ಏನಾಗಿದೆ ಎಂದು ತಿಳಿಯಲು ಆಗ ಸಿ ಟಿ ಸ್ಕ್ಯಾನ್ ಇರಲಿಲ್ಲ .ತಲೆ ಬುರುಡೆ  ಓಪನ್ ಮಾಡಿಯೇ ತಿಳಿಯ ಬೇಕಿತ್ತು .ಬುರುಡೆ ಕಟ್ ಮಾಡಲು ಈಗಿನ ಪರಿಷ್ಕೃತ  ಉಪಕರಣಗಳೂ ಇರಲಿಲ್ಲ . ಸುಧಾರಿತ ಉಳಿ ಮತ್ತು ಚಮ್ಮಟಿ ಉಪಯೋಗಿಸುತ್ತಿದ್ದ ನೆನಪು . 

ಈ ಚಳುವಳಿ ಗುಂಡೂ ರಾಯರಿಗೆ ರಾಜಕೀಯವಾಗಿ ವಾಟರ್ಲೂ ಆಗಿ ಮುಂದಿನ ಚುನಾವಣೆ ಯಲ್ಲಿ ಸೋತವರು ಮೇಲೆ ಎಳಲೇ ಇಲ್ಲ.

ಮೂರನೆಯದು ಸರ್ಕಾರಿ ವೈದ್ಯಕೀಯ ವಿದ್ಯಾರ್ಥಿಗಳ ಚಳುವಳಿ .

ನಾನು ಹಿಂದೆಯೇ ಬರೆದಂತೆ ಸರಕಾರ ತಾನು  ನಡೆಸುತ್ತಿರುವ ಮೆಡಿಕಲ್ ಕಾಲೇಜ್ ಗಳ ಸ್ಥಿತಿ ದಿನೇ ದಿನೇ ಚಿಂತಾ ಜನಕ ಆಗುತ್ತಿದ್ದರೂ ಅದರ ಸುಧಾರಣೆಗೆ ಗಮನ ಕೊಡದೆ ಹೊಸ ಖಾಸಗಿ ವೈದ್ಯಕೀಯ  ಕೋಲೇಜುಗಳಿಗೆ ಅನುಮತಿ ಕೊಡಲು ಪ್ರಾರಂಭಿಸಿತ್ತು.ಕೆ ಎಂ ಸಿ ಹುಬ್ಬಳ್ಳಿ ಯಂತಹ ಉತ್ತರ ಕರ್ನಾಟಕದ ಹೆಮ್ಮೆಯ ಏಕಮೇವ ಸಂಸ್ಥೆಯಲ್ಲಿಯೇ ಪ್ರಿನ್ಸಿಪಲ್ ಇಲ್ಲ ,ಮೆಡಿಸಿನ್ ನಂತಹ ಮುಖ್ಯ ವಿಭಾಗದಲ್ಲಿ ಅಧ್ಯಾಪಕರಿಲ್ಲ .ಇನ್ನು ಖಾಸಗಿ ಕಾಲೇಜ್ ಆರಂಭ ಆದರೆ ಅಲ್ಲಿಗೂ ಇಲ್ಲಿಂದ ಕೆಲವರನ್ನು ಎರವಲು ಕೊಡುವರು .ಇಲ್ಲಿಯ ಅನೇಕ ಗುರುಗಳು ತಮ್ಮ ಊರಿಗೆ ಸಮೀಪ ಎಂದು ಇಲ್ಲಿ ಬಿಟ್ಟು ಅಲ್ಲಿಗೆ ಹೋಗುವರು . ಇಂದಿಗೂ ಕೂಡ ಕೇರಳ ಮತ್ತು ತಮಿಳುನಾಡಿನ ಸರಕಾರಿ ವೈದ್ಯಕೀಯ ಕಾಲೇಜ್ ಗಳು  ನಮ್ಮ ಸಂಸ್ಥೆಗಳಿಗಿಂತ ತುಂಬಾ ಮುಂದುವರಿದಿವೆ .

