ಮಲೇರಿಯಾ ಜೀವನ ಚರಿತ್ರೆ

   ಮಲೇರಿಯಾ ಜೀವನ ಚಕ್ರ ಅಥವಾ ಚರಿತ್ರೆ 

ಪ್ರಕೃತಿಯ ಸೃಷ್ಟಿ ಬಹು ವಿಚಿತ್ರ . ಮನುಷ್ಯ ನ ದೇಹದಲ್ಲಿ ಸಂಕೀರ್ಣವಾದ   ರೋಗ ನಿರೋಧಕ  ವ್ಯವಸ್ಥೆ ಇಟ್ಟಿದೆ  .ಅದೇ ಸಮಯ ಅವನನ್ನು ಹಣಿಯಲು ಬೇಕಾದ ಪ್ರಬಲ ಆಯುಧ ಗಳು ಉಳ್ಳ ರೋಗಾಣುಗಳನ್ನೂ . 

ಉದಾಹರಣೆಗೆ ಇಂದು ನಾವು ಮಲೇರಿಯಾ ಕಾಯಿಲೆಯನ್ನು ಪರಿಗಣಿಸುವ . ಹಿಂದೆ ನಾವು ಕೊಕ್ಕೆ ಹುಳದ ಬಗ್ಗೆ  ತಿಳಿದಿದ್ದೇವೆ . ಅದು ಏಕ ಪ್ರಾಣಿ ವೃತಸ್ತ  . ಮನುಷ್ಯ ಓರ್ವ ಇದ್ದರೆ ಸಾಕು ಅದರ ಬಾಲ್ಯ ,ಯೌವನ ,ಸಂತಾನೋತ್ಪತ್ತಿ  ನಮ್ಮೊಳಗೇ ನಡೆದು ಮುಗಿಯುವುದು .ಅದರ ಮೊಟ್ಟೆ ಮಣ್ಣಿನಲ್ಲಿ ಸ್ವಲ್ಪಕಾಲ ಬೆಳೆದು ಬೆಳವಣಿಗೆ ಕಂಡು ಮತ್ತೆ ಮನುಷ್ಯನ ಶರೀರ ಸೇರಿ .ಪುನರಪಿ ಜನನಂ ಪುನರಪಿ ಮರಣಂ ಪುನರಪಿ ನರನ ಜಠರೇ (ಕರುಳೇ )ಶಯನಂ . 

ಆದರೆ ಮಲೇರಿಯಾ ಜೀವನ ಚರಿತ್ರೆ ಹಾಗಲ್ಲ ; ಇನ್ನೂ ರೋಚಕ .. 

ಈ ಪರೋಪಜೀವಿ ಗೆ  ಎರಡು ಆತಿಥೇಯರು ಬೇಕೇ ಬೇಕು . ಒಂದು ನಿರ್ಣಾಯಕ -ಹೆಣ್ಣು ಅನೋಫಿಲಿಸ್ ಸೊಳ್ಳೆ ಮತ್ತೊಂದು ಮಧ್ಯವರ್ತಿ -ಮನುಷ್ಯ . ಗಂಡು ಸೊಳ್ಳೆ ಅಹಿಂಸಾ ವಾದಿ ,ನಮ್ಮ ಸುದ್ದಿಗೆ ಬರದು ,ಸಾಧು .ಸಸ್ಯಾಹಾರಿ .ಹೆಣ್ಣು ಸೊಳ್ಳೆ ರಕ್ತ ಪಿಪಾಸು , ಅದರ ರೆಕ್ಕೆಯ ಚಲನೆ ಉಚಿತವಾದ ಸಂಗೀತ ಉಂಟು ಮಾಡುವುದು . ನಮ್ಮನ್ನು ಕಚ್ಚಿದಾಗ ಅದರ ಲಾಲಾರಸದಲ್ಲಿ  ಇರುವ ರಾಸಾಯನಿಕಗಳು ರಕ್ತ ಕೂಡಲೇ ಹೆಪ್ಪುಗಟ್ಟದಂತೆ ಮಾಡಿ ಹೆಚ್ಚು ರಕ್ತ ಅದಕ್ಕೆ ಸಿಗುವಂತೆ ಮಾಡುವವು . ಬದಲಿಗೆ ಸೊಳ್ಳೆಯ ಬಾಯಿಯ ಮೂಲಕ ಮಲೇರಿಯಾ ರೋಗಾಣು  ಪ್ಲಾಸ್ಮೋಡಿಯಂ ನಮ್ಮ ಶರೀರ ಸೇರುವುದು ;ಕಡಿತದ ವ್ಯಾಪಾರ . ಸೊಳ್ಳೆಯನ್ನು  ಮಲೇರಿಯ ಕಾಡುವುದಿಲ್ಲ 

  ಸೊಳ್ಳೆ ಮಲೇರಿಯ ರೋಗಾಣುವಿನ ನಿರ್ಣಾಯಕ ಅತಿಥೇಯ ಎಂದೆವಲ್ಲ .ಅದರ ಅರ್ಥ ಅದರ ವೈವಾಹಿಕ ಜೀವನ ಮತ್ತು ಸಂತಾನೋತ್ಪತ್ತಿ ಹೆಣ್ಣು ಅನೋಫಿಲಿಸ್ ಸೊಳ್ಳೆಯ ಒಳಗೇ ನಡೆಯುವದು . ಸ್ವಲ್ಪ ಬೆಳೆದ ಮರಿಗಳು ಮನುಷ್ಯನ ಶರೀರ ರಕ್ತದ ಮೂಲಕ ಸೇರಿ ,ಅದರ ಬ್ರಹ್ಮಚಾರಿ ಜೀವನ ಅಲ್ಲಿ ನಡೆಯುವದು . ಮೊದಲು ಲಿವರ್ ಸೇರಿ ಅಲ್ಲಿ ಕೆಲವು ಹಂತದ ಬೆಳವಣಿಗೆ ,ಆಮೇಲೆ  ಎಳೆಯ ಕೆಂಪು ರಕ್ತ ಕಣಗಳ ಮೇಲೆ ಧಾಳಿ ,ಅಲ್ಲಿ ಅತಿಥಿಯಾಗಿ ಸೇವೆ ಸಲ್ಲಿಸಿ ಬೆಳವಣಿಗೆ ಹೊಂದಿ ಪುರಾಣದ ವಾತಾಪಿಯಂತೆ  ಅತಿಥೇಯನ (ಅಂದರೆ ಕೆಂಪು ರಕ್ತ ಕಣಗಳ )ಶರೀರ ಛೇದಿಸಿ ಹೊರ ಬರುವವು .ಕೆಲವು ಪುನಃ ಲಿವರ್ ಯಾತ್ರೆ ಕೈಗೊಂಡರೆ ಮತ್ತೆ ಹಲವು ಪುನಃ ಕೆಂಪು ರಕ್ತ ಕಣ ಸೇರಿ ಕಾರ್ಯಕ್ರಮ ಮುಂದು ವರಿಸುವವು .  ರೋಗಾಣು ಮತ್ತು ನಶಿಸುತ್ತಿರುವ ರಕ್ತ ಕಣಗಳಿಂದ ಉಂಟಾದ ವಸ್ತುಗಳು ಜ್ವರ ಕಾರಕಗಳು .ಈ ತರಹ ಉಂಟಾದ ಮರಿಗಳು ಬೆಳೆದು ಕೆಲವು ಗಂಡು ಮತ್ತು ಕೆಲವು ಹೆಣ್ಣು ಆಗಿ ,ಸೊಳ್ಳೆಯ ಕಡಿತಕ್ಕೆ ಕಾದು ,ಮುಂದೆ ಅದರ ಶರೀರದಲ್ಲಿ ವಿವಾಹ ,ಮಧುಚಂದ್ರ ಮತ್ತು ಸಂತಾನೋತ್ಪತ್ತಿ ನಡೆಸುವವು . ಮುಂದಿನ ಹಂತದ ಜೀವನ ಮನುಷ್ಯ ಶರೀರದಲ್ಲಿ

