ವಿ ದ ಪೀಪುಲ್ ಆಫ್ ಇಂಡಿಯ

 

ವಾರಗಳ ಹಿಂದೆ ನಮ್ಮ ರಾಘಣ್ಣನ "ಕಾಡು 'ವಿನಲ್ಲಿ  ಶಿವಮೊಗ್ಗ ದ ರಂಗಾಯಣ ತಂಡದವರಿಂದ "ವಿ  ದ ಪೇಪಲ್ ಆಫ್ ಇಂಡಿಯ "ನಾಟಕ ಪ್ರದರ್ಶನ ಇದ್ದು ,ನಾನು ಗೆಳೆಯರ ಜೊತೆ ಹೋಗಿದ್ದೆ . ಪ್ರಥಮವಾಗಿ  ರಾಗಣ್ಣ ಮತ್ತು ಅವರ ಕುಟುಂಬದವರು ಪ್ರತೀ ವರ್ಷ ಆಯೋಜಿಸುತ್ತಿರುವ ಮೌಲಿಕ ಕಾರ್ಯಕ್ರಮ ಗಳಿಗಾಗಿ ಅವರು ಮತ್ತು ಅವರ ಕುಟುಂಬದವರನ್ನು ಅಭಿನಂದಿಸುತ್ತೇನೆ .

ನಟ ನಟಿಯರು ನಾಟಕಕ್ಕೆ ನ್ಯಾಯ ಒದಗಿಸಿದರು ಎಂದು ಹೇಳಬಲ್ಲೆ .  ಸಂವಿಧಾನ ಸಂವಿಧಾನ ಎಂದು ಎಲ್ಲರೂ ಜಪಿಸುತ್ತಿರುತ್ತಾರೆ . ಭಾರತದ ಸಂವಿಧಾನ ಆಶಯದಂತೆ ರಾಗ ಅಥವಾ ದ್ವೇಷ ಇಲ್ಲದೆ ,ಭಯ ಅಥವಾ ಪಕ್ಷಪಾತ ಇಲ್ಲದೆ ಕರ್ತವ್ಯ  ನಿರ್ವಹಿಸುತ್ತೇನೆ ಎಂದು ಮಂತ್ರಿ ಮಾಗಧರು ಪ್ರತಿಜ್ನೆ ಮಾಡುತ್ತಾರೆ . 

ಈ ನಾಟಕದಲ್ಲಿ ಸಂವಿಧಾನ ಎಂದರೆ ಏನು ಎಂಬ ಪ್ರಶ್ನೆಯನ್ನು  ಜನ ಪ್ರತಿನಿಧಿ ಮತ್ತು  ಸಮಾಜದ ಇನ್ನಿತರ ಗಣ್ಯರಲ್ಲಿ ಕೇಳಿದಾಗ ನಿರುತ್ತರ ಅಥವಾ ತಪ್ಪು ಉತ್ತರ ಸಿಗುತ್ತದೆ .

ನಾಟಕಕ್ಕೆ ಹತ್ತಿರದ ಕಾಲೇಜ್ ನಿಂದ ವಿದ್ಯಾರ್ಥಿ ವಿದ್ಯಾರ್ಥಿಯರು ಬಂದಿದ್ದು ,ಸಂವಿಧಾನ ರಚನೆ ಪ್ರಕ್ರಿಯೆ ,ಮೂಲ ಆಶಯಗಳು ಇತ್ಯಾದಿಗಳ ಮೇಲೆ ಪಕ್ಷಿನೋಟ ಸಿಕ್ಕಿರ ಬೇಕು .

                                                                         ನಾಟಕದಲ್ಲಿ ಅಮ್ಮು ಸ್ವಾಮಿನಾಥನ್ ಸೇರಿ ಹಲವರ ಉಲ್ಲೇಖ ಇದ್ದರೂ ಕನ್ನಡಿಗರೇ (ದಕ್ಷಿಣ ಕನ್ನಡ )ಅದ  ಬೆನಗಲ್ ನರಸಿಂಹ ರಾವ್ (-ಇವರು ಸಂವಿಧಾನ  ಕರಡು ರಚನಾ ಸಮಿತಿಯಲ್ಲಿ ಇದ್ದವರು .)ಮತ್ತು ಅವರ ಸಹೋದರ  ಶಿವ ರಾವ್( -ಇವರು ಸಂವಿಧಾನ ಸಭೆಯಲ್ಲಿ ಇದ್ದವರು )ಇವರ ಉಲ್ಲೇಖ ಇಲ್ಲದ್ದು ಮಾತ್ರವಲ್ಲ ಸಮಿತಿಯ ಸದಸ್ಯರು ಎಲ್ಲಾ ಬೇರೆ ಬೇರೆ ಕಾರಣಕ್ಕೆ ಸಿಗದೆ ಹೋದರು ಎಂಬ ಡಯಲಾಗ್ ಇದೆ . 

ಬಿ ಆರ್ ಅಂಬೇಡ್ಕರ್ ಅವರೇ  ತಮ್ಮ ಸಮಾರೋಪ ಭಾಷಣದಲ್ಲಿ ಹೇಳಿದ್ದಾರೆ "ಸಂವಿಧಾನ ರಚನೆಯ ಶ್ರೇಯ ವನ್ನು ನನಗೆ ಕೊಟ್ಟರೂ ಇದು ಭಾಗಷಃ ಮೊದಲ   ಕರಡು ಪ್ರತಿ  ರಚಿಸಿ ಅದನ್ನು ಕರಡು ಸಮಿತಿಗೆ ಒಪ್ಪಿಸಿದ ಬೆನಗಲ್ ನರಸಿಂಗ ರಾವ್ ಅವರಿಗೆ ಸೇರಬೇಕು "ಇದರ ಕರಡು ರಚಿಸಲು ಜಗತ್ತಿನ ಹಲವು ದೇಶಗಳ ಸಂವಿಧಾನದ ಕೂಲಂಕುಷ ಅಧ್ಯಯನ ಮಾಡಿ ನಮ್ಮ ದೇಶಕ್ಕೆ ಬೇಕಾದಂತ ಅಂಶಗಳನ್ನು ಅಳವಡಿಸಿಕೊಂಡ ಕೀರ್ತಿ ರಾವು ಅವರಿಗೆ ಸೇರಬೇಕು . ಬರ್ಮಾ ದೇಶದ ಸಂವಿಧಾನ ರಚನೆಯಲ್ಲಿ ಕೂಡಾ ಇವರ ಸೇವೆಯನ್ನು ಬಳಸಿಕೊಂಡಿದ್ದು ನಮಗೆ ಹೆಮ್ಮೆ . ಇವರ ಇನ್ನೊಬ್ಬ ಸಹೋದರ ರಾಮ ರಾವ್ ಭಾರತ ದೇಶದ ರೆಸೆರ್ವ್ ಬ್ಯಾಂಕ್ ಗವರ್ನರ್ ಆಗಿದ್ದರು .