ಇದರ ವಿರುದ್ದ ನಾವು ಮನವಿ ಸಲ್ಲಿಸಿದೆವು . ಆದರೆ ಸರಕಾರ ಸ್ಪಂದಿಸಲಿಲ್ಲ .ನಾವು ಮುಷ್ಕರ ಮಾಡಿದರೆ ಫೈನಲ್ ವರ್ಷದಲ್ಲಿ ಇರುವ ನಮಗೆ ನಷ್ಟ ,ಆದರೂ ಸುಮ್ಮನಿದ್ದರೆ ಮುಂದಿನ ತಲೆಮಾರು ನಮ್ಮನ್ನು ಕ್ಷಮಿಸದು ಎಂದು  ಚಳುವಳಿ ಆರಂಬಿಸಿದೆವು . ಸರ್ಕಾರ ತಾನೇ ಮೆಡಿಕಲ್ ಕಾಲೇಜ್ ಗಳನ್ನು ಸ್ಥಾಪಿಸಲಿ ,ಅರ್ಹ ವಿದ್ಯಾರ್ಥಿಗಳಿಗೆ ಮತ್ತು ಸಮಾಜಕ್ಕೆ ಕ್ಷೇಮ ಎಂಬುದೂ ನಮ್ಮ ಬೇಡಿಕೆಯಲ್ಲಿ ಸೇರಿತ್ತು .

(ಮುಂದೆ ಹಲವು ದಶಕ ಗಳ ನಂತರ ಡಾ ವಿ ಎಸ್ ಆಚಾರ್ಯ ರು  ವೈದ್ಯಕೀಯ ಶಿಕ್ಷಣ ಮಂತ್ರಿ ಆಗಿದ್ದಾಗ ಜಿಲ್ಲಾ ಕೇಂದ್ರಗಳಲ್ಲಿ ಸರಕಾರಿ ವೈದ್ಯಕೀಯ ಕಾಲೇಜ್ ಗಳನ್ನು ಆರಂಬಿಸುವ ಕೆಲಸ ಆರಂಬಿಸಿದ್ದು ಈಗ ಮುಂದುವರಿದಿದೆ .ಕೋವಿಡ್ ಸಾಂಕ್ರಾಮಿಕ ಸಮಯದಲ್ಲಿ ಅದರಿಂದ ಆದ ಪ್ರಯೋಜನ ಅಳೆಯಲಾರದ್ದು .)