   ನಮ್ಮ ಊರಿನಲ್ಲಿ ವೈ ವಾಕ್ಸ್ ಮತ್ತು ಫಾಲ್ಸಿಫಾರಂ ಎಂಬ ಎರಡು ತರಹದ ಮಲೇರಿಯ ಕಾಯಿಲೆ ರೋಗಾಣುಗಳು ಕಾಡುತ್ತಿವೆ ,ಇದರಲ್ಲಿ  ಫಾಲ್ಸಿಫಾರಂ ಸ್ವಲ್ಪ ಅಪಾಯಕಾರಿ .ಅದು ಮೆದುಳು ,ಮೂತ್ರಪಿಂಡ ಇತ್ಯಾದಿಗಳಿಗೆ ಹಾನಿ ಮಾಡುವದು ಹೆಚ್ಚು . ಮಲೇರಿಯ ಲಿವರನ್ನು ಕಾಡುವುದರಿಂದ ಮತ್ತು ಕೆಂಪು ರಕ್ತಕಣಗಳನ್ನು ನಾಶ ಮಾಡುವದುದರಿಂದ ಮಲೇರಿಯಾ ದಲ್ಲಿ ಹಳದಿ ಕಾಮಾಲೆ ಬರ ಬಹುದು .ಇದನ್ನು ಕಾಮಾಲೆ ರೋಗ ಹಳ್ಳಿ ಮದ್ದು ಮಾಡುವೆವು ಎಂದು ಕುಳಿತರೆ ಪ್ರಾಣಾಪಾಯ ಆದೀತು . 

   ನೋಡಿ ಪ್ರಕೃತಿಯ ವಿಚಿತ್ರ ಆಟ .ನಾವು ಬಾರಿಯ ದಾಳದ ಪಗಡೆಯಾಳುಗಳು . 

https://youtu.be/A2-XTlHBf_4

ಕೊಕ್ಕೆ ಹುಳದ ಜೀವನ ಚರಿತ್ರೆ

      ಕೊಕ್ಕೆ ಹುಳದ ಜೀವನ ಚಕ್ರ 

 

 ಪ್ರತಿಯೊಂದು ಕರುಳ ಜಂತುವಿನ ಜೀವನ ಚಕ್ರ ಸಂಕೀರ್ಣವಾಗಿದ್ದು ಪ್ರಕೃತಿಯ ವೈಚಿತ್ರ್ಯವನ್ನು ಸಾರುತ್ತದೆ . ಉದಾಹರಣೆಗೆ  ರಕ್ತ ಹೀರುವ ಕೊಕ್ಕೆ ಹುಳ (Hookworm )ನ್ನು ತೆಗೆದು ಕೊಳ್ಳುವ . ಗಂಡು ಮತ್ತು ಹೆಣ್ಣುಹುಳಗಳು ಕರುಳ ಒಳಗಣ ಮಿಲನದ ಫಲವಾಗಿ ಹೆಣ್ಣು ಹುಳಗಳು ದಿನಕ್ಕೆ ಸಾವಿರಾರು ಮೊಟ್ಟೆಗಳನ್ನು ಇಡುತ್ತವೆ .ಈ ಮೊಟ್ಟೆಗಳು ಮಲದ ಮೂಲಕ ನೆಲ ಸೇರಿ ಕೆಲ ದಿನಗಳಲ್ಲಿ ಹಂತ ಹಂತವಾಗಿ ಎರಡು ರೂಪದ ಲಾರ್ವಾ ಆಗಿ ಪರಿವರ್ತನೆ ಗೊಳ್ಳುವುದು . ಎರಡನೇ ರೂಪದ ಲಾರ್ವಾ ನಮ್ಮ ಕಾಲಿನ ಗಾಯ ಮತ್ತು ಕೂದಲ ರಂಧ್ರಗಳ ಮೂಲಕ ಶರೀರದ ಪ್ರವೇಶ ಪಡೆಯುವುದು . ಅಲ್ಲಿ ಅದು ರಕ್ತನಾಳಗಳನ್ನು ಪ್ರವೇಶಿಸಿ ಶ್ವಾಸಕೋಶ ಸೇರಿ ,ರಕ್ತ ನಾಳ ಭೇದಿಸಿ ಶ್ವಾಸ ಕೋಶ ,ಶ್ವಾಸ ನಾಳ ಮೂಲಕ ಗಂಟಲು ಸೇರಿ ,ಅನ್ನ ನಾಳದಲ್ಲಿ ಇಳಿದು ತನ್ನ ನಿವಾಸವಾದ ಕರುಳು ಸೇರುವುದು .ಇಲ್ಲಿ ಲಾರ್ವಾ ರೂಪದಿಂದ ಪ್ರಬುದ್ಧ ಗಂಡು ಮತ್ತು ಹೆಣ್ಣು ಕೊಕ್ಕೆ ಹುಳವಾಗಿ ಮಾರ್ಪಡುವುದು .. ಅಲ್ಲಿ ಕರುಳ ಗೋಡೆಗೆ ಆತು ಕೊಂಡು ರಕ್ತ ಹೀರುವುದು . 

ಈ ಹುಳದ ಲಾರ್ವಾ ಚರ್ಮ ಪ್ರವೇಶಿಸಿದ ಭಾಗದ ಸುತ್ತ ಮುತ್ತ ಅಲ್ಲರ್ಜಿ ಯಿಂದ ತುರಿಕೆ ಮತ್ತು ಕೆಂಪು ಉಂಟಾಗ ಬಹುದು .ಶ್ವಾಸ ಕೋಶದ ಮೂಲಕ ನಡೆಯುವ ಸವಾರಿ ಮತ್ತು ಕಟ್ಟೆ  ಪೂಜೆಯಿಂದ ಕೆಮ್ಮು ಮತ್ತು ಅಸ್ತಮಾ ಉಂಟಾಗ ಬಹುದು . ಇವು ಅಲರ್ಜಿ ಅಥವಾ ಅತಿ ಸಂವೇದನೆಯಿಂದ ಉಂಟಾಗುವ ತೊಂದರೆಗಳು . ಕರುಳಿನ ರಕ್ತ ಹೀರುವಿಕೆಯಿಂದ ತೀವ್ರ ತರ ರಕ್ತ ಹೀನತೆ ಉಂಟಾಗ ಬಹುದು . 

                ಇಂತಹ ಪರೋಪಜೀವಿಗಳು ಸೇರಿದಾಗ ಮಾನವ ನ ರಕ್ತದಲ್ಲಿ ಇಯೋಸಿನೋಫಿಲ್ ಎಂಬ ಬಿಳಿ ರಕ್ತ ಕಣಗಳ ಸಂಖ್ಯೆ ಹೆಚ್ಚಾಗುವುದು ;ಇದನ್ನು .ಇಯೋಸಿನೋಫಿಲಿಯಾ ಎನ್ನುವರು . ಇಯೋಸಿನೋಫಿಲಿಯಾ ಎಂಬುದು ಒಂದು ಕಾಯಿಲೆಯಲ್ಲ .ಹಲವು ಕಾಯಿಲೆಗಳಲ್ಲಿ ಅದು ಇರ ಬಹುದು . ಬಹಳ ಮಂದಿ ನನಗೆ ಇಯೋಸಿನೋಫಿಲಿಯಾ ಕಾಯಿಲೆ ಇದೆ ಎಂದು ಬರುತ್ತಾರೆ . 

ಕೊಕ್ಕೆ ಹುಳ ತಡೆಗಟ್ಟಲು ಬಯಲು ಶೌಚ ನಿರ್ಮೂಲನೆ ಮತ್ತು ಪಾದರಕ್ಷೆ ಹಾಕಿ ನಡೆಯುವುದು ಮುಖ್ಯ .ಆದರೆ ಹಳ್ಳಿಗಳಲ್ಲಿ ಕೃಷಿ ಚಟುವಟಿಕೆ ಯಲ್ಲಿ ತೊಡಗಿರುವಾಗ ಎರಡನೇಯದು ಸ್ವಲ್ಪ ಕಷ್ಟ . 