ಅಡಿಕೆ ಹಾಳೆ ಶಯನ

 

                                                                                                                            ವಿಷ್ಣುವನ್ನು ಪನ್ನಗ ಶಯನ ,ಕ್ಷೀರ ಸಾಗರ ಶಯನ ಎಂದೆಲ್ಲಾ  ವರ್ಣಿಸುತ್ತಾರೆ . ಹಾಗೆ ನೋಡಿದರೆ ನಾವೆಲ್ಲಾ ಅಡಿಕೆ ಹಾಳೆ ಶಯನ ಅಗಿದ್ದೆವು . ಹುಟ್ಟಿದ ಮಗುವಿಗೆ ಹಾಳೆಯ ಮೇಲೆ ಒಂದು ಬಿಳಿ ಬಟ್ಟೆ . ತಲೆಯ ಬದಿಗೆ ಒಂದು ಒಂದು ಬಟ್ಟೆಯ ಉರುಟಿನ ತಲೆದಿಂಬು . ಹಾಸಿದ ಬಟ್ಟೆ (ಹೆಚ್ಚಾಗಿ  ಹಳೆ ವೇಷ್ಟಿ )ಯನ್ನು ಮಗು ಒದ್ದೆ ಮಾಡಿದಂತೆ ಕೆಳಗೆ ಎಳೆದು ಉಂಡೆ ಮಾಡುವುದು .ಮಗು ಅತ್ತಾಗ ಹಾಳೆ ಯ ಕೆಲ ಬಾಗ  ವನ್ನು  ಕೈಯಲ್ಲಿ ಕರಕರ ಮಾಡಿದರೆ ಅಳು ನಿಲ್ಲಿಸುವುದು .ಈಗ ಬಗೆ ಬಗೆಯ ಪ್ಲಾಸ್ಟಿಕ್ ಹಾಸುಗಳು ಅವುಗಳ ಮೇಲೆ ಬಣ್ಣ ಬಣ್ಣದ ದಪ್ಪದ ರೆಡೀ ಮೇಡ್ ಉಡುಪುಗಳು ಬಂದಿವೆ . ನಮ್ಮ ಆಸ್ಪತ್ರೆಯಲ್ಲಿ ಒಬ್ಬರು ಮಾತ್ರ ಹಾಳೆಯಲ್ಲಿ  ಮಗುವನ್ನು ಮಲಗಿಸಿದ್ದುದನ್ನು  ಕಂಡಿದ್ದೇನೆ .

                      ಅಡಿಕೆ ಹಾಳೆ ನಮ್ಮ ಜೀವನದ ಅತ್ಯಾವಶ್ಯ ಅವಿಭಾಜ್ಯ ಅಂಗ ಆಗಿತ್ತು .ತಲೆಗೆ ಮುಟ್ಟಾಳೆ ,ತೋಟಕ್ಕೆ ನೀರು ಚೇಪುವ ಚಿಳ್ಳಿ .ಚಿಳ್ಳಿಯ ಅಣ್ಣನಿಗೆ ಪಡಿಗೆ ಎಂದು ಹೆಸರು .ಇದು ತರಕಾರಿ ಹಚ್ಚಿ ಹಾಕುವುದರಿಂದ ಹಿಡಿದು ರೋಗಿಗಳ ಬೆಡ್ ಪ್ಯಾನ್ ವರೆಗೆ ವಿವಿಧ ಕಾರ್ಯಗಳಿಗೆ ಉಪಯೋಗಿಸುತ್ತಿದ್ದರು .ಹಾಳೆ ತುಂಡು ಸೆಗಣಿ ಸಾರಿಸುವುದರಿಂದ ಹಿಡಿದು ,ಚುಟ್ಟಿ ಕಿಟ್ಟಲು ಮತ್ತು ಮಕ್ಕಳ ಕಕ್ಕ ತೆಗೆಯಲು ; ಮಳೆಗಾಲಕ್ಕೆ ಮೊದಲೇ ಹಾಳೆಯನ್ನು ಒಣಗಿಸಿ ಅಟ್ಟದಲ್ಲಿ ಹೇಮಾರಿಸುವರು . ಬಚ್ಚಲು ಮನೆಯಲ್ಲಿ ಒಳೆಗೆ ಮುಖ್ಯ ಉರುವಲು .ಬೇಗನೆ ಬೆಂಕಿ ಹಿಡಿದು ಉರಿಯುವುದು . 

ರಾಸುಗಳಿಗೆ ಇದು ಒಳ್ಳೆಯ ಆಹಾರ ಕೂಡಾ .

ಊಟ ಮಾಡಲು ಕಟ್ಟಿಪ್ಪಾಳೆ . ಇದರಲ್ಲಿ ಒಂದು ದೊಡ್ಡದು ಅನ್ನ ಹಾಕಲು ,ಪಕ್ಕದಲ್ಲಿ ಒಂದು ಮರಿ ,ಪದಾರ್ಥ ಹಾಕಲು . ಹಾಳೆಯಿಂದ ಸುರ್ ಸುರ್ ಎಂದು ಉಣ್ಣುವುದು ಒಂದು ಸುಖ

ಈಗ ಈ ಹಾಳೆಗೆ ವಾಣಿಜ್ಯ ಬೆಲೆ ಬಂದಿದೆ .ಹಾಳೆ ತಟ್ಟೆ ಮಾಡುವುದು ಉದ್ಯಮ ಆಗಿ ಬೆಳೆದು ,ನಮಗೆ ಸಾಧ್ಯವಾಗದಿದ್ದರೂ ಈ ಬರೀ ಹಾಳೆ ವಿದೇಶಕ್ಕೆ ಹೋಗಿದೆ . ಅಡಿಕೆಗೆ ಮಾತ್ರ ವಲ್ಲ ತನಗೂ ಮಾನ ಬಂದಿದೆ ಎಂದು ಅದು ಬೀಗುತ್ತಿದೆ .