ಈ ಚಳುವಳಿಯ ಅಂಗವಾಗಿ ನಾವು ನೂರಾರು ವಿದ್ಯಾರ್ಥಿಗಳು ಬಂಧನಕ್ಕೆ ಒಳಗಾಗಿ ನ್ಯಾಯಾಧೀಶರು ಜಾಮೀನು ಕೊಡುತ್ತೇನೆ ಎಂದರೂ ತಿರಸ್ಕರಿಸಿ ಜೈಲಿಗೆ ಹೋದೆವು .ನಾನು ಹುಬ್ಬಳ್ಳಿ ಸಬ್ ಜೈಲಿನಲ್ಲಿ ಹತ್ತು ದಿನ ಬಂಧಿಯಾಗಿ ಇದ್ದೆನು .ಇನ್ನೊಂದು ದೊಡ್ಡ ತಂಡ ಧಾರವಾಡ ಜಿಲ್ಲಾ ಕಾರಾಗೃಹಕ್ಕೆ.ನಮಗೆ ಹಾಸ್ಟಲ್ ನಿಂದ ಊಟ ಉಪಾಹಾರ ಸರಬರಾಜು ಆಗುತ್ತಿತ್ತು ಮತ್ತು ಕಾಲೇಜ್ ಹಿಂದೆ ಇರುವ ಪೈ ಹೊಟೇಲ್ ನವರು ಪ್ರೀತಿಯಿಂದ ವಿಶೇಷ ಆಹಾರ ಉಚಿತ ವಾಗಿ ತಂದು ಕೊಡುತ್ತಿದರು . ನಮ್ಮ ಗುರುಗಳಿಗೆ (ಅವರು ಜೈಲಿಗೂ ಬಂದಿದ್ದರು)ಮತ್ತು ಸಾರ್ವಜನಿಕರಿಗೆ ನಮ್ಮ ಮೇಲೆ ಸಹಾನುಭೂತಿ ಇತ್ತು . ಎಸ್ ಆರ್ ಬೊಮ್ಮಾಯಿ ,ಜೋರ್ಜ್ ಫೆರ್ನಾಂಡಿಸ್ ಮುಂತಾದ ನಾಯಕರು ನಮ್ಮನ್ನು ಕಂಡು ಬೆಂಬಲ ಸೂಚಿಸಿದ್ದರು .ನನ್ನ ಅತ್ತೆ ಮಗ ಸುಬ್ರಹ್ಮಣ್ಯ ಇಂಜಿನಿಯರಿಂಗ್ ವಿದ್ಯಾರ್ಥಿ ದಿನಾಲೂ ನನ್ನನ್ನು ಜೈಲ್ ನಲ್ಲಿ ಬಂದು ಕಾಣುತ್ತಿದ್ದ .ಇಲ್ಲಿಯ ಜೈಲರುಗಳಿಗೆ ಇದು ಒಂದು ಹಬ್ಬ ಆಗಿತ್ತು .ಕ್ರಿಮಿನಲ್ ಚಟುವಟಿಕೆಯವರೆ ಹೆಚ್ಕು ಬರುತ್ತಿದ್ದವರನ್ನು ನೋಡಿ ನಮ್ಮಂತಹ ಹುಡುಗ ಹುಡುಗಿಯರನ್ನು ನೋಡಿದ ಮೇಲೆ .ಹಲವರು ಆ ಮೇಲೂ ಆಸ್ಪತ್ರೆಯಲ್ಲಿ ಬಂದು ನಮ್ಮನ್ನು ಕಾಣುತ್ತಿದ್ದು ನಾವೂ ನೃಪತುಂಗ ಬೆಟ್ಟಕ್ಕೆ ವಾಕಿಂಗ್ ಹೋಗುವಾಗ ಜೈಲ್ ವಸತಿಗೆ ಭೇಟಿ ಕೊಡುತ್ತಿದ್ದೆವು .ಹುಬ್ಬಳ್ಳಿಯಲ್ಲಿ ವಿದ್ಯಾರ್ಥಿಯಾಗಿದ್ದ (ಮತ್ತು ನನ್ನ ಆತ್ಮೀಯರೂ ಆಗಿದ್ದ )ಅನಂತಕುಮಾರ್  ಕ್ರಿಯಾತ್ಮಕವಾಗಿ ನಮ್ಮೊಡನೆ ಸಹಕರಿಸಿದ್ದರು .ಅವರ ತಂದೆ ರೈಲ್ವೇ ನೌಕರರಾಗಿ ಹುಬ್ಬಳ್ಳಿಯಲ್ಲಿ ಇದ್ದರು .ತಾಯಿ ಹುಬ್ಬಳ್ಳಿ ಧಾರವಾಡ ಕಾರ್ಪೊರೇಷನ್  ಉಪ ಮೇಯರ್ ಆಗಿದ್ದರು ಎಂದು ನೆನಪು .ಮುಂದೆ ಅವರು ಎಂ ಪಿ ,ಮಂತ್ರಿ ಆದಮೇಲೆ ಸಂಪರ್ಕ ಬಿಟ್ಟು ಹೋಯಿತು . ಇದೇ ಚಳುವಳಿಯ ಅಂಗವಾಗಿ ಆಗ ಮಂತ್ರಿಗಳಾಗಿದ್ದ  ಶ್ರೀ ಎಂ ವೀರಪ್ಪ ಮೊಯಿಲಿಯವರನ್ನು ವಿದ್ಯಾರ್ಥಿಗಳು ಹೆದ್ದಾರಿಯಲ್ಲಿ ಘೇರಾವೋ ಮಾಡಿದಾಗ ಲಾಟಿ ಚಾರ್ಜ್ ಆಯಿತು .ಆ ದಿನ ನಾನು ಊರಿನಲ್ಲಿ ಇದ್ದರೂ ಕೇಸ್ ನಲ್ಲಿ ನನ್ನ ಹೆಸರನ್ನೂ ಸೇರಿಸಿದ್ದರು . ಮುಂದೆ ರಾಮಕೃಷ್ಣ ಹೆಗ್ಡೆ ಸರಕಾರ ರೈತರು ಮತ್ತು ವಿದ್ಯಾರ್ಥಿಗಳ ಮೇಲಿನ ಕೇಸ್ ಗಳನ್ನು ಹಿಂಪಡೆಯಿತು .ಆದರೂ ಸರಕಾರಿ ವೈದ್ಯಕೀಯ ಕಾಲೇಜ್ ಗಳ ಸ್ಥಿತಿ ಹೆಚ್ಚು ಸುಧಾರಣೆ ಕಾಣಲಿಲ್ಲ ,ಅವುಗಳನ್ನು ಸ್ವಾಯತ್ತ ಸಂಸ್ಥೆ ಗಳನ್ನಾಗಿ ಮಾಡಿದರೂ .ಇದರಲ್ಲಿ ಅಧ್ಯಾಪಕ ವೈದ್ಯರ ಪಾಲೂ ಇದೆ ಎಂದು ಹೇಳಲು ವಿಷಾದ ಪಡುತ್ತೇನೆ .

