ಆಧುನಿಕ ರೋಬಿನ್ ಹುಡ್ ಕತೆ

ಇತ್ತೀಚಿಗೆ ಮುಂಬೈಗೆ ಒಂದು ಕಾರ್ಯಕ್ರಮ ನಿಮಿತ್ತ ಹೋದವನು ಮರಳುವಾಗ 

 ರಾತ್ರಿ  ಹತ್ತೂವರೆ ರೈಲು ಮೂರು ಗಂಟೆ ವಿಳಂಬ ವಿದ್ದುದರಿಂದ  ಅಸಹನೆಯಿಂದ 

ಕಾಯುತ್ತಿದ್ದೆ .ಸ್ಟೇಷನ್ ಪರಿಸರದಲ್ಲಿ  ಪ್ರಯಾಣಿಕರು ,ನಿರ್ಗತಿಕರು ,ಭಿಕ್ಷುಕರು 

 ಇತ್ಯಾದಿ   ಎಲ್ಲೆಂದರಲ್ಲಿ ಜಾಗ ಮಾಡಿಕೊಂಡು ಮಲಗಿದ್ದರು . ಸುಮಾರು ಒಂದು 

ಗಂಟೆ ಸಮಯ ಒಂದು ವ್ಯಾನ್ ಬಂದು ಸ್ಟೇಷನ್ ಪೂರ್ವ ಭಾಗದಲ್ಲಿ ನಿಂತಿತು ,

ಕೂಡಲೇ ಮಲಗಿದ್ದವರು ಹಲವರು ಎದ್ದು ಕ್ಯೂ ನಿಂತರು .ಕೆಲವರ ಕೈಯ್ಯಲ್ಲಿ ತಟ್ಟೆ .

ಗಲಾಟೆ ಇಲ್ಲ ,ಗೊಂದಲ ಇಲ್ಲ.ಮುಂಬೈ ಇಲ್ಲದಿದ್ದರೂ ಕ್ಯೂ ಗೆ ಹೆಸರಾದ ನಗರ .

 ( ಇಲ್ಲಿಯ ಜನಸಂಖ್ಯೆ ಯೂ ಇದಕ್ಕೆ ಕಾರಣ ಇರಬಹುದು .ಗೊಂದಲದ 

ನಡುವೆಯೂ ಒಂದು ಶಿಸ್ತು ಇಲ್ಲಿಯ ಜೀವನವನ್ನು ಸಹನೀಯವಾಗಿ ಮಾಡಿದೆ .)

   ವ್ಯಾನ್ ನಿಂದ ಇಳಿದ ಯುವಕರು ಎಲ್ಲರಿಗೂ ಆಹಾರ ವಿತರಣೆ ಮಾಡಿ 

ಯಾವುದೇ ಗೌಜಿ ಗದ್ದಲ ಇಲ್ಲದೆ ಮರಳಿದರು .ಉಂಡವರು ಸಂತೃಪ್ತಿಯಿಂದ ನಿದ್ದೆಗೆ 

ಜಾರಿದರು .ಅಷ್ಟರಲ್ಲಿ ನನ್ನ ಟ್ರೈನೂ ಆಗಮಿಸಿತು .ಗಣೇಶ ಹಬ್ಬವಾದ್ದರಿಂದ ರಶ್ 

ಇತ್ತು .ಕಾದಿರಿಸದ ಬೋಗಿ ಗೆ  ಹತ್ತಲು ಜನ ತಾವೇ ಕ್ಯೂ ಹಚ್ಚಿದರು .ಅಲ್ಲೂ ಒಂದು 

ಶಿಸ್ತು .

ಟ್ರೈನ್ ಏರಿದವನಿಗೆ  ಅಲ್ಲಿ ಅನ್ನ ದಾನವ ಮಾಡುತ್ತಿದ್ದವರ ದೃಶ್ಯ 

.ದಾನವರಾಗುತ್ತಿರುವ ಮನುಜರ ನಡುವೆ ಅನ್ನ ದಾನವ ಮಾಡುವ ಮನುಜರಾರು ?