ಬೂದಿ ಮುಚ್ಚಿದ ಕೆಂಡ

ಸಂಜೆ ಶಾಲೆಯಿಂದ ಬಂದು ಆರಿದ ಬೆಲ್ಲದ ಕಾಪಿ ಯೊಡನೆ ಬೆಳಗಿನ ತಿಂಡಿ ಏನಾದರೂ ಉಳಿದಿದ್ದರೆ ಗಬಗಬ ತಿಂದು ಕತ್ತಲಾಗುವ ಮೊದಲು ಆಟ ಆಡುವ ಆಸೆ .ಕೆಲವೊಮ್ಮೆ ತಿಂಡಿ ಏನೂ ಇರುತ್ತಿರಲಿಲ್ಲ . ಗೆಣಸು ಅಥವಾ ನೇಂದ್ರ ಬಾಳೆ ಹಣ್ಣು ಇದ್ದರೆ ಒಲೆಯ ಕೆಂಡದಲ್ಲಿ ಮುಚ್ಚಿ ಹೋಗಿ ಮತ್ತೆ ಬಂದು ತಿನ್ನುತ್ತಿದ್ದೆವು .ಕೆಲವೊಮ್ಮೆ ಹಪ್ಪಳ ಸುಟ್ಟು ತಿನ್ನುವುದೂ ಇತ್ತು . ಒಂದು ಒಲೆಯಲ್ಲಿ ಯಾವಾಗಲೂ ಕೆಂಡ ಇರುತ್ತಿದ್ದು ಬಹಳ ಉಪಯೋಗಿ .

                    ಕೆಂಡದ ಬಿಸಿಯಲ್ಲಿಯೇ ಓಡಿನಲ್ಲಿ ಕೆಂಡದಡ್ಯೆ ಬೇಯಲು ಇಡುವುದು . ಹಲಸಿನ ಹಣ್ಣಿನ ಅಡ್ಯೆ ಕೂಡಾ ಆರಂಭದಲ್ಲಿ ಬೆಂಕಿಯಲ್ಲಿ ಉತ್ತರಾರ್ಧದಲ್ಲಿ  ಕೆಂಡದ ಬಿಸಿಯಲ್ಲಿ ಬೆಂದು ಮುಂಜಾನೆ ಗಮ ಗಮ ಪರಿಮಳ ಸೂಸುವುದು . ಹೆಸರು ಪಾಯಸವನ್ನು  ಒಂದು ಉರುಳಿಯಲ್ಲಿ ಹಾಕಿ ಕೆಂಡದ ಮೇಲೆ ಇಟ್ಟರೆ ಅದು ಗಟ್ಟಿಯಾಗಿ ಉಂಡೆ ಮಾಡಲು ಬರುವುದು ,ಮತ್ತು ತಿನ್ನಲು ರುಚಿ .ನನ್ನ ಅಜ್ಜ ಸ್ವಯಂ ಇದನ್ನು ಮಾಡುತ್ತಿದ್ದರು. ಇನ್ನು ದೀಗುಜ್ಜೆ ಮತ್ತು ಬಸಳೆ ಸಾಂಭಾರು  ಮಣ್ಣಿನ ಪಾತ್ರೆಯಲ್ಲಿ  ಕೆಂಡ ಇರುವ ಒಲೆಯ ಮೇಲೆ ಇಟ್ಟರೆ ಗಟ್ಟಿಯಾಗಿ ಉಪ್ಪು ಮೆಣಸು ಹೀರಿ ಬಹಳ ರುಚಿ ಇರುತ್ತಿತ್ತು . (ಆಯಾ ದಿನದ ಫ್ರೆಷ್ ಪದಾರ್ಥಕ್ಕಿಂತಲೂ ನಮಗೆ ಅದುವೇ ಹೆಚ್ಚು ಇಷ್ಟವಾಗುತ್ತಿತ್ತು )

ಬಲಿತ ಮಾವಿನ ಕಾಯಿ ಉಪ್ಪಿನಕಾಯಿ (ಇಡಿಕ್ಕಾಯಿ)ಯ ಗೊರಟನ್ನು ಕೆಂಡದಲ್ಲಿ ಬೇಯಿಸಿ ಒಡೆದು ಅದರ ಒಳಗಿನ ಕೋಗಿಲೆ ಸವಿಯುವುದು ಕೂಡಾ ಒಂದು ಹವ್ಯಾಸ . ಬದನೆ ಕಾಯಿ ಸುಟ್ಟು ಗೊಜ್ಜಿ ಮಾಡುತ್ತಿದ್ದರು.

ಮಳೆಗಾಲ ಒಲೆಯ ಪಕ್ಕ ಬಟ್ಟೆ ಒಣಗಲು ಹಾಕುತಿದ್ದು ಅಂತಹ ಬಟ್ಟೆಗಳು ವಿಶಿಷ್ಟವಾದ  ಪರಿಮಳ ಹೊಂದಿರುತ್ತಿದ್ದವು . 

ಸಂಜೆ ಹೊತ್ತು ಮನೆಯಲ್ಲಿ ಯಾವತ್ತೂ ಇರುತ್ತಿದ್ದ ಎಳೆ ಹಸುಳೆಗಳ ದೃಷ್ಟಿ ತೆಗೆಯಲೆಂದು ಉಪ್ಪು ಸಾಸಿವೆ ಸುತ್ತಿ ಒಲೆಗೆ ಹಾಕಿ ಚಿಟಿಚಿಟಿ ಮಾಡುತ್ತಿದ್ದರು .

ಸರಿಯಾದ ವಾತಾನುಕೂಲ ಇಲ್ಲದ ಅಡಿಗೆ ಮನೆಯಲ್ಲಿ ಹೊಗೆ ಕಾರುವ ಸೌದೆಗಳ ಎದುರು ಊದು ಓಟೆಯಲ್ಲಿ ಕಣ್ಣು ಮೂಗಿನಲ್ಲಿ  ನೀರು ಸುರಿಸಿಕೊಂಡು ಗಂಟೆ  ಕಟ್ಟಲೆ ಕುಳಿತೇ ದೋಸೆ ಹೊಯ್ಯುವುದು ,ಅಡಿಗೆ ಮಾಡುವುದು ಮಾಡುತ್ತಿದ್ದ ಅಮ್ಮಂದಿರು ಕಣ್ಣ ಮುಂದೆ ಇದ್ದಾರೆ .ಹಲವು  ದಮ್ಮು ಉಂಟುಮಾಡುವ ಶ್ವಾಸ ಕೋಶದ ಕಾಯಿಲೆಗಳಿಗೆ ಇದುವೇ ಕಾರಣ ಆಗಿತ್ತು .