ಹುಬ್ಬಳ್ಳಿ ದಿನಗಳು 7

                      ಹುಬ್ಬಳ್ಳಿ ದಿನಗಳು7

ನಮಗೆ  ಆಸ್ಪತ್ರೆ ಪೋಸ್ಟಿಂಗ್ ಜತೆಗೆ ಔಷಧ ಶಾಸ್ತ್ರ (Pharmacology) ,ರೋಗ ನಿದಾನ ಶಾಸ್ತ್ರ  (Pathology),ಸೂಕ್ಷ್ಮಾಣು ಜೀವಿ ಶಾಸ್ತ್ರ (Microbiology)ಮತ್ತು ಅಪರಾಧ ಪತ್ತೆ ವೈದ್ಯ ಶಾಸ್ತ್ರ (Forensic medicine) ಕಲಿಯಬೇಕಿತ್ತು .ಪ್ಯಾಥಾಲಜಿ ಯಲ್ಲಿ  ಡಾ ಗೊರವಲಿಂಗಪ್ಪ ,ಡಾ ಮಹಾಲೆ ಮತ್ತು ಡಾ ನಾಡಿಗ್ ಪ್ರಾಧ್ಯಾಪಕರಾಗಿದ್ದು ಕೊನೆಯವರು ಮೈಕ್ರೋಬಯಾಲಜಿ ವಿಭಾಗದ ಪ್ರಭಾರಿ ಆಗಿದ್ದು ಡಾ ಮೀರಾ ಮೇವುಂಡಿ ಅವರೊಡನೆ ಇದ್ದರು . ಫೋರೆನ್ಸಿಕ್ ಮೆಡಿಸಿನ್ ಗೆ  ಡಾ ಭಾಸ್ಕರ್ ಕೆಲವು ತಿಂಗಳುಗಳ ನಂತರ ಬಂದರು . 