ನಾಯಿ ಮತ್ತು ಬೆಕ್ಕುಗಳಲ್ಲಿಯೂ ಕೊಕ್ಕೆ ಹುಳ ಕಾಟ ಇದ್ದು ಅವುಗಳು ಮನುಷ್ಯರಿಗೆ ಹರಡ ಬಹುದು .ಆದರೆ ಅವು ಹೆಚ್ಚಾಗಿ ಚರ್ಮದ ತುರಿಕೆ ಮತ್ತು ಕೆಂಪು ಉಂಟು ಮಾಡಬಹುದು . ಅವು ಅಲ್ಲಿಯೇ ಕೊನೆಯುಸಿರು ಎಳೆಯುವದು ಸಾಮಾನ್ಯವಾದ್ದರಿಂದ  ಕರುಳಿನ ವರೆಗೆ ತಲುಪುವುದು ಅಪರೂಪ ..ಏನೇ ಇರಲಿ ಸಾಕು ಪ್ರಾಣಿಗಳಿಗೂ ಹುಳದ ಔಷಧ ಆಗಾಗ ಕೊಡುತ್ತಿರ ಬೇಕು 

 

 

ವೈದ್ಯ ವಿಜ್ಣಾನಿ ಲೇಖಕ ರೋನಾಲ್ಡ್ ರಾಸ್

 ವೈದ್ಯ ವಿಜ್ನಾನಿ ಕವಿ ಲೇಖಕ ರೋನಾಲ್ಡ್  ರಾಸ್ 

 

೧೮೭೮ ರಲ್ಲಿ ಮಲೇರಿಯ ರೋಗಾಣುಗಳನ್ನು ಫ್ರೆಂಚ್ ಲಾವೆರಾನ್ ಕಂಡು ಹಿಡಿದರೆ ಅದು ಸೊಳ್ಳೆಗಳ ಮೂಲಕ ಹರಡುತ್ತದೆ ಎಂಬ ಸತ್ಯವನ್ನು ರೊನಾಲ್ಡ್ ರಾಸ್ ಭಾರತದಲ್ಲಿ ನಡೆಸಿದ ಪ್ರಯೋಗಗಳಿಂದ ಕಂಡು ಹಿಡಿದನು .ಇಬ್ಬರೂ ನೊಬೆಲ್ ಬಹುಮಾನ  ಭಾಜನರು . ರಾಸ್ ಭಾರತದ ವೈದ್ಯಕೀಯ ಸೇವೆಯಲ್ಲಿ ಇದ್ದು ಕೆಲ ವರುಷ ಬೆಂಗಳೂರಿನಲ್ಲಿಯೂ ಸೇವೆ ಸಲ್ಲಿಸಿದನು . 

 ರಾಸ್ ಬಯಸಿ ವೈದ್ಯನಾದವನಲ್ಲ ,ತಂದೆಯ ಒತ್ತಾಯಕ್ಕೆ ಆದವನು .ತಾನು ಲೇಖಕ ಅಥವಾ ಕಲಾವಿದ ಆಗಬೇಕು ಎಂಬುದು ಅವನ ಬಾಲ್ಯದ ಹಂಬಲ . ಉಷ್ಣ ವಲಯ ವ್ಯಾಧಿ ಶಾಸ್ತ್ರ  ಪಿತಾಮಹ ಪ್ಯಾಟ್ರಿಕ್ ಮ್ಯಾನ್ಸನ್ ಅವರ ಮಾರ್ಗದರ್ಶನದಲ್ಲಿ ಭಾರತದಲ್ಲಿ ನಡೆಸಿದ ಸಂಶೋಧನೆ ;ಮ್ಯಾನ್ಸನ್ ದೂರದ ಲಂಡನ್ ನಲ್ಲಿ . ನಡುವೆ ಆ ಕಾಲದಲ್ಲಿ ಇವರ ಪತ್ರ ವ್ಯವಹಾರ . ಕೊನೆಗೆ ಸಿಕ್ಕಿತು ಅಂಗೀಕಾರ . ಆದರೆ ಆರ್ಥಿಕವಾಗಿ ರೊನಾಲ್ಡ್ ರಾಸ್ ಗೆ ಹೇಳುವಂತಹ ಲಾಭ ಆಗಲಿಲ್ಲ ಮತ್ತು ಭಾರತದಿಂದ  ವಾಪಸು ಆದವನಿಗೆ ತಾನು ಎಣಿಸಿದ ಪ್ರಾಕ್ಟೀಸ್ ಆಗಲಿಲ್ಲ . 

 

  ರೊನಾಲ್ಡ್ ರಾಸ್ ಹಲವು ಕೃತಿಗಳನ್ನು ರಚಿಸಿರುವನು .ಕವಿತೆಗಳನ್ನು ಬರೆದಿರುವನು

.ಮಲೇರಿಯಾ ರೋಗ ಲಕ್ಷಾಂತರ ಮಂದಿಯನ್ನು ಬಲಿ ತೆಗೆದು ಕೊಳ್ಳುವುದನ್ನು ಕಂಡು ರಚಿಸಿದ ಕವನ . 

In this, O Nature, yield I pray to me.
I pace and pace, and think and think, and take
The fever’d hands, and note down all I see,
That some dim distant light may haply break.
The painful faces ask, can we not cure?
We answer, No, not yet; we seek the laws.
O God, reveal thro’ all this thing obscure
The unseen, small, but million-murdering cause.

                  ಓ ಪ್ರಕೃತಿಯೇ ಶರಣು ವಂದಿಸುವೆ 

                  ಯೋಚಿಸಿ ಯೋಚಿಸಿ ದಾಪುಗಾಲ ನಡೆ 

                 ತಾಪ ಹಸ್ತವ ಪಿಡಿದು ,ಕಾಂಬುದೆಲ್ಲವ ಬರೆದು 

                  ಕಂಡೀತೋ ದೂರದಲ್ಲಿ ಸಣ್ಣ ಬೆಳಕು ?

                  ಯಾತನಾ ಗ್ರಸ್ತ  ಮೊಗಗಳು ಕೇಳೆ ,ಗುಣಪಡಿಸೆವೆ ನಾವು ?

                   ನಮ್ಮ ಉತ್ತರ ಇಲ್ಲ ಇಲ್ಲ ಇನ್ನೂ ಇಲ್ಲ ;

                    ಓ ದೇವರೇ  ತೋರೆಮಗೆ ಅಸ್ಪಷ್ಟ 

                     ಅದೃಶ್ಯ ,ಬಹುಸಣ್ಣ ,ಮಿಲಿಯ ಸಂಖ್ಯೆಯ ಕೊಲೆಯ ಕಾರಣ . 

 ಕೊನೆಗೂ ಅನಾಫಿಲಿಸ್ ಸೊಳ್ಳೆಗಳ  ದೇಹದೊಳಗೆ ಮಲೇರಿಯ ರೋಗಾಣುಗಳನ್ನು ಕಂಡಾಗ ಮ್ಯಾನ್ಸನ್ ಅವರಿಗೆ ಬರೆದು ಕಳುಹಿಸಿದ ಕವನ . 

              

This day relenting God

Hath placed within my hand
A wondrous thing; and God
Be praised. At his command,

Seeking his secret deeds
With tears and toiling breath,
I find thy cunning seeds,
O million-murdering Death.

I know this little thing
A myriad men will save,
O Death, where is thy sting?
Thy victory, O Grave?

  ಕೊನೆಗೂ ಕಣ್ಣು ಬಿಟ್ಟ ಇಂದು ದೇವರು 

  ದಯಪಾಲಿಸಿದ ಅದ್ಭುತ ಜ್ಞಾನದ ಕೊಡುಗೆ 

  ಪೊಗಳುವೆ ಅವನ ಅನವರತ . 

   ಅವನ  ರಹಸ್ಯ ಕಾರ್ಯಾಚರಣೆಯ 

   ಕಣ್ಣೀರು ನಿಟ್ಟುಸಿರ ಕೂಡೆ ತಡಕಾಡೆ 

   ಸಹಸ್ರ ಸಾವುಗಳ ಕೊಲೆಗಾರ

  ಕಂಡೆನಾ ದುಷ್ಟ ಬೀಜಗಳ . 

   ಈ ಅಲ್ಪ ತಿಳಿವು  , ಅಸಂಖ್ಯ ಜನ ರಕ್ಷಿಸೆ 

   ಓ ಸಾವೇ ಎಲ್ಲಿದೆ ನಿನ್ನ ಕುಟುಕು . 

  ನಿನ್ನ ಜಯ ?ಓ ಗೋರಿಯೇ ?