ಇಂತಹ  ಒಲೆ ಗಳು ,ಹಾಲು ಮಜ್ಜಿಗೆ ಪಾತ್ರೆ ಇಡುವ ಸಿಕ್ಕ ,ಕಲಾಯಿ ಯವರು ಮುಚ್ಚಳ ಮಾಡಿಕೊಟ್ಟ ಖಾಲಿ ಎಣ್ಣೆ ಡಬ್ಬಗಳು (ಅವಲಕ್ಕಿ ಇತ್ಯಾದಿ ಶೇಖರಿಸಲು ) ಇಂದು ಅಪರೂಪ ಆಗಿವೆ .

                  

ಹಿರಿಯರ ಆಶೀರ್ವಾದ

                

ಮೇಲಿನ ಚಿತ್ರದಲ್ಲಿ ಇರುವವರು 93 ವರ್ಷದ ಯುವಕ ಬಲ್ನಾಡು ಸುಬ್ಬಣ್ಣ ಭಟ್ ಅವರು .ಸುಬ್ಬಣ್ಣನ ತ್ರಿಪದಿಗಳು ಎಂದು ಅವರ ಚುಟುಕುಗಳು ಹಿಂದೆ ಶಿಂಗಣ್ಣ ರಾಮಕೃಷ್ಣ ಶಾಸ್ತ್ರಿಗಳ 'ಇಂದ್ರ ಧನುಸ್ ' ಮಾಸಿಕ ದಲ್ಲಿ ಓದಿದ ನೆನಪು . ಎಸ್ ಬಿ ಹೇಟ್ ಅವರ ಕಾವ್ಯ ನಾಮ . ಆದಾಗ್ಯೂ ಅವರಲ್ಲಿ ಬರೀ 24  ಕೇರೆಟ್ ಪ್ರೀತಿಯೇ ಹೊರತು ಹೇಟ್ ಹುಡುಕಿದರೂ ಸಿಗದು .ಹಿಂದೆ ಅಡಿಕೆ ಸಂಘದಲ್ಲಿ ಉದ್ಯೋಗಿಯಾಗಿದ್ದು  ಪುತ್ತೂರು ಪರ್ಲಡ್ಕ ದಲ್ಲಿ ವಾಸವಿದ್ದು ಪಕ್ಕದಲ್ಲಿಯೇ ನನ್ನ ಅಕ್ಕನ ಮನೆ ಇತ್ತು . ಸಾತ್ವಿಕರೂ ದೈವ ಭಕ್ತರೂ ಆಗಿರುವ ಇವರು ಸಮಾಜದ ಅಂಕು ಡೊಂಕುಗಳನ್ನು ನವಿರಾದ ಹಾಸ್ಯದೊಡನೆ ತಮ್ಮ  ಚುಟುಕಗಳ ಮೂಲಕ ಹೇಳಲು ಹಿಂಜರಿಯರು .ಈಗ ನರಿಮೊಗರು ಸಮೀಪ' ಪಂಚವಟಿ'ಯಲ್ಲಿ ವಾಸ. ಅವರ ಪುತ್ರ ಪ್ರಸನ್ನ  ಪುತ್ತೂರಿನ ಹೆಸರಾಂತ ಸಿವಿಲ್ ಎಂಜಿನಿಯರ್ .

ಸುಬ್ಬಣ್ಣ ಭಟ್ ಅವರ ಹಾಸ್ಯ ಪ್ರಜ್ನೆ ಪ್ರಸಿದ್ದ . ಹಲವು ಕೃತಿಗಳನ್ನು ರಚಿಸಿದ್ದಾರೆ . ಅವರ ಪತ್ನಿ ನಮ್ಮ  ಗುರುಗಳಾದ ಅಮೈ ಮನೆತನದವರು . 

ಹಿರಿಯರಿಗೆ ನನ್ನ ಕೃತಿ 'ವೈದ್ಯನ ವಗೈರೆಗಳು ' ಪ್ರತಿಯನ್ನು ಪ್ರೀತಿ ಗೌರವಗಳಿಂದ ಕಳುಹಿಸಿದ್ದೆ .

ಇಂದು ಅವರ ಆಶೀರ್ವಾದ ರೂಪದ ಪತ್ರ ತಲುಪಿದೆ .

                                               ಬಲ್ನಾಡು ಸುಬ್ಬಣ್ಣ ಭಟ್ ,'ಪಂಚವಟಿ '

ಡಾ ಎ ಪಿ ಭಟ್ ಅವರಿಗೆ ಸುಬ್ಬಣ್ಣನ ನಮಸ್ಕಾರಗಳು . ನೀವು ಪ್ರೀತಿಯಿಂದ ಕೊಟ್ಟ "ವೈದ್ಯನ ವೈಗೈರೆಗಳು 'ಓದಿ 'ಖುಷಿ ' ಯಾಯಿತು .ತಪ್ಪು ತಿಳುವಳಿಕೆಗಳ ಮೇಲೆ ಬೆಳಕು ಬೀರಿ ಸೋಂಕುಗಳ  ಮೂಲ ಪರಿಚಯ ಮಾಡಿರುವ ಪುಸ್ತಕವಿದು ಎಲ್ಲರ ಮನೆಯಲ್ಲೂ ಇರಬೇಕಾದ ಗ್ರಂಥ .

ತಿಳಿಹಾಸ್ಯದ ಲೇಪನದ ಎರಡನೆಯ ಭಾಗ ನೇಪಥ್ಯ ಸೇರಿದ್ದ ಬಾಲ್ಯದ ನೆನೆಪುಗಳನ್ನು ರಂಗಕ್ಕೆ ತಂದಿರುವುದು  ಶ್ಲಾಘನೀಯ .ದಯವಿಟ್ಟು ಪುಸ್ತಕದ  ಗೌರವ ಧನವನ್ನು ಸ್ವೀಕರಿಸಿರಿ .

ವೃದ್ದಾಪ್ಯ (93 ವರ್ಷ )ಸಹಜ ದೌರ್ಬಲ್ಯಗಳ ಹೊಂದಿ 

ಆಗಿರುವೆ ನಾನಿಂದು  ಮನೆಯೊಳಗೆ ಬಂಧಿ 

ಬಿಡುವು ದೊರೆತರೆ ನಮ್ಮ ಮನೆಗೊಮ್ಮೆ ಬನ್ನಿ 

ಬರುವಾಗ ಜತೆಗೆ 'ನಿಮ್ಮವರ 'ಕರೆತನ್ನಿ .