ಫಾರ್ಮಕಾಲಜಿ ಪ್ರೊಫೆಸರ್ ಡಾ ಕಂದ ಸ್ವಾಮಿ ಹಿಂದಿ ಸಿನಿಮಾ ದ  ಪ್ರಾಣ್ ತರಹ ಇದ್ದು  ಅವರ ಡೈಲಾಗ್ ಡೆಲಿವರಿ ಮತ್ತು ಪಾಠ ಮಾಡುವ ಕ್ರಮ  ವಿಶಿಷ್ಟ ಆಗಿತ್ತು . ನಮಗೆ ಪರೀಕ್ಷೆಗೆ ಇಲ್ಲದಿದ್ದರೂ ಪ್ರಾಯೋಗಿಕ ಔಷಧ ಶಾಸ್ತ್ರಕ್ಕೆ  ಹೆಚ್ಚು ಒತ್ತು ನೀಡುತ್ತಿದ್ದರು . ಔಷಧ ಶಾಸ್ತ್ರ  ವೈದ್ಯರಿಗೆ ಬಹಳ ಮುಖ್ಯ  . ಯಾವುದೇ ಔಷಧಿ ಬರೆಯುವ ಮೊದಲು ,ಅದರ ರಚನೆ ,ಇತರ ಔಷಧಿಗಳಿಗೆ ಅದರ ಪ್ರತಿಕ್ರಿಯೆ ,ಅಡ್ಡ ಪರಿಣಾಮಗಳು ,ಅದು ಶರೀರದಿಂದ ವಿಸರ್ಜನೆ ಆಗುವ ವಿಧಾನ , ಡೋಸ್ ಇತ್ಯಾದಿ ತಿಳಿದಿರಬೇಕು . ಪ್ರಸಿದ್ಧ ನೆಫ್ರೊಲೊಜಿಸ್ಟ್ ಡಾ ಎಂ ಕೆ ಮಣಿ ತಮ್ಮ ಗುರು ಡಾ ಈಶ್ವರಯ್ಯ  ಹೇಳುತ್ತಿದ್ದ  ಕಿವಿ ಮಾತು ಆಗಾಗ ನೆನಪಿಸಿ ಕೊಳ್ಳುವರು . 

"ವೈದ್ಯಕೀಯ ದಲ್ಲಿ  ಮೂರೂ ಪ್ರಾಥಮಿಕ ವಿಷಯಗಳು . ಫಿಸಿಯೋಲಾಜಿ (ಸಾಮಾನ್ಯ ಶರೀರ ಕಾರ್ಯ ಶಾಸ್ತ್ರ ),ಪ್ಯಾಥಾಲಜಿ (ರೋಗ ಶಾಸ್ತ್ರ )ಮತ್ತು ಫಾರ್ಮಕಾಲಜಿ (ಔಷಧ ಶಾಸ್ತ್ರ ).ಫಾರ್ಮಕಾಲಜಿ ಚೆನ್ನಾಗಿ ಕಲಿತರೆ ಪ್ಯಾಥಾಲಜಿ ಯನ್ನು ಫಿಸಿಯೋಲಾಜಿ ಮಾಡುವಿರಿ ,ಇಲ್ಲದಿದ್ದರೆ ಫಿಸಿಯೋಲಾಜಿ ಪ್ಯಾಥಾಲಜಿ ಆಗುವುದು ."