ವಿಚಾರಿಸಿದಾಗ ತಿಳಿಯಿತು .ಇವರೇ ಅಧುನಿಕ ರಾಬಿನ್ ಹುಡ್ ಗಳು .ಆದರೆ  

ಇವರು ಇರುವವರನ್ನು ಲೂಟಿ ಮಾಡಿ ಇಲ್ಲದವರಿಗೆ ಕೊಡುವವರಲ್ಲ .ಇದ್ದವರಿಂದ 

ಮಿಕ್ಕದ್ದನ್ನು ಇಲ್ಲದವರಿಗೆ ಹಂಚುವವರು .ದೆಹಲಿ ನಗರದಲ್ಲಿ ಕೆಲವು ಸಹೃದಯೀ

ಯುವಕರು ಈ ಸಂಸ್ಥೆಯನ್ನು ಹುಟ್ಟು ಹಾಕಿದ್ದು ಹೋಟೆಲ್ ಕಲ್ಯಾಣ ಮಂಟಪಗಳಲ್ಲಿ 

ಮಿಕ್ಕ ಆಹಾರ ಸಂಗ್ರಹಿಸಿ  ನಿಗದಿತ ಜಾಗಗಳಲ್ಲಿ ಅದನ್ನು ಹಂಚುವರು .ಇದರ 

ಮುಂಬೈ ಶಾಖೆಯ ಕಾರ್ಯವನ್ನೇ ನಾನು ಕಂಡದ್ದು .ಆಹಾರ ಅಲ್ಲದೆ ಚಳಿಗಾಲದಲ್ಲಿ 

ಕಂಬಳಿ ಹಂಚುವ ಕೆಲಸವನ್ನೂ ಮಾಡುವರಂತೆ .

ಈ ಸಂಸ್ಥೆಯು ಪಾಕಿಸ್ತಾನದಲ್ಲಿಯೂ ಇದ್ದು ಮೈತ್ರಿ ಮಾಡಿ ಕೊಂಡಿವೆ .

  ಅನ್ನವನು ಇಕ್ಕುವುದು ನನ್ನಿಯನು ನುಡಿಯುವುದು ತನ್ನಂತೆ ಪರರ ಬಗೆದೊಡೆ 

ಕೈಲಾಸ ಬಿನ್ನಾಣವಕ್ಕು ಸರ್ವಜ್ಞ 

ಅವರ ಜಾಲತಾಣ ದಿಂದ ಆರಿಸಿದ ನುಡಿಮುತ್ತುಗಳು
.೧  ಉಪವಾಸದಿಂದ ಸಾಯುವವರ ಸಂಖ್ಯೆ ಕ್ಷಯ ,ಏಡ್ಸ್  ಮತ್ತು ಮಲೇರಿಯಾ 

ಕಾಯಿಲೆಗಳಿಂದ ಒಟ್ಟಾಗಿ ಸಾಯುವವರಿಗಿಂತ ಹೆಚ್ಚು .

೨.ಜಗತ್ತಿನಲ್ಲಿ ತಯಾರಿಸಿದ ಆಹಾರದಲ್ಲ್ಲಿ ಮೂರನೇ ಒಂದು  ಸೇವಿಸಲ್ಪಡುವುದೇ 

ಇಲ್ಲ .

೩.೮೨% ಉಪವಾಸ ವಿರುವವರು ಆಹಾರ ಮಿಗತೆ ಇರುವ ನಾಡಿನಲ್ಲಿಯೇ 

ಇರುವರು 

೪ ಜಗತ್ತಿನಲ್ಲಿ ಹತ್ತು ಸೆಕುಂಡುಗಳಿಗೆ ಒಂದು ಮಗು ಉಪವಾಸದಿಂದ ಸಾಯುತ್ತಿದೆ .

ಇವರ ಬಗ್ಗೆ ಹೆಚ್ಚು ಮಾಹಿತಿಗೆ robinhoodarmy.com ಗೆ ಲಾಗ್ ಮಾಡಿರಿ 
         

 ಇಂತಹ ರಾಬಿನ್ ಹುಡ್ ಗಳ ಸಂತತಿ ಸಾವಿರವಾಗಲಿ .

(ಚಿತ್ರಗಳ ಮೂಲಗಳಿಗೆ ಆಭಾರಿಯಾಗಿದ್ದೇನೆ)

ಅಮೇರಿಕಾ ಯಾತ್ರೆ ೮

ಸಿಯಾಟಲ್ ಸಂದರ್ಶನ ಮುಗಿಸಿ ಚಿಕಾಗೊದತ್ತ  ದಾರಿ ಬೆಳೆಸಿದೆವು .ವಿಮಾನ 

ನಿಲ್ದಾಣ ದಲ್ಲಿ ಸೆಕ್ಯೂರಿಟಿ ಯವರು  ಶ್ರೀಮತಿಯವರ ಉಡುಗೆಯಲ್ಲಿದ್ದ ಅಲಂಕಾರಿಕ 

ಜರಿಗಳು ಸ್ಕ್ಯಾನ್ ನಲ್ಲಿ  ಕಂಡುದರಿಂದ ವಿವರವಾದ ಪರಿಶೀಲನೆಗೆ ಒಳ ಪಡಿಸಿ 

ಯಾವುದೇ ಸ್ಪೋಟಕ ಇಲ್ಲ ಎಂದು ಖಾತರಿಸಿ ಒಳ ಗಡೆ ಬಿಟ್ಟರು .ನನಗೇನೋ 

ಸಂದೇಹ ,ಆಗಾಗ್ಗೆ ನನ್ನ ಮೇಲೆ ಅವರ ಸಿಟ್ಟು ಸ್ಪೋಟವಾಗುವುದು ಇದೆ .