                             ಇತೀ

                                       ಸುಬ್ಬಣ್ಣ ಭಟ್

                                             
ಜತೆಗೆ  ಎಂಟು ಚೌಪದಿಗಳ ಮೆಚ್ಚುಗೆ ನುಡಿಗಳನ್ನು ರಚಿಸಿ ಕಳುಹಿಸಿದ್ದಾರೆ .ಅವುಗಳನ್ನು ಅಶೀರ್ವಚನ ಎಂದು ಸ್ವೀಕರಿಸಿದ್ದೇನೆ .

 

ವೈದ್ಯರ ವಗೈರೆ ಪುಸ್ತಕದ ಕೃತಿಕಾರ 

ವೈದ್ಯರೇ ನಿಮಗೆ ಸಲಿಸುವೆ ನಮಸ್ಕಾರ 

ಸುಲಿದ ಕದಳಿಯ ಹಣ್ಣಿನಂತಿಹ ವಿಚಾರ 

ತಿಳುವಳಿಕೆಗಳಿಗೆನ್ನ ಪುರಸ್ಕಾರ . ೧

 

ಜಿಜ್ಞಾಸುಗಳ ಬಗೆಗೆ ಇದು ಮಾರ್ಗದರ್ಶಿ 

ಸೋಂಕುಗಳ ಪರಿಚಯಕೆ ಕೃತಿಯೊಂದು ದರ್ಶಿ 

ತಪ್ಪು ತಿಳುವಳಿಕೆಗಳ ಮೇಲೊಂದು ಬೆಳಕು 

ಬೀರಿರುವ ಗ್ರಂಥ ವಿದರೊಳಗುಂಟು ಥಳಕು . ೨

 

ಹತ್ತೂರುಗಳ ಸುತ್ತಿ ತುಂಬಿರುವ ಬುತ್ತಿ 

ಪುತ್ತೂರಿನಲಿ ಬಿಚ್ಚಿ ಉಣಿಸಿಸಿದ ಪ್ರಸಕ್ತಿ 

ಚಿತ್ರ 'ಬಾಲಂಗೋಚಿ 'ಗಳ ಬರಹದಿಂದ 

ವರ್ಧಿಸಿದೆ ಹೊತ್ತಿಗೆಯ ಸೊಬಗು ಒಟ್ಟಿಂದ.  ೩

ಕಷ್ಟ ಸುಖ ಸಂತೋಷದನುಭವ ಪಡೆದು 

ಹುಟ್ಟೂರ ಸೇರಿರುವ ಸಾಹಸವು ಹಿರಿದು 

ಇಷ್ಟಮಿತ್ರರ ನಡುವೆ ವೃತ್ತಿಯ ನಡಿಗೆ 

ಚಿತ್ತದಲಿ ಸಂತುಷ್ಟಿ ಶಾಂತಿಗಳ ಕೊಡುಗೆ .೪

ನಾಗವಲ್ಲಿಯ ದಳಕೆ ಲೇಪಿಸುತ ಸುಣ್ಣ 

ಜಗಿದಾಗ ತುಟಿಗೆ ಬರುವಂತೆ ಕೆಂಬಣ್ಣ 

ಓದಿದನುಭವ ಮೆಲುಕಾಡಿದರೆ ಜ್ನಾನ

ಮೊಸರ ಕಡೆದರೆ ಸಿಗುವ ವರಮಾನ .೫

 

'ಅನುಭವವು ಸವಿಯಲ್ಲ ನೆನಪು ಸವಿಯು '

 ಇದು ಕಡೆಂಗೋಡ್ಲು ಶಂಕರ ಭಟ್ಟರ ಮಾತು 

ಬಾಲ್ಯದಲಿ ಕಂಡು ಸಂಭ್ರಮಿಸಿಸುವ ಮನಸು 

'ಆತ್ಮ ನಿರ್ಭರ 'ಹಳ್ಳಿ ಜೀವನದ ಸೊಗಸು .೬

 

ಆತ್ಮಕತೆಯಂತಿರುವ  ಎರಡನೆಯ ಭಾಗ 

ಜಾತ್ರೆಯಲಿ ಮಣಿಸರಕಿನಂಗಡಿಯ ಜೋಗ 

ಎಲ್ಲವೂ ಉಂಟಲ್ಲಿ ಸುಲಭದಲಿ ಲಭ್ಯ 

ಅರಸುವಡೆ ಶ್ರಮವಿಲ್ಲ ತೆರೆದ ಸೌಲಭ್ಯ .೭

 

ಸಾಹಿತ್ಯ ಕಲೆಗಳಲಿ ನಿಮಗಿರುವ ಪ್ರೀತಿ 

ವೈದ್ಯರೊಳಗಪರೂಪವೆನುವ  ಪ್ರತೀತಿ 

ಜನಹಿತದ ಗ್ರಂಥಗಳು ಬರಲಿ ನಿಮ್ಮಿಂದ 

ಬಲ್ನಾಡು ಸುಬ್ಬಣ್ಣ ಭಟ್ಟ ಹೀಗೆಂದ.೮

 

 

 

ಮುರಿದ ಕವಿ ಕನಸು

 ರಾಷ್ಟ್ರಕವಿ ಕುವೆಂಪು ಬಯಸಿದರು

ನಮ್ಮ ನಾಡು ಆಗಲಿ

ಸರ್ವ ಜನಾಂಗದ ಶಾಂತಿಯ ತೋಟ 

ಅಡಿಗರು ಪ್ರತಿಜ್ನೆ ಮಾಡಿದರು

ಕಟ್ಟುವೆವು ನಾವು ಹೊಸ ನಾಡೊಂದನು,

                - ರಸದ ಬೀಡೊಂದನು.

ಹೊಸ ನೆತ್ತರುಕ್ಕುಕ್ಕಿ ಆರಿಹೋಗುವ ಮುನ್ನ,

ಹರೆಯದೀ ಮಾಂತ್ರಿಕನ ಮಾಟ ಮಸುಳುವ ಮುನ್ನ,

ಉತ್ಸಾಹ ಸಾಹಸದ ಉತ್ತುಂಗ ವೀಚಿಗಳ

ಈ ಕ್ಷುಬ್ಧ ಸಾಗರವು ಬತ್ತಿಹೋಗುವ ಮುನ್ನ

ಕಟ್ಟುವೆವು ನಾವು ಹೊಸ ನಾಡೊಂದನು!