ಪ್ಯಾಥಾಲಜಿ ಯಲ್ಲಿ  ರೋಗ ಪೀಡಿತ ಅಂಗಗಳ  ಸ್ಲೈಡ್ ಗೆ ಬಣ್ಣ ಹಾಕಿ ಮೈಕ್ರೋಸ್ಕೋಪ್ ನಲ್ಲಿ ನೋಡಿ ರೋಗ ಗುರುತಿಸ ಬೇಕು . ಅದೇ ರೀತಿ ರಕ್ತವನ್ನೂ . ನಮಗೆ ತರಗತಿಯಲ್ಲಿ ಕೊಡುತ್ತಿದ್ದ ಸ್ಲೈಡ್ ಪರೀಕ್ಷೆಗೂ ಇಡುತ್ತಿದ್ದು ವಿದ್ಯಾರ್ಥಿಗಳು ಕೆಲವು ಕಷ್ಟದ ಸ್ಲೈಡ್ ಗಳನ್ನು  ಮೂಲೆ ತುಂಡಾದ ಸ್ಲೈಡ್ ಲಿವರ್ ಕ್ಯಾನ್ಸರ್ ,ಸ್ಲೈಡ್ ನ ಬದಿಯಲ್ಲಿ  ನೊಣದ ರೆಕ್ಕೆ ತರಹ ಇದ್ದರೆ  ಥೈರಾಯಿಡ್ ಕಾಯಿಲೆ ಇತ್ಯಾದಿ ನೆನಪು ಇಟ್ಟುಕೊಳ್ಳುತ್ತಿದ್ದೆವು . ಇದಲ್ಲದೆ ರೋಗ ಪೀಡಿತ ಅಂಗಗಳನ್ನು   ಸ್ಪೆಸಿಮೆನ್  ಅಂತ ಕಲಿಸುತ್ತಿದ್ದರು .ಆಸ್ಪತ್ರೆಯ ಆಪರೇಷನ್ ಥೀಯೇಟರ್ ನಿಂದ ಬಂದ  ಈ ಅಂಗಗಳನ್ನು  ಫಾರ್ಮಲಿನ್ ಇರುವ ಗಾಜಿನ ಜಾರಿನಲ್ಲಿ ಇಡುವರು . ವೈದ್ಯಕೀಯ ವಲಯದಲ್ಲಿ ಪ್ರಚಲಿತ ವಿರುವ ಒಂದು ಜೋಕ್ . 

ಒಂದು  ಪ್ರಾಯೋಗಿಕ ಪರೀಕ್ಷೆ .ವಿದ್ಯಾರ್ಥಿ ಹುಡುಗ ಮತ್ತು  ಗಂಡು ಎಕ್ಸಾಮಿನರ್ . ಗರ್ಭ ಕೋಶದ ಸ್ಪೆಸಿಮೆನ್  ಇಟ್ಟಿದ್ದರು .ಇದು ಏನು ?ಎಂದು ಕೇಳಿದರು ಪರೀಕ್ಷಕ .ವಿದ್ಯಾರ್ಥಿ  ಮೇಲಿಂದ ಕೆಳಗೆ ಅಂಗವನ್ನು ನೋಡಿ ಕಿಡ್ನಿ ಅಂದ .  Is it kidney ?ಸರಿಯಾಗಿ ನೋಡು . ಸಾಮಾನ್ಯ ವಾಗಿ  ಆತ್ಮ ವಿಶ್ವಾಸ ಇಲ್ಲದ ವಿದ್ಯಾರ್ಥಿ ಮಾಡುವಂತೆ 'ಅಲ್ಲ ಅಲ್ಲ ಸಾರೀ ಸರ್ ಅದು ಲಿವರ್ ಎಂದು ಅಂದಾಜಿಗೆ ಗುಂಡು ಬಿಟ್ಟ . ಪರೀಕ್ಷಕರು ಒಳ್ಳೆಯಕಲರ್ಡ್ ವರು .ಅವನನ್ನು ಹೇಗಾದರೂ ಪಾಸ್ ಮಾಡುವಾ ಎಂದು "ನೋಡಪ್ಪಾ ಈ ಅಂಗ ನನ್ನಲ್ಲೂ ಇಲ್ಲ ,ನಿನ್ನಲ್ಲೂ ಇಲ್ಲ ,ಯೋಚಿಸಿ ಹೇಳು "ಎಂದರು .ಹುಡುಗ ತಟ್  ಎಂದು "ಗೊತ್ತಾಯಿತು ಸರ್ ಮೆದುಳು "ಎಂದು ಬಿಡುವುದೇ ?