    ಚಿಕಾಗೊ ನಿಲ್ದಾಣದಲ್ಲಿ ಇಳಿಯುವಾಗ ಸಂಜೆ ಆರು ಗಂಟೆ .ಇಲ್ಲಿನ ಬಹುತೇಕ 

ನಗರಗಳಲ್ಲಿ ಒಂದಕ್ಕಿಂತ ಹೆಚ್ಚು ವಿಮಾನ ನಿಲ್ದಾಣಗಳಿವೆ .ನಮ್ಮನ್ನು 

ಕರೆದೊಯ್ಯಲು ಬಂಧು ಮುರಲೀಧರ ಕಜೆ ಕಾರ್ ಸಮೇತ  ಬಂದಿದ್ದರು .ಅವರ 

ಕಾರಿನ ನಂಬರ್ ಪ್ಲೇಟ್ನಲ್ಲೂ KAJE ಇದೆ .

  ನಗರಗಳ ಮುಖ್ಯ ಭಾಗಕ್ಕೆ ಡೌನ್ ಟೌನ್ ಎನ್ನುತ್ತಾರೆ .ಮುರಳಿಯವರ ಆಫೀಸ್ 

ಇಲ್ಲಿದೆ .ಮನೆ ಹೊರ ವಲಯದಲ್ಲಿ ಇದೆ .ಅವರು ಬ್ಯಾಂಕ್ ನಲ್ಲಿ ತಾಂತ್ರಿಕ ಅಧಿಕಾರಿ .

ಮುರಳಿ ಯವರು ತಮ್ಮ ಪದವಿ ಅಧ್ಯಯನ ಹೊರತು ಪಡಿಸಿ ಎಲ್ಲಾ ವಿದ್ಯಾಭ್ಯಾಸ

ಸತ್ಯ ಸಾಯಿ ಸಂಸ್ಥೆಗಳಲ್ಲಿ ಮಾಡಿದವರು ,ಅದರ ಛಾಪು ಅವರಲ್ಲಿ ಇದೆ .ವಿನಯ .

ಸಂಸ್ಕೃತಿ ಪ್ರೇಮ ಮತ್ತು ಅತಿಥ್ಯದಲಿ ಆನಂದ ಕಾಣುವ ಗುಣ  ಎದ್ದು ಕಾಣುವುದು .

ಚಿಕಾಗೊ ನಗರದ ಕನ್ನಡ ಕೂಟ ,ಸತ್ಯ ಸಾಯಿ ವೃಂದ ಗಳಲ್ಲಿ ಅವರು ಕ್ರಿಯಾಶೀಲ

ರಾಗಿ ಮುಂಚೂಣಿಯಲ್ಲಿದ್ದಾರೆ .

ಅವರ ಪತ್ನಿ ಸಹನಾ .ಹೆಸರಿಗೆ ತಕ್ಕಂತೆ ಸಹನಾ ಶೀಲೆ .ದಂತ ವೈದ್ಯೆಯಾದ 

ಇವರು ಕುಟುಂಬಕ್ಕೆ ಸಮುಯ ಮೀಸಲಿಡುವುದಕ್ಕಾಗಿ ಎಳೆಯ ಮಕ್ಕಳ ಶಾಲೆಯಲ್ಲಿ 

ಅಧ್ಯಾಪನ ಮಾಡುತ್ತಿದ್ದಾರೆ ,ಮಕ್ಕಳಾದ ಸಖ್ಯಂ ಮತ್ತು ಸೋಹಂ ಅವರಲ್ಲಿ 

ನಮ್ಮ ಸಂಸ್ಕೃತಿಯ ಪ್ರಭಾವ ಉಳಿಯುವಂತೆ ಪ್ರಯತ್ನ ಮಾಡುತ್ತಿದ್ದಾರೆ .

   ಅವರ ಮನೆಯ ನೆಲ ಮಾಳಿಗೆಯಲ್ಲಿ ಧ್ವನಿ ವರ್ಧಕ ಮತ್ತು ಸಂಗೀತ ಸಾಧನ 

ಗಳು ಇದ್ದು ಭಜನೆ ಇತ್ಯಾದಿ ನಡೆಯುತ್ತಿರುತ್ತವೆ .

                   ಮುರಳಿ  ಕುಟುಂಬದೊಡನೆ ನಾವು 

   ರಾತ್ರಿ ಕಳೆದು ಮರುದಿನ  ಚಿಕಾಗೋ ನಗರ ವೀಕ್ಷಣೆಗೆ ಹೊರಟೆವು ,ಕಾರು 
ಅವರದು .ಚಾಲಕ ನಮ್ಮ ಮಗ .ಮೊದಲು ಇಲ್ಲಿಯ ಪ್ರಸಿದ್ಧ  ಮತ್ಸ್ಯಾಗಾರ 

ಶೆಡ್ ಅಕ್ವೇರಿಯಂ ಗೆ ಹೋದೆವು .ರಜಾದಿನ ಆದ್ದರಿಂದ ಜನ ಸಂದಣಿ ಇತ್ತು .