 

ಜಾತಿಮತ ಭೇದಗಳ ಕಂದಕವು ಸುತ್ತಲೂ,

ದುರ್ಭೇದ್ಯವೆನೆ ಕೋಟೆ ಕೊತ್ತಲಗಳು;

ರೂಢಿ ರಾಕ್ಷಸನರಸುಗೈಯುವನು, ತೊಳ್ತಟ್ಟಿ 

ತೊಡೆತಟ್ಟಿ ಕರೆಯುವನು ಸಂಗ್ರಾಮಕೆ!

 

ಅಂತೂ ಕಟ್ಟಿದೆವು ಕಟ್ಟಿ ಹಾಡಿದೆವು ಠಾಗೋರ್ ಆಶಯ ಪದ್ಯ 

 ಎಲ್ಲಿ ಮನಕಳುಕಿರದೋ ಎಲ್ಲಿ ತಲೆ ಬಾಗಿರದೋ
ಎಲ್ಲಿ ತಿಳಿವಿಗೆ ತೊಡಕು ತೋರದಿಹುದಲ್ಲಿ
ಎಲ್ಲಿ ಮನೆಯೊಕ್ಕಟ್ಟು ಸಂಸಾರ ನೆಲೆಗಟ್ಟು
ಧೂಳೊಡೆಯದಿಹುದೋ ತಾನಾನಾಡಿನಲ್ಲಿ
ಎಲ್ಲಿ ಸತ್ಯದಗಾಧ ನೆಲೆಯಿಂದ ಸವಿವಾತು
ಸಲ್ಲಲಿತ ನಡೆಯಿಂದ ಮುಂಬರಿವುದಲ್ಲಿ
ಎಲ್ಲಿ ದಣಿವಿರದ ಸಾಧನೆಯು ಸಫಲತೆಗೆಡೆಗೆ
ತೋಳ ನೀಡಿಹುದೋ ತಾನಾನಾಡಿನಲ್ಲಿ
ಎಲ್ಲಿ ಸುವಿಚಾರ ನಿರ್ಮಲ ಜಲದೊಸರು ಹರಿದು
ಕಾಳರೂಢಿಯ ಮರಳೊಳಿಂಗಿ ಕೆಡದಲ್ಲಿ
ಎಲ್ಲಿ ನೀನೆಮ್ಮ ಚಿಂತನವನುದ್ಯಮವ ಸುವಿ-
-ಶಾಲತೆಯ ಪೂರ್ಣತೆಗೆ ಮುಂಬರಿಸುವಲ್ಲಿ
ಅಲ್ಲಿಯಾ ಬಂಧನ ರಹಿತ ಸುಖದ ಸ್ವರ್ಗದಲಿ
ಪಾಲಿಸೈ ಪಿತ ನಮ್ಮ ನಾಡೆಚ್ಚರಿರಲಿ !

 

 

ಕಟ್ಟುವುದು ಎಂದರೆ ಕೈಗಳು ಬೇಕು ಸಾವಿರ

ಮೇಲಾಗಿ ಸನ್ಮನಸು

 ಚಿಗುರಿತು ಎನ್ನುವಷ್ಟರಲ್ಲಿ ಶಾಂತಿಯ ಮಾಮರ .

 

 ಎಲ್ಲಿಂದ ಬಂದವೋಮನೆಮುರುಕ ಬುಲ್ ದೋಜರ್ ಗಳು

 ಯಂತ್ರಗಳಲ್ಲವೇ ಎಲ್ಲಿ ಅವಕ್ಕೆ  ಮನಸು 

ಅರಿವು ಹೇಗೆ ಇದ್ದೀತು ಪಿತೃಗಳು ನಾವು ಕಂಡ ಕನಸು 

ಭಯ ಯಂತ್ರದ್ದಲ್ಲ    ಹಿಂಡು  ಹಿಂಡಾಗಿ ಹಿಂದು ಮುಂದು ನೋಡದೇ                                                             ಕೇಳಿ ಬರುತ್ತಿರುವ ಜಯ ಘೋಷ , ಮುರಿಯುವ ತವಕ

                                                                                                   

 

ಒಂದು ಲಿಫ್ಟ್ ನ ಹಿಂದೆ

 ದಿನಗಳ ಹಿಂದೆ ಮಧ್ಯರಾತ್ರಿ ತನ್ನ ಆಫೀಸ್ ನಿಂದ ಮನೆಗೆ  ಲಿಫ್ಟ್ ನಿರಾಕರಿಸಿ ಓಡುತ್ತಿರುವ  ಯುವಕನ ವಿಡಿಯೋ ಮಾಧ್ಯಮಗಳಲ್ಲಿ ವೈರಲ್ ಆಗಿತ್ತು . 

ನಡೆಯುವುದು ಆರೋಗ್ಯಕ್ಕೆ ಒಳ್ಳೆಯದು ಮತ್ತು ವಾಹನಗಳಿಂದ ಆಗುವ ವಾತಾವರಣ ಕಲುಷಿತ ಗೊಳ್ಳುವುದು ಕಡಿಮೆ ಆದೀತು . ಪುತ್ತೂರಿನಂತಹ ಪಟ್ಟಣದಲ್ಲಿ ನಡೆಯುವರಿಗೆ ಕಾಲುದಾರಿ ಬಹುತೇಕ  ಇಲ್ಲದೆ  ಎರ್ರಾ ಬಿರ್ರಿ ಓಡುವ ವಾಹನಗಳಿಂದ ತಪ್ಪಿಸಿ ಹೋಗುವುದು ಹರ ಸಾಹಸ ಆಗಿದೆ . ವಾಹನದಲ್ಲಿ ಸಂಚರಿಸುವುದು ನಡೆಯುವುದಕ್ಕಿಂತ ಸುಲಭ . ಇದರಿಂದ ವಾಹನ ದಟ್ಟಣೆ ಹೆಚ್ಚಾಗಿ ಪಾದಚಾರಿಗಳಿಗೆ ಮತ್ತೂ ಸಂಕಷ್ಟ ..ಇದೊಂದು ವಿಷ ವೃತ್ತ . 

ಬಾಲ್ಯದಲ್ಲಿ ನಾವು ಶಾಲೆಗೆ ಹೋಗುವಾಗ ಅರ್ಧ ಭಾಗ (ಒಂದೂವರೆ ಕಿಲೋಮೀಟರು )ಗದ್ದೆ ಬಯಲು ;ಇನ್ನರ್ಧ ದೂರ ಮಣ್ಣಿನ ರಸ್ತೆ ;ವಿರಳ ಬಸ್ ಸಂಚಾರ ಇತ್ತು . ಕೆಲವೊಮ್ಮೆ ಲಾರಿ ಯವರು ,ಬಾಡಿಗೆ ಕಾರಿನವರು ನಮ್ಮನ್ನು ಬನ್ನಿ ಎಂದು ಕರೆದಾಗ ಬಹಳ ಸಂತೋಷ ದಿಂದ ಹತ್ತಿ ಹೋಗುತ್ತಿದ್ದೆವು . (ಉಚಿತ ಸವಾರಿ ).ರೋಡ್ ರೋಲರ್ ನಲ್ಲಿ ಕುಳಿತು ಹೋದದ್ದೂ ಇದೆ . ನಮ್ಮ  ಹೈ ಸ್ಕೂಲ್ ಅಧ್ಯಾಪಕ ಶ್ರೀಪತಿ ರಾಯರ ಬಳಿ ಒಂದು ಬೈಸಿಕಲ್ ಇತ್ತು .ನಾವು ರಾಜ ರಸ್ತೆಗೆ ಸೇರುವಲ್ಲಿ ಅವರ ಮನೆ .ಅನೇಕ ಬಾರಿ ನನ್ನನ್ನು  ಡಬ್ಬಲ್ ರೈಡ್ ಮಾಡಿ ಕರೆದೊಯ್ಯುತ್ತಿದ್ದರು . (ನಮ್ಮಂತಹ ಧಡಿಯರನ್ನು ಚಡಾವುಗಳು ಇರುವ ಮಣ್ಣಿನ ಮಾರ್ಗದಲ್ಲಿ ಪೆಡಲ್ ಮಾಡಿ ಹೋದ್ದರಿಂದ ಇರಬೇಕು ,ಅವರ ಅರೋಗ್ಯ ಸರಾಸರಿ ಚೆನ್ನಾಗಿದೆ )

  ನಿಜಕ್ಕೂ ಗೆಳೆಯರ ಜತೆ ನಾವು ನಡೆದು ಹೋಗುವುದನ್ನು ಆನಂದಿಸುತ್ತಿದ್ದೆವು .ಚೇಂಜ್ ಗೆ ವಾಹನ ಸಂಚಾರ ಒಂದು ಖುಷಿ ಕೊಡುತ್ತಿತ್ತು . 

ಈಗ ಅಪರಿಚಿತರು ಕರೆದರೆ ಯಾರೂ ವಾಹನ ಹತ್ತರು .ನಂಬಿಕೆ ವಿಶ್ವಾಸ ಕಡಿಮೆ ಆಗಿದೆ . ಆ ತರಹ ಕರೆಯುವವರೂ  ಕಡಿಮೆ . ಸಂಬಂಧಿಕರ ಮನೆಗೆ ಸಮಾರಂಭಕ್ಕೆ ಹೋಗಿ ಬರುವಾಗ ಪರಿಚಯದವರು ಕಂಡರೂ ವಾಹನ ನಿಲ್ಲಿಸಿ ಬರುತ್ತೀರಾ ಎಂದು ಕೇಳುವುದಿಲ್ಲ . ಒಂದು ಶನಿವಾರ ನಾನು ಕೊಣಾಜೆ ಮುಡಿಪ್ಪು ರಸ್ತೆಯಲ್ಲಿ ಮಧ್ಯಾಹ್ನ ಬರುವಾಗ ಶಾಲೆಯ ಹುಡುಗನನ್ನು ಕಂಡು ಕಾರು ನಿಲ್ಲಿಸಿ 'ಬಾ ಮಾರಾಯ ನಿನ್ನನ್ನು ಬಿಡುತ್ತೇನೆ "ಎಂದು ಕರೆದೆ . ಆತ ಒಳಗೆ ಬಂದು ಕುಳಿತ ಮೇಲೆ ನಿನ್ನ ಮನೆ ಎಲ್ಲಿ ಇತ್ಯಾದಿ ವಿಚಾರಿಸಲು ಎಕಾ ಏಕಿ ಹೆದರಿ ನಿಲ್ಲಿಸಿ ನಿಲ್ಲಿಸಿ ಎಂದ .ಅವನಿಗೆ  ಈ ಆಸಾಮಿ ತನ್ನನ್ನು ಕಿಡ್ನ್ಯಾಪ್ ಮಾಡುತ್ತಿದ್ದಾನೆ ಎಂದು ಭಯ ವಾದಂತೆ ಕಂಡಿತು . ಅವನನ್ನು ಸಂತಯಿಸಿ ಅಲ್ಲೇ ಬಿಟ್ಟೆ . 

ಆದರೂ ಹಳ್ಳಿಗಳಲ್ಲಿ ಮತ್ತು ಮನೆಯ ಅಕ್ಕ ಪಕ್ಕದವರು ಕಂಡರೆ ನಾನು ನಿಲ್ಲಿಸಿ ಬರ್ಪಾರಾ ಎಂದು ಕೇಳುತ್ತೇನೆ . ಪಾದಚಾರಿಗಳಿಗೆ ದಾರಿ ಇದ್ದರೆ ನಾನು ನಡೆದೇ ಹೋಗಲು ಇಷ್ಟ ಪಡುವನು . ದ್ವಿಚಕ್ರ ವಾಹನದಲ್ಲಿ ಹೋಗಲು ಮನೆಯವರ ಆಕ್ಷೇಪ (ಸುರಕ್ಷತೆಯ ದೃಷ್ಟಿಯಿಂದ )ಇರುವುದರಿಂದ ಗೃಹ ಶಾಂತಿಗಾಗಿ ಕಾರಿನಲ್ಲಿ ಒಬ್ಬನೇ ಹೋಗುವಾಗ ಏನೋ ಕಸಿವಿಸಿ 

ಹುಲಿಗೆಪ್ಪ ಕಟ್ಟಿಮನಿ

                 ಹುಲಿಗೆಪ್ಪ ಕಟ್ಟಿಮನಿ 

ನಿನ್ನೆಯ ದಿನ ಸಂಜೆ ಬಹು ವಚನಂ ನಲ್ಲಿ ರಂಗ ಕರ್ಮಿ ಶ್ರೀ ಹುಲಿಗೆಪ್ಪಾ ಕಟ್ಟಿಮನಿ ಯವರ ಕಾರ್ಯಕ್ರಮ ಇತ್ತು . ಶ್ರೀಯುತರು ಹಿರಿಯ ಕಲಾವಿದರು ;ರಂಗಾಯಣದ  ಸುಧೀರ್ಘ ಅರ್ಥಪೂರ್ಣ ಕಲಾ ಸೇವೆಯಿಂದ ಇತ್ತೀಚಿಗೆ ನಿವೃತ್ತ ರಾದವರು. ಜೈಲು ಕೈದಿಗಳಿಗೆ ನಾಟಕ ತರಬೇತಿ ಮಾಡಿಸಿ ಅವರ ಬಂಧಿ ಜೀವನ ಸಹ್ಯವಾಗುವಂತೆ ಮಾಡಿದ್ದಲ್ಲದೆ ಅವರ ಮನ ಪರಿವರ್ತನೆ  ಮಾಡುವದುದರಲ್ಲಿ ಬಹು ಮಟ್ಟಿಗೆ ಯಶಸ್ವಿ ಆದವರು . ನಾನು ನೇರವಾಗಿ ಇವರ ನಾಟಕಗಳನ್ನು ನೋಡಿಲ್ಲ .ಕುತೂಹಲದಿಂದ ನಿನ್ನೆ ಸಂಜೆ ಹೋಗಿದ್ದೆ . 

ಕಟ್ಟೀಮನಿಯವರು ತಮ್ಮ ಗುರು ಶ್ರೀ  ಬಿ ವಿ ಕಾರಂತರನ್ನು ನೆನೆಪಿಸಿಕೊಂಡು ತಮ್ಮ ಆರಂಭದ ಕಲಿಕಾ ದಿನಗಳಲ್ಲಿ ಗುರುಗಳು ಬಸ್ ಸ್ಟಾಂಡ್ , ರೈಲ್ವೆ ಸ್ಟೇಷನ್ ನಂತಹ ಸಾರ್ವಜನಿಕ ಸ್ಥಳಗಳಿಗೆ ಹೋಗಿ ಎಲ್ಲರೊಡನೆ  ಒಂದಾಗಿ ಅಲ್ಲಿಯ ಒಂದೊಂದು ಘಟನೆಯನ್ನೂ ಸೂಕ್ಷ್ಮವಾಗಿ ಗಮನಿಸುವ ಅಭ್ಯಾಸ ಮಾಡಿಸಿದರು .'ನಾಟಕವೆಂದರೆ ವೇಷ ಹಾಕಿ ಸಂಭಾಷಣೆ ಕಕ್ಕುವುದು ಅಲ್ಲಾ ;ಪಾತ್ರದ ಆತ್ಮ ರಂಗಕ್ಕೆ ಬರಬೇಕು .ಕಳೇಬರ ಅಲ್ಲ .'ಎಂಬುದನ್ನು ಹೇಳಿ ಕೊಟ್ಟವರು . 

ಕೈದಿಗಳಿಗೆ ನಾಟಕ ಹೇಳಿಕೊಡುವ ಕಾರ್ಯ ತಾವು ಪ್ರಸಿದ್ಧ ಬಳ್ಳಾರಿ ಜೈಲಿನಲ್ಲಿ ಆರಂಭಿಸಿದ್ದು ;ಆರಂಭದಲ್ಲಿ ಎದುರಿಸಿದ  ಸವಾಲುಗಳನ್ನು ವಿವರಿಸಿದ ಅವರು ಮುಂದೆ ಅದು ಯಶಸ್ವೀ ಆದ ಬಗ್ಗೆ ತಿಳಿಸಿದರು .ಶ್ರವಣ ಬೆಳಗೊಳ ಮಹಾಮಸ್ತಕಾಭಿಷೇಕ ದ ಜನ  ಜಂಗುಳಿಯಲ್ಲಿಯೂ  ತಮ್ಮ  ತಂಡ ದ ಕೈದಿಗಳು ತಪ್ಪಿಸಿ ಓಡಿ ಹೋಗದೆ ಪುನಃ ಬಂದ ವಿಚಾರ ಸ್ವಾರಸ್ಯ ವಾಗಿತ್ತು . ಪುನಃ ಯಾಕೆ ಬಂದ್ರಿ ಎಂದು ಕೇಳಿದ್ದಕ್ಕೆ'ನಾಟಕ್ದಲ್ಲಿ   ನಮ್ಮ ಪಾತ್ರ ಮಾಡ್ಬೇಕಲ್ರೀ" ಎನ್ನುವಷ್ಟು ಇನ್ವೋಲ್ವೆಮೆಂಟ್ ಅವರಲ್ಲಿ ಇತ್ತು ಎಂದರು . 

ವಿಶ್ವ ರಂಗ ಭೂಮಿ ದಿನ (ಒಂದು ವಾರ ಮೊದಲೇ ಆಚರಿಸಿದರು )ದ ಅಂಗವಾಗಿ ನಡೆದ ಕಾರ್ಯಕ್ರಮ . ಐ ಕೆ ಬೊಳುವಾರು ಶ್ರೀ ಪೀಟರ್ ಸೆಲ್ಲರ್ಸ್ ಅವರ ಸಂದೇಶದ ಕನ್ನಡ ಅನುವಾದ ಓಡಿದರು . 24x7 ಸುದ್ದಿ ಮಾಧ್ಯಮಗಳ ಭರಾಟೆಯಿಂದ ತಪ್ಪಿಸಿ ಮಾನವೀಯ ಸಂಬಂಧಗಳನ್ನು ಹುಡುಕುವ ,ಸೃಜ್ನನಶೀಲ ಮನಸುಗಳ ಕಟ್ಟುವಿಕೆ ಆಗ ಬೇಕೆಂಬುದು ಒಟ್ಟಾರೆ ಆಶಯ .ಇದನ್ನು ಅತಿಥಿಗಳೂ ಒತ್ತಿ ಹೇಳಿದರು . 

ಒಟ್ಟಾರೆ  ಒಂದು ಸುಂದರ ಸಂಜೆ ,ಉಪಯುಕ್ತವಾಗಿ ಕಳೆದ  ಭಾವ .ಆಯೋಜಕರರಿಗೆ ಧನ್ಯವಾದಗಳು .