ರೋಗ ಶಾಸ್ತ್ರದಲ್ಲಿ ಹಲವು ಆಹಾರ ವಸ್ತುಗಳ ಹೆಸರುಗಳನ್ನು  ರೋಗಗಳ ಜತೆ ತಳುಕು ಹಾಕಿ ಹೆಸರು ಇಟ್ಟಿದ್ದು ಊಟ ಮಾಡುವಾಗ ಅದರ ನೆನಪು ಆಗುವುದು .ಉದಾ ಕಾಲರಾ ದಲ್ಲಿ ರೈಸ್ ವಾಟರ್ (ಗಂಜಿ )ಮತ್ತು ಟೈಫಾಯಿಡ್ ನಲ್ಲಿ  ಶೇಂಗಾ ಸೂಪ್ ಭೇದಿ ,ಇದೇ  ರೀತಿ ಕೋಲಾ ಕಲರ್ಡ್ ಮೂತ್ರ ,ಜಾಯಿಕಾಯಿ ಲಿವರ್ ,ಸ್ಟ್ರಾಬೆರಿ  ಪಿತ್ತಕೋಶ ,ಬ್ರೆಡ್ ಅಂಡ್ ಬಟರ್ ಅಪಿಯರೆನ್ಸ್ , ಎಂಕೋವಿ (ಮೀನು)ಸಾಸ್ ಕೀವು ಇತ್ಯಾದಿ ಹಲವು ಇವೆ

  ಫೋರೆನ್ಸಿಕ್ ಮೆಡಿಸಿನ್  ತರಗತಿಗಳು ರಂಜಕ .ನಮ್ಮ ಪ್ರಾಧ್ಯಾಪಕರಾಗಿದ್ದ ಡಾ ಭಾಸ್ಕರ್ ಸಿಗಾರ್ ಪೈಪ್ ಇಟ್ಟುಕೊಂಡು ಬರುವರು ,ಅವರಿಗೆ ಒಳ್ಳೆಯ ಹಾಸ್ಯ ಪ್ರಜ್ಞೆ ಇದ್ದು ,ಹಲವು ಪತ್ತೇದಾರಿ ಕಥೆಗಳನ್ನು ತಮ್ಮ ಅನುಭವದಿಂದ ಹೇಳುವರು . ಮರಣೋತ್ತರ ಪರೀಕ್ಷೆಗಳನ್ನು ನಾವು ಅಟೆಂಡ್ ಮಾಡಬೇಕಿತ್ತು . ಇದು ಕಷ್ಟದ ವಿಷಯ ಅಲ್ಲದಿದ್ದರೂ ನಮ್ಮ ಫೈನಲ್ ಪರೀಕ್ಷೆಯಲ್ಲಿ ಭಾರೀ ಅನ್ಯಾಯ ಆಯಿತು .ಡಾ ಭಾಸ್ಕರ್  ಒಳ್ಳೆಯವರು .ಆದರೆ ಪರೀಕ್ಷೆಗೆ ನಮಗೆ ಆಂತರಿಕ ಪರೀಕ್ಷಕರು ಇರಲಿಲ್ಲ .ಹೊರಗಿನಿಂದ ಬಂದವರು ಪೂರ್ವಾಗ್ರಹ ಪೀಡಿತರಾಗಿ ಬಂದಂತ್ತಿತ್ತು .ನಮ್ಮ ತರಗತಿಯ ಹಲವು ಪ್ರತಿಭಾವಂತ ವಿದ್ಯಾರ್ಥಿಗಳನ್ನು ಫೇಲ್ ಮಾಡಿ ಹೋದರು . ಆಗ ಈ ತರಹ ಅಲ್ಲಲ್ಲಿ ನಡೆಯುತ್ತಿತ್ತು . ಪ್ರಾಧ್ಯಾಪಕರ ಮರ್ಜಿಯ ಮೇಲೆ ವಿದ್ಯಾರ್ಥಿಯ ಭವಿಷ್ಯ .. ವಿದ್ಯಾರ್ಥಿ ಎಷ್ಟು ಪ್ರಾಮಾಣಿಕ ,ಬುದ್ದಿವಂತ ಆಗಿದ್ದರೂ ಸಾಲದು ,ಗುರುವಿನ ಗುಲಾಮ ಆಗುವ ತನಕ ದೊರೆಯದಣ್ಣ ಮುಕುತಿ .ಆದರೆ ಇಂತಹವರು ಅಪರೂಪಕ್ಕೆ ಕೆಲವರು ಇದ್ದು ಬಹುತೇಕ ಅಧ್ಯಾಪಕರು ಒಳ್ಳೆಯವರು ಆಗಿದ್ದರು . 