(ಅನುವಾದ ನನ್ನದು ತಪ್ಪುಗಳಿಗೆ ಕ್ಷಮೆಯಿರಲಿ )

  

ಕರುಳ ಜಂತು ಪುರಾಣ

 ಹೆತ್ತ ಕರುಳು ಎಂದು ವಾಡಿಕೆಯಲ್ಲಿ ತಾಯಂದಿರಿಗೆ ಅನ್ವಯಿಸಿ ಹೇಳಿದರೂ ಗರ್ಭ ಧರಿಸಿ ಹೆರುವ ಪ್ರಕ್ರಿಯೆಗೂ ಕರುಳಿಗೂ ನೇರ ಸಂಬಂಧ ಇಲ್ಲ .ಆದರೆ ನಮ್ಮ ಕರುಳಿನಲ್ಲಿ ಪರೋಪಜೀವಿ ಜಂತುಗಳ ವಾಸ ,ಲೈಂಗಿಕ ಕ್ರಿಯೆ ಮತ್ತು ಸಂತಾನೋತ್ಪತ್ತಿ ಆಗುತ್ತಲಿರುತ್ತದೆ .ಆದುದರಿಂದ ಗಂಡಸರು ಮತ್ತು ಹೆಂಗಸರು ಎಂಬ ಭೇಧ ಇಲ್ಲದೆ ಎಲ್ಲವರೂ ಹೆತ್ತ ಕರುಳುಗಳೇ . 

ಇಂದು ಒಬ್ಬ ರೋಗಿ ಬಂದಿದ್ದರು . ತನ್ನ ಉದರದಲ್ಲಿ ಹುಳದ ಉಪದ್ರ ,ದಿನವಿಡೀ ಗೊಳ ಗೊಳ ಎಂದು ಶಬ್ದ ಮಾಡುತ್ತ ಇರುತ್ತವೆ ಎಂಬುದು ಅವರ ಆರೋಪ . ಹೊಟ್ಟೆಯಲ್ಲಿ ವಾಸಿಸುವ ಜಂತುಗಳು ಶಬ್ದ ಮಾಡುವುದಿಲ್ಲ ,ಅವು ಮೌನ ಸಾಧಕರು . ಹೊಟ್ಟೆಯಲ್ಲಿ ಕೇಳಿ ಬರುವ ಶಬ್ದ ನಮ್ಮ ತನ್ನೊಳಗಿನ   ಒಳಗಿನ ದ್ರವ ಮತ್ತು ಗಾಳಿ  ಕರುಳಿನ ಚಲನೆಯೊಡನೆ  ಓಡುವಾಗ  ಮಾಡುವ ಶಬ್ದ . 

ಇನ್ನು ಪರೋಪಜೀವಿ ಜಂತುಗಳು ಮನುಜನಿಗೆ ಮಿತ್ರರು ಎಂಬ ವಾದ ವಿಜ್ಞಾನಿಗಳಲ್ಲಿ ಇದೆ .  ಇದರ ಪ್ರಕಾರ ನಮ್ಮ ಹೊಟ್ಟೆಯ ಒಳಗೆ ಈ ಹುಳಗಳು  ಶರೀರದ ರೋಗ ಪ್ರತಿರೋಧ ವ್ಯವಸ್ಥೆಯನ್ನು ಪ್ರಚೋದಿಸುತ್ತವೆ . ಇದರಿಂದ  ಅದು ಸದಾ ಸಜ್ಜಾಗಿ ಇರುವುದಲ್ಲದು ಒಂದು ಅನುಕೂಲ ಆದರೆ ,ಇನ್ನೊಂದು  ಈ ಜಂತುಗಳು  ಕೆಲವು ರಾಸಾಯನಿಕ ಸಂದೇಶಗಳನ್ನು ಕಳುಹಿಸಿ    ಇವನಾರವ, ಇವನಾರವ, ಇವನಾರವನೆಂದೆನಿಸದಿರಯ್ಯಾ. ಇವ ನಮ್ಮವ, ಇವ ನಮ್ಮವ, ಇವ ನಮ್ಮವನೆಂದೆನಿಸಯ್ಯಾ ಎಂದು ಪರ ವಸ್ತುಗಳ ಸಹನೆಯನ್ನು ನಮ್ಮ ಶರೀರದ ರೋಗ ಪ್ರತಿರೋಧ ವ್ಯವಸ್ಥೆಗೆ ಮೇಲಿಂದ ಮೇಲೆ ಕಳುಹಿಸುತ್ತದೆ . 

   ನಮ್ಮ ಶರೀರ ಕೆಲವೊಮ್ಮೆ ಹೊರಗಿನ ಮತ್ತು ಒಳಗಿನ ವಸ್ತುಗಳನ್ನು ವೈರಿ ಎಂದು ಪರಿಗಣಿಸಿ ಉತ್ಪ್ರೇಕ್ಷಿತ  ರೋಗ ನಿರೋಧಕ ಪ್ರಕ್ರಿಯೆ ಆರಂಬಿಸುತ್ತದೆ .ಇದರಿಂದಲೇ  ಆಸ್ತಮಾ ,ಕ್ರೋನ್ಸ್ ಕಾಯಿಲೆ(ಕರುಳ ಊತ)ಮಲ್ಟಿಪಲ್ ಸ್ಲೇರೋಸಿಸ್ ಎಂಬ ನರಾಂಗ ಶಿಥಿಲತೆ ಇತ್ಯಾದಿ ಉಂಟಾಗುವವು . ಈ ಕಾಯಿಲೆಗೆ ಚಿಕಿತ್ಸಾ ರೂಪವಾಗಿ ಪರೋಪಜೀವಿಗಳನ್ನು ಶರೀರಕ್ಕೆ  ಸೇರಿಸುವ ಪ್ರಯೋಗಗಳು ನಡೆದಿವೆ . 

 ನೈರ್ಮಲ್ಯ ರೋಗ ವಾದ ( Hygiene Hypothesis )ಎಂದು ಇದೆ .ಅತಿ ನೈರ್ಮಲ್ಯ ಇರುವ ಮುಂದುವರಿದ ದೇಶದ ಜನರಲ್ಲಿ ಸ್ವಯಂ ನಿರೋಧಕ (Autoimmune )ಕಾಯಿಲೆಗಳು ಜಾಸ್ತಿ ,ಸಣ್ಣ ಸೊಳ್ಳೆ ಕಡಿತವೂ ಅತೀವ ಅಲರ್ಜಿ ಉಂಟು ಮಾಡುವುದು . ನಮ್ಮಲ್ಲಿ ಈ ತರಹದ ಕಾಯಿಲೆಗಳು ಕೆಲವು ವರ್ಷಗಳ ಹಿಂದೆ ಬಹಳ ಕಡಿಮೆ  ಇದ್ದವು . 

                    ನಮ್ಮ ಬಾಲ್ಯದಲ್ಲಿ ಹೊಟ್ಟೆ ಹುಳಕ್ಕೆ ವರ್ಷಕ್ಕೆ ಒಮ್ಮೆ ಹರಳೆಣ್ಣೆ ಕುಡಿಸಿ ಭೇದಿ ಮಾಡಿಸುತ್ತಿದ್ದರು .ಈಗ  ಬೇರೆ ಬೇರೆ ಪರೋಪಜೀವಿಗಳಿಗೆ ಬೇರೆ ಬೇರೆ ಔಷಧಿ ಇದೆ .ಇದರಲ್ಲಿ ಕೆಲವು ಪುನಃ ಪುನಃ ಕಾಡುವವು .ಇದಕ್ಕೆ ಕಾರಣ ಮನೆಯಲ್ಲಿ ಇರುವ ಯಾರಾದರೂ ಒಬ್ಬರು ಮೂಲವಾಗಿ ಇರುವರು .ಆದುದರಿಂದ ಮನೆಯಲ್ಲಿ ಎಲ್ಲರೂ ಜತೆಗೆ ಔಷಧಿ ತೆಗೆದು ಕೊಂಡರೆ ಉತ್ತಮ

 

 

 

ಸೋಂಕು ರೋಗ ಶಾಸ್ತ್ರ

 

                ಸೋಂಕು ರೋಗ ಶಾಸ್ತ್ರ

 ಕೋವಿಡ್  ಸಾಂಕ್ರಾಮಿಕದಿಂದ ಒಂದು ವಿಷಯ ನಾವು ಕಲಿಯ ಬೇಕು . ಸೋಂಕು ರೋಗ ಶಾಸ್ತ್ರಕ್ಕೆ ನಮ್ಮ ವೈದ್ಯಕೀಯ ಶಿಕ್ಷಣ ಮತ್ತು ರಂಗದಲ್ಲಿ  ಸಿಗ ಬೇಕಾದ ಆದ್ಯತೆ ನಾವು ಕೊಟ್ಟಿಲ್ಲ . ವೈದ್ಯಕೀಯ ಕಾಲೇಜ್ ಗಳಲ್ಲಿ  ಇದಕ್ಕೆ ಪ್ರತ್ಯೇಕ ವಿಭಾಗವೇ ಇಲ್ಲ .ಸೂಕ್ಷ್ಮಾಣು ಜೀವಿ ಶಾಸ್ತ್ರ ಮತ್ತು ವೈದ್ಯಕೀಯ ವಿಭಾಗಗಳಲ್ಲಿ ಸರಿಯಾದ ಸಂವಹನ ದ ಕೊರತೆ ಇದೆ . ಸಕ್ಕರೆ ಕಾಯಿಲೆ ಹೃದ್ರೋಗ ಇತ್ಯಾದಿಗಳು ಎಲ್ಲರ ಡಾರ್ಲಿಂಗ್ ಆಗಿವೆ . ಇವುಗಳ ಚಿಕಿತ್ಸೆಯಲ್ಲಿ ತುಂಬಾ ಹಣ ಹೂಡಿಕೆ ಆಗುತ್ತದೆ .ವೈದ್ಯರು ಉನ್ನತ ಶಿಕ್ಷಣ ವನ್ನು ಇಂತಹ ವಿಷಯಗಳಲ್ಲಿ ಮತ್ತು ರೇಡಿಯಾಲಜಿ ಯಂತಹ ವಿಭಾಗ ದಲ್ಲಿ ನಡೆಸಲು ಹೆಚ್ಚು ಆಸಕ್ತಿ ತೋರಿಸುವರು . ನಮ್ಮ ದೇಶದಲ್ಲಿ ಬ್ರಿಟಿಷರ ಆಳ್ವಿಕೆ ಸಮಯದಲ್ಲಿ ಸಾರ್ವಜನಿಕ ಆರೋಗ್ಯ (ಪಬ್ಲಿಕ್ ಹೆಲ್ತ್ ) ವಿಭಾಗ ಬಹಳ ಕ್ರಿಯಾಶೀಲ ಆಗಿತ್ತು . ಮಲೇರಿಯಾ ಸೊಳ್ಳೆ ಮೂಲಕ ಹರಡುವುದನ್ನು   ಮತ್ತು ಕಾಲಾ ಆಜಾರ್  ದಂತಹ ಕಾಯಿಲೆಗಳ ರೋಗಾಣುಗಳನ್ನು ಭಾರತದಲ್ಲಿಯೇ  ಕಂಡು ಹಿಡಿಯಲ್ಪಟ್ಟವು ಎಂದರೆ ನಮಗೆ ಆಶ್ಚರ್ಯ ಆಗುವುದು . 

ಆದ ಕಾರಣ  ಇಂತಹ ಹೊಸ ಸಾಂಕ್ರಾಮಿಕ ಬಂದಾಗ ಎಲ್ಲರೂ ತಮ್ಮ ತಮ್ಮ ಅರಿವಿಗೆ ತಕ್ಕಂತೆ ಅದನ್ನು ವಿಶ್ಲೇಷಿಸಲು ತೊಡಗುತ್ತಾರೆ . ಇದರಲ್ಲಿ ಹಲವರು ಕುರುಡರು ಆನೆಯನ್ನು ಮುಟ್ಟಿ ವರ್ಣಿಸಿದ ಪರಿಯನ್ನು ನೆನಪಿಸುವರು . ಜನಸಾಮಾನ್ಯರು ಇದನ್ನು ಕೇಳಿ ಗೊಂದಲಕ್ಕೆ ಒಳಗಾಗುವರು  .ಸರಕಾರದ ಸೋಂಕು ರೋಗ ಸಲಹಾ ಸಮಿತಿಗೆ ಲೌಕಿಕವಾಗಿ ಯಶಸ್ವಿ ಎಣಿಸಿದ ವೈದ್ಯರನ್ನು ನೇಮಿಸುವರು .ಏನಾದರೂ ಹೆಚ್ಚು ಕಡಿಮೆ ಆದರೆ ಅವರ ನಾಮದ ಬಾಲ ಇರಲಿ ಎಂಬ ಉದ್ದೇಶ ಇರಬಹುದು . ಆದರೆ ಸೋಂಕು ರೋಗ ಗಳ  ನಿರ್ವಹಣೆಯ ಅನುಭವ ಇರುವ ಮತ್ತು ವಸ್ತು ನಿಷ್ಠ  ವೈಜ್ನಾನಿಕ  ಶಿಫಾರಸು ಮಾಡುವವರು ಅದರಲ್ಲಿ ಇದ್ದರೆ ಉತ್ತಮ .

ನಮ್ಮ ಸಾಮಾನ್ಯ ಸೋಂಕು ರೋಗ ಚಿಕಿತ್ಸೆಗೂ ಒಂದು ಗೊತ್ತು ಗುರಿ ಇದ್ದಂತಿಲ್ಲ . ಉದಾಹರಣೆಗೆ ಸಣ್ಣ ಶೀತ ಜ್ವರಕ್ಕೂ ಆಂಟಿಬಯೋಟಿಕ್ ಕೊಡುತ್ತೇವೆ ,ಕೊಡದಿದ್ದರೆ ರೋಗಿಗಳು ಮತ್ತು ಹೆತ್ತವರು ಕೇಳಿ ಪಡೆಯುತ್ತಾರೆ . ನಮ್ಮಲ್ಲಿ ಮಕ್ಕಳಲ್ಲಿ ಮತ್ತು ದೊಡ್ಡವರಲ್ಲಿ ಭೇದಿ ಹೆಚ್ಚಾಗಿ ವೈರಸ್ ನಿಂದ ಬರುವುದು .ಆದರೂ ಒಂದು ಭೇದಿ ಆದ ಒಡನೆ ಅಮೀಬಿಯಾಸಿಸ್ ಮತ್ತು ಬ್ಯಾಸಿಲ್ಲರಿ (ಬ್ಯಾಕ್ಟಿರಿಯಾ ದಿಂದ ಉಂಟಾಗುವ )ಗೆ ಇರುವ ಔಷಧಿ ಸೇವಿಸುತ್ತೇವೆ . ಇಲ್ಲಿ ಕೇವಲ ಜಲ ಮತ್ತು ಲವಣ ಪೂರಣ ಸಾಕು ಎಂದು ಗೊತ್ತಿದ್ದರೂ . ಒಂದು ದಿನದ ಜ್ವರಕ್ಕೆ ವೈ ಡಾಲ್  ಎಂಬ ಟೆಸ್ಟ್ ಮಾಡಿ  ಟೈಪೋಯ್ಡ್  ಗೆ ಎಂದು ಎರಡೆರಡು ಆಂಟಿಬಯೋಟಿಕ್ ತಿನ್ನುತ್ತೇವೆ . ಈ ಟೆಸ್ಟ್ ಬೇರೆ ಸಾಧಾರಣ ಕಾಯಿಲೆಗಳಲ್ಲಿಯೂ ಪಾಸಿಟಿವ್ ಇರುತ್ತದೆ ಮತ್ತು ಟೈಫಾಯಿಡ್ ನಿರ್ಧಾರಕ ಅಲ್ಲ .ನಾನು ಪುತ್ತೂರಿಗೆ ಬಂದು ಹತ್ತು ವರ್ಷದಲ್ಲಿ ಒಂದು ಟೈಫಾಯಿಡ್ ಕೇಸ್ ಮಾತ್ರ ನೋಡಿದ್ದು ಅದೂ ಕ್ಯಾಂಬೋಡಿಯಾ ಪ್ರವಾಸ ಮಾಡಿ ಬಂದ ವ್ಯಕ್ತಿಯಲ್ಲಿ . ಅನಾವಶ್ಯಕ ಔಷಧಿಗಳ ಸೇವನೆಯೂ ಅವಕಾಶ ವಾದಿ ಸೋಂಕಿಗೆ(ಉದಾ ಫಂಗಸ್ ) ಮತ್ತು ಆಂಟಿಬಯೊಟಿಕ್ ಗಳು ತಮ್ಮ  ಕ್ಷಮತೆ ಕಳೆದು ಕೊಳ್ಳಲು ಕಾರಣ ಆಗುತ್ತವೆ .

    ಸೋಂಕು ರೋಗಗಳನ್ನು ಪತ್ತೆ ಹಚ್ಚುವಲ್ಲಿ  ನಿರ್ಧಾರಕ (Definitive ) ಟೆಸ್ಟ್ ಗಳು ಎಂದು ಇವೆ .ಉದಾಹರಣೆಗೆ ಟೈಫಾಯಿಡ್ ನಲ್ಲಿ ಬ್ಲಡ್ ಕಲ್ಚರ್ ,ಕ್ಷಯ ರೋಗ ದಲ್ಲಿ ಕಫ ಪರೀಕ್ಷೆ ಮತ್ತು ಇತ್ತೀಚಿಗೆ ಪಿ ಸಿ ಆರ್ ಟೆಸ್ಟ್ ಗಳು .ಇಲ್ಲಿ  ಟೆಸ್ಟ್ ಸ್ಯಾಂಪಲ್ ಸಂಗ್ರಹ ,ಮಾಡುವ ವಿಧಾನ ಮತ್ತು ತಂತ್ರಜ್ಞರ ಪರಿಣತಿ ಮೇಲೆ ವರದಿ ಅವಲಂಬಿತ ವಾಗಿರುತ್ತದೆ .,ಇನ್ನು ಕೆಲವು ಟೆಸ್ಟ್ ಗಳು ಇವೆ ಅವು ರೋಗದ ಅಂದಾಜು ಟೆಸ್ಟ್ ಗಳು . ಉದಾ ಮೇಲೆ ಹೇಳಿದ ವೈಡಾಲ್ ,ವಿ ಡಿ ಆರ್ ಎಲ್ , ವೀಲ್ ಫೆಲಿಕ್ಸ್ ಇತ್ಯಾದಿ .ಇವು ರೋಗಾಣುಗಳ ವಿರುದ್ಧ ಶರೀರದಲ್ಲಿ ಉತ್ಪತ್ತಿ ಯಾಗುವ  ಪ್ರತಿ ವಿಷ (antibody )ಗಳನ್ನು ಗುರುತಿಸುವವು . ಉದಾಹರಣೆಗೆ ವಿ ಡಿ ಆರ್ ಎಲ್ ಎಂಬ ಟೆಸ್ಟ್ ಸಿಫಿಲಿಸ್ ಎಂಬ ಲೈಂಗಿಕ ರೋಗವನ್ನು ಪತ್ತೆ ಹಚ್ಚಲು ಮಾಡುವರು .ಆದರೆ ಅಪರೂಪಕ್ಕೆ ಇದು ಮಲೇರಿಯ ,ಕ್ಷಯ ದಂತಹ ರೋಗಗಳಲ್ಲಿಯೂ ಪಾಸಿಟಿವ್ ಇರ ಬಹುದು . ಇದಲ್ಲದೆ  ಈಗ ಕೆಲವು ಧಿಡೀರ್ ಪತ್ತೆ ಹಚ್ಚುವ ಕಾರ್ಡ್ ಟೆಸ್ಟ್ ಗಳು ಬಂದಿವೆ ,ಇವು ಕೆಲವೊಮ್ಮೆ ಇದ್ದ ಕಾಯಿಲೆಯನ್ನು ತೋರಿಸುವುದರಲ್ಲಿ ವಿಫಲ ಆಗ ಬಹುದು ,ಅಥವಾ ಇಲ್ಲದ ಕಾಯಿಲೆ ಇದೆ ಎಂದು ತೋರಿಸಲೂ ಬಹುದು . ಆಂಟಿಬಾಡಿ ಟೆಸ್ಟ್ ಮಾಡುವ ಟೆಸ್ಟ್ ಗಳು ಕಾಯಿಲೆ ವಾಸಿ ಆದ ಮೇಲೂ ಬಹು ಕಾಲ ಪಾಸಿಟಿವ್ ಆಗಿ ಉಳಿಯುತ್ತವೆ . ಆದ ಕಾರಣ ಇವುಗಳನ್ನು ಮಾತ್ರ ಅವಲಂಬಿಸಲು ಆಗದು .ನಮ್ಮ ಅನುಭವ ,ರೋಗ ಲಕ್ಷಣ ಮತ್ತು ಪರೀಕ್ಷೆ ಆದ ಮೇಲೆ ಪ್ರಯೋಗಾಲಯದ ಟೆಸ್ಟ್ ಗಳನ್ನು ಗಣನೆಗೆ ತೆಗೆದುಕೊಳ್ಳಬೇಕು . 

ಜನ ಸಾಮಾನ್ಯರು ಒಂದು ವಿಚಾರ ಗಮನಿಸ ಬೇಕು . ವೈದ್ಯರ ಜ್ಞಾನ ದ  ಹರವು ಹೆಚ್ಚಾದಂತೆ  ಅವರ ವಿನೀತ ಭಾವ ಹೆಚ್ಚುವುದು . ಮತ್ತು ಯಾವುದೇ ರೋಗವನ್ನು ರಿಪೋರ್ಟ್ ನೋಡಿ ಧಿಡೀರ್ ಡಯ ಗ್ನೋಸಿಸ್ ಮಾಡರು .ಮತ್ತು ಔಷಧಿ ಬರೆಯುವಾಗ ಹಲವು ಭಾರಿ ಯೋಚನೆ ಮಾಡುವರು .(ರೋಗಿ ಗರ್ಭಿಣಿಯೋ ,ಮಗುವಿಗೆ ಹಾಲು ಕುಡಿಸುವಳೋ ,ಸಕ್ಕರೆ ಕಾಯಿಲೆ ಇದೆಯೋ ,ಕಿಡ್ನಿ ,ಲಿವರ್ ಸಮಸ್ಯೆ ಇದೆಯೋ .ಇವರು ಈಗ ತೆಗೆದು ಕೊಳ್ಳುತ್ತಿರುವ ಔಷಧಿ ಗೂ ತಾನು ಬರೆಯುವ ಮದ್ದಿಗೂ ತಾಕಲಾಟ ಇದೆಯೋ ಇತ್ಯಾದಿ ).ಇವುಗಳ ಅರಿವು ಇಲ್ಲದವರು ಅತೀ ಆತ್ಮ ವಿಶ್ವಾಸ ದಿಂದ ಓಷಧಿ ಬರೆಯುವರು ,ಕಾಯಿಲೆಯೂ ಹೆಚ್ಚಾಗಿ ಟಂ  ಎಂದು ಗುಣವಾಗ ಬಹುದು . ಆದರೆ ನಿಮಗರಿವಿಲ್ಲದಂತೆ ನಿಮಗೆ ಅದರಿಂದ ಹಾನಿ ಆಗ ಬಹುದು . 

ಸೋಂಕು ರೋಗಗಳ ಅಧ್ಯಯನಕ್ಕೆ  ಪ್ರಾಮುಖ್ಯತೆ ಕೊಟ್ಟ ಹೆಮ್ಮೆಯ ಸಂಸ್ಥೆ ವೆಲ್ಲೋರ್ ನ  ಕ್ರಿಶ್ಚಿಯನ್ ಮೆಡಿಕಲ್ ಕಾಲೇಜು ಎನ್ನಬಹುದು .ಈಗ ಮಣಿಪಾಲದ ಕೆ ಎಂ ಸಿ ಯಲ್ಲಿಯೂ ಸೋಂಕು ರೋಗಗಳ ವಿಭಾಗ ತೆರೆದಿದ್ದಾರೆ .ಪುತ್ತೂರಿನ ವಿಕ್ಟರ್ಸ್  ಶಾಲೆಯ ಹಳೆ ವಿದ್ಯಾರ್ಥಿನಿ  ಪ್ರತಿಭಾವಂತೆ ವೈದ್ಯೆ ಡಾ ಕವಿತಾ ಸರವು ಅದರ  ಸ್ಥಾಪಕ ಪ್ರಧ್ಯಾಪಕಿ ಮತ್ತು ಮುಖ್ಯಸ್ಥೆ ಆಗಿದ್ದು ದೇಶ ವಿದೇಶ ಗಳಲ್ಲಿ ಹೆಸರು ಗಳಿಸಿರುವರು . 

 

ಕಣವಿ ಬೆನ್ನು ಹತ್ತಿ

 

ಚೆನ್ನವೀರ ಕಣವಿ   ಯವರ  ಲೇಖನ ಸಂಗ್ರಹ ಸಾಹಿತ್ಯ ಸಮಾಹಿತ   ಎರಡನೇ ಓದು ಮುಗಿಸಿದೆ .ಅವರ ಕಾವ್ಯ ,ಗದ್ಯ ಮತ್ತು ನಗು ಬೆಳದಿಂಗಳ ಹಾಗೆ . ಸದಾ ತಂಪನ್ನು ಈಯುತ್ತವೆ ;ಮತ್ತು ಈಗಿನ ಸಂದಿಗ್ದ ಪರಿಸ್ಥಿತಿಯಲ್ಲಿ ಅಪ್ಯಾಯಮಾನ . ಅವರು ಪ್ರಸಿದ್ಧ ಕವನ ವಿಶ್ವ ವಿನೂತನ ನಮ್ಮ ನಾಡಗೀತೆಗಳಲ್ಲಿ ಒಂದು ,ಧಾರವಾಡ ಆಕಾಶವಾಣಿಯಲ್ಲಿ ಆಗಾಗ ಬರುತ್ತಿದ್ದು ಜನಪ್ರಿಯ .   

 https://youtu.be/CC3TVtrgGno

ಸಾಹಿತ್ಯ ಸಮಾಹಿತದ ಮೊದಲನೇ ಲೇಖನ ಮಾಸ್ತಿ :ನಾನು ಕಂಡಂತೆ . ೧೯೫೬ ರ ಕರ್ನಾಟಕ ವಿಶ್ವ ವಿದ್ಯಾಲಯದ ಘಟಿಕೋತ್ಸವಕ್ಕೆ ಮಾಸ್ತಿ ಯಾವರನ್ನೂ  ವಚನ ಪಿತಾಮಹ ಫ ಗು ಹಳ ಕಟ್ಟಿಯವರನ್ನೂ ಕರೆಸಿ ಗೌರವ ಡಾಕ್ಟರೇಟ್ ಪದವಿ ನೀಡಿ ಗೌರವಿಸಲಾಯಿತು . ಈ ವಿಶ್ವವಿದ್ಯಾಲಯ ದಿಂದ ಗೌ ಡಾ ಪಡೆದ ಮೊದಲಿಗರು . ದಂತ ಕತೆ ಡಾ ಡಿ ಸಿ ಪಾವಟೆ ಆಗ ಉಪಕುಲಪತಿ ..ಘಟಿಕೋತ್ಸವ ಭಾಷಣ ಮಾಡುವ ಗೌರವ ಮಾಸ್ತಿಯವರಿಗೆ ಕೊಡಮಾಡಿದ್ದು ಅದನ್ನು ಅವರು ಕನ್ನಡದಲ್ಲಿಯೇ ಮಾಡಿದರು . 

"ಇದುವರೆಗೆ ಬರಿಯ ಶ್ರೀಮಾನ್ ಎಂದು ಕರೆದು ಕೊಂಡು ಇನ್ನು ಮುಂದೆ ಡಾಕ್ಟರ್ ಶ್ರೀಮಾನ್ ಎಂದು ಕರೆದುಕೊಳ್ಳಬಹುದಾಯಿತು ಎಂಬ ಭಾವನೆಯಿಂದ ನನಗೆ ಸಂತೋಷವಾಗಿದೆಯೆಂದು ಹೇಳಲಾರೆ .ಆದರೆ ನನ್ನ ತಾಯಿನಾಡು ನನ್ನ ಭಾಷಾ ಸೇವೆಯನ್ನು ಎಷ್ಟುಮಟ್ಟಿಗಾದರೂ ಮೆಚ್ಚಿ ಕೊಂಡಿತು ಎಂಬ ಭಾವನೆಯಿಂದ ಸಂತೋಷ ತುಂಬಿದೆ .ನಮ್ಮ ವಿಶ್ವ ವಿದ್ಯಾಲಯಗಳು ಇಂತಹ ಮೆಚ್ಚಿಗೆ ತೋರಿಸುವಲ್ಲಿ ನಮ್ಮ ಜನತೆಯ ಅಧಿಕೃತ ಪ್ರತಿನಿಧಿಗಳಾಗುತ್ತವೆ "ಎಂದು ಸಂತೋಷಕ್ಕೆ ಕಾರಣವನ್ನು ನಿವೇದಿಸಿದ ಮಾಸ್ತಿ ಯವರು "ಕನ್ನಡ ಜನತೆಯ ಜೀವನದಲ್ಲಿ ಕನ್ನಡದ ಸ್ಥಾನ ಯಾವುದಾಗಿರಬೇಕು ?ಕೇಳಬೇಕೇ ?ಇಂಗ್ಲಿಷ್ ಜನರ ಜೀವನದಲ್ಲಿ ಇಂಗ್ಲಿಷ್ ಭಾಷೆಗೆ ಯಾವುದೋ ,ಫ್ರೆಂಚ್ ಜನರ ಜೀವನದಲ್ಲಿ ಫ್ರೆಂಚ್ ಭಾಷೆಯ ಸ್ಥಾನ ಕನ್ನಡ ಭಾಷೆಗೆ ಇರಬೇಕು .ಈಗ ಈ ಸ್ಥಾನದ ಎಷ್ಟು ಹತ್ತಿರ ತಲುಪಿದ್ದೇವೆ ?"

ಇದು ಮಾಸ್ತಿಯವರ ೨೨ ಪುಟಗಳ ಭಾಷಣದ ಆರಂಭ .. 

ಮಾಸ್ತಿಯವರ ಜತೆ ಡಾಕ್ಟರೇಟ್ ಸ್ವೀಕರಿಸಿದ ಫ ಗು ಹಳಕಟ್ಟಿ ಯವರನ್ನು ವಚನ ಪಿತಾಮಹ ಎಂದು ಕರೆಯುತ್ತಾರೆ .

ಒಮ್ಮೆ ಕನ್ನಡದ ಕಣ್ವ ಆಚಾರ್ಯ ಬಿ.ಎಂ.ಶ್ರೀಕಂಠಯ್ಯನವರು ವಿಜಯಪುರ ಕ್ಕೆ ಬಂದಿಳಿದಾಗ ಒಬ್ಬರು ಕೇಳಿದರಂತೆ – “ಇತಿಹಾಸ ಪ್ರಸಿದ್ಧವಾದ ಗೋಳಗುಮ್ಮಟವನ್ನು ನೋಡುವಿರಾ?” ಅದಕ್ಕೆ ನಕ್ಕು ಬಿ.ಎಂ.ಶ್ರೀ ಅವರು ಉತ್ತರಿಸಿದರಂತೆ “ಮೊದಲು ನಾನು ವಚನಗುಮ್ಮಟವನ್ನು ನೋಡಬೇಕಾಗಿದೆ” ಎಂದು. ಆ ವಚನ ಗುಮ್ಮಟವೇ ವಚನ ಪಿತಾಮಹರೆಂದು ಖ್ಯಾತನಾಮರಾದ ರಾವಬಹದ್ಧೂರ ಫಕೀರಪ್ಪ ಗುರುಬಸಪ್ಪ ಹಳಕಟ್ಟಿ ಅವರು. 

ತಮ್ಮ ತನು ಮನ ಧನ ವನ್ನೆಲ್ಲ ಶರಣ ಸಾಹಿತ್ಯ ಸಂಗ್ರಹ ಮತ್ತು ಪ್ರಕಟಣೆ ಮತ್ತು ಸಮಾಜಮುಖಿ ಸಂಸ್ಥೆ ಗಳಲ್ಲಿ ತೊಡಗಿಸಿದ ಅವರು ಜೇವನದಲ್ಲಿ ಕಾರ್ಪಣ್ಯ ಎದುರಿಸ ಬೇಕಾಯಿತು .ಕವಿ ಸಿದ್ದಲಿಂಗ ಪಟ್ಟಣ ಶೆಟ್ಟಿಯವರ ಮಾತುಗಳಲ್ಲಿ ಅವರ ಬಗ್ಗೆ ಕೇಳಿರಿ 

 https://youtu.be/UBBlS8IYGsQ

ಮೈಸೂರು ರಾಜ್ಯಪಾಲರಾಗಿದ್ದ ಜಯಚಾಮರಾಜೇಂದ್ರ ಒಡೆಯರ್ ವಿಜಯಪುರ ಕ್ಕೆ ಹೋದಾಗ ಹಳಕಟ್ಟಿಯವರ ಮನೆಗೆ ಹೋಗಿ ಹೂ-ಹಣ್ಣು ಸಮರ್ಪಿಸಿ ನಮಸ್ಕರಿಸಿ ಬಂದರಂತೆ. ರಾಜ್ಯಪಾಲರ ಈ ವರ್ತನೆ ಹಳಕಟ್ಟಿಯವರ ವ್ಯಕ್ತಿತ್ವ ಅರಿಯದ ಸರಕಾರಿ ಅಧಿಕಾರಿಗಳಿಗೆ ದಂಗು ಬಡಿಸಿತು. ಸತ್ಯವಂತರಿಗಿದು ಕಷ್ಟಕಾಲವಯ್ಯ ಎಂದು ದಾಸರು ಹೇಳಿದಂತೆ ಶರಣರಿಗೆ ಕಷ್ಟ ನಿರಂತರ ಭಾದಿಸತೊಡಗಿದವು. 

 

 

ಗೌಪ್ಯತೆಯ ಪ್ರಮಾಣ

ಗೌಪ್ಯತೆಯ  ಪ್ರಮಾಣ 

ಮೊನ್ನೆ ಕೇರಳ ಸರ್ಕಾರದ ಪ್ರಮಾಣ ವಚನ ಕಾರ್ಯಕ್ರಮ  ಟಿ ವಿ ಯಲ್ಲಿ ನೋಡುತಿದ್ದೆ . ರ್ರಾಜ್ಯಪಾಲರಾದ ಆರಿಫ್ ಮೊಹಮ್ಮದ್ ಖಾನ  ಅಧಿಕಾರ ಮತ್ತು ಗೌಪ್ಯತೆಯ ಪ್ರಮಾಣ ವಚನ  ಭೋದಿಸುತ್ತಿದ್ದರು . ಅವರು ಬರೀ ನ್ಯಾನ್(ನಾನು ) ಎನ್ನುವರು ,ಮಂತ್ರಿಗಳು ತಮ್ಮ ಹೆಸರು ಹೇಳಿ ಪ್ರಮಾಣ ವಚನ ಸ್ವೀಕರಿಸುವರು . ಹಿಂದೆ ರಾಜ್ಯಪಾಲರು ಇಂಗ್ಲಿಷ್ ನಲ್ಲಿ ಪೂರ್ಣ ಪ್ರಮಾಣ ಓದುತ್ತಿದ್ದರು ,ಆಮೇಲೆ ಸ್ಥಳೀಯ ಭಾಷೆಯನ್ನು ಹಿಂದಿಯಲ್ಲೋ ಇಂಗ್ಲಿಷ್ ನಲ್ಲೋ ಬರೆಸಿ ಕಷ್ಟ ಪಟ್ಟು ಓದಲು ಆರಂಭಿಸಿದರು . ಈಗ ಐ ಅಥವಾ ನಾನು ಎಂದು ಬಿಟ್ಟು ನಿಲ್ಲುವರು .ಮಂತ್ರಿ ತಾನು  ಬರೆಸಿ ಕೊಟ್ಟದ್ದನ್ನು ಓದುವರು. ಕೇರಳದ ಕೆಲವು ಮಂತ್ರಿಗಳು ಅಡ್ವೋಕೇಟ್ ಎಂದು ತಮ್ಮ ಹೆಸರು ಆರಂಭಿಸಿದರು . ಇದು ಹೊಸದು . ಡಾಕ್ಟರ್ ಎಂದು ಆರಂಭಿಸಿದ್ದು ಇದೆ .ಕೇರಳದಲ್ಲಿ ವೃತ್ತಿ ಹೆಸರಿಗೆ ಸೇರಿಸುವದು ಸಾಮಾನ್ಯ; ಶೈಲಜಾ ಟೀಚರ್ ,ರಾಮಪ್ಪ ಮಾಸ್ಟರ್ ಇತ್ಯಾದಿ . 

ಅಧಿಕಾರದ ಪ್ರಮಾಣದಲ್ಲಿ ಸಂವಿಧಾನದ ಆಧಾರದಲ್ಲಿ  ಭಯ ಅಥವಾ ಪಕ್ಷಪಾತ ,ರಾಗ ಅಥವಾ ದ್ವೇಷ ಇಲ್ಲದೆ ಆಡಳಿತ ನಡುಸುತ್ತೇನೆ ಎಂದೂ  ಗೌಪ್ಯತೆಯ ಪ್ರಮಾಣದಲ್ಲಿ ಅಧಿಕಾರದ ಪರಿಧಿಯಲ್ಲಿ ಬಂದ ವಿಚಾರಗಳನ್ನು ,ಆಡಳಿತಾತ್ಮಕ ಉದ್ದೇಶಗಳಿಗೆ ಅಲ್ಲದೆ ಬೇರೆಯವರಿಗೆ ಬಹಿರಂಗ ಪಡಿಸೆನು ಎಂದೂ ಪ್ರಮಾಣ ಮಾಡುವರು . ಇದನ್ನು ಎಷ್ಟು ಪಾಲಿಸಿದ್ದಾರೆ ಎಂಬುದನ್ನು ನೀವು ನಿಮ್ಮ ಒಬ್ಬೊಬ್ಬರೇ  ನಾಯಕರ ನಡೆಯನ್ನು ನೋಡಿ ಪರಿಶೀಲಿಸಿ . 

ನಮಗೆ ವೈದ್ಯ ವೃತ್ತಿಯಲ್ಲಿಯೂ  ರೋಗಿಯ ಆರೋಗ್ಯದ ವಿವರದ ಗೋಪ್ಯತೆಯನ್ನು ಕಾಪಾಡುವ ಜವಾಬ್ದಾರಿ ಇದೆ .ಕೆಲವೊಮ್ಮೆ ಗಂಡ ನ ಅರೋಗ್ಯ ಅನಾರೋಗ್ಯ ವಿವರ ಹೆಂಡತಿಗೂ ಮತ್ತು ವೈಸ್ ವರ್ಸಾ . ನನ್ನ ಅಥವಾ ನನ್ನ ಪತ್ನಿಯ ಸಂಬಂಧಿಕರು ಆಸ್ಪತ್ರೆಗೆ ಬಂದರೆ ನಾನು ಅವರ ಕಾಯಿಲೆಯ ವಿಷಯ ಮನೆಯಲ್ಲಿ ಮಾತನಾಡುವುದಿಲ್ಲ .ಕೆಲವೊಮ್ಮೆ ಅವರು ನನ್ನ ಮನೆಯವರಿಗೆ ಫೋನ್ ಮಾಡಿ ವಿವರ ಕೇಳಿದಾಗ ಮೊದಮೊದಲು ಛೇ ನನ್ನಲ್ಲಿ ಹೇಳಲಿಲ್ಲವಲ್ಲಾ  ಎಂದು ಅವರಿಗೆ ವ್ಯಥೆಯಾಗುತ್ತಿ  ತ್ತು .ಈಗ ಅಭ್ಯಾಸ ಆಗಿದೆ . ಬಹಳ ಮಂದಿ ರೋಗಿಯ ಸಂಬಂದಿಕರು ,ಆಪ್ತರು ಎಂದು ಮುದ್ದಾಂ ಇಲ್ಲವೇ ಫೋನ್ ನಲ್ಲಿ ವಿಚಾರಿಸುತ್ತಾರೆ .ಆಗ ಎಲ್ಲವನ್ನೂ ಹೇಳಲು ಆಗುವುದಿಲ್ಲ .ನಾವು ಹೇಳಿಲ್ಲಾ ಎಂದು ಬೇಸರಿಸುತ್ತಾರೆ