,ಮೊದಲೇ ಟಿಕೆಟ್ ಕೊಂಡಿದ್ದರಿಂದ ಒಳ ಹೋದೆವು .ಮೊದಲು ಇಲ್ಲಿ ಜಲಚರಗಳ 

ಬಗ್ಗೆ 4 D ಚಿತ್ರ ಪ್ರದರ್ಶನ ನೋಡಿದೆವು .ಒಳ್ಳೆಯ ಅನುಭವ .

 ಆ ಮೇಲೆ  ಅಕ್ವಾಟಿಕ್ ಶೋ ಇದೆ ,ಇಲ್ಲಿ ತರಬೇತಿ ಹೊಂದಿದ ಬಿಳಿ ತಿಮಿಂಗಿಲ ಗಳ 

ಆಟ ಪ್ರದರ್ಶಿಸುತ್ತಾರೆ.

  

ಪೆಂಗ್ವಿನ್ ಮತ್ತು ನಾಯಿ ಮರಿಗಳ  ಆಟ ಕೂಡ ತೋರಿಸುವರು .

ಬೇರೆ ಬೇರೆ ಜಲಚರಗಳ (ಕಪ್ಪ್ಪೆ  ಮೀನು )ಪ್ರದರ್ಶನ ಕಾಣಲು ಚೆನ್ನ .

  ಮಿಷಿಗನ್ ಸರೋವರ ಚಿಕಾಗೋದ ದೊಡ್ಡ ಆಕರ್ಷಣೆ ಮತ್ತು ನಗರದ ಜಲ

ಪೂರೈಕೆಯ ತಾಣ .

ಚಿಕಾಗೊ ನಗರದ ಮೂಲಕ ಹರಿಯುವ ಚಿಕಾಗೊ ನದಿ ಗೂ ಈ ಸರೋವರಕ್ಕೂ 

ಸಂಪರ್ಕ ಇದ್ದರೂ ನದಿ ನೀರು ಇದಕ್ಕೆ ಸೇರದಂತೆ  ತಾಂತ್ರಿಕ ವ್ಯವಸ್ಥೆ ಮಾಡಿದ್ದಾರೆ.

     ಮದ್ಯಾಹ್ನ ಮನೆಯಿಂದ ತಂದಿದ್ದ  ಚಿತ್ರಾನ್ನ ,ಪುಳಿಯೋಗರೆ ತಿಂದು 

ನಗರದ  ಪ್ರಸಿದ್ಧ  ಅರ್ಕಿಟೆಕ್ಚರಲ್  ದೋಣಿ ಯಾತ್ರೆಗೆ ಹೋದೆವು .ಚಿಕಾಗೋ 

ಮುಖ್ಯ ನಗರದ ಗಗನ ಚುಂಬಿ ಗಳಲೆಲ್ಲ  ಚಿಕಾಗೊ ನದಿ ದಂಡೆಯಲ್ಲಿ ಇವೆ.

ಇವುಗಳಲ್ಲಿ ಒಂದೊಂದಕ್ಕೂ ತನ್ನದೇ ಅದ ಇತಿಹಾಸ ಇದೆ .ಯಾಂತ್ರಿಕ 

ದೋಣಿಯಲ್ಲಿ ವೀಕ್ಷಕ ವಿವರಣೆ ನೀಡುತ್ತಾ ಕರೆದು ಒಯ್ಯುತ್ತಾರೆ .

               

ಕೆಳಗೆ  ಕಾಣುವ ಟ್ರಂಪ್ ಟವರ್ ನೋಡಿರಿ ,ಇದು  ಅಮೇರಿಕಾ ಅಧ್ಯಕ್ಷ 

ಸ್ಥಾನಕ್ಕೆ  ಪೈಪೋಟಿ ನಡೆಸುತ್ತಿರುವ  ಡೊನಾಲ್ಡ್ ಟ್ರಂಪ್  ಮಾಲಕತ್ವದ ಗಗನ 

ಚುಂಬಿ .

  

ಇಲ್ಲಿ ನದಿ ಸುತ್ತ  ಕಟ್ಟಡಗಳನ್ನು ಕಟ್ಟುವಾಗ  ಪಾದಚಾರಿಗಳಿಗೆ ಮತ್ತು  ಸೈಕಲ್ 

ಸವಾರರಿಗೆ ಎಂದು  ಜಾಗ ಬಿಡಬೇಕೆಂಬ ಕಾನೂನು ತಂದಿರುವರು .

ನದಿ ತೀರದಲ್ಲಿ ಹಾದು ಹೋಗುವ  ಮೆಟ್ರೋ ರೈಲು ಹಳಿಗಳು ಮತ್ತು ಸ್ಟೇಷನ್ 

ಗಳು  ಈ ಕಟ್ಟಡಗಳ ಕೆಳಗೆ ಇವೆ.

ಚಿಕಾಗೋದ ಅತಿ ಎತ್ತರದ ಕಟ್ಟಡ ಸಿಯರ್ರ್ಸ್ ಅಥವಾ ವಿಲ್ಲಿಸ್  ಟವರ್ 

ಈ ನದೀ ಗುಂಟವೇ ಇದೆ .ಇದರ ನಿರ್ಮಾಣದಲ್ಲಿ ಬಾಂಗ್ಲಾದೇಶ 

ಸಂಜಾತ ಇಂಜಿನಿಯರ್  ಫಜಲೂರ್ ರಹಮಾನ್ ಖಾನ್ ಅವರ ಮುಖ್ಯ ಭೂಮಿಖೆ

ಇತ್ತು .

ವಿಲ್ಲಿಸ್ ಟವರ್ .

ನದೀ ಯಾತ್ರೆ ಮುಗಿಸಿ ನಾವು ಗ್ರಾಂಟ್ ಪಾರ್ಕ್ ನತ್ತ ತೆರಳಿದೆವು .

ಶಾಲೆಗಳಿಗೆ ರಜಾದಿನಗಳು ಮತ್ತು ಶನಿವಾರ ಆದುದರಿಂದ ನಗರದಲ್ಲಿ 

ಜನಸಂದಣಿ ಇತ್ತು .

ಇಲ್ಲಿ ಬಕಿಂಗ್ ಹ್ಯಾಮ್ ಕಾರಂಜಿ ಇದೆ .

   
ಅದರ ಸನಿಹದಲ್ಲಿಯೇ ಕ್ಲೌಡ್ ಗೇಟ್ ಇದೆ .ಇದರ ರಚನೆಯಲ್ಲಿ  ಭಾರತ ಸಂಜಾತ 

ಆಶಿಶ್ ಕಪೂರ್ ಅವರ ಪಾತ್ರ ಮುಖ್ಯ ಎಂಬುದು ವಿಶೇಷ ,ಇಲ್ಲಿ  ಉಕ್ಕಿನ 

ಹಾಳೆಗಳಿಂದ ನಿರ್ಮಿಸಿದ ಚಿಕಾಗೊ ಬೀನ್ ಇದೆ .ಇದರಲ್ಲಿ ಯಾತ್ರಿಕರ ಪ್ರತಿಬಿಂಬ 

ನೋಡಲು ಚಂದ .

ನನ್ನ ಮಗನಿಗೆ ಅಲ್ಪ ಸಮಯದಲ್ಲಿ ಹೆಚ್ಚು ಹೆಚ್ಚು ಸ್ಥಳಗಳ ಪರಿಚಯ ಮಾಡಿಸುವ 

ಆಶೆ ಮತ್ತು ಹುಮ್ಮನಸು ,ಆದರೆ ನಮ್ಮ ಗಾಡಿ ಅದಕ್ಕೆ ಸರಿಯಾಗಿ ಒಡ ಬೇಕಲ್ಲ .


ಪಾರ್ಕಿಂಗ್ ಸಮಸ್ಯೆಯಿಂದಾಗಿ ನಾವು ಒಂದು ಕಡೆ ಇಟ್ಟು ಮತ್ತೆ ಎಲ್ಲಾ ಕಡೆ 

ಪಾದಯಾತ್ರೆ  ತಾನೇ .

  ಸಂಜೆಯಾಗುತ್ತಿದ್ದಂತೆ ವಿಲ್ಲ್ಸ್ ಟವರ್ ಏರಲು ಹೋದೆವು ,೧೦೮ ಮಹಡಿಗಳ 

ಇದು ಅಮೆರಿಕಾದ ಎರಡನೇ ದೊಡ್ಡ ಕಟ್ಟಡ .ಟಿಕೆಟ್ ಪಡೆದು ಮೇಲೆ ಹತ್ತ ಬಹುದು .

ಮೇಲಿನ ಅಂತಸ್ತಿನಲ್ಲಿ  ಇಡೀ ಚಿಕಾಗೊ ನಗರದ ವಿಹಂಗಮ ನೋಟ ನೋಡ 

ಸಿಗುತ್ತದೆ .ಅಲ್ಲದೆ ಗಾಜಿನ ಒಂದು ವಿಸ್ತರಿತ  ಚೇಂಬರ್ ನಲ್ಲಿ ನಿಂತು ಪ್ರಪಾತ 

ವಿಕ್ಷಣೆಗೂ ಅವಕಾಶ ಇದೆ ,ರೋಮಾಂಚಕಾರಿ ಅನುಭವ ,

ಮರಳುವಾಗ ಭಾರತ ಮತ್ತು ಪಾಕಿಸ್ತಾನ ದವರ  ಅಂಗಡಿಗಳು ಹೆಚ್ಚಾಗಿರುವ 

ದೆವೊನ್ ಅವೆನ್ಯೂ ಮೂಲಕ ಹೋದೆವು .ಮುಖ್ಯ ನಗರದಲ್ಲಿ ಕಾಣದ 

ಸೈನ್ ಬೋರ್ಡ್ ಗಳು ,ಫ್ಲೆಕ್ಸ್ ಗಳು ಇಲ್ಲಿ ಕಂಡು ಬಂದುವು ,ಮುಂದೆ ಇಲ್ಲಿಯ 

ಬಹಾಯಿ ಮಂದಿರಕ್ಕೆ ತೆರಳಿ ಅಲ್ಲಿಯ ಚಟುವಟಿಕೆ ವೀಕ್ಷಿಸಿ ದೆವು.

ಬಹಾಯಿ ಮಂದಿರ 

ಮನೆಯಲ್ಲಿ ಸಹನಕ್ಕ ತಯಾರಿಸಿದ ಭೂರಿ ಭೋಜನ ಸೇವಿಸಿ  ಪವಡಿಸಿದೆವು

ಅಮೇರಿಕಾ ಯಾತ್ರೆ ೭

ಸಿಯಾಟಲ್ ನಗರದಲ್ಲಿ ಸ್ಪೇಸ್ ನೀಡಲ್ (ಅಂತರಿಕ್ಷ ಸೂಜಿ )ಎಂಬ ಆಕರ್ಷಕ ಗಗನ 

ಚುಂಬಿ ಇದೆ .ಟಿಕೆಟ್ ಖರೀದಿಸಿ ಇದರ ಮೇಲೆ ಏರಿ ನಗರದ ವೀಕ್ಷಣೆ ಮಾಡ 

ಬಹುದು .

ಈ ಕಟ್ಟಡದ ಪ್ರತಿಬಿಂಬ ಸನಿಯದಲ್ಲಿ ಇರುವ ಗಾಜಿನ ಮನೆಯ ಗೋಲದ ಮೇಲೆ 

ಹೀಗೆ ಕಾಣುವುದು 

ಲಿಫ್ಟ್ ಮೂಲಕ ಈ ವಿಶಿಷ್ಟ ಶೈಲಿಯ ಕಟ್ಟಡ ಏರಿದೆವು ,ಅದರ ಮೇಲಿಂದ 

ಕಂಡ ಸಿಯಾಟಲ್ ನಗರದ ಕೆಲವು ದೃಶ್ಯಗಳು 

ಈ ಕಟ್ಟಡದ ಬಳಿ ಗಾಜಿನ ಕಲಾಕೃತಿಗಳ ಸಂಗ್ರಹಾಲಯ ಇದೆ .ಅದರ 

ಒಳಗೆ ಗಾಜಿನಿಂದ ತಯಾರಿಸಿದ ಮನ ಮೋಹಕ  ಕಲಾಕೃತಿಗಳು ಇವೆ .

ಈ ಕಟ್ಟಡದ ಸನಿಹದಿಂದ  ಡಕ್ ಟೂರ್ ಎಂಬ (ಬಾತುಕೋಳಿ ಯಾತ್ರೆ )

ಮೋಜು ಯಾತ್ರೆ ಏರ್ಪಡಿಸಿದ್ದಾರೆ .ಈ ವಾಹನ  ನೆಲದ ಮೇಲೂ ನೀರಿನಲ್ಲೂ

ಚಲಿಸುವುದು .ಇದರ ಚಾಲಕರು ಊರ ಪರಿಚಯ ಮಾಡಿ ಕೊಡುವುದರೊಂದಿಗೆ 

ಗಟ್ಟಿಯಾಗಿ ಹಾಡುವರು ,ಯಾತ್ರಿಕರು ಚಪ್ಪಾಳೆ ತಟ್ಟಿ ತಮ್ಮ ಹರ್ಷ ವ್ಯಕ್ತ 

ಪಡಿಸುವರು .

ನೀರಿನಲ್ಲಿ  ಈ ಬಾತುಕೋಳಿ ಸಂಚರಿಸುವಾಗ  ಸಮೀಪದಲ್ಲಿ  ದೋಣಿಯಲ್ಲಿ 

ವಿಹರಿಸುವ ಯಾತ್ರಿಗಳು .ದೋಣಿ ಮನೆಗಳು ಕಾಣ ಸಿಗುತ್ತವೆ .

ಇಲ್ಲೇ ಸಮೀಪದಲ್ಲಿ  ನೀರಿನಲ್ಲಿ ಇಳಿಯುವ ವಿಮಾನಗಳು ಬರುತ್ತಿರುತ್ತವೆ .

ಅವುಗಳೂ ನೋಡಲು ರೋಚಕ .

(ಚಿತ್ರಗಳ ಮೂಲಗಳಿಗೆ ಅಭಾರಿ )

ಅಮೇರಿಕಾ ಯಾತ್ರೆ ೬ ನಯಾಗರಾ ಸಂದರ್ಶನ

ಚಿಕಾಗೋ ನಗರದಲ್ಲಿ ಮುರಳೀಧರ ಕಜೆ ದಂಪತಿಗಳ ಅತಿಥ್ಯ ಸವಿದು ಸಂಜೆ 

ವಿಮಾನದಲ್ಲಿ ಬಫೆಲೋ ನಗರ ಸೇರಿದಾಗ ಮೋಡ ಕವಿದ ವಾತಾವರಣ ,ತುಂತರು 

ಮಳೆ . ನಿಲ್ದಾಣದಿಂದ ಬಾಡಿಗೆ ಕಾರು ತೆಗೆದು ಕೊಂಡು ಮಗನೇ ಚಾಲಕನಾಗಿ 

ನಯಗರಾದತ್ತ ತೆರಳಿದೆವು .ಬಫೆಲೋ ದಿಂದ ನಯಾಗರಾ ಕ್ಕೆ ೨೫ ಮೈಲುಗಳು .


ಸಂಜೆ ಆರೂವರೆ ಗಂಟೆಗೆ ನಯಾಗರಾ ತಲುಪಿದಾಗ ಮಳೆ ಜೋರಾಗ ತೊಡಗಿತು .


ನಮ್ಮ ಊರಿನವರೇ ಆದ ಡಾ ಶಂಭು ಉಪಾಧ್ಯಾಯ ರು  ಬಫೆಲೋ 

ವಿಶ್ವವಿದ್ಯಾಲಯದಲ್ಲಿ  ಕಂಪ್ಯೂಟರ್ ಪ್ರಾಧ್ಯಾಪಕರಾಗಿ ಸೇವೆ ಸಲ್ಲಿಸುತ್ತಿದ್ದು  ನಾವು 

ಬರುವ ವಿಚಾರ ಮೊದಲೇ ತಿಳಿಸಿದ್ದೆವು .ಶ್ರೀಯುತರು  ಮಾಧ್ಯಮಿಕ ಶಾಲೆಯಲ್ಲಿ 

ನನಗಿಂತ ಒಂದು ವರ್ಷ ಹಿರಿಯರು .ಆಗಲೇ ಅವರು ಜಾಣರೆಂದು ಗುರುತಿಸಿ 

ಕೊಂಡವರು.ಬಾಲಕನಾಗಿದ್ದಾಗ  ಕ್ರಿಕೆಟ್ ಮತ್ತು ಕನ್ನಡ ಚಲನಚಿತ್ರ ಗಳನ್ನು 

ಹಚ್ಚಿ ಕೊಂಡಿದ್ದವರು .

ನಾವು ನಯಗರಾದಿಂದ  ಅರ್ಧಕ್ಕೇ ಹಿಂತಿರುಗಿ  ಉಪಾಧ್ಯಾಯರ ಮನೆಗೆ  

ತೆರಳಿದೆವು .ವಿನೋದ ಪ್ರಿಯರಾದ (ಶಂಭು ಉಪಾಧ್ಯಾಯರ ಪತ್ನಿ 

ಹೆಸರು ವಿನೋದ ,ಹೆಸರಿಗೆ ತಕ್ಕಂತೆ ಮತ್ತು  ಸದಾ ಹಸನ್ಮುಖಿ ) ಉಪಾಧ್ಯಾಯರು 

ಮತ್ತು ನಾನು ಬಾಲ್ಯದ ನೆನಪುಗಳನ್ನು ಮೆಲುಕು ಹಾಕಿ ಸಂತೋಷ ಪಟ್ಟೆವು .

   ಭರ್ಜರಿ ಭೋಜನ ವಾಯಿತು .ಸಂತ್ರುಪ್ತಿಯೊಡನೆ  ಮರಳಿ ನಯಾಗರ ದತ್ತ 

ತೆರಳಿದೆವು .ತುಂತುರು ಮಳೆ ಇತ್ತು .

    ನಯಾಗರಾ ಜಲಪಾತ ಅಮೇರಿಕಾ ಕೆನಡಾ ಗಡಿಯಲ್ಲಿದ್ದು  ಕೆನಡಾ ಭಾಗದಿಂದ 

ನೋಡಲು ಚಂದ .ಅದಕ್ಕೆಂದೇ ನಾವು ಕೆನಡಾ ವಿಸಾ ಮಾಡಿಸಿ ಕೊಂಡಿದ್ದೆವು ,

ರೈನ್ ಬೋ ಸೇತುವೆ  ಎರಡು ರಾಷ್ಟ್ರಗಳನ್ನು ಸಂಪರ್ಕಿಸುವ ಸೇತುವೆ .

                   

ನಾವು ವಲಸೆ ಅಧಿಕಾರಿಗಳ ಪರಿಶೀಲನೆ ಬಳಿಕ ಕೆನಡಾ ಪ್ರವೇಶಿಸಿ 

ಜಲಪಾತ ವೀಕ್ಷಣೆ ಗೆ ಹೋದೆವು .ಮಳೆಯಿದ್ದರೂ  ಬಹಳ ಯಾತ್ರಿಕರು ಇದ್ದರು .

ರಾತ್ರಿ ಜಲಪಾತಕ್ಕೆ ಬಣ್ಣದ ಬೆಳಕು ಹಾಯಿಸಿ ವರ್ಣರಂಜಿತವಾಗಿ ಕಾಣುವಂತೆ 

ಮಾಡುತ್ತಾರೆ .

ಮಳೆ ಇಲ್ಲದಿದ್ದರೆ ಇನ್ನೂ ಚೆನ್ನಾಗಿತ್ತೇನೋ ?ಅಂತೂ ರಾತ್ರಿ ಹನ್ನೊಂದಕ್ಕೆ 

ಉಪಾಧ್ಯಾಯರ  ಮನೆಗೆ ಮರಳಿದೆವು .

ಮುಂಜಾನೆ  ಹೊಟ್ಟೆ ತುಂಬಾ ಕಾಫಿ ತಿಂಡಿ ತಿಂದು ನಮ್ಮ ಅತಿಥೇಯರಿಗೆ

ವಂದಿಸಿ ಪುನಃ ನಯಾಗರಾ ದತ್ತ ತೆರಳಿದೆವು .

ಡಾ ಉಪಾಧ್ಯಾಯ ದಂಪತಿಗಳ ಜೊತೆ ಅವರ  ನಿವಾಸ ದ ಮುಂದೆ 

ನಯಾಗರಾ ವೀಕ್ಷಣೆಗೆ  ಮೆಯ್ಡ್ ಆಫ್ ಮಿಸ್ಟ್ (ಅಮೇರಿಕಾ ಬದಿಯಲ್ಲಿ )

ಎಂಬ ಯಾ೦ತ್ರಿಕ ದೋಣಿ ಯಲ್ಲಿ  ಹೋಗುವ ವ್ಯವಸ್ತೆ ಇದೆ .ಅವರೇ ಕೊಡುವ 

ನೀಲ ಬಣ್ಣದ ರೈನ್ ಕೋಟ್ ಧರಿಸಿ ದೋಣಿಯಲ್ಲಿ ನಮ್ಮನ್ನು  ಜಲಪಾತದ 

ಬುಡಕ್ಕೆ ಕೊಂಡೊಯ್ಯುವರು .ಸಮೀಪದಿಂದ ಭೋರ್ಗೆರೆದು ಬಿದ್ದು 

ರಜತ ಹನಿ ಗಳಾಗಿ ನಮ್ಮ ಮೇಲೆ  ಸಿಂಚನ ಮಾಡುವ  ದೃಶ್ಯ ಮತ್ತು 

ಅನುಭವ ರೋಚಕ .

ಕೆನಡಾ ಬದಿಯಿಂದ ಬರುವ ಯಾತ್ರಿಕರು ಕೆಂಪು ರೈನ್ ಕೋಟ್ ಧರಿಸಿರುವರು .

ಮುಂದೆ ಜಲಪಾತದ ಬಳಿಗೆ ಮೆಟ್ಟಲುಗಳ ಮೂಲಕ ಹೋಗುವ  ಕೇವ್ ಆಫ್ ವಿಂಡ್ಸ್ 

ಗೆ ಹೋದೆವು .ಇಲ್ಲಿ ನಮಗೆ ಒಂದು ಜತೆ ವಿಶೇಷ ಚಪ್ಪಲಿ ಮತ್ತು  ಹಳದಿ 

ಬಣ್ಣದ ರೈನ್ ಕೋಟ್ ಕೊಡುವರು ,ಅದನ್ನು ಧರಿಸಿ ಮಾನವ ನಿರ್ಮಿತ 

ಮೆಟ್ಟಲುಗಳ ಮೂಲಕ ಜಲಪಾತದ ಸನಿಹಕ್ಕೆ ಹೋಗಿ ನೀರ ಸಿಂಚನದ ಆನಂದ 

ಅನುಭವಿಸಿದೆವು .

ಇಷ್ಟೆಲ್ಲಾ ಆಗುವಾಗ ಮಧ್ಯಾಹ್ನ ಗಂಟೆ ಒಂದು ಆಯಿತು .ಪಂಜಾಬಿ ಹೋಟೆಲ್ 

ನಲ್ಲಿ ಭಾರತೀಯ ಬಫೆ ಊಟ ಮಾಡಿ ಪುನಃ ಕೆನಡಾ ಭಾಗಕ್ಕೆ ಹೋದೆವು .

ರಾತ್ರಿ ಕಂಡುದ್ದಕ್ಕಿಂತ ದೊಡ್ಡದಾಗಿ ಕಾಣುತ್ತಿದ್ದ ಜಲಪಾತ ದ ಬೇರೆ ಬೇರೆ 

ನೋಟವನ್ನು ಸವಿದೆವು 

ಕಣ್ಣು ತುಂಬಾ ನಯಾಗರಾ ತುಂಬಿ ಕೊಂಡು ಪುನಃ ಅಮೇರಿಕಾ ಪ್ರವೇಶಿಸಿ 

ನಮ್ಮ ಮುಂದಿನ  ತಾಣವಾದ ವಾಷಿಂಗ್ಟನ್ ಡಿ ಸಿ ಗೆ ವಿಮಾನ ಹಿಡಿಯಲು 

ಬಫೆಲೋ ನಗರದತ್ತ ತೆರಳಿದೆವು