ಈ ಅನ್ಯಾಯದ ಬಗ್ಗೆ ಆಗ  ಇಲ್ಲಿಯ ಅತ್ಯಧಿಕ ಪ್ರಸಾರ ಇದ್ದ ಸಂಯುಕ್ತ ಕರ್ನಾಟಕ ಪತ್ರಿಕೆಯಲ್ಲಿ ಮುಖ ಪುಟದ ಲೇಖನ ಬಂದಿತು . ವಿದ್ಯಾರ್ಥಿಗಳ ಪರಿಸ್ಥಿತಿ ಮತ್ತೂ  ನಾಜೂಕು ಆಯಿತು .ನಮ್ಮವರೇ ಪತ್ರಿಕೆಗೆ ಸುದ್ದಿ ಕೊಟ್ಟದ್ದು ಎಂದು ತಿಳಿದು ಮುಂದಿನ ಪರೀಕ್ಷೆಯಲ್ಲಿಯೂ ಅದೇ ಪರೀಕ್ಷಕರು ಅಥವಾ ಅವರ ಮಿತ್ರರು ಬಂದರೆ ಬಹಳ ಕಷ್ಟ ವಾದೀತು  ಎಂದು ನಾವೆಲ್ಲಾ ಪತ್ರಿಕೆಯ ಆಫೀಸ್ ಗೆ ದೌಡಾಯಿಸಿದೆವು ..ಸಂಪಾದಕರು ನಿಮಗೆ ಆದ ಅನ್ಯಾಯ ಪುನಃ ಮರುಕಳಿಸ ಬಾರದು ಎಂಬುದುದಷ್ಟೇ ನಮ್ಮ ಉದ್ದೇಶ ಎಂದು ಸಮಾಧಾನ ಮಾಡಿ ಕಳುಹಿಸಿದರು . ನಮ್ಮ ಅದೃಷ್ಟಕ್ಕೆ ಮುಂದಿನ ಪರೀಕ್ಷೆಗೆ ವಿಶ್ವವಿದ್ಯಾನಿಲಯ ದವರು ಡಾ ಭಾಸ್ಕರ್ ಜತೆಗೆ ರಾಜ್ಯದ ಹೊರಗಿನಿಂದ ಪರೀಕ್ಷಕರನ್ನು ತರಿಸಿದರು ಮತ್ತು ಅನ್ಯಾಯವಾಗಿ  ಅನುತ್ತೀರ್ಣರಾದ ಎಲ್ಲರೂ ಉನ್ನತ ದರ್ಜೆಯಲ್ಲಿ ಪಾಸ್ ಆದರು  

ಬಾಲಂಗೋಚಿ : ಔಷಧಿ ಶಾಸ್ತ್ರದಲ್ಲಿ ಮದ್ಯಪಾನ ಮತ್ತು ಲೈಂಗಿಕತೆ ಯ  ಬಗ್ಗೆ ಶೇಕ್ಸ್ ಪಿಯರ್ ನ ಮಾಕ್ಬೆತ್ ನಾಟಕದ ಒಂದು ಉಕ್ತಿಯನ್ನು ಕೋಟ್ ಮಾಡುವರು " It provokes the desire, but it takes away the